Strikes Back-15

A thiltum hmanhmawh thlak tak avang chuan a ke ah thla a rawn invuah ta emaw tih mai turin chu mi zan la la chuan Dave-a pawh South Bend chu a thleng phei rang ngang mai a. Judge Putar chu a lehkha ziahna pindana a lo buai lai takin a va hmu a. Thawk pawh la mumal hman mang lovin Grace-i’n Bank a tlawh thu te, De Witt-a’n a lo dawnsawn dan awm anglo tak te, dahkham ṭhin anih tawh thu te, Parr-a’n a lo lambun dan leh a inpuanna te leh thildang pawimawh leh sawi awm a tih zawng zawng chanchin chu a han sawi zar zar a. Judge Pringle-a chuan a sawi zawh hma chuan ngawi rengin a lo ngaihthlak sak a.

‘De Witt-a chuan dahkham man bak dollar singthum lai a lo dil belh I tia law?'

‘Chu chu a dik e,’ tiin Dave-a chu a lo bu nghat a. ‘Grace — ah, Miss Tate-I chuan a zat dik tak chu Dollar singkhat leh sangnga a ni tih a hre-chiang a. Mahse, De Witt-a chuan lehkha pakhat a lo hmuh a. Chutah chuan a pa kut nemna chuang ngei dollar singli sangnga  a batna a awm si a ni.’

‘A nih leh De Witt-a chuan lehkha chu a kawl ngei si a maw?’

Dave-a chu a lo bu leh a. ‘Putar-a khan chutiang zat zat a puk ka ring thei lo a ni, Judge. Ranch tihphuisui nan khatiang zat zat kha a hmang lo tih ka chiang a ni’ a han ti that that a.

 ‘Keipawn ka hrechiang a lawm,’ Judge Putar chuan a lo ti ve ngal ngal a. ‘Tuna I thu min hrilh tak te khan thil dang ka hmuhchhuah hote pawh a kungkaih kual theihna a awm ta a nih chu. Hun tiam I sawi kha engtik nge kha?’

‘Brady-a chuan naktuk tuk lehah hian lilamna chu Hanging Rock khuaah neih a nih tur thu a sawi a,’ tiin Dave-a chuan chu dan hremi chu a han hrilh a.

‘Ka hrethiam e. A nih leh min hrethiam la, thil rawt duh ka nei a. Chu chu, zanin la la ah hian Slash 8 a kir leh nghal chu a ngai kher lo ti ta ila? Nang anga tlangval thaza zek zawk ka ni tawh si lova, Mr. Haynes. Tin, I landanah nangmah ngei pawh hi chawlh rih phawt I mamawh a ni. Kan tumna hmun pana kan hmanhmawh lutuk hian thil a buai zawk chang a awm ṭhin tih hi kum tam chu ka lo zir chhuak ve tawh a sin’

Chu putar chuan dam tak leh nui chunga a awka a han chhuah chuan, tih vak ngaihna hre lovin Dave-a chu ngui zetin a bu ringawt a.

 ‘I sawi dik ang, Judge, amaherawh-chu ka….’

‘Ka hria a lawm ka nau. Tlangvalte rilru puthmang leh chetdan hi chu ka hai hleinem. Mahse, chawlh hahdam phawt a ṭha. Hetah hian khawtlai ta pawh ni la, zanin atan chuan Slash 8 ah chuan eng thil thalo dang mah a thleng tawh lovang. Ka awmpui nu ka’n ko anga, I hliamte kha enkawlin tuamṭha se la. Mu hahdam phawt rawh. Naktuk khaw en veleh kan chhuak dawn nia,’ a han ti a.

Dave-a chu a lo bu leh nghat a.

‘Chuan, lungngai lutuk mah ta che,’ tiin Judge chuan a han hnem leh a. ‘De Witt-a ruahmanna kal mek chu kan chelhdin theih ka ring. Tunah chuan Coffee sa ver vawr in tawh ang aw.. ?’

Dave-a chuan chu putar ngilnei takin a lo dawnsawn dan avanga a hnuk ulh ta deuh chu a thup hram hram a.

Dave-a South Bend lama a thang hlan pawh chuan Slash 8 lam chuan tlawhtu dang an lo nei leh a. Lo thleng thar pa thlir pah chuan Dobbs-a chuan Shorty a hnenah chuan ‘Ranch chu inhmuhkhawmna hmun lun takah a lo chang ta a ni maw’ a han ti a.

‘Tehreng mai, Henglai hmuna mi tha ber ber te hi lo kal tura koh khawm an nia lawm’ awmze nei fe in a lo ti a. ‘Lal ropui Barclay-a a nih saw. Kan lo hawihhawm viau a ngai lo’ng maw?’

Gimpy-a pawh an titi boruakah chuan lo che chhuak ve in, chu an mi sawm pa chu a pheikhawk lo tem tir sak a chakzia thu sawi pahin Barclay-a lo dawngsawng tur chuan kawtah a chhuak phei ta nghal a. Chu Rancher pa lianpui chuan a lo buk khum nghut a. ‘Miss Tate-I hetah a awm em?’ tih pah chuan a hlutna chhut vel ni awm takin in leh a vel chu a han thlek kual a.

‘A zawttu a zir a niang chu’ Gimpy-a chuan a lo ti hmak a, nangma chungchang thu a nih chuan… a awm leh awm loh ka’n zawt ang e.’

Chu pa lianpui chuan an lo dawnsawn dan boruak chu a ngaih ngaihin lo ngai hlawm teh se ti rilru chungin inchhungah chuan a lut bo ta a. Kar lovah Grace-i nen chuan an rawn chhuak leh a. 'A laklawh viau na chungin kan pi chuan a hmu dawn che a nih chu hei. Ṭha te te khan aw’

Barclay-a thinrimna chu hai ruallohvin a rawn lang chhuak nghal a. A han phun sup a, ‘I khawsa zia kha fimkhur deuh rawh aw, hrep tak che chuan. Heta ka rawn awm hunah chuan….’ a tawng lai chu tu emaw a lo inrawlh buai a vangin a tawp chawt a.

‘Sawi zel rawh, Mr. Barclay,’ Grace-i chuan nem takin a lo ti a. A nem viau na a, a phena boruak danglam tak chu paliana chuan a hai lo. ‘I eng hunah maw?’

‘Engtizia nge, hmeichhe zahawm tak rawn tlawh ka tum laiin a sakechek nazawngin an duh duh a min lo tawngkhum hi ka beisei lo tih sawi ka lo tum mai a nia’ Barclay-a chuan a lo ti vat a. ‘Enteh nula, inhnial hi ka duh lo. Helai hmunah hian thil pakhat vang chauhin ka rawn kal a nia. Nangmah hmu tur chauh che in.

A han ṭawng dan vel avang chuan nula hmai chu a lo sen awp awp a. ‘Eng atan maw?’ tiin a rawn zawt leh ta khauh mai le.

Chhang lovin Barclay-a chu a sakawr aṭangin a han chhuk phawt a. A rilruah chuan zawhna a rawn lut zut zut a. He nula hi a kawlh riau dawn tlat. Chu chu a ṭhalo takzet a ni. Hun lah chu a tlem tawh si a, he ranch thunun theihna hi a neih a ngai, a nih loh chuan De Witt-a’n engkim a nei vek dawn a ni. A khawngaihna zar a zo ve tawk tawk anga, Banker chuan vanneihna zawng zawng a pumbilh vek si ang. Innei tura a sawmna khan a rilru a tibuai deuh a nih a ring a. Chu pawh nise, a dinhmun han thlirin, a remti tho maithei a sin. Bathlar panna rahka a rah lai chuan a tawngkam hman leh tur pawh a thlang uluk ta kher mai.

‘Ka tanpui theihna tur che a ka thil rawt kha’ a han ti ṭan a. ‘Ngaithla teh, Nula, ka duh che a ni tih hi thuruka neih pawh ka tum ta lo ve. Helai hmuna ka rawn len tuma ka sawi ang khan. I buaina hi ka hria a. Brady-a chuan Slash 8 mi hawisang tak tak ten vaivut an bar lai chu hmuh a chak thu a sawi nasa teh a sin. Dollar singthumin I la tlin lo tih chu a dik tiraw?’

‘Aw, ni e,’ Grace-i chuan a lo ti a, ‘chuti si, enge —’

Barclay-a chuan a kut chum buang chu a rawn phar a. ‘Min han sawi zawh tir phawt la mawle, Nula. Hei hi ka hmuh dan chu a ni. Ka hrilh tawh ang che khan I ranch leh ka ranch hi thlunzawm ta ila, helai phai ruamah hian lalram kan din thei dawn a. Kha thu kha a la dik reng a ni. Sweetwater phairuam lalnu hi I ni thei a sin. Min nei la. I leiba zawng zawng ka pe tla vek ang a, Ranch hi kan zawmkhawm ang a, I phu ang ngeiin lalnu angin ka cheibawl ang che. Enge chutah chuan sawi tur I neih le ?’

Tawngkam a thluaithlum thiam ang reng bawk a, amah ngei pawh chuan sawi tha a intiin, nula pawh chu a hneh viauin a inhria a. Amah leh amah pawh chu inlawmpui rilru taka thil a lo suangtuah kual lai chuan a ngaihtuahna kal vel chu Grace-I aw chuan a rawn pawtchat leh hmak a.

‘Anih leh lo hnial ta che ila?’

‘Khai a, Nula, thil thleng tur chu I hria a lawm. Bank chuan he hmun hi an khar sak ang che anga. Chutah, Slash 8 hi chu engti kawng pawhin ka nei dawn tho. Ranch hrim hrim hi chu ka tan engmah a ni lo. Nangmah hi ka venhim duh che chu I ni. Hanging Rock mi satliah ho hmuh laia I tlawm lai hmel hi hmuh ka duh loh vang mai a nia.

‘Dahkham zat pawisa chu ka rul thei lo ngei dawn tih I hrechiang chiah a maw? tiin Grace-i chuan hriam hrakin a rawn zawt leh a.

‘Grace, Nula, he phairuamah hian ka lian ber a. Helai mel sawmnga bial chhunga miten Bank-a an pawisa dah zawng zawng dollar nga chenin ka hre vek a ni. Chu chuan sumdawng mi lian ka ni tih a entir a. Barclay-a hi a ṭhang lian zel a nih hi.’ a han ti a. Chu nula rilru chu hneh ngei tawh turah a inngai a. A hneh ngei pawh a ngai a ni. Slash 8 hi lilam a nih loh na tura a mah a pawimawh zia leh venhim tuma a theihtawp a chhuah reng zia  chu nula hnenah chuan hriattir a tumna te pawh  niin a lang a. Nula pawh hian engti zawng pawhin ṭawngkam han nei ve mah se, ranch hi a neihsak dawn tho tho tih a rin tir a ngai bawk a (a bak chu hre tawh vak lo mah se). Diktak chuan Box B neitu pawh hi a ni chiah lova, ni awm takin a awm vel ve mai mai a. Chu erawh chuan Barclay-a chu a tibuai therte lo.

Chutih lai chuan Grace-i chu a rilru a chu pa hmelchhe lutuk tawng hluam hluam mai a tenna lo sosang zel thup tum chuan theihtawp a lo chhuah a. Zawhna dang a han zawt leh a.

‘Innei tur chuan min enkawltu (Gurdian) phalna te pawh ka neih ngei a ngai dawn lawm ni?’ 

‘Khai a, chu zawng a palzam theih a lawm,’ tiin Barclay-a chu a han nui sung a. ‘A rukin kan innei ang a, a hnuah kan puangzar leh mai dawn alawm. Chutiang chuan Green-a hian tihchhiat che a tum tho a. A rukin ka lo venghim dawn che a alawm.’

‘A pawi ka ti khawp mai, hun min pe leh deuh tur a ni’ Grace-I chuan a lo ti a. Chu a thusawi Barclay-a’n a lo dawnsawn dan, a thinrimna rawn so chhuak avanga a mit hnuai lam atanga a chal thlenga thisen zam rawn pawng tawlh tawlh te chu a lo thlir reng a.

‘Nula, mi nghak chi ka ni lo ka tih tawh kha,’ Barclay-a chuan a ti ta khur khur mai a. ‘Naktukah hian he hmun hi hralh a ni dawn a. I thil neih te hi vawn him zel I duh a nih chuan, vawin ah hian min nei rawh. Duh thlan tur I ngah lo teh a nia.’

‘I tidik a lawm, Mr. Barclay,’ Grace-I chuan a lo ti a, a rawn dingdihlip a. Ani chuan angaihna hrelo deuhin a lo en a. Chutah, ‘Ka mualpho dawn anih rau rau chuan mi pakhat lakah ni lovin mipui vantlanga hmuha mualpho ka thlang e. Mi dawthei, bumhmang leh dan bawhchhetu neih ai chuan mipui vantlangah min lilam mai zawk rawh se. Chu chu ka hmuh dan dik tak che a ni. Tunah, Ranch I chhuahsan theih chuan ka lawm ngawt ang’ a ti ta khawl mai a. 

Barclay-a chu ṭekin a deng ta emaw tih mai turin a zuang ṭawk a. A chal chu a chuar nûng a. A kut te chu hum ruhin a han tipharh leh a. ‘Nula, I dam chhunga I thil tih sual lian ber chu I ti ta. I lakah hian ngilneih ka lo tum tehreng nen. Ka ṭanpui I duhlo bawk a, hremhmunah kan inhmu dawn nia. Naktukah chuan keimah ngeiin heta tang hian ka paih chhuak ang che’ a han ti a.

‘Chu chu naktuk thil a nia vawiin chu a dang leh daih’ tiin aw ro zetin a rawn chhang a.

‘Man rawh u, naute u!’ a rawn sawitu chu Gimpy-a a lo ni a. A hnunga a naute ho lo awmkhawm sa te chuan a banah chuan rawn manin an ṭham nghal nawk nawk a. Kawt zawla Dobbs-a’n a sakawr nena a lo nghah reng na lamah chuan uṭawk reh takin an rek phei ta nawk nawk mai a. 

Gimpy-a chuan a silai chu a han phawi a. A naute ho chu thlah turin a han ti a. ‘Hrep tak cheu hian. He thil avang hian hremhmunah ka tir liam vek ang che u!’ tiin Barclay-a chu a te tuar tuar a.

‘Hremhmunah kan hmuh che chuan Paradise-ah sawn tur chein kan lo dil dawn nia’ then sak chungin Gimpy-a chuan a lo ti a. Barclay-a sakawr dul hnuaiah chuan a han hmetpuak thuai a. Sakawr chu a zuang zawk a. Barclay-a chu a lo la chuang fel hman si lova, a vawn a pelh phat phat a. Lui lama kawngṭumah chuan chak zetin a sakawr nen chuan an bu liam ta a. Gimpy-a chu in lam pan chuan a pen phei charh charh a.

‘A kal ta e, Ka pi. A tumdan aia rangin a nih ka ring,’ tih pahin a han then sak a.

Grace-I hmel chu a thutak hle a. ‘Ka thil sawi avang khan min ngaidam ngai tawh lo vang. David-a chuan min pui thei tur thil enge maw tal han hmuchhuak se tih hi ka tawngtaina a ni. Green-a chungah pawh chuan eng thil tak chu thleng ang maw?