Strikes Back 1

‘Kir rawh.. Pu a..., a nih loh chuan i lubur kha ka thlawh a ni mai!’

                  A sawitupa chu naupang chhe tawh lo tak a nih avangin a aw chu tlemin a khur deuh lek lek a.... Hlau hmel erawh a pu teh chiam lo. Chawhnu her tawh lam nisa hnuaiah chuan a sam var leh Sakawr chungchuang pa vau nana tin reng tu a elhbun phir  ngul tle rang chu a langsar hle a.. Silai hmawr hmachhawn tupa chu, a khel tawn tawna a pai revolver fual hnelh hnawlh bakah a thawmhnaw in bel thar tawh lo tak, mahse felfai angreng tak si avang chuan Cowboy naran mai chu a ni lo tih a hriat hran nghal hliah hliah a..

                  'Zawi muang khan aw, ka Pu,’ banphar pah chuan a han ti a. A awki chu a hniamin a zawi raih a. Hlauhthawnna erawh a tel lem lo.  ‘I hahchhiau palh hlauh anga ka hriselna hian a tuar ange aw?’

                 'Chutiang pawh chuan ka ti maithei,’ tiin Putar chuan a lo pawtchat leh hmak a. ‘Kir rawh!’

                  'Ka sakawr hi tui intir hmasa ila.... ?'

                  ‘Khanglang tak a che’ han tih nawn leh pah chuan a thusawi nemngheh nan Putar chuan a elhbun chu, chibai buk nan ti niawm takin, a han lek rem sauh a.. ‘I pu  Barclay-a hnenah chuan bawkvakin kir leh la..  puitling hna thawk turin naupang mai mai rawn tir tawh lovin, a lehpekah chuan amah ngei rawn kal turin hrilh ang che’

                Chu Cowboy sang thlerh thlawrh chuan a dar san ak pahin. ‘Hm.. a tihzia hlauh e,’ Awka pangngai takin a han ti leh bauh a. 'Barclay tia an koh thin mihring hi ka hre ngai miah lo ti ila thil sual lutuk chu a ni lo'ng chu maw ?' 

               'Teuhlo mai. Ka kum hi a tam tawh a ni maithei, mahse, mi a nileng chu ka la ni bik lo a nia.’

               Putar chu reilote a han tim deuh a. ‘Barclay-an ka naute ramvah hlan chuhin min tibuai turin a rawn tir che a ni lawm ni ?’

               'Enteh, Pu a, ka hrilh leh a che.. Barclay tih hmingpu hrim hrim hi ka hre ngailo reng reng.’

               'I chiang maw. A nih chuan Sheba Lalnu ka ni ta ve ang,’ tiin Putar chuan a lo pawtchat leh hmak a.

                'Keimah chauh emaw tia man min tum mai chuan i tawlhthlu ngei ang mawle, Silai a eizawng pa. Kawngka chung dinglama tukverh pahnihna khi han thlir kual vel mah teh.’

                Chu cowboy mit chuan tukverh vel chu a han melh kual thuak a, a mitvar leh chak tak chuan Putarin a sawina lai tukverh a rifle ngul tle zauh chu a hmu nghal ta mai reng a.

               ‘Kan Chawchhum,’  rancher chuan a lo ti vat a. ‘Ei siam thiam tak a nia. Silai kah lam hi a misa zawk mah a nia. A nilo zawnga ke i chheh sual vaih chuan pen hnih khatah mitthi i ni mai. E khai.. chutiang tum lui talh tur chuan at i so zui beisei ila.... chutiang chu a ni lo maithei bawk a' a han ti zui zat a.

               'Ni love ka lawm e,’ then sak chungin chu cowboy sang zeihzawih chuan a lo ti vat a. ‘Tuemaw chuan i tawmkukah hian rawn chawhbuai che an chak hle tih ka chiang ta khawp mai'

‘I pu sual kherek lutuk Barclay khan a duh apiang a lak vek hma loh chuan  min tawp san dawn lo tih ka hrechiang a, mahse, mi tihṭhaih chu sawi loh, a sakawr nen ka hnawtbo ta chu a nih kha. Zun cheh rual lek  I nih lai aṭang khan he ramah hian ka awm tawh a. Rawn kal thar naupang ṭhangduang satliahin min vau avanga chhuak mai mai chi ka ni lo. Tunah’ tih pahin elhbun chu a han vilik leh zoh a. ‘Awmze nei lovin kan tlak ta duah a. I boss hnenah chuan meikhup chungin kal ta la chinchang chu va hrilh tawh rawh le.’

Cowboy chu a han thaw leh halh a. A hmel aṭang chuan a dawhtheihna in a tlin lo ṭep tawh niin a lang a. ‘Enteh.. . vawi khat leh…Ka hming chu James Green a ni. Chhinchhiahna pawh ka Sakawrah hian I hmu thei ang.. Chuan.. Texas lam mi ka ni e. Ka hun tam zawk chu ka lukhumin a khuh phak chinah hian ka khawsa ber a. Tunah hi chuan Santa Fe lam kawng zawhin ka rawn tei kual a nih hi. I tuite hi hman I phal takin tiin ka rawn ding zawk a ni e. Barclay tia an koh ṭhin mihring hi ka hre ngai lova. Tin, I han titi dan atang khan hriatchian lehzual chakna pawh ka nei ta lo khawp mai. Tuihal dang char viau mah ila… I kawtkai thlenga luhchilh che a, kawngka kika thawm riva rawn siam a, rawn tihbuai che hi ka tum hran lo’

Putar chuan chu Cobwboy sam dum hlap mai chu rei ngial a han thleng vung vung a. A han en hniam leh hret a, a kawng bawra puakruk fual hnalh maia inthiat varh mai lamah chuan a mit chu a fu leh ta zel a.  A kawm hlui tawh lam mah se, a hnum em em mai te chuan a neitu chanchin tam tak a tarlang thei awm e. 

Chutiang endikna ngeiawm angreng tak chu Cowboy pawh chuan pangngai takin a lo chhawn ve mai a. Ngaihdan siam fel ta niawm takin Putar chu a han bu leh nghat a. A elbun cheng kau chu sût pahin leilam hawi zawngin a lek nghal a. In lama inher hret pah chuan -

‘Chawchhum pa, I silai kha dah la, kan nau atan hian in tur han buatsaih teh le. Kan lo rin dan angin Barclay-a zu dawr hrik mai mai chu a nih loh hmel riau mai’. Cowboy lam chu rawn hawi lehin, nui chungin a ban chu a rawn phar chhuak a, ‘George Tate ka ni e. Helai hmunhma Slash 8 neitu hi. Thlamuang takin i Sakawr chu tui pe rawh, Mr. Green’

  ‘In dawnsawn dan pangngai tak chu a nih kha,’ ngaisang angreng taka tih pahin, nui var var chungin chu Cowboy chu Sakawr aṭang chuan a lo chhuk a. ‘Jim’ tih hian a awlsam lehzual a sin’.

Pa pahnihte chu khunkhan takin chibai an inbuk ta a. ‘Coffee No han dawm pawh chu a nuam ka ti khawp ang chu’, ngaihngam taka nuih pahin a han ti a. ‘Kan in tawksirna lamah leh thil dang dang vangin  hrawk te pawh a ro hulh hman a lawm le’ 

George Tate-a chu a han chek hluk a, hma hruaiin In lam chu a pan ta a. A sakawr zin te a han phelh thawl a, a duhtawka tui in tura a chhuah hnuah Green-a pawh chuan a rawn zui ve ta bawk a.

Inkawmkhawmna pindan zau angreng tak, lunga siam thuk/meichhemna langsar taka lo awm lurh mai leh chhuat a Sakeibaknei engemaw zat vun kahparh awmna ah chuan ṭhuthmun an han rem ta a. In chhungkhur bungrua chu a mawlmangin a bawnra ang reng a.  Hai ruallohin parawl khawsakna a ni tih hi a hriat hliah hliah a.

Green-a chuan amah lo mikhual tupa dinhmun tur  awm ang chu a chhut ru neuh neuh a. Tate-a chu nupui sunna rei tawh tak, kum tam tak chhung mahni  ke a lo ding tawh niin a ring a. Chu tlangval ngaihtuahna  hria niawm tak chuan Tate-a chuan urhsun takin, ‘Kan nu thihna chu a rei tawh mai.  Jim- Apaches ho an nia….’ Chu thumal pakhat leh a sawi chhuah dan chu Green atan chuan a tawk em emin, a rilru tur pawh a hrethiam nghal vek a. He ram hi thisena nemngheh niin, chu Putar chuan tlanchhiat san ai chuan a thihchilh ngei ang tih pawh a hrechiang hle a ni.

Khuavang kallai chu pate lam, hmai zur deuh, hang lam leh a kum zat tur awm ang rin thiam harsa tak lo lut mek chuan, a rawn pawtchat ta a. Fiamthu deuha chu Cowboy han chik kual vel pah chuan, ‘Pawna I thut laia I han phar kual zawr zawr lo kha chu a lawmawm ka ti khawp mai’ tiin a habal eng ṭhut mai lang chuan a han ṭhen sak a.. ‘Kan chaih dangchar ta vak che a.. ngaih loh lamah I ngai em lo’ng  chu. King-a mi leh sa I ni lo tih ka han chian tak hnu kha chuan a nuam ka ti ta vak lo a’ a han ti zui leh a.

Green-a hmelah chuan zawhna a awm avangin a thlenin pa chuan a lo hrilhfiah a, ‘Tupawhin Zack Barclay-a chu King tiin an ko a lawm. A chhan pawh he phairuam vel lal nih hi a chuh deuh a. 4-Flusher a nia’. 

‘Min lo dawnsawn dan ngaihtuahin I chekin a mil mang lo a ni maw’ Green-a chuan a lo ti leh bauh a. ‘A chungchang chu min hrilh hreh lem lovang chu maw?’

  ‘Pa lianpui, bawngkawlh sual rual zet,  Gambler hausa tak anga inthuam. Kum hnih kalta vel a rawn lang hlawl a ni a. Buaina chauh lo chu engmah nei lo. Mi kuta rulkaw zen ching a ni tih ka hming chhalin ka sawi e.’

‘Eng buaina maw?’ Green-a chuan a han ti a.

‘Buaina awm thei ang zawng zawng hi a ni tawp mai, Jim,’ tih pah chuan Cook-in a rawn pek Coffee no chu a han dah thla thuai a. A kuaite hlui lam tawh chu a ṭan ta nghal a.

‘A zawng zawng chu a ni lo a ni mahna. Mahse bawngruk te, inthahna te kan tawk chamchi mai chu a nih hi. Tin, Misual pawl hlawmkhawm ho pawh hi’,

‘A chinchhuakin thil I sawi ni chuan I inngai maithei a’, boss,’ 

‘I thusawi dan teh nuai kha a hrethiam ziktluak lo vang à,' chawchhum pa chuan a lo ti ve bauh a.

Putar chuan lungni lo lek lek hian a chawchhumpa chu a han melh a, ani lah chu a lo nui ṭhaw a. ‘Takzet che hian.. chawchhum pa chuh’ tih pahin a thinur tireh turin a han chek zui hluk a. ‘I tisual hle a nih loh chuan… hetiang deuh hi a ni.'

'Jim Barclay-a chu kum hnih kalta vel atang khan a rawn in bengbel ve a. Mahni inngai pawimawh thiam tak leh mahni hmakhua hre tak a ni a. United States pawisa chherna ah chanvo neiin, Old Casey-a hmun rauhsan tawh leh a thil neih dangte  a lei chhawng a. Ranch te din thar lehin ram humhalh lamah ṭan a la thar leh a. Mi rura tak tak a kawikhawm a, an tlem rem rawm nain an turu teh a nia. Chung ho zawng zawng chunga leng mihring chu Foreman atan a la hmang zui. Barclay-a hian hriau chungchang ka hriat tluk pawh hian Bawng enkawl dan hi a hre lo tih ka chiang a. Mahse, engemaw tum mumal tak erawh a nei niin a lang si. An mi tihṭhaihna te hian ka hnar pawh a tiza tham love.

‘

-Sudden Strikes Back chhunzawm zelna chu chu tlema thui deuh ka rawn dah leh e....

 

Bawng ruk chungchang te kha han hrilh ve teh’, Chawchhum pa chuan a lo ti leh bauh a.

‘Inchhung sekrek khawih tur a awm tawh lo mi?’ Tate chuan a ti nghut a. ‘Kan titi chho mek a nih hi, I rawn sawi takah chuan, taka, khawnge kan sawi chin kha..  ni tak e…Barclay-a rawn thlen achin thla hnih thum hnuah, keini ho — Kei leh thenawm vela inbengbel ve  ho — chuan Bawng kan hloh zeuh zeuh ta a. ngaihmawh hluai tham si loh .. sawm emaw sawmhnih vel lek lek mawle. Tunah chuan sawmnga velah a chho tawh maithei. Mahse, che nghelnghet tawh deuh ho chu a la tibuai vak chuang lova. Chutah, Hanging Rock – chu chu heta tanga khaw hnai ber – ah chuan chhim lam tlangdung tawpa Thunder Mesa bulthut velah suamhmang pawl mumal tak – Shadders - an tih hovin awmhmun an khuar tih thuthang a lengvel ta a. ‘Shadows  I tia law?’ Green-a chuan hmel thutak angeng takin a lo ti zauh a. ‘Chutiang suamhmang pawl hming chu an sawi awm ka hre ngai miah lo?

‘Kei pawh,’ tih pah chuan Tate-a chu a titi chho zel a. ‘Bawm ak thu mai mai ah ngaiin ka lo bengkhawn lem lova. Apache thenkhat bawngsa duhin tlema zawng an lo talh mai mai niah ka ngai a.’

‘Thuthang lengvel mai mai chu a nih loh hmel si ka ti’ Green-a chuan a lo ti leh a.

‘I ring suallo a nih ka ring,’ tih pah chuan chu rancher putar chuan a rawn thlek zawk a. ‘Hun a han kal leh hlek a. Awmze nei takin chet an thawh chho ta a. A mal malin Ranch tenau deuh ho an khawih tan ta a, Bawng hralh tur an tlachham chho va. Bawng hralh tur a awm loh chuan sum lama tlakchhiat a ni mai a. Sum lama tlakchhiat chuan Bank lamah ba rulh theih a ni ta lova. Chutiang dinhmun a lo thlen takah chuan Bank lamin an rauhsak ta mai ṭhin a ni. Kawng dang ngaihtuah tih lam I sawi hmain ka han hrilh tlang law law ang che. Barclay-an lawm takin a lo leisak hmiah hmiah mai a ni.’

‘Hm.. thil diklo engmah a awm bawk si lova,’ tih pahin Greena chuan a han chhut vang vang a, ‘Barclay-a thil ruahmanna a ni tih tichiangtu engmah a awm thei bawk lovang maw.’

‘Tehreng nang,’ uar zetin putar chuan a lo ti a. ‘Ngawi tak rawh.. ka han lipse mek a lawm. Chuan, hun engemaw chen hnuah Barclay-a chuan helai phairuamah ram chhete a rawn nei ve tih te ka han hre chho a. Helai phairuam, I rawn luhna kawnga loh theih loha I rawn kan tak, Sweetwater Lui hmar lam femah khan a nia.

Green-a chu a lo bu nghat a. A hma ni khan Lui kuang zau angreng tak thuk lutuk lo chu a rawn kan ngei a. Tlang bulṭhut a Bawng tla ni awm tak dum pheuh pheuh a hmuh ho te tan kha chuan nunkhaw chhuah nan a pawimawh tur zia pawh a ngaihtuah let leh neuh neuh a.

‘Barclay-a chu khuaah vawikhat chu ka hmu a,’ tiin Tate-a chuan a han hrilh leh a. ‘thil nihphung pawh a chinchhuakin ka hrilh dap a. Chessy a zawhte rualho ang maiin a nui ringawt a, “Tate, helaiah hian ram neih, lei leh hralh chungchangah dan mumal engmah a awm loh hi. Chuvangin, nipui a lo thawk leh meuh chuan helai ruam hi engti kawng zawng pawhin ka nei vek dawn hrim hrim” tiin min chhang a. Kei lah chuan ka ruang chungah chauh lo chuan ka ram chu a neih loh tur thuin ka chhang ve hmak a. Min phum nghal mai tum niawm taka min melh run run pah chuan, “Chutiang thleng thleng a thui kal chu a ṭul I ti lovang tih ka chiang,” a han ti a.

‘Dawrtu hawihhawm leh duhawm tak a nih dawn chu,’ Green-a chuan a lo ti leh sap a.

‘Duhawm tak mawle? Thlaler rul ang mai a vawt raih mai, a tûr erawh a let li vel laia hlauhawm ni si a ni..’

‘Sheriff te pawh in pun ve bawk lawm ni?’ tiin Cowboy chuan a lo zawt leh a.

‘Keini chuan ni lo ve—Barclay-a erawh chuan a nei,’ tiin awmze nei zetin a lo chhang leh a. ‘Uar lua ah chuan min ngai lo la, siamtu hian beng leh hnarte a lo pe ve hi a tihsual lian ber pawl a nih ka ring. Bawng ruk chungchangah hian a bul tumtu chu Barclay-a hi a ni tih pawh lo finfiah theih ta tehreng ila – thil theih a ni miah lo na chungin, Brady-a hi chu Barclay-a mi leh sa diktak, a tih dan ang ang a thle kual vel a ni khawp a lawm. Midang ho zawng lah hi Shadders nena inkungkaih vek an lo ni bawk si”

  ‘Midang ho I tih te chu…. ?’

‘Khaih.., ka hrilh mek che hi: lo nghakhlel lutuk lo la, zawimuangin le.. Hnawhchhuah tur chi ho an han thliar fel hnuah chuan  — chhan eng eng emaw vangin — an ramte an hralh a, an kalbo ta pheuh pheuh va, chutah… a invalh lian leh ngelnghet deuh hovin, inleng duhawm an nei leh ṭan ta a.’

‘Shadows ho chu maw ?’

‘Ni hlawm e mawle. Chutichuan, tumahin helam zawnga tawngkam tuitam hi an duh lo khawp mai a. Ka sawi theih chinah chuan, hmaituam mi pahnih pathum vel te’n thim hlimah mi ranch tlawhin, a neitute an ko chhuak a, an titipui zawk a. Hmun hrang hrangah an hmuh dan a danglam lo viau. Meng rum tak tak leh in ralthuam ther fup mai an ni tlangpui a ni awm e. Tualthat tura rawih theih te pawh an ni mahna. Tom Sheppard-a kha an biak hmasak ber chu a ni awm e. A insuan chhuak rang khawp mai a. Eng dang sawi lovin a intel mawlh mawlh a, a hmunhma Bank-ah hralhin a phe chhuak dawr dawr mai mawle. 

‘A lehlamah Barclay-a chuan Bank aṭangin ram chu a lo lei ve mial mial zel anga tiraw,’ nuihzat deuh tak chungin Green a chuan a lo ti a.

‘I sawi ang chu a nih hmel riau,’ lungrualpui tih hriat zetin Tate-a chuan a lo ti a. ‘A dawt lehah Harry Carpenter-a kha an han tawksir leh a.  A ngaite bawkin. A remchan dan angin Box 40 chu a hralh a. Wagon-ah a nupui fanaute a khung sawk sawk a, an bungraw neih ang ang nen an inphur liam leh ta chu a nih kha.’

‘Chhuanlam leh thil sawifiah mumal erawh a nei lovang tiraw.’

‘A ka a ang chhin lo hrim hrim,’ Tate chuan a lo ti leh a. ‘Thil awmdan erawh a hriat ruak tho mai.’

‘Insuan chhuak rawh … a nih loh chuan….. tih vel a nih ka ring’

‘Chu chiah chu mawle. Tichuan an kal thui zel a. Kar engemaw zat liamta ah khan, Diamond S neitu Jess Stackpole-a  lam an hawi leh ta a. Helai mual dung letliam chiah heta tanga mel hnih khat vel a hla hi a nia - zanah tlawhtu a nei a. Be turin silai vilik chungin a chhuak teh ngawt a. A tisual ta a ni. Ama kawtkaiah ngei an thal der a nih kha. A nupui fanaute hmuh lai ngeiin mawle. Brady-a chu a rawn kal a, engmah hmuhchhuah nei si lovin, In leh a velah chuan chhimtir ar chuk ang maiin a rawn chiau hlut ringawt a. San Antone khawlai atangin Texas ram pum pawh hmuh ṭhelh thei a mawi a ni.’

‘Nang enge I dinhmun chiah ni ve ta le?’

‘Nia, I hriat angin, Jim, Stackpole-a hmunhma an suasam aṭang khan kan inveng ru ta reng mai a nih hi. Barclay a’n chulai hmun chu a lei ta ngei a, tichuan helai phairuam a Barclay-an a lei loh awm chhun chu ka hmunhma hi a ni ta a nih chu’  

‘Chuvang chiah chu a ni maw sawt bo rang tura min lo vau.’

‘Tehreng mai, Nau a, huatthu ah I la em lo’ng chu maw. Ka lo hresa bik si lo che a .... ’

‘Khai, thupha chawi a ngai love,’ Green-a chuan a lo ti vat a. ‘Stackpole ang mai maia chetsual I duh si loh chuan I tihawm tak a ni e.’

Chu Rancher putar hmel chu a lo hnim ta ruih a. A ngawi zui ta vang vang a. Chawchhum chu rawn thawh pahin a khuh kharh a, Coffee no ruak chu a khawm ta a. Boruak chawh zangkhai nan Green-a chuan Coffee an siamsak te chu a han fak luam a.  Chu Chawchhum putar hmai zur tawh tak chuan nui hmel a rawn pu a. Tate-a hmel ngui tak pawh a rawn ziaawm ve ta deuh a.  ‘I sawi dik a ni, Jim,’ a han ti bauh a. ‘Ka eisiam pa hi chu a thawk ropui ṭhin teh a nia.’ .

‘Coffee tui tak hi chu tawn fuh mai mai har deuh asin,’ ṭawmpui tak chungin Cowboy chuan a lo ti ve leh a. ‘Engtin nge I sawngbawl thiam bik le?’

Chawchhum pa chuan nui var var chungin a han chhang ve leh a, ‘Nia, Jim, Coffee tui deuh te chu siam a har hran hlei nem. A lumtui dan te chu... Tui han chhuang so phawt la. Coffee tak ngen ngawn in I han thlak ang a. I han chhuang leh deuh ang a, Coffee bawk chu I telh leh ang a. I han so tir leh bawrh bawrh ang a, coffee bawk chu I thlak leh ang a. a hnuhnung berah sakawr pheikhawk I han thlak leh ang a. A lan lap lap theih chuan a in theih tawh tihna a ni mai.’

‘Kei pawh Arbuckles-ah kha chuan min hrilh ve tawh tak kha mawle,’ tiin, a hriat ṭhan em em, khaw thlang rama coffee lum thiam ber nia a lo ngaih thin a chawchhum pa tihchhan deuh tak chung chuan Tate-a chu a lo inrawlh ve a. Lunga siam thuka a kuaite vap khawng thla pah chuan a rawn dingchhuak a, Kawt lam ân tukverh chu a pan phei ta a. Zanriah chhum hun tlai tawh lamah chuan thing hlim te chu sei pui pui a lo ni tawh a; kawt zawlah ah chuan in leh a vela thing sang pui pui hlim te chu a in kal thelh sung a. ‘Kan naute ho riva a va la awm lo ve mawle,’ tih pah chuan a phun deuh bul bul a.

‘Mi engzatnge I chawr a?’ tiin Green-a chuan a han zawt a..

‘Panga chiah,’ tiin putar chuan a lo chhang a. ‘Pariat an ni thin a, an bang ṭhen tawh. Ka thiam lo hran lo. Buaina a inmung chho ṭan niin an hria a, an ngeih vak lo a niang. Tlem chuan kan buai deuh sawt na in, kan khawsa ve naw naw thei e.’

Chawchhumpa chuan kawngka lama hawi pahin Apple chhang ka’n siam ange. Zanriah pawh min kilpui nghal law law ka ring deuh a, Jim?’

‘Khai a, ka lo sawm theihnghilh ṭep che alawm le, Jim,’ tih pahin Tate-a chuan a khel a han beng a. ‘I khaw muang deuh phawt ang chu, Tlangval. Kan lo dawnsawn dan che pawh kha a duhawm vak si lova !’

Chawchhumpa chuan insawm thluk lam chu Putar kutah dahin, Green-a pawh chuan apple pie tharlam tak han hrawkhrui  leh chu a hreh loh zawng tak a lo ni ve bawk a. Putar chu bathlarah chuan rawn chhuakin Cowboy riahbuk leh sakawr in te chu a han kawk kual vel a. 

‘Va kal la, va in ṭhetdarh rawh, Sakawr te pawh kha. Kan titi dun leh dawn nia. I chak emaw chak lo emaw zanin chu riak ve ang che.  I hnial lem lo tih a lang reng a lawm kha!’ tih pah chuan Ranch neitu putar chuan Green-a darah chuan an beng thap thap a, Sakawrin lama chu Cowboy in a sakawr dum lianpui a hruai phei lai chuan inah a luhsan leh ta a.

‘Kan pu Barclay chu mi tha teh chiam chu a ni lo niin a lang, Nig,’ tiin, a saddle phelh pahin chu ransa lianpui chu a be mawlh mawlh a. A tuang hmul te chu a han zut sak thuak thuak a. ‘Kha putar khan a tawn tur ang ang chu a su chho tan niin a lang a, mahse atan chuan a phur hi a rit mah mah a ni’.

Green-a chuan Barclay-a leh a hote hmalak dan chu han chhut kual leh neuh neuh pah chuan a sakawr chu a tih ṭhin dan pangngai ang leh a kaida diktak chuan a mamawh tur ang te a han tihsak zung zung a. Thil thleng fo tawh ṭhin angin, Barclay-a, mi lian leh thiltithei tak chuan sum leh mihring hmangin, helai ram vela lo awm hmasa ho, a aia te zawkte a hnawtchhuak mek a. Rancher tenau te te, dan chêp leh midang tanpuina ngen duhlo tlawmngai laklawh ho tan chuan chutiang silaia eizawng ho, hmun dang atanga lo lut leh indawrna pangngai a theih lova tharum thawh mai ṭhin te chu, an u mah mah a ni. Mahse … a hmel zawiawi raih mai chu a rawn ner chhuak sawk a. 

‘Engvang chuan helai ram zawng zawng chu duh kher chu ni maw, 'Night?’ A sakawr Night-a chuan a hminga koh chu a lo chhawn let ve a. ‘Lui pawh duhtawkin a pawh thei a, ran tlatna hmun lah hman tangkai sen loh a nei a … a la duh belh zelna chhan tur ka ngaihtuah hian min tibuai angreng hle mai. Pianken ve renga mi phakar leh duham hi an awm ṭhin a. Chutiang mi chu an inthup rei thei tak tak lo’. 

Tuemaw thlirtu chu lo awm se, kawng hrang hranga ngaihtuahna a hman pah chuan, Green-a chuan a  thil tih lai chu a chawl leh dat thin tih an hmu thei ang. A lu a thing nar nar a, a thil tih lai mek chu a han chhunzawm leh a. ‘A awm ang lo hle mai, tiraw… Night’ tiin a sakawr chu a be mawlh mawlh a. ‘ Thil ni thei awm chu…. Barclay-a hian Shadows ho chu a chhawr emaw, Shadows ho hian an chawr emaw a nih hmel.’

Midnight-a chuan a pu ban chu a lo seh fiam ve thuak thuak a. ‘Lo kiang lawk teh, a nih loh chuan sakawr dang nen ka thleng daih mai tur  che a nia,’ tih pahin Cowboy chu a han then a. ‘Tangkaina hi I nei tam lo mang e.’

(Sudden-a sakawr hming kha Nigger-a ni lovin Midnight-a tiin a inziak tlat mai he thawnthuah hi chuan !! – MH)

Chutihlai tak chuan, sakawr engemaw zat rawn kal thawm ri chu kawt lam an kawngka inhawng aṭanga a hriat rualin a inralring vat a; Mahse, Tate-a naute ho ramchhuak rawn hawn thawm te pawh an nih takin tiin a han inthlahdul leh deuh a. Tukverh lam a han thlek phei chuan sakawr chung chuang pali ranch bathlar hma a inkhuangrual mang lova an ding chu a hmu a. Thawm nei miah lovin Green-a chu tukverh aṭang chuan a tawlh kir vat a. Khaw thim tur la eng deuh ruau hnuaiah chuan silai phawisa veka an awm danah heng mite  hi an lamṭang zawng an ni lo tih a hriat hle a ni.

Pawn lamah  chuan, chung mi pali te zinga hotu ber chuan thûm leh ṭêng chhuai mai hian, ‘Tate, Lo chhuak rawh, choak tar pa!’ a rawn ti ta.

Reilote a reh vang vang a, putar chu a lo chhuak ta a, Sakawr chunga ṭhu mêk, amah hmachhawntu pali te lamah chuan Green-a vau nana a hman ngai bawk ulbun chu a han villik leh a. ‘Choak tar pa I tia law ?’ a rawn ti chhum hmuk a. 'Tunge he hmunah hian rawn tir reng reng che u a, kareh zau ho?’ 

An hotupa tawng leh hma chuan, Tate-a chuan a han chhunzwm leh zat a, ‘Min hrilh duh suh u.. ka’n ring chhin teh ang. In pu Barclay-a chuan a rawn tir che u a ni. In lo thleng tawh bawk a, a tha e.. ti khan kir leh ngal rawh u. In rawn kal chhan chu engpawh nise, a chhanna chu  - aih - tih a ni e.’

Green-a chu a lo nui sak a; Tate putara chu a dinhmun en ang ngawta zuam chi ni dawnin a hre lo va. Kawt lam chiang taka lan theihna, sakawr in sir lehlama turkverh, atang chuan an chet lak zel dan chu a lo thlir ve reng a.

An hotupa chu a rawn chhuk a. Palian tak niin, chutih hunlai vela ranch a chetla ṭhin ho thawmhnaw inbel tlangpui ang  chi hi a inbel a. Tate-a lam a pan lai chuan midang pathumte pawh an rawn chhuk ve nghal a, Tate-a tana tinkual vek harsa thei tur ang ber zawngin an hotupa hnungah chuan an inzar pharh ta a. 

Paliana chu a rawn tawng leh a,  ‘Tate-a, min hnar hmain, ka rawtna hi I ngaihthlak a ṭha zawk ang’

‘Ka chhawrbawk duh tur thil rawtna I nei hrep lovang e,’ hnar tum dawt pahin  Tate-a chuan a lo ti a. ‘Chuan — ka dawhtheihna in a tlin loh hma hian —’

‘—I thih leh dam thuhla a ni e,’ tiin paliana chuan a lo pawhchah sak a, Tate-a hmel puthmang chu a lo danglam ta hle a, a riat chhuak nawk nawk a.

‘I eng.. a?’ a aw ah chuan awih harsa a ti tih a hriat mai a.

‘I hriat ang kha a ni mai, Tate,’ tih pahin paliana chu a han nui a. Tate-a awih lo lutuk hmel chu a hlau hmelah ngaiin a aw ah chuan nuam a ti tih a hriat hle a.. ‘Shadows ho hnen atangin thuchah ka rawn thlen e — He phai ruam atang hian chhuak rawh, rang takin. Heng lai vel boruak hi I hriselna atan a tha lo. I awm reng chuan — I la thih phah mai ang.’

‘A ni maw, hrep tak che u hian, Pawne Indian ho tluk chauh pawhin min tihlau lem love,’ tiin George Tate putara chu a han inhrosa ve a, thinrim takin a au ṭhawt a. ‘In sakawrah khan lawnin kir leh ta ula, in lalpa Barclay-a hnenah chuan i thuchah rawn ken chu hawn leh ta la. Ka hmunhma ka chhuahsan hmain hremhmunah kan in hmuh tur thu in lo hrilh dawn nia. Tin, I hnunga I thiante pawh kha hrilh la, an ke chheh kha inchi khat pawhin sawn tawh suh se, a nih loh chuan a khampheiin a nia in hawn dawn ni. He ka laipui hi ka lek  satliah lo ṭep tawh a nia. A chhunga awmte pawh hian rawn chhuah hlan an nghakhlel tawh teh mai a nia.’

‘I luhlul ang reng hle mai a, tiraw?’ tiin ti-el deuh takin mi pali te zinga an hruaitu deuh ber chu a rawn ṭawng chhuak leh a. I fiamthu thawh vel lo puibawm tu tur che tuemaw chu I hnung lam inchhungah khan an tawm reng tih te chu tlang hriat a lawm.’ 

Thlamuang leh duhdah angreng taka chu paliana ṭawng mêk dan chuan Tate-a chu a tibuai deuh hlek a. Chutiang bawkin, a ruka anmahni lo thlir ve rengtu pawh chu. Sakawr in kaltlangin inpui phenah chuan zawhte ang maia thawm nei lovin Green-a chu a put bo ta a. Chutih lai chuan Tate-a nuam tihlohna chu a zual sauh a.

‘I hnunglamah I chawchhum pa in a lo veng reng che niin I ngai tiraw, Putar? Han ko chhuak nghal law law la?’ tiin paliana chu a lo nui huah huah a, hawi let kher lovin Tate-a chu a han au vak a, ‘chawchhum pa, chawchhum pa, I ṭha em ?’ 

A reh dan em em chu a ngaihṭhat awm ta hlek lo mai le. A fimkhurna hloh in, Tate-a chu a hawikir a, a han ko leh a, chu chuan Paliana atan rawn bawhbuaina hun remchang a siam sak ta a. Sakei ang maia ranga rawn zuang pheiin elhbun ngulah chuan a rawn man a, Tate-a kenlai chu a rawn chhuh ta lawp mai a, chumi pah chuan a kut hnung lam chuan a han vai thuak a, Tate-a chu chhuatah a thal thla nghal thlawrh mai a.

Tate-a kamsirah chuan thisen rawn chhuak ngiai ngiai a, ‘Engtinnge in tih a.. tenawm pa?’

‘A ṭha lutuk a lawm Putar,’ an hotupa chuan a lo ti a. ‘Kan veng fimkhur deuh mai chauh a ni e.’ A aw chu a han tiring deuh a. ‘A dik a ni lawm ni, Ray?’

‘Dik chiah,’ inchhung atang chuan aw in a rawn chhawn ve a.

‘In khawhmuhna kha anchhe dawngin awm rawh se,’ Tate-a chuan chau taka dinchhuah tum hram hram pahin a lo ti a. ‘Ka naute chu han awm na se chu in nasa lo ang chu—’

‘Nia, eng ruai an ang bik lovang’ tiin paliana chuan a lo pawtchat leh hmak a. A mitmei hmuin a hote zinga pahnih chu an rawn hnai a. Rancher ban leh lam ve ve ah chuan nghet taka chelhin an hnuk phei ta hrawt hrawt a. An hruaitu pa chuan Tate-a kun reng chu a khabe ah chuan a han kuai dak a. ‘Tichuan, tlanchhe lovin hremhmunah chuan min hmuh i tum a maw, chiah?’ titak ang reng tak chuan a han ti a. ‘nangni ang sava tlahlang satliah mai maiin in riat chhuah pui ve ngawt ngawt loh tur thil hi a awm niin a lang.’ tih hmuar hmuar pah chuan elhbun chu sakawr dahna lamah chuan a vawm bo ta daih a. A sakawr zin a hruihrual tel inkhai chu a han ban nghal a.

Tate-a chu a meng zau kawk a. ‘Eng thil nge tih in tum a?’ tiin a han zawt a, a aw ah chuan ngaihthat lohna a lang a.

‘Ngati nge, thurawn satliah ringawt aia daih rei deuh tur thil pek che kan tum a nih hi,’

A lo ti rum ul a. ‘He lamah hian rawn la phei teh u.’ tih pah chuan Cottonwood sangpui mai, ranch kawt zawla zar phei du lamah chuan a han inher nghal a. Thing hlimte chu a bulthut lamah chuan an lang thim ruih tawh a. Hla taka Mesang tlang vel te chu tlai nitla liam tawh zungzam chambangah chuan fiah lo takin a lang riai ruai a. Chu Rancher putar hmachawn chuan a han inher leh a. ‘Choak-Ârawn thla tawn hi kan ngah mah mah a,’ tih pah chuan thil ṭha tih tum lo tih hriat takin a then fur mai a. ‘An nghawng te hi pawh sei sak deuh ang u.’

Chutihlai chuan, a dinhmun leh thil tih zel dan tur chhut zung zung pahin Green-a chuan kawmchar lam chu a rawn paltlang phei a, Sakawr chungchuang hovin thildang ngaihsak lêk lova Tate-a kut leh ke an phuar mawlh lai chuan, an hmuh loh hlanin thawm nei hlek lovin kawmchar bang chu a rawn hel a. Choka ah chuan a lut ta zâl zâl a. Hmunhma te a la hriat chian vak loh avangin chaw ei khawmna pindan puiah chuan lutin a han chawl leh det a, mihring kein zawite a lei a phiat ri chu chiang takin a hre ta a. In ralring tak chungin inpui kawngka lam chu a han thlir phei zawr a, Green-a chuan tukverh bul chiah a chawchhum pa taksa lo thingthi nuai leh kutthlak tupa, pa sang lam, pawn lama thil thleng mek lo thlir ve reng tu nen chuan, a hmu ta a. Rang takin a che zui nghal zat a. Inpui chhungah chuan a dawk phei zawk a. Ray-a an tih pa tukkhum lam beng chung chiah ah chuan a .45 ngul chuan dimna tel hlek lo in a hem ta bur mai a. Ray-a chu chet thawh zui thei lovin a thir tlawn tluk nghal tawp a. Hun khawhral tam lovin a silai leh kawnghren chu a phelhsak nghal a, amah phuar nan a hmang zui ta nghal a. Chawchhum pa nikhawhrelova awm mek kaiharh tur chuan a han khawtlai leh hlek a. Ray-a pistol chu chawchhumpa kutah hmehbel nawk nawk pahin bengchheng siam lo turin a kutzungtang chu a hmuiah an dah a. Lo veng tha hle turin zaizirin a han hrilh nghal a. Chawchhumpa chu a lo bu nghat a. Ṭawng tuitam zui tawh lovin sakawr in lamah chuan  a thil tih mek lai chhunzawm zel turin a let phei leh ta a. In sir lam Cottonwood thing sangpui dinna atanga Yard tlemte a hlaah chuan a kawng zawh mek lai chu a chhuak phei a. Chulai chu mi pali ten dim baksak lova a sakawr a Tate-a an lo hlan mekna hmun chu a ni a. 

‘Kan pu hnena thuchah duh te I nei em, Tate?’ a hoten chet an thawh mawlh mawlh lai chuan an hruaitupa chuan a han ti a. ‘Nangni mi laktlakloh ho.. hremhmunah kal vek rawh u!’ Putar chuan tham ṭuakin a lo ti a. Chu pa chuan anchhe lawh pahin sakawr khela ben tumin zak kau meuhin a ban chu a han vai a, a ban chuan a thiltum chu a hlen thei ngai ta lo a ni.

Chutihlai second khat kar dan mai ah chuan silai a rawn puak thuai a, a ban chu leilam hawiin a hnawl leng nghal lawp a. A ban na lam chu vuanin anchhia a han phuh chhuak bawrh bawrh a. Mi dang pathumte pawh chuan an silai paina lama kut vai thlak pah chuan silai rawn puahna lam hawi chuan an han inher a… ‘A chhin pawhin ngaihtuah duh suh u’ awka vawt reih rawih hian a rawn vau ta chhak a. Puakruk la khu vat vat lo lek kawh rengtu mikhual mit meng zim set sawt an han hmachhawn meuh chuan thirling an khawih ta emaw tih mai turin an kut te chu an hmanrua aṭanga hla thei ang berah an dah nghal rawk rawk hlawm a. Pathum leh pakhat chu an ni nameuh mai, amaherawh chu phawi rang ber kut che vel ai pawhin silai mu thlawk chu a rang zawk tih an hrechiang em a ni. Chubakah, an thil tih lai a lo inrawlh ve pa, sam dum hlep hlawp chu, silai hmetpuak hmasa te te hnua zawhna zawt chauh chi mihring niin a lang bawk si.

Green-a pawh chuan an thuawihna chu a han pawmsak ve ta rih phawt a. ‘A hmasaberin, in hriamhrei leh a paina te kha theh thla nghal rawh u, hmel ho!’ tih pah chuan a thupek nemngheh nan a puakruk chu a lek rem leh sauh a, Chung mi pathumte pawh chuan an zawm rang ngang mai a. Green-a chuan an zinga pakhat chu, an hotupa hliam tuar leh a ban na then chawk chawk chunga thingthi mek, ralthuamte  chu hlihsak ve turin a ti leh a. Chung te chu hmunkhatah an vawmkhawm vek a.

Chung mite laka mit la sawn chuang miah lovin Green-a chu Tate-a bula chuan a kat phei a, mitkhap kar lovah chu putar kut an phuarna te chu a zai chahsak ta zung zung a. Tate chu awlsam takin sakawr zin aṭang chuan a rawn tawlh thla vat a, an kawnghren vawmkhawm aṭang chuan pistol  pakhat chu la in a han hum vang vang a, Green-a bulah chuan a rawn phei ve leh a.

Chutih lai chuan, paliana pawh chu pai ṭawng ṭawngin a rawn ding chhuak a. A na tawrh avang chuan a hmai chu a dang var pap a. Mahse hlau hauh lovin anmahni vaubet tupa chu a han hmachhawn a. Green-a hnenah chuan, ‘Pu a, kan thil tih laiah hian mi thar mai I ni a, I rawn inrawlh ve ngawt na hi eng ang chiah nge anih I hrelo pawh a niang a, ka thu ngai la — inthiarfihlim rawh.. Anih loh chuan I thihni thlengin I inchhir ngawih ngawih mai ang. Chu chu a lo thleng thuai dawn bawk’ a han ti a.

Green-a chuan engto lo zetin a lo ṭhen khum a. ‘Mi vau leh tihthaih hi I tuizawng a ni maw,’ tih pahin zawi sap hian. ‘Heng lai velah chuan an sahuai neih chhun ni awm I ni.’ a han ti zui a. 

‘I tidik hrep ang.’ tih pahin an hotupa chuan a lo rum khum ngal ngal a, a awki an san deuh a. ‘Ray-a kan khawih tir ange !’

In lam atanga silai puak thawm beiseia taka an awm reng lai chuan Green-a chu chhete pawh hian a phu chin eih lova. Chutiang awzawng a awm ta bawk lo.!  

‘Ray-a chuan min khawih thei lovang,’ tiin chu Cowboy chu a lo ṭhensak a. A mitangte ho hmela makti leh hlauthawng hmel rawn lang thlir pah chuan ‘Ka dah bo tawh.’ a lo ti a. Green-a chuan,. ‘Mi lambun ching, mi zakzum tak in nih hi. Ray-a pawh a hna thawk turin chhuatah a bawk mek ta ve ang.’ a han ti zawm leh zat a. A han chawl det a, a rawn ṭawng chhuah leh chuan hmusit leh deusawhna awka a tel ta tlat a. ‘Tunah’ a han ti leh thawt a, a aw chu Rulngan thinrim inhrosa ang maia hlauhawm a rawn ni ta thut a, ‘Tunge I nih reng renga, Pu a, tunge rawn tir che’

Chu misual hliam tuar pa chu a rum ngal ngal a. Green-a chu rang taka zinkawng thui tak zawh vat tura thurawn pe in, ân hla ngap deuh deuh a’n chhak chhuak leh chiam a. 

‘Tut, tut!’ tih pahin George Tate-a chu a lo inrawlh a, rawn pen chhuah pahin ‘Khatiang khan thil I sawi tur a ni lovang, a nih loh chuan tu emaw in khak deuh che a ngai a nih hi!’ “Hetiang hian” tih pahin a thatawpin a khabe ah a’n pe ta siah mai a. Tate-a ruangam ruh theh thawh leh tihtakzeta thinrimna aṭanga lo chhuak a ni bawk a.  Paliana pawh chu ke vawr ṭhawtin a kang zawk a, hnung lama a ṭhiante ban bawhin a hlawm phei nawk a. Tate-a kuttum ruh fang maiin thinrimna inup nasa tak chunga a khawih a ni bawk a, a naran lo hle ang le. Ṭhen chak chak chungin a rawn hawi a,  ‘Min hrethiam rawh, Jim. Kha thil kha chu a ba ve tlat a ni.’ a han ti a.

‘Engtik ni ah emaw chuan ka la rul ang che,’ an hotupa chuan thisen chhak chhuah pah chuan, ‘a suahdur ngeiin mawle.’ a han ti a.

‘I tawng leh chuan suahdur chu tunah kan hmang nghal anga ni mai alawm,’ tiin Green-a chuan a lo hrilh a. ‘chunglam aṭangin.’  a han ti zui a.

Chung mite ho hlauhlawp hmel hmachhawn chuan an zavai tihchhan deuh takin, ‘Mi a nileng ka ni lo tih in hriatchian nan — lo en rawh u!’ a han ti a.

A Silai puak zawt zawt ri chu khawpui ri ang mai a ni a. Hlauthawng leh makti taka lo thlirtute chuan, silaimu hmasaberin bur chhia a len lawp lai, a pahnihna in yard sawmnga piah lama a chheu darh hawk lai, a pathumna in sir zawng a deng per leh nawlh lai leh a palina in Sakawr dahna in hungna piahlama a vawrh liam phei lai chu, an lo hmu vek a. Tumah chuan Silai puak leh puak inkar awl chu an hre hman lo reng reng. Chu Cowboy hmel thutak raih mai chu, a silai chelek tur zawnga  tihbuai an tum ngam tawh hek lo.

Meikhu pak bial pap pap pahin Green-a chu a rawn peh chhuak leh a. ‘Tunah chuan ka tum chu ka kap fuh thei tih in hre ta a, ka hrilh a che u: pathum thleng ka chhiar ang. Pathum ka tih veleh,in ke veilam zungpui theuh kha ka thlawh darh vek ang.’ 

Misual ho chu a ngaihna hrelo leh hlauthawng takin an inen kual hrak hrak a. He pa ngaihsam hmel angreng tak hian a sawi chu a tih mai zel duh hmel bawk si a. A khabe ruh kual nghet tlet tlawt leh a hmui chip hmak danah lah fiamthu thawh hmel reng a lang si lo.

Green-a chuan a chhiar tan ta a…

 ‘Pakhat...’

Misual pakhat chuan an hotupa chu hmanhmawh deuhin a han bekbawr a.

 ‘Pahnih…..’

An hotupa chuan a lu a thing a. chutiangin mi dangte pawh chuan…. An thil sawiho rawl pawh a ring ta deuh a. Green-a number chhiar mek hmel an enin engmah thuruk neih a ṭulna an hre tawh lo pawh a ni mahna…..

An hotupa chu a rawn petek chhuak nawk nawk a. ‘I hriat duh chu enge ni a?’

‘A hmasaber atan chuan, I hming.’

‘Pardoe. Bull Pardoe. I chhawrbawk lo kher ang chu. Mitthi mai I ni tawh, Pu a. I hriat duh zawng zawng chu ka hrilh ang che, a chhan pawh naktukah chuan ransa leh chungleng sava te chaw mai in ni tawh dawn. Bull Pardoe ka ni a. Heng midangte hi ka hote an ni. ‘Shadows.’ tiin kan in vuah’

‘Sidewinders te pawh inti ula a mawihnai deuh zawk ang a,’ Vawt raih in Green-a chuan a lo ti leh a. ‘In chhinchhiahna tih vel kha chu ka ngaihven zawng a ni lem love, Pardoe. Tunge rawn tir che u a?’

‘Tuman min tir lo. Tu thuhnuaiah mah kan kun lova, kan mamawh bawk lo.’

‘Chutiang chu ring turin min beiseia maw?’ tiin Tate-a chuan a lo pawhchah sak a. ‘Engvangin nge dawt hlir I sawi a, tenawmpa, Barclay-a tualthattu rawihte in ni tih ka hria, chu chu engvangin nge zep tuma I buai chiam a ?’

‘Barclay hian min thunun love, Pu a,’ tih chu chhanna chang beng bawng tak a ni. ‘Tuma thuhnuaiah mah kan awm love.’

‘Chutiang nih chu tuman an duh reng hleinem,’ an chezia lo thlir rengtu Green-a chuan ro halh hian a lo ti ve a, ‘Mahse kei hi chuan maw, thlasik lo thlen leh hunah vur a tla dawn tih pawh hi min hrilh mah ula ka awih therte lovang.

  ‘A nih chuan, zawhna mawlmang tak tak chu min zawt duh tawh suh, Mikhualpa. I thaw te kha ren rawh, a chhan chu I thih dawn darkarah I la mamawh dawn nasa a nia.’

Green-a chuan chu paliana chu uluk takin a han thlek leh vang vang a. Ngaihdan siam fel ta niawm takin a han bu nghat a. Goerge Tate-a chu a han be zawk a, ani chu hmanhmawh takin Ranch inpuilamah chuan a lut bo ta a. A rawn lang lehnghal vat a, tun ṭumah chuan Chawchhum pa nen ama puakruk ngeiin Ray-a chu pawr phungin an rawn chhawm chhuak ta a.  ‘Kal zel rawh, nang sidewinder pa,’ tih pahin chawchhum pa chuan a rawn nawr phei nawk nawk a, I sangawi zawnpui te saw I innghah rei tir dawn lutuk a nia!’ tih pahin silai ngul chuan a rawn khawng phei pah ang lawlh lawlh a. Chawchhum putar chuan Ray-a hmel nur tak chu a thiante lo awmkhawmna ah chuan a khalh phei ve ta zel a, chutah Green-a lam a rawn hawi chuan a hmelah lungawitih hriat takin a nui sung a.

Cowboy chuan mitangte lam chu rawn ngaihven lehin, ‘Tuma dal ruallohin in lo in vaivung rei tawh hle a. Bakah, in ṭhian ṭawngthei tak Pardoe lah hian kan kaltir che u chuan kan tisual hle ang tih kha tlang takin min lo hrilh tawh bawk a. Ka ngaihtuah vang vangin, thah nghal vek mai che u hi tha zawkin ka hre ta.’

Hlauthawng  leh mangang thawri hlawp hlawp chu an hmaa dingkhawmte atang chuan a rawn chhuak a. An zinga pakhat, tawi deuh leh hmai chik deuh chuan Pardoe-a vuan tawk tawk pah chuan, ‘Nang leh I hote inluling lutuk hian eng dinhmunah nge min hnuhluh tak hi!’  a han ti a.

Pardoe-a chuan men deuh ṭuau chungin ‘I ti tak tak lo tiraw.’  a aw chuan zawhna lam ai mahin tihtak zeta ngenna lam a kawk zawk mah a.

‘Teh nang... ka ti tak tak maithei a sin,’ chu chhanna avang chuan Pardoe ṭhiante chu an lo thaw deuh huai a. ‘Ka ti ngei dawn nain, nuamti taka inthemthiam nan erawh ka hmang  dawn lo che u a. In rawn lawr leh a nih chuan nangni ang tiat hi chu ṭin chhia mai mai ai chuan kah fuh in har lo hle dawn a. Thil hre rei chi ka nih vak loh avangin kan inhmuh leh hunah pawh ka hriat hran theihna tur cheu in chhinchhiahna erawh chu ka siam dawn a ni’.

Tawng zui tawh lovin a kut veilam chu a silai paina lamah chuan a phe thla zawr a, an lo thlir thap nain a phawi tih pawh an hriatchian hma in a rawn puak leh ta ṭhuai ṭhuai a. An bek sam thawi vaiha an beng kawm veilam rawn su hek hlak tu silaimu avang chuan chung misual ho chu an ṭe ṭhawt ṭhawt hlawm a.

An bengkawm aṭanga thi far zaih zaih titawp tura an beng an huh ṭhap lai chuan ten hmel fe in Green-a chuan a'n enkual leh den den hlawm a. Awmze nei tak leh vawt raih mai chuan, ‘Tunah chuan, kha, chhin-chhiahna in pu ta bawk a, tute pawh hi ka hmu leh che u a nih vaih chuan khabe sep buai tawh lovin ka kap nghal ang che u. Tunah, in sakawr chhemi nen khan phusa nghal ula. Kutpalh tuar turin rawn kir leh tawh suh u’.

A puakruk vilik hmel an hmuh chuan hmanhmawh takin an kawng zawh tur lamah chuan an phe ta dawr dawr a. Pardoe-a chu sakawr zin rahchhan rapin a han ding leh det a. ‘Ka hrereng dawn a nia Cowboy,’ tiin a han inhrosa ve leh ngal ngal a.

‘I lo hrisel zawk nan, a ṭul khawp ang chu,’ engngelh lo zeta chhanna chu a han hre leh a. ‘Thlawkbo rawh u!’

Ṭawngkam nei zui tawh lovin mi pangate chuan an sakawrte chu an pawt her a, chu phairuam laihawl lamah chuan thim zingah an pil bo ta thliah thliah a.

Green-a hnung lamah chuan thawk ham ham pahin George Tate-a chuan, ‘Jim, I lei ka ba nasa ta hle mai —’

‘—Apple chhang dang chu min tiam leh tak kha maw le?’ tiin Green-a chuan ṭawngkam a lo rawlh leh zauh a. ‘Awm ngheh zui ka tum ta deuh tlat mai. Khai a, Pu Tate, ka lo awm hnai hlauh chu a tihzia ngei mai. Khang ho kha nangmah khaihlum ngei tuma rawn thawk an ni chiang mai. A tu emaw ber tal kha chu hmuh tawhna I nei mial lo maw?’

‘Ka’n ngaihtuah let ngial a, ka hre tlat lo,’ tih chu chhanna a ni, ‘Lo hre ta pawh ni ila, kori a tu lem dawn em ni, Barclay-a Foreman, Burley Linkham tih loh hi chu han hriatchian fak tumah hi ka nei law…. Thunder Mesa a tangkaraw laihchhuahna ah chuan mi za tel hnathawk an awm bawk a… engtizia nge chu chu min zawh a ?

‘Barclay-a mi leh sa te kan hriat hran theih takin ka ti mai mai, i la hmu ngailo a nih si chuan thing kihna tur hreipui dang a rawn hmang te pawh a ni mahna  . . .?’

‘A enga pawh chu ni se, Barclay-a chu a fihlim leh luau ang chu,’ eisiamtupa chuan a lo ti ve bauh a. ‘An behchhan ber ranch ah sawn an hlawh hen tawk hna thawh tur an nei pawn ka hre love.’

‘Chawchhumpa hian a tidik a lawm, Jim. Shadders ho suahsual rawng-bawlna ah hian hlawkpuitu an awm ngai a nih chuan Barclay-a chiah hi a ni ang,’ tiin kut zungtang vilik chhuak meuhin Rancher chuan a lo ti ve a.

‘A tha e, thu thang kan lo hriat dan ang deuh chu a ni maw,’ awmze nei takin  Green-a chuan a lo ti ve a, ‘Bawnghnute belah nghavawk a lo tla a nih chuan thil diklo a awm tihna a ni mai.’

‘Henglai vel a bawnghnute belah hian nghavawk tla I hmu a ni maw, Jim?’

‘Tehreng e,’ tiin Green-a chu a nui sak a, ‘ Naupangchhia deuhin ka’n sawi ange. Ka ngaihven em em bawk.’

Chhawchhumpa chuan kamsir phuan bat bata chumite pahnih titi chu a lo thlir reng a. A han hnaih deuh a, a hmui chu a chip ta hmak a. In lamah chuan a pen phei ta ngawng ngawng mai a. A han phun zui nang nang a. ‘Mi â pahnih mai mai chuh.... eirawngbawl leh chetna tur ṭul dang tam nak alaiin, bawnghnute bela sangha tla chungchangte an sawi ang mai mai a’  tih pahin choka kawngkhar chu a khar bur a, bungbel leh thawmnaw ilo tla ri rum rum karah chuan an titi chu a la hriat riai ruai a.

Green-a leh Ranch neitupa Putar chu bathlar lamah chuan an rawn let phei a. Varanda a thutthleng ṭawih tawh lamah chuan ṭhuthmun an han rem zui a. A vawihnihna atan an lam pana sakawr rawn tlan thawm an han hre leh a.

Tate-a chuan dinchhuah pahin a puakruk chu a han phawi a. Chutiang taka a lo inralring chu thil mak pawh a ni lem awm love. Green a pawh chu a kut pahnih a sâr zam raih mai, silai kausa lek kawh chung leh a tul dan azira hmang nghal maithei turin a lo dingchhuak fel der tawh a.

‘Kan nau te an ni maithei,’ tiin Tate-a chuan Cowboy chu a han hrilh a, ‘Mahse, chian phawt ang’

Vaivut khu chuk chuk karah sakawr chung chuang pangate chuan tualzawl an rawn tlan thleng a. Chung lai huna sakawr chungchuang ho tihdan pangngai angin zeihawi tak leh engnghelh nei lo zetin an sakawr aṭang chuan an  chhuk a. An zinga mi, sang lam leh la valai tak, thil zep ṭit ṭet nei ngai vak lo hmel pu chuan a sakawr lakam hrui chu pa upa lam kum sawmnga vel hmel pu, sam pawh tuak phauh phauh tawh, kal bai hlau hlau lamah chuan theh phei pahin, ‘Sakawr enkawltu a I ṭan ve ni,’ tih pahin a ṭhenkhum sak a. ‘Helai phairuam vela sakawr chungchuan thiam ber I intlansiak pui a niah… I chau chhe lutuk lo’ng chu maw.’ a han ti zui leh a.

‘Kha kha  Dave Haynes-a a nih kha.’ Tate-a chuan a lo ti sup a. ‘Naupang fel tak a nia. Pa upa lam deuh kha chu Gimpy MacDonald-a a nia — kan hnena a awmna chin hi kum khat aiin a tam tawh, ka la hre chiang khawp mai. Bawng rual hlauhlawp tlanchhe zingah a lut palh a, a ke pawh na takin an chil sak a. Mahse, a kut thawhna lamah chuan a la chungnung larh nia’.

Tlangvala chu bathlarah chuan a rawn chuang kai a. An rawn intlansiak haw na lama hnehtu a nih avang chuan a sakawr zin ilo vel singsak hna a awl tur chu tihzia a tih hmel hle a. Rawn hawi thlak paha Tate-a silai phawisa reng a han hmuh chuan hlau der tih hriat takin a han nur kual vel a.

‘Hey!’ a han ti a, ‘Ka hna chu ka thawk ṭha teh a nia, hotupa — ka ti tak tak ! Engtizia nge min lo dawngsawng turin mumal taka in lo thutkhawm teh tlat?’

‘Dave, khawtlai lo khan lo phei la, Green-a hi han hmelhriat ve teh. Helai vela a lo awm remchang hlauh chu a vanneihthlak kher asin. In vahbo hlan khan hrikhrah ṭhenkhat in min lo tibuai deuh a’. 

Midangte pawh chuan rawn zawm vein, a mal te te in Green-a chu an rawn chibai ta ṭheuh a. Gimpy-a pawh chu tualzawl vang tan zawngin chau leh hah hmel takin rawn kal hnak hnak a, amah leh amah chu a rawn inbe phei mawlh mawlh a. Tate-a chuan Green-a nen a han inhmelhriattir ve a. Green-a hmanrua te leh a silai uai fual hnalh mai chu han thlek zawk pahin ‘Howdy’ a han ti a. Chu bak engmah sawi zui chu a nei lem hlei lova. Green-a chuan, a kum upatna avangin a tha a ṭhum ve ṭan tawh tih a lo hre mai a. Chutih lai chuan Tate-a chuan a hma darkar  liam ta lawka thil thleng chungchang chu a lo sawi hlut a.

‘I lo inrawlh remchang hman hlauh chu a va tihzia ve, Jim,’ thutak tawkin Gimpy-a chuan a han ti a.

‘Ka vanneih vang a nih kha,’ tiin Green-a chuan a lo chhawn a. ‘Ka sakawr tui pek ka tum mai chauh a nia.’

‘Tute nge an nih rindan te I nei reng reng em, Hotupa?’ tiin Cowboy pakhat, Ben Dobbs-a ti a, Tate-an a hmelhriattir pa chuan a lo zawt a. A hote nen hlim taka chibai an in buk thliah thliah pah chuan, Putar chuan chung mihring, a bik takin an hotupa hmelhmang te chu a han hrilh leh mawlh mawlh hlawm a. 

‘Tu emaw ber chu khuaah kan hmu tawh mial lo maw’ tiin an zinga tawi thau lampang ‘Shorty’ tia a thianten an koh fiam thin chuan a lo ti ve zauh a.

‘Nang enge.. Curt?’ a biak mek pa chu pa hmai tlang ṭha ang reng tak, amaherawh chu a hmui tihrawl diklo in a hmai vun a pawh sawih avanga ṭhen deuh reng hi a ni a. Inhmelhriattirna an neih lai aṭang khan he pa hi chu ‘Curt Parr’ tiin Green-a chuan a lo hre tawh a.

‘Shadows ho an nih takzet chuan, tute mah khuaah kan la hmuh ka ring lo,’ Parr-a chuan a lo ti a. ‘Ka hriatdan chuan a huho in an awm dul dul khat khawp mai.’

Chutah, an titi lai chu chawchhumpa kawng dawm a fiamthu titak deuh thinrim hmel taka kawngka biang nghenga rawn ding rum ul chuan a rawn ti buai ta a.

.

‘Nangni ho kha, khatah khan titi tlaivar ṭhak in tum em ni? A nih chuan, in zanriah hi sanghal ho inhnangfak nan ka pe ang a, Chhang hi chu keimah in ka duk zo mai dawn a sin’ a han ti a.

Chutianga sawmna duhawm an han dawn takah chuan Slash 8 hnathawk ho chu chaw ei khawmna pindan lianpui lamah chuan an lut khawm ta dial a. Chawei dawhkan thingtum a siam lianpui, kum tam tak hman tawh tih hriat taka var hnum hlurh mai kil chuan an thutna theuh an chuh sang sang a. Chutih lai chuan Chawchhum pa chuan thlengin chaw eitur a rawn chhawp khu vut vut mai bawk a.

‘Ei ang ule, ti ti lam chu nakinah.’ Tate-a chuan a han ti lauh lauh a.

A lehpek minute sawmli chhung vel chu hah leh thlantui luang zawih zawih a chawhnu lam pum hun an hman tawhna te hre chang lo lek in, an eisiampa in chaw leh ahmeh hrang hrang a chawp te hmang chuan an inhnangfâk ta mur mur mai a.

Sa hrang mawm hlap maia sawngbawl te, alu kanro te,  chhang ur tharlam tak tak te, an lo chhuan em em Apple chhang ur ro rap te chu an han hrawkhrui buan buan a, Green-an fiamthu deuha a lo vuah ‘Horseshoe Coffee’ a tih mai chuan an han tleng thla leh duak duak a. Chungte chu thlasik chhum leivak ni tlangsangin a em ral ta ang mai hian an tawnah chuan a zam ral duak duak zel hi a ni ber a.

A vawi lina atan a coffee no chawchhumpa in rawn thlih khahsak a tum leh mek lai chu lo nawr sawn pahin Green-a chu a ṭhutna hnung nghengin a han zimar a, kamram dang chu a han ban zui nghal zat a. 

‘A va han tui tehreng ve le,’ tih pah chuan dawhkan hmawr lama Rancher thu chu a han mitmei a. ‘Nikum christmass hnuah khan heti em ema tlai leh puar hian ka la awm leh tawh lo reng reng.’

‘He lai ram puma eisiam thiam ber kan nei tlat a lawm’, Dave Haynes-a chuan a lo ti a.

‘Henglai velah hian I cham rih dawn nge, khawthlang lam I pan zel dawn, Jim?’ Curt Parr-a zawhna awm ang lo lutuk rawn phuhchhuah avang chuan thawm chu a reh nghal duak a.  He ramah hian mi tupawh, khawi aṭanga lo kal nge tih te, khawiah nge a kal zel dawn tih te hriat chaka zawhna siam chu a hawihhawm loh thlakin a finthlakloh hle tih an hre vek si a.

Green-a erawh chu boruak lo inthlak danglam  ta pawh chu hre awm hian a awm lem lova. A han nui sak a. ‘Pan tum bik riau pawh ka nei hran law.. Texas atangin khua ka rawn chuan satliah mai mai a ni e. Santa Fe lam panna vantlang kawng ka rawn zawh pah a’ tiin a lo chhang satliah mai a.

‘Sakawr nena teihawi reng chu a ninawm ve tawh deuh lo maw, Jim?’ tiin Tate-a chuan a han zawt satliah a. Chu chu Green-a sum pai dinhmun leh hna thawh chungchang zawh dan mawihnai deuh zawk niin a lang a. 

‘Ka la ro lutuk hran love, chu chu I zawh tum a nih chuan, hnathawh fahrah te te chu ka nei ve a lawm.’ tiin Green-a chuan a lo chhang a. Green-a chu a ṭawng chhunzawm ta lova. (Mahse, kum engemaw zat liam leh hnuah, a hna te hlenchhuah zawh a nih tak thu a han hriat hnu khan, tuna an titi boruak hi a hrechhuak zawk a ni.)

Slash 8 hnathawktuten chhun lama an hnathawh chungchang vel sawi a an titi mar mar lai chuan, Green-a chuan a ṭhutna nghenchhan ngheng ar ar pahin a meizial khu kar aṭangin an mizia awm turte chu a lo chhut den den hlawm a. Gympy-a, thuawih, sehhel leh rinawm tlut mai, Chung mite ho zinga upa ber pawl leh a thawhna ranch tana thih huama inpe zo, chuan sawi leh ruat hranpa ngai lem lovin hotu chan a chang nghal tih a lang reng mai a. Dave Haynes, mi tlang tak, thup ṭit ṭet nei lemlo, mize inhawng tak te, Dobbs-a leh Shorty-a, pianken ve renga phakar lo tih hriat ngawih ngawih, thawveng em em mai, hun harsa ah erawh thlamuanpuiawm tak tur ni si te, Cut Parr-a nihphung tur awm ang a han  ngaihtuah chuan a buai deuh hlek a. A mizia ah chuan heng midang hlim thei tak tak ho zinga inhnimphum ve atan hi chuan inhmeh vak in a hre lo a ni. Hun remchang a neih chuan Putara hnena la zawhfiah a tum rilru ta ran a. Chutih lai tak chuan Ranch neitupa-in bengchheng khap daihna tura dawnkan a ben rik ṭhuai chuan a ngaihtuahna kal vel chu a rawn tibuai ta a. 

‘Nau te u, thil han sawi kual duah hi ka thiam ṭhin lova,’ a han ti ṭan a, ‘Mahse engemaw hrilh tur che u ka nei a nia. Vawiin khan hruizenah ka uai ṭep a, chutah tihtakzetin thil ka ngaihtuah ta a. Mihring hian a siamtu a tawh dawn meuh chuan,  a ngaihtuahna in kiltin kiltang a hawl kual vel thin an lo ti a’ a han chek zui nghak hluk a, tichuan a sawi chhunzawm ta zel a, ‘nangni ka nau te hian inhmakhua tur in thlan fel hi a thain, in zalenna pawh a ni a. Ka chungchang bikah hi chuan, he phairuamah hian buaina a chhuak ngei dawn a. Barclay-a hian ka ram hi a it tlat mai si a, chutiangin a chekkawite, silai chelek thiam ho hian awlsam tak chuan min thlah zalen hlek dawn si lova. Chumi in a hrinchhuah tur chu namen lova inkahna a ni’. Tunah,  lo ngawi lawk teh u!—’ tih pah chuan a hote aṭanga hnialna awka leh fuihna awka inpawlh ri nuai nuai chu bengdaih tumin ban a han phar a. . ‘He ram inchuha indona a in zuanluh hma hian min ngaithlak phawt hi a tha ang. Ka fanu Grace-I chungchang a nia.’ 

Gimpy-a chu Green-a lamah a han awn phei a a han hrilhru sap a, ‘Putara fanu hi a nia. Khawchhak lamah Sikul ṭha deuhah lehkha a zir a.’ tiin. Tate-an thil a sawi chhunzawm leh lai chuan hrethiam tih hriat takin Green-a chu a lo bu nghat a. 

‘Grace-I chu kum sawmhnih pakhat a lo tling ve tawh dawn reng mai a, naute u, Helai hmuna a awm lohna chin kum sawm lai a ni ta. Zirna ṭha tak  awmna hmunah ah a seilian a ni. Engkim huama New Mexico-a ranch siama kan inbenbel tirh lai vel kha chuan mumal pawh a la nei vak lovin ka hria. Insawhngheh lam pawh kha a la ngaihven lutuk lova. Mahse, tunah heti hi kan nih dawn takah chuan tiin nikum khan  thurochhiah ka lo siam diam tawh a. Chutah chuan ka chungah thil pawi engemaw lo thleng palh ta se Slash 8 hi Grace-I kutah a lut dawn a ni. Ka sawi chu in hrethiam maw.. nau te u’

‘Dawn lawm ni, hotupa, tawh sual I tawh palh chuan keini pawh mahni kawng theuhah kan vah darh a ngai maithei tih vel a ni tiraw,’ Dobbs-a chuan a lo ti a.

‘Chumi chungchang chu a nia,’ Tate-a chuan a ti ta hlawl mai a.

‘A ṭha e, thil pakhat chiah kan tih theih a awm, a ni lawm ni?’ Gimpy-a chuan zawt awka deuhin a lo ti ve a. Slash 8 hnathawkte chu inthurual takin an lo bu nghat nghat hlawm a.

‘Tawh sual tawk palh lo tura chet lak char char a ni mai’ tiin Tate-a chuan an sawi leh tur chu a lo sawi zawh khalh a.

Inhnial leh titi thawm chuan a zui leh luai luai a, a thu ngaithla a ngawih rih tir tumin Tate-a chuan dawhkan chu a han chum bur a. Rei vak lovah a reh duak a, a hote chuan an lo thlir leh ta ṭhap a.

‘Awmze nei deuhin khawsa ang u aw,’ a aw ah chuan a thutak ta hle tih a hriat a. ‘He hmun hi dahkham a ni a; Bank-ah hralhin a la bang awm angte ka sem ang che u ang a, kan vakdarh mai ang.. chu chu thil awlsam te a ni. In awm tlat chuan, thil engmah hi ka tiam thei lo che u a...’

Chu mi chin bak chu sawi theih a ni ta lo. A han ṭawng leh apiang chuan kûk thawm te, ring tak a inhnial thawm te, a thusawi pawmpui lova rawtna dang lo aupui thawmte chu a ri leh ta nuai nuai a. A tawp a tawpah Gimpy-a chuan a puakruk kawm a dawhkan chhut rik dawt dawt pahin a rawn ding chhuak a. A thiante chu mitmeng vawt reih rawiha han en dan dan pahin, ‘kan zavai aiawha thu puangtu atan ka han inruat chawp mai ang a. Hnialna nei te in awm em, tun hi thil sawi hun a ni e!’ a han ti lauh lauh a.

Thlanmual ang maiin a reh ta duak a, chutah Gimpy-an chutia thupui a han vai vel a han hmuh chuan Green-a chu a lo nui sak a.

‘Hotupa, kan sawi duh chu tawite leh thlum tak a ni. Kan zavai hian Slash 8 I chhuahsan leh chhuahsan loh tur chungchangah kan buai hran lo. He hmuna I awm chhung chu kan awmpui ang che. A ṭûldan a zirin hremhmun pawh kan haldarh anga, Vânpui pawh lo chim se kan do pawp ang chu kan ti.’

A thusawi ṭha tihna leh pawmpuina authawm chuan a rawn zui nghal nuai nuai a. Chutah Tate-a chuan ngaihngam hmel takin a naute chu a han enkual a, an inpekna te chuan a hneh takzet a ni. Lawm avanga mittui parawl ṭeuh chungin, a han sawi chhunzawm leh a, ‘Engti kawng pawhin kan zuanluhna hi a nuam nai lo hle dawn a, mahse, Slash 8 erawh hi chuan a phu ve tawk a ni. Amaherawhchu, khang thim hlima rawn kal misual rual ho kha khin an huphurhawm viau dawn a nia’

‘I ti chiah maw, Hotupa,’ phurna avanga mit khap zaih zaih chungin Dave Haynes chuan a han ti a. ‘Kan eisiam pa pawh hi ralthuam han bel ve la, pasarih kan ni tawh dawn tihna a ni mai a. Tichuan, min rawn basa ngam ngawt tawh lo deuh ang chu’.

‘In mimal thilah ka ring ka rawn rawlh ve chu a ni mai thei a,’ tih pahin Green-a chu a rawn inzep ve a, ‘Pariat thleng I chhiar thei ang — Nang leh I hoten min telh ve duh chuan.’

Tate-a chu a rawn hawi chhuak vat a. ‘I sawi awmzia chuh — Kan zingah I rawn invawm lut ve dawn maw, Jim?’

‘A nih mai lohvin?’ tih chu chhanna vawt reih rawih tak a ni. ‘Ka chiang chiah lo nangin, he lai Sweetwater phai ruam velah hian ka mi zawn mek te pawh ka hmu mial maithei a sin’ 

‘A tha e, lawm I hlawh lo a nih chuan a mak ka ti hle ang, tlang takin ka han hrilh mai ang che,’ Tate-a chuan a lo ti huah huah a.‘Thil ṭangkai leh ṭanpuina awm thei ang zawng zawng chu kan hmang thei dawn ta a nih chu.’

Slash 8 hnathawk ho hmel puthmang lamah chuan Green-a chuan mit chu a han len kual leh zuai zuai a, Mi pakhat mit tih chauh lo chu an boruakah chuan nuamti takin an lo cheng vek a.  

‘Hotupa hi a tisuallo viau ang, Jim,’ tiin Dobbs-a chuan a han belhchhah leh hlak a. ‘Kan kutke mai lo deuh a piah lam thlengin kan hmang thei dawn ta niin a lang.’

‘Nia,’ tih pahin Shorty-a chuan a rawn kawk a. ‘Tu emaw hi chu a zahzum deuh avangin kaihkep hi a ngai deuh reng thin a’.

‘Zakzum a ? Enge I sawi awmzia chu?’ a sawi chhan deuh Cowboy chuan lungni manglo zetin a lo ti a.

‘Hnathawh kawnga zahzumna hi maw le,  a ni lawm ni,’ tih pahin Shorty-a chu a lo then sak a.

‘Kei hi maw hnathawh lama zakzum chu? Nang thau hmim hmem khan engvanga rawn sawi ve ngawt nge I nih a, ei lama ka u — thawh lama ka nau I nih kha aw’

Gimpy-a chu rawn inrawlhin, ‘Titi lam kha chu bansan ula, tluk zal hun a ni ta.’ tih pahin a thutna atanga rawn thovin kawngka lam chu a pan phei ta a, Chawchhumpa chu a han mangtha leh zawk a. Midangte pawh chuan an zui ve nghal a. Tate-a chuan Dave Haynes-a chu Bunkhouse-ah Green atana riahna lo siam belh ve turin a han hrilh a. Green-a rawn dinchhuah ve mek lai chuan awm khawtlai rih turin a lo ti a. An pahniha an awm fal hnu chuan Slash mithar lo ni ta lamah chuan a han hawi a, ‘Jim, lawmthu ka hrilh che hi a ṭûl takzetin ka hria —’ tiin a han ṭan a.

‘Chungte chu thil pawimawh ber pawh a ni hran lo ka tih tawh kha,’ tih chu Green-a chhanna a ni. ‘Ka chaw eitur chu hlawh chhuah theih ngei ka tum a lawm’

Putar-a chu khun khân taka in-ngaihtuah chungin a han bu nghat a. Chung pa pahnihte chuan ngawi rengin mei an han zu dun vang vang leh rih phawt a. Chutah Tate-a chu a rawn ṭawngchhuak leh ta a.

‘Jim, tawhsual lo tawk palhin ka mawhphurhna hi I ko ah lo tla ta se, eng angin nge I ngaih ang ?’

‘Khai a, chutiah thil engmah I chungah a thleng lovang,’ Green-a chuan a lo ti a.

‘Maithei, a ni lo maithei bawk. Chutiang chu a lo thlen palh takah thil hi felfai tak rel fel thlap ka duh a ni. Chu chu I lo dawn ve tawh em, Jim? Ka hnatawktute hotu atan hian dah che ka lo rilruk deuh a sin, chuan —’

‘Pu Tate, ka chanchin engmah I hre hleinem,’ tiin Green-a chuan Rancher pa chu a han hrilh leh a.

‘Thil thleng thei tur hi nang pawhin I chhuidawn thiamin ka ring a. Mahse Jim, mi mizia leh rilru puthmang awm hi chu ka chhutthiam ve a lawm. Zin vak satliah chu I ni lo reng reng.’

Green-a chu a han nui sak a. Chu Putar chuan thil awm dan a lo chhui dawn ṭhelh deuh mai thei a ni.

‘Vawin chawhnu lama thil thleng kha I lo ngaihtuah mek a ni maithei a. Nauva, thil kal fuh lo palh a nih kha.. ’

‘Teh nang, a ni miah lo.’ a ṭawng pah chuan Green-a fiamthu hmel chu a reh tial tial a. A thutakin a lungngaih hmel ta hle a. ‘Min rintawkna hi a lawmawm em em nain I tisual ve deuh maithei tih hi ka hrilh tlang mai che a tha zawkin ka hria a: Sawtah, ka rawn chawrchhuahna hmun Texas ah chuan hming dangin min hre thin a. Sudden tiin min ko thin asin.’ 

Sudden ! Chu inpuanna avang chuan Tate-a chu a han meng zau kâwk a. Tichuan…. He tlangval la naupang tak, ṭawng zawi sat mai, a puakruk hmanga mi namai a nih lohzia lo entir tawhtu hi Sudden-a, mi hratkawkheng, a fan tawhna chin khawthlang ram a a chanchin thawnthu ngaihnawm tak anga bâng lova an sawi thin chu lo zuk ni rengin!! Kawlphe ang maia phawirang a nihdan te, hriat loh ram ralti a daidar zel theih dan mak tak te, tualthah avanga zawnlai mek a nih thu te la hre miah lo chu mi tlemte an ni awm e.

Tate-a chuan a nunna chhanhimtupa chu mit tharin a han thlir leh vang vang a. ‘Jim,’ muangchangin a han ti a, ‘Khawi atanga lo kal nge I nih tih te, enge I tih ṭhin tih velah ah hian ka buai lo. He hmun aṭang hi chuan Sudden-a, dan pawna hnawl chung-changa mi dawt thu leng vel mai mai hi ka ring ngai lova, tin, lo ni ta pawh nise ka pawisa hek lo’.

‘A ṭha tawk a lawm,’ Green-a chuan a han ti a. ‘Ka hrilh loh che chuan engtik niah emaw I beng a la thleng tho tho dawn a.’

Tate-a chuan engemaw chen a kuaite chu a han fawp hrawk hrawk a. ‘Ka sawi tawh kha chu ka sawhsawn lovang,’ a rawn ti chhuak leh ta hlawl mai a. ‘Tawhsual ka lo tawk palh anih chuan ka fanu in kum a tlin hma he ranch hi I lo enkawl ang. Chu chu a tak rama chan nghal theihna turin zaninah ka ziak fel nghal ang. Naktukah South Bend  a mi ka ṭhian hlun ukil Amos Pringle-a hnenah ka thawn nghal ang. ‘Amah hi chu ka hriattir ngei a ngai dawn a ni, nau a’,  inthlahrung deuh lek lekin a han ti a.

Green-a chu rang tawkin a rawn hawi chhuak a, ‘I ring takzet a ni maw.’ zawhna pawh a ni chiah lova, Tate-a chuan a lu a lo bu ve mai a. ‘Anih chuan, chanchin kimchang takin hrilh law law ang che,’ Green-a chuan a han tih chhunzawm leh a. A awki chu a hniamin a thutak kher mai. Pa pahnihte chu khawnvar eng chau tak hnuaiah chuan an inkawm a. Chu Cowboy-in a tum loh leh rin loh dan deuh thil kalsual avanga hmingthanna ṭha lemlo tak a hlawhchhuah tak erh dan  a hrilh mek lai chuan Tate-a chuan makti em em hian a lo ngaithla reng a. Chu hmun zan reh khupruh pelhsawlh tawh lamah chuan, mitthi tur hnena chu tlangvalin a thutiam, tualthattu pahnihte a rem dan dana  a zawn chhuah ngei  tur thu te, chutianga hun a hman laia dik lo taka puh a nihna zawng zawng te, chumi avanga tlangval chhuak awrh a nih lai aṭanga lu man nei a lo nih tak dan te, chutah, a tan chuan tute pawh hi rinhlelhawm an nih vek tawh avanga khawthlang rama mal taka chetla a nih dan te chu Tate-a chuan a hre ta vek a. 

An inhrilh zawh dawn lamah chuan, Tate-a chuan lu thing nar nar chungin ti hian a han ti a, ‘Ka sawi tawh kha chu ka sawhsawn lovang, Jim. Sudden-a I lo ni a nih pawhin, I chungchangah chuan dawt thu a leng vel hle a nih hrep chu’.— A kut chu rawn phar chhuakin a rawn vuan a —‘Chung zawng zawng mangtha thei tur chuan ka thlawp tlat ang che. Hna chu chelh ang che aw?’

‘Ka theihna zawng zawng ka hlan ang,’ tiin Sudden-a chuan a han tiam ve ta ngat a. Pa pahnihte chu khunkhan takin chibai han han inbuk leh a.

‘Thil dang han beisei ka nei hran tawh love,’ tiin Tate-a chuan a han ti thawp ve sat a. An inmangtha a, amah chauha kuaite zu chunga thu hnufual turin Sudden-a chuan  a chhuahsan ta a. 

‘Tichuan.. Sudden-a maw lo ni a,’ Tate-a chuan a han ti tha leh a. ‘A ni ngawt ang, ka ring a ni. Ka lamṭang a han ni hlauh chu a lawmawm kher mai,’ tih pahin a bu nghat nghat a, thuk lianpui ah chuan a kuaite var chu khawngthla in, a dawhkan rawih tawh tak kil chuan ṭhuthmun a han rem a, Lehkha leh a ziak fung chu lachhuakin a han thai kawi ṭan ta a. A thilziah chu a duhdan ang zan a nih hma chuan thaichhe zelin, uluk zetin a han bur ta ngar ngar a. Chutah, lo dingchhuakin, a han zimar a. Choka kawngka lamah chuan a pen phei a, eisiam pa chu a ko ta a. Chawchhumpa chu kut hru mawlh mawlh chungin a lo lut a, ‘He thil hi chhiar turin ka duh che a ni,’ tih pahin Tate-a chu lehkha lamah chuan a han bu a. ‘Chuan ka hming ziah kha min hriatpuina ka duh bawk a.’ 

Engmah sawi lem lovin Chawchhum-pa chuan lehkha chu a la a, Tate-a thu ziahte chu a han chhiar a. Maktihna hmel chu a rawn lang a, mahse zawt buai lovin a han chhiar zo phawt a. 

‘I thiltih mek hi I hrechiang meuh a maw?’

‘Ka beisei,’ tih chu chhanna tluangtlam angreng tak a ni.

‘I tumdan teh ngawt chu.. enge a awmzia ni reng reng a ?’ tiin chawchhumpa chuan a han zawt a.

 ‘Green-a’n a chanchin diktak a hrilh ngam a, a hrilh che a nih chuan, thil mak leh thu thinthawng tak dawngsawng turin inring sa la, mahse I lo hriat tawh angin  a chet zel dan I lo thlir zui zel dawn nia. Chu chu a ni mai. Judge Pringle ka hrilh tawh tho a, ka sawi zui vak lo mai ang’ tih chu chhanna chang angreng tak a ni. ‘Lehkha ah chuan sign ringawt mai rawh.’

‘Ka’n sign ange,’ tiin chawchhumpa chu a phun sup a, ‘Vawiin a I hmelhriat tan chauh mihring lakah rinna I nghat lian lutuk deuh lo maw ? Barclay-a rawn zeh luh pawh a ni maithei a sin, chu chu I lo ngaihtuah chin tawh em?’

‘Ka chiang khawp mai,’ tiin a rul tawk chhanna a dawng leh tawp a. ‘Chutiang a nih loh beiseiin ka indahkham reng a ni. Dik taka sawi chuan, ka neih zawng zawng hi a ko ah ka nghat chu a ni deuh ber e.’

Chawchhumpa chu vawikhat a han bu leh nghat a, amah ruaitupa hming ziahna hnuai zawnah chuan a hming chu a han thai kawi ve ta vat a. 

‘Vawin a ka thil hmuh danah kha chuan, I tisual lo turah ngai ang. Boruak a lo lum chhoh deuh hunah pawh tihṭhaih mai mai chi a nih loh ka beisei.’

Putar chuan a lu a han thing a, a mitmeng dul reih chu a lo eng chhuak a,  ‘He pa hi hlauhlawpa siam chu a har khawp ang tih ka hre tlat, a rura thawkhat ang.’ tiin chawchhumpa hnenah chuan a han hrilh leh a.