Cleopatra-3

 CHAPTER III: AMENEMHAT LUNGAWI LOHNA, HARMACHIS TAWNGTAINA, LEH PATHIAN THIANGHLIM TE CHHINCHHIAHNA..!

Eng emawti chhung chu, ka pa nupui hlui Atoua-i damdawi bawlhlo ka hliam a min bel sak chuan min ti khawr ang reng viau a, mahse, na engmah ka hre lo thung. Tin, thudik chu, chung damdawi bawlhlo te chuan thatna riau an nei ni ngei in ka ring, a chhan chu, ni hnih chhung lek in ka hliam chu a dam fel vek a, a ser hnuhma reng reng pawh hmuh tur a awm lo. Mahse, ka pa tia a ka koh, puithiam sang, Amenemhata thu ka awih loh avang khan ka rilru chu a inthiam thei meuh lo. Vawiin ni thleng hian ani chu ka pa tak tak, ka thisen zawmpui ngei a ni tih reng ka hre lo. Pathian hnen atanga thu a dawn ang in, a fapa, pharoah kut a thi ta aiawh tur a temple a a rawngbawlna a pui tur a min la luttu mai mai niin ka hria a. Min chawilian tu a nia a. Nakin zel ah pawh temple a a rawngbawlna hi ka la chhunzawm dawn ni in min hrilh thin a. Chuvangin, ka rilru chu a buai hle thin a. A chhan pawh, he putar a hi pa thinchhe tak leh anchhe tak a nih avangin, amah hi ka hlau a ni. Finna thu vawt reih rawih min fah a ching viau bawk lehnghal a.

A enga pawh chu nise, a hnen ah kal a, ka thil tihsual te puang in, ka chunga hrem na a lek tur ang zawng zawng chu tuar mai tur in ka rilru chu ka siamfel ta tawp mai a.

Tichuan, ka fei, a hmawr a thisen la kai luai chu kengin, ka awm a Sakeibaknei in min ham na hliam, la tharlam zet nen chuan Temple luhka hmasa ber ah chuan ka pen lut ta a. Chutah, puithiam hotupa chenna pindan bik ah chuan ka lut phei ta zel a. Pindan ropui leh mawihnai tak mai hi a ni a. Pathian te lim te chu pindan kil ah chuan a lo inhung thluah a, tin, chhun lam ah chuan inchhung a ni eng lo luhna tur an siam atang chuan ni eng chu a rawn zam lut raih thin a. Mahse, zanlam ah erawh pindan chhung chu khawnvar hmang a tih en a ni thung thin. Kawngkapui chu a lo inkhar phui lem loh avang chuan  bengchheng engmah siam lovin ka lut tlang thei mai a. Chutah, parda zar chhah zet mai chu keu in, pindan chhungril ber ah chuan thin phu dut dut chung leh tiril a khur ru der der chung in ka lut ta a, pindan lai ah chuan ka ding ta ran mai a.

Pindan chhungah chuan khawnvar hi a lo inchhi a, zan a nih tawh avangin. Khawnvar eng hnuai ah chuan putar, saingho leh thing man to, Ebony aṭanga siam thutthleng ropui zet mai a lo thu reng chu ka va hmu ta a. A hma zawn chiah ah chuan lungphek atanga siam dawhkan hi a inhung a, a chungah chuan hmasang thuziak dan hmang a ziak, thihna leh nunna chungchang ziak hi a lo inpharh duai bawk a. Mahse, putara chuan chiar lovin a lo mutthluk san daih mai tih chu ka hmu nghal mai a. A khabe, hmul tuak var vek tawh in a bawh khah tlat tawh chu dawhkan chungah chuan, a thi ta emaw tih mai tur hian a lo nghat bul mai a. Pindan chhung eng deuh reih ruih hnuai ah chuan a zungbun leh tlereuh dang te, a hmel leh chhinchhiahna eng eng emaw te chu a hmuhtheih ruai ruai a. A bak, a vel chu a thim vek a ni ber mai. A lu kawlh tul mai leh a kawrfual te, a pianzia, lal ni tur reng a duan ni awm ngawih ngawih leh a mithmul tuak var vo tawh te, a mitkhur thuk tak phen a a maimitchhing te,  a thutna kiang a lal tiang intung te, a thutthleng, saingho leh ebony thing atanga siam te chuan chu putar thiltihtheih na chu an lantir a. Chung zawng zawng ka han hmuh chuan ka tiril ah ka khur a, a chhan pawh, amah ah chuan mihring zahawmna piahlam thil eng emaw tak ka hmu tlat a ni! Pathian te nen rei tak ata tawh lo inbia a lo inkawm tawh in, keini mihring satliah in kan hriatthiam phak ngai hauh loh tur thilmak tam tak nen thuk takin an inlaichin tawh tlat a ni. Osiris nihna chu rei tak ata a lo chelh tawh a. Tunah pawh boruak sang tak, he mihring te mihrin na sawi nghing lawih thei thil nen an inkungkaih tlat tawh a ni.

Ka ding a, amah chu ka en reng a. Chutia ka en reng lai chuan a mitkhur thuk tak piah a a mit chu rawn meng in a rawn hawichhuak a, mahse, keimah lam reng reng a en lo. A lu lah a hawi sawn hek lo. Mahse, ti chung chuan kei chu min hmuh hmaih hauh lova. Ti hian thu a han sawi zui ta a'

"Engati nge ka thu i zawm loh mai le, ka fapa?" a han ti phawt a, "Ti lo tur a ka hrilh mawlh mawlh chung che pawh in engati nge sakeibaknei bei tur khan i vah chhuah luih ṭalh mai le?" a han ti leh a.

"Engtin nge ka kal tih chu i lo hriat theih mai chu le, ka pa?" tiin ka lo zawt lêt vethung a.

"Engtin nge ka lo hriat mi zawt a maw? Mihring in a pianpui hriatna chauh lo hi hriatna dang a nei chuang em ni? Aw, naupang tihmawh! Sakeibaknei in i kalpui pa a beih lai khan ka thlarau chu i kiang ah khan a awm a sin! Nang i him theih nan ka tawngtai lo a ngem ni? Sakeibaknei kha i fei khan chhun fuh lo ta pawh ni la, i him theih nan i bula tanpuitu tur an awm theih nan nasa takin ka lo tawngtai a sin!  Engati nge i lo feh chhuah reng reng le aw, ka fapa?"a han ti leh a.

Kei chuan, "Kha pa, insawithei lutuk pa khan min rawn cho chhauk a tin a ni!" ka lo ti a, "Chuvanga kal mai chauh chu ka ni."

"Chu chu ka hria a lawm. Tin, i tleirawl thisen lum leh zauthau na avanga ti i nih vang chauh khan ka ngaidam ang che, Harmachis. Mahse, tunah chuan ka thusawi hi ngun takin ngaithla la, thlaler vaivut in tui a hip kang duak duak ang hian i thinlung ah khan lut rawh se. Kha pa, mi insawithei pa kha nangmah rawn thlemchhuak tur che a rawn tirh a ni a, i dawhtheihna leh chakna enchhin nan a ruahhman na a ni. A chung a thil thleng ta erawh a pawi takzet a ni!  Chuvangin, nangma hun pawh hi pawh tawi a ni a. He thil hian i chakzia ti lang hlauh lo phei se chuan tunah pawh i hmabak tur chu tih fel a ni tawh hial ang. Mahse, enchhinna a i hlawhchham na chuan i hun neih te a pawhsei sak ta zawk che a nih hi le!"

"I thusawi chu ka hrethiam hauh lo mai, ka pa?" ka lo ti a.

Ani chuan, "Chuti anih chuan, ka nupui hmasa Atoua-i khan luikam a in awm lai khan i bulah eng thil chiah nge a sawi le?" tiin min zawt leh a.

Atoua-i thil min hrilh zawng zawng chu ka hrilh chhawng ve leh ta a.

"Anih chuan, a thusawi te kha i ring em, Harmachis, ka fapa?" a han ti leh a.

"Aih...engtin mge khatiang thawnthu lawilo lutuk te ka rin theih ang ni? Chiang takin ani kha a rilru a buai zo tawh a ni. Chu chu mi zawng zawng in an hria e," ka lo ti a.

Tunah chuan pindan chhung ka luh atanga a vawikhat nan kei, thimtham hnuaia ding reng, ka lam chu a rawn hawi ve ta a, "Ka fapa, ka fapa!" tiin a han au a, "I ti diklo a ni. Ani kha a rilru a buai reng reng lo asin. Kha nu khan thudik tak a sawi zawk a ni. Ama rilru puakchhuak a sawi a ni lova, amah a awm thlarau in sawi tur a a tih chauh a sawi mai zawk a ni...dawt sawi thei a ni hleinem. Chuvangin, Atoua-i hi zawlnei a nih mai bakah mithianghlim a ni a sin. Tun atang chuan Egypt pathian ten i tana an thil ruahman hi zirchiang ang che, i tihhlawhtlin theih nan. I chakloh na te avanga i hlawhchham hlauh chuan i chungah hrem na nasa tak a rawn thleng dawn a ni! Ngaithla teh, nang hi temple a pathian ber tur a hmel hriat loh leh mihran, ka inchhunga ka lak luh mai mai i ni lo asin!  Nang hi ka fapa diktak, he kan sawi mek nu in thihna lak ata a chhanhim i nia sin. Mahse, hamachis, chu mai chauh chu a la ni lo a sin. Chu ai daih a pawimawh zawk chu a la awm. Nang leh kei a thisen zam ah hian egypt lal thisen a luang a. Egypt lal thlah zeding la awmchhun kan nia sin! Nang leh kei hi Persian ochis ho in an umchhuah, pharoah Nekt-nebt thlah zeding, pawlhdal loh awmchhun kan nih hi! Persian ho an rawn lang a, min umbo a. Persian ho zawh ah mecadonian an rawn lang leh a. Tunah chuan lagiden ho kut ah double crown hi kum 300  chuang a awm tawh a ni. Khem ram te chu ti bawrhbang in, an pathian te chu eirukna tenawm tak hmang in an ti bawrbang a ni. Chu chu hre reng ang che. Mahse, tunah chuan nangmah tihhlum tum tu che, ptolemy kha kar thum kal ta khan a thi tawh a ni. Mahse, tunah hian kha tilreh pa, Pothinusa, hman a nangma lu ngei lak tum a Abouthis a rawn kal khan a pu ptolemy duhthisam te chu tih hlawhtlin sak tum in, a pu fapa chu lal thuthleng luah tir ngei tum in a bei mek a ni. Chuvang chuan a unaunu, Cleopatra, nula hmeltha tawpthang leh huaisen tak mai pawh chu Syria lam ah a him na zawng in a tlanchhiat phah hial a ni. Ka hriatsual loh chuan, a tlanchhiat na hmun ah chuan sipai te din in, a unaupa laka phuba lak a tum a ni awm e. A chhan pawh a pa, ptolemy khan, a thih hun ah lalthuthleng chu an unau a lo intawm tur in thu a hnutchhiah a ni awm e. Chutihlai mek chuan hei hi lo chhinchhiah rawh, ka fapa, Roman mupui te chu vansang ah thlawk in, an ketin hriam tak hmanga egypt kel leh beram te tham a, pawt darh vek tur in an inring reng tawh a ni. Tin, hei pawh hi hre rawh; Egypt mite hian hnamdang ho nghawngkawl bah reng hi an kham tawh takzet a, Persian ho kha hriatreng an duh tawh hek lo, tin, Alexandria bazar pui vel a Macedonian mite ti a koh an ni thin pawh chu an ning a, an haw takzet tawh a ni. Tin, tunah la la pawh hian Egypt ram pumpui mai hi Greek ho nghawngkawl bat a, roman ho thuneihna hnuai a kun reng hi an ning tawh a, an phunnawi nasa tawh a ni. 

"Nekchep in kan awm lo em ni? Kan fate thah sak kan niin, Lagidae duhamna tawp chin nei lo tih lanna atan kan thlai thar te leh kan thil neih tha tha te chu laksak in kan awm reng a ni lawm ni? Pathian biakin te pawh rauh san a ni tawh a ni lawm ni?  Pathian te ropui na pawh heng ti bawrhbang in, engmah lo ah heng Grecian mi dawheh ho hian an chhuah zo tawh a, pathian te thutak thleng in an ti bawrhbang ngam ta chu a nih hi. Tin, chungnungbera hming pawh hming dang, Serapis, ti in an thlak a. Hmuhtheih loh a nihphung thleng in an duhdan dan in an thlak danglam zo ta a nih hi! Hetih lai hian Egypt mite chu zalenna duh in an tap lo em ni? An tahna te chu engmah loh ah a chang mai dawn em ni? Ni love...ni lul love, nang ka fapa, an ni chhanchuak tir a khuanu ruat chu i ni asin. Tun a pang in i hming hi egypt mite chuan hmun thinghlim ah te chuan an sawi sep sep tawh a, Abu atanga Athu thleng in. Puithiam leh mipui te chuan chhinchhiahna thianghlim leh an hnen a rawn inpuang tur a hming ngei chuan inpumkhatna leh tan hona thuthlung an siam tawh a. Mahse, a hun a la rawn thleng si lo...! Chutiang taka mawhphurhna lian tham la tur chuan ila nau in inla tuai hle si a. Mahse, vawin ni hian fiahna chu i paltlang tawh a, i tling ngei bawk a ni!

"Mi'n pathiante rawng a bawl dawn chuan, a tisa chaklohna leh tlin lohna te dahtha in, sir ah a hnawl tur a ni, nang Harmachis, Isis leh Osiris unaupa. Mi tute emaw thlemna leh nuihsawhna mai mai leh mihring tisa chakna leh duhzaqng ten a kawng a dal zo lova,  ti chaklo thei heklo. I hma a tla mawhphurhna leh kohna hi sang tak mai a ni a, mahse, hei erawh i zir ve a ngai a ni. Heng thil te hi i zir loh chuan, mathei lovin i hlawhchham ngei ang. Tichuan, i chungah ka anchhia, Egypt anchhia, leh Egypt pathian te anchhia chu leihbuak in a awm ang. Chuvangin, hei hi hre reng ang che; pathiante hi thithei lo, chatuan daih an ni pawh a ni mahna, mahse, an hna te ti hlawhtling tur chuan mihring bawk an hman a ngai a. Pasaltha in a chempui a hmang thin ang hian pathian te pawh hian mihring kaltlang a an tih hlawhtlin a ngai tho thin a ni. Tin, indo lai a chempui bung chu eng atan mah a hmantlak tawh loh a. A tuiek ral mai mai a nih loh pawh in meipui sa ah paihlut in, a tuiral mai thin a ni. Chuvangin, i thinglung kha thinghlim takin vawng tlat la, tichak in, ho mai mai ah hmang suh ang che, i lawmman tur pawh mihring te hnen atanga i dawn tur a ni si lova. Nang, Osiris unaupa, Harmachis, hnehna leh ropuina ah i lut ang a, tunah leh nakin thleng in!  I hlawhchham a nih hlauh erawh chuan lungngaihna leh hreawmna zawng zawng i ta a ni thung ang!

A lu kun in, a han ngawi vang vang a. Chutah, sawizawm leh in;

"He thil chungchang hi chu i la hriat belh dawn chauh a ni. Chutihlai mek erawh chuan zir tur tam tak ila nei a ni. Naktul khian lehkhathawn ka kentir che ang a, Nile lam ah kal in, Memphis kulhbang var atangin Annu lam ah i keng ang. Chutah chuan kum eng emaw ti chhung chu i zuk cham a ngai dawn a ni. Chulai hmun ah chuam hmasamg finna te i zuk zirchhuak ang a, pyramid hlim hnuai ah te ila thawh tur puithiam hna te i zuk zir ang. Tin, kei erawh chu helai hmun ah hian thu in, ka thih ni tur nghak in ka lo thlor reng dawn a ni, ka hun a la rawn thleng si lova. Tichuan, nang chuam Macedonian khuaipui chu man in, i hrebet dawn a nia.

"Ti teh, ka fap, lo kal la, ka chalah hian min han fawp ta che. Nang hi ka tana beiseina leh egypt tana beiseina hnuhnung ber i ni tawh si a. Mahse, dikna nen i hmabak lam pan chuan mupui ang in thlawk la, helai ah leh nakin zel a ila ropui na tur hmun pan in. Humsual i dai a, i hlawhchham ta a nih erawh chuan, chil ka chhak che ang a, anchhe lawh in i awm bawk ang a. Tin, i thlarau chu, thil thalo te pawh thil tha a a inleh hma zawng leh egypt hi zalen a nih hma zawng chu hreawm taka phuarbeh a ni ang."

Khur chungin a lam chu ka va hnaih a, ka han fawp a, "Ka pa hi ka ti hlawhchham a nih chuan, heng zawng zawng hi ka chungah rawn thleng rawh se,"ka han ti a.

"Aih..kei chu ni love! Mahse, kei ni lo, ka duh thlan te zawk ni rawh se"a lo ti a,"Awle, ka fapa, kal ta la, ka thu hrilh zawng zawng che kha ngun takin ngaihtuah zui ang che. I thil hmuh tur te chu ngun tak in chhinchhiah la, finna zing daifim te chu la khawm la, indona lo awm tir atan inbuatsaih ang che. Nang zawng thil thalo lak ata venhim tlat i nih avang in engmah reng hlau suh la. Eng thil mah in a khawih na thei lo che a, nangmah chauh hi i hmelma te tudai thei tu chu i ni, chu chu ka hrilh a che,"a ti ta a.

Chumi hnu chuan rilru a lungawi takin ka kal ta a. Zan chu a reh hle mai a, lalin tual vel ah pawh tumah reng tei vak hmuh tur an awm lo. Hmanhmawh takin ka kal zel a, pylon luhkapui, gate pawn ta ber chhung chiah a awm chu ka va thleng phei a. Chutah, vanlam ka hnaih theih nan mahni chauh a awm na tur ka zawng a, tichuan, a ler a inchung ropui tak ka thlen chhoh hma zawng chu pylon rahbi zahnih zet chu ka zawh chho ta ngat ngat a. Inchung zawl a tlakdal an siam chu bawh in, ka hma lam chu ka han thlir vang vang a. Vanlam a thla bial eng sen ruih mai chuan ka ding na inchung sang chu a rawn chhun eng paw sen ruih mai a. Ka piah deuh a temple bang leh pathian lim an dah te pawh chu a chhun sen ruih bawk a. Chutah, thla eng chuan thlanglam ruam a leilet zawl a buh vui te chu a zuk chhun eng var vau mai a. Chu van sang khawnvar eng chu muangchang in Khem ram pa, Sihor an tuipui a lum luhna ruam lam chu a chhum thla ta zel a. 

Tunah chuan chu thla eng chuan tuipui chu zuk chhun in, tuipui tui chuan a eng chu a lo chhunlet ve bawk a. Mother Isis chu rawn harh in, a kawrfual eng ropuo tak chu leilung chungah hian a zarpharh ta a. Tlang te, ruam te, lui leh khawmual te, temple leh khawchhung te leh leilet zawl te chu a en na chuan a khuh vel vek mai a ni. A mawi em em mai a, mumang duhawm tak ang mai leh thih hnu a zahzawm na kan inpek thin ang mai a mawi a ni. Ropui tak mai in chu zan thla eng hnuai ah chuan temple chu a sing tohlawr luah mai a. Chutiang ang rwng reng a zan duhawm leh mawi chu ka la hmu ngai lo....chung hmun thianghlim chatuan ata tur, a bang te pawh hun in a tihchhiat loh tur te nen chuan. Chung hmun thianghlim leh zahawm te chu keima ta tur vek a la ni ang a, chu thla eng mawi takin a chhun leilung te chu ka lalram a la ni ang. Pathian te la chawimawi in, ptolemy chu a lalna ara ka la paihthla ang a, ram dang mite pawh he egypt ka la umchhual dawn a ni. Tochuan, egypt ram chu zalen a lo ni tawh ang. Ka thisen zam ah hian thawhlehna nghak tu la ropui tak tak kalta te thisen a luang a, Thebes ruam thlanmual a zalh te thisen ngei mai chu. Ka hma hun lo la thleng tur leh ka la nih tur te ngaihtuah na chuan ka thlarau chu lawm na in a khat a. Tichuan, chu pylon hmun ah chuan pathian, hming hrang hrang nei leh lan dan hrang hrang a inlar thin hnen ah chuan tunhma zawng zawng aia nasa in ka tawngtai leh ta a.

"Aw, Amen...Osiris, a in pumpek na avanga thinghlim leh mittlung a min siam tu, Region of winds Lalpa, khawthlang lam a awmhmun khuar, Amemti ah thuneitu lalber, kei hi min lo ngaithla ang che."

"Aw, Isis, Pathian nu ropui, Horus a nu, nu a zawnga hriatfiah har ber mai, unau ni, leh nupui, nang in min lo ngaithla ang che. Kei hi pathian te thil tum hlenchhuak tir a pathian ten an vohbik ka nih takzet chuan ka hma ah hian chhinchhiahna rawn lantir mawlh rawh se, tunah ngei hian, he nun kawng hi ka zawh tak meuh dawn a nih si chuan. Aw, Pathian, ka lam ah i ban te chu rawn pharchhuak in, i hmel ropui sawihleihtheih loh chu kei mitlawm ber hma ah hian rawn lan tir lul rawh. Min lo ngaithla la, ka tawngtai na te hi lo bengkhawn sak lul rawh!" Chutia, ka tawngtai zawh chuan ka thingthi ta a, vanlam chuan chuan ka mit te chu ka len chho a.

Chutia, ka han thingthit velleh chuan chhum.chhah tak hian thla eng chu a rawn hliah a, zan chung ah chuan thimna nasa tak mai in thla a rawn zar ta a, ka vel ah chuan eng thawm mah hriat tir a awm lo. Ral a ui hram ri te chu a awm ta lova. Chu zanthim reh tak chuan zual lam pan zel in, thihna ang mai in a reh ta vung vung mai a. Ka thlarau chu phur na in a khat ni in ka hre ta a, ka tukhum sam te chu a ding ur ur mai a. Chutih lai tak chuan vawilehkhat ah ka ke hnuai a leilung chu a rawn nghing dur dur a, thilfim nasa tak hian ka mithmul te chu a rawn chhem a, ka chhungril ah chuan aw hian ti hian thu a rawn sawi ta a"-

"Chinchhiahna chu lo nghak la, dawhtheihna neih tum ang che, aw, Harmachis..!"

Chutia, aw in thu a sawi lai tak chuan kut vawt tak mai hian ka kut ah chuan min rawn chelh a, eng emaw hi a hnutchhiah bawk a. Chuvelleh chuan, thla eng hliah tu chhum chhah tak chu a bo a, thlifim nasa tak pawh chu hân nghal in, ka ke hnuai a leilung in sawi vel pawh chu a reh ta nghal bawk a. Chu zan chu zan dang ang bawk a rawn ni leh ta a ni.

Chutia, thla eng a rawn let leh tak ah chuan ka kut a thil awm chu ka han enchiang a. Lotus thiang hlim, par chhuah tan tir hi a lo ni a, chu pangpar chuan rimtui namen lo hi a chhuah bawk a. 

Ngaiteh, chutia ka en reng lai chuan ka kut ata lotus par chu a bo ta thut mai a. Mak ti tak leh hrilhhai takin ka ding khawng ta reng ringawt mai a..!