Bung-9

Benvo khua chu kawr ruam phaizawl ang deuhva awm hi a ni a. Khaw lan chian theihna tur,  khaw eptu mualdung inkhawh phei zur maiah chuan Hickock a chu a han ding vang vang a. A vawikhat tlawhna tur chauh a la nih dawn avangin a khawthleng awmdan leh kawm kar leh kawtthler vel awmdan zawng zawngte chu hriat theih ang ang tal hriat hmasak phawt a duh avangin uluk zetin a thlir vang vang a. He khua hi khaw rura ve tak mai a ni in Outlaw te pawhin tawm khawm nan an hmang fo ve reng a. Chu khaw Marshal pawh chuan Outlaw ho rawn tlan lut chu a ngai pawimawh vak lova, hei hi Texas huam chhung a ni tlat lova, Texas sorkar in dan pawna a hnawh chhuah Outlaw te chu New Mexico ah hian lo buaipui ve kher a tulna a hre lem lo pawh a ni ta ve ang, tia miten an lo sawi thin pawh a lo hre ve fo tawh thin a. Tun tumah erawh chuan mi sawi mai ni tawh lovin a takin amah ngei in a tlawh ve dawn ta a ni. "Black Nill, in tihhlimna tur  pawh kan hmu thei ngei ang le! Mahse a pawi fahran lovang chu maw; khuate pawh a har tawhin han buai deuh rep rep pawh a châkawm ve tawh tho a lawm." ti in a sakawr nghawngah chuan a han ben sak thak thak a.

Chiangkuang deuh taka chu khaw awmdan hmel hmang a en a, hmun pawimawh leh engemaw deuhte a

piang a chhinchhiah fel thlap hnu chuan Benvo khua chu pawhthla tawh turin Black Nill chu mualdung panah chuan muang changin a kal thlaktir ta buk buk a.Khaw luh dawn hnaih dai bulah chuan a han ding leh dat a. Chumi hmunah chuan thingphel hlai pui hi bân pahnih nei hian a lo in phun a, chu thingphelah chuan rawng dum hian:-

'He khuaah hian

Rustler, Outlaw,

Mi rawk hmang leh

Tualthah hmangte tan

Hmun a awm lo

          Marshal

        Benvo

tih hi a lo intar kuau mai a.

Mahsela chu thingphela thu inziak chuan zawm ai in diriam a hlawh zawk a ni tih hriat fahran hian silaimu denna hi a kaw nuk a, a chik hrep hrup mai a ni. Chung vel Hickock an a han hmuh chuan a nui sak a, "In vau ngawt mai ai chuan ataka tih theih hi atulin a pawimawh fe zawk a sin maw le, Marshal," a han ti sap a. Khua a va luh a in lo awm hmasa ber chu thirdeng In a ni tih hriat fahran mai hian tualzawl vela buk zar,bang pawh awm lohna ah chuan thir chherna hmanrua chi hrang hrang hi a lo let rum mai a. Chumi piahah chuan chenna atan chauhva hman, kawngsir tawn tawnah chuan In tam fe hi a in tlar phei put a. Chung In leh In inkar awl lai chu kawtthler a ni mai a. A piah leh deuh lamah chuan a tawn tawn bawk hian nepnawi zawrhna dawr, silai zawrhna, thawmhnaw zawrhna leh dawr chi hrang hrang hi a in ep phei leh tuar bawk a. Saloon te pawh a awm bawk a. Kawtthler an ve lovin In dang pawh a awm  thova. Marshal office leh Jail te, thubuai sawi a tul nikhuaa han pun khawmna mai tura In an sak lianpui maite pawh chu kawtthler atanga chhim lam pang fal deuh reih rawih ah chuan an ding khap hlawm a Chulai kiang hnaiah chuan mimal In te pawh a inhung ve thliah thluah tho bawk a ni.

Hickock a chuan a hmel chu chiang taka lang thei lo turin a lukhum chu a kuaikun lap a. Kawtthlerah chuan muang chang delh dawlh hian Black Nill chu a kal pheitir zel a. Lo entute tan chuan a thatchhiat hmelin a inthlahdah hmel hle a. Mahse a ruk tak erawh chuan engthil pawh a chungah chuan rawn thleng dawn mahse lo chhang let mai tur chuan a inpeih ru at reng thung a ni.

'Benvo Hotel' tih lo intar kalhna, In var lian tak zawnah chuan Black Nill chu a dintir ta chut a. Chu In kawta sakawr thahnem tham fe lo in thlung a hmuh chuan a thlen tumna Hotel chu an lun hrep a ni tih pawh a hre nghal mai a. A lo tawt viau tawh pawh a ni mai thei a mahse zankhat chauh tur a ni bawk a, thlen ve tho chu a rilruk ta a.  Sakawr atang chuan a chhuk a, sakawr thlunna tura an siam thing kham pheiah chuan a sakawr lakam chelhna hrui chu a han bang liam satliah ringawt a. Chutihlai chuan naupang pakhat chu rawn kalin a bulah chuan a lo ding hman reng tawh a. Chu naupang chu Benvo Hotel a thlengte sakawr lo enkawl sak thintu a ni ang tih pawh Hickock a chuan a ring nghal mai a. A kawrfem nei ipte a pawisa cent nawi chu phawrh in naupang hnenah chuan a han pe a, "Tlangval, ka sakawr hi tui leh eitur tuihnai tha tawk lo pe la, a taksa erawh chu dek hauh lovang che," ti in chu naupang hnenah chuan a han hrilh a. Chutah naupang pawh chu a bu nghauhva, a ni chuan Hotel kawngkapui lam chu a pan san ta a. Hotel han luh phatah chuan dawhkan seipui mai hi a awm a, chu dawhkan hnungah chuan palian tawk tak ve bawk, pa rinawm tak ni ngei tur hi lehkhabu bih hian a lo thu run a. Chu pa chuan Hickock a hmel a lo hmuh veleh chuan, "Engnge duh i neih ve.? " ti in hmel hlim tak pu chung chuan a lo zawt a. "Zankhat riahna tur atan pindan ka mamawh a ni. A tul phei chuan zankhat aia rei pawh ani maithei," ti in pindan luah tur a mamawh thu Hickock a pawh chuan a hrilh ve nghal a. Chu pa chuan pindan a awm theih tur thu hrilhin reiloteah a pindan duhzawng tak maiah chuan a chawl hahdam ve thei ta a.

Tui vawt tha taka a in phih harh vel hnu chuan ni pawh a lo tla dawn suar suar tawh a. Chaw han ei nan a la hma deuh bawk a, Hotel piah lawka saloon ah chuan tlem va lem hlak turin ke chuan a phei ta rih a. Chu saloon ah chuan zu in leh card khel vel chu an lo awm nuaih nuaih a. Hmel mak tak tak leh tawng tak tak te, mahni tawka 'kei ka ni' in ti ve thei tur chin ni ngei tura lang, pai fual tak tak te pawh an lo kat ve nuk mai nghe nghe a. Zu in tam luat tuar lova lo thle bawk bawk tawk lah an awm nual bawk a. Hickock a va lut ve pawh chu tukhaw kha in an lo ngaihsak lem lo kher mai. Chu tak chu a ni Hickock a pawhin a duh dan chiah phei chu a ni zawk a. Bar dawhkan lam pan chuan a tlang phei ve ta nghal a. Ruihna hun a ni lo bawk a, in hnem vak pawh a tum hek lovin dawhkan bawh chung chuan no khat chu a han thawk khat pawp a. No dang a lam leh a in ta karh karh thung a. 

Darkar chanve dawn lai a awm hnu chuan no thum lai a lo in ve hman tawh a. No khat dang a dawm leh chiah tih chuan chu saloon kawngkhar chu a rawn in then hawng lawp a, thawmhnaw dum hlira inthuam, pa

cher leh sang tha zet mai chu a rawn lang ta hlawl a. Chu pa chuan a lukhum parh chu hnung lama kuai liamin tham lo hmel fahran mai hian saloon chhunga awmte chu a rawn thlek kual vel chiam a. A khel dinglam sira a puakruk  pai, fual hnelh hnawlh chu a kut bawr chuan a hlat lo hle reng mai lehnghal a. Chu pa rawn lan ve atang chuan saloon chhung thawm ri luih luih pawh chu a reh nghal duk mai a. An lo

hriat than tawh hlawm, mi tuemaw tak chu a ni ngei ang tih Hickock a chuan a ring mai a. Chu pa cher a chu an tih hle a ni tih pawh a hrethiam mai a. Hotel lam pana chhuah leh mai a tumna pawh chu chu pa cher a che vel

hmuh a duh tak rih avang chuan a thulh ve leh ta rih a, a thlir ve ta zawk a.

Pa cher a chu Bar dawhkan lamah chuan ngeng fahran mai hian a rawn phei ve ta a. Dawhkan bul a rawn

thlen chuan, "Buck, whisky um nga ka duh, "a han ti hmuk a. Bar nghaktupa chuan phur taka a lo pek ve nghal mai Hickock a chuan a lo rin teh reng nen! Mahse,Bar nghaktu erawh chu a phur lo kher mai thung si, lohtheih lohna avang chauhva phawrh ang mai hian

Bar nghak tupa chuan whisky um nga chu a rawn phawrh chhuak ta tuah tuah a. Bar nghaktupa chuan whisky um nga chu dollar sawm sarih leh panga man anih thu a han sawi dek dek a, chu pa cher a chuan, "Ngawi chip cham mai rawh, ka duh leh ka pe ang che a, ka duh leh ka pe lo mai ang che. Zalen taka i la nun theihna hi i hlut zawk lo em ni.?" ti in a leh a ling chuan a vau ta khur khur mai zawk a. Barnghaktu pawh chuan engmah sawi leh ngam tawh lo chuan a ngawi ta reng ringawt mai a. Chumi atang mai pawh chuan Hickock a chuan engvanga Bar nghaktupa khan a zu zawrh rawn phawrh chhuah tur chu phur lo viau nge anih chu a hrethiam ve ta nghal mai a. Hrilh hran kher a ngai tawh bik aw zawng lo. Chutiang ang teh hrepa invau behna leh diklo taka

hlei lenna chu Hickock a chuan a thil ten zawng leh duh loh ber chi a ni ve tlat mai a. A chunga thilthleng ni lo

mahse a thin chu a sa ve ta phat mai a. A zu no dawm lai chu a thawk khat ta pawp a.

Saloon kawngka lam hawi a zu um nga lai mai pawm tu tu chunga chhuak mek lam hawi in Hickock a chuan, " I zu um ken lai kha a man i pek dawn loh chuan rawn dah leh rawh," ti in aw nelawm loh zet hian a va au ta chher chher mai le!. A aw chu ring vak lo mahse a fiahin saloon chhung pawh chu a reh tha dek dawk bawk a, pa cher a chuan a hre chiang kher mai. Chuveleh a rawn vir kual zawk a, a zu um pawm lai chu chhuatah chuan a dah thla a, pistol phawi mai inpeih atin amah rawn au tu chu a hma chhawn ve ta siah mai a, "Thih hi a hlauhawm hle a ni tih chu i hria ang maw.? Han tem chhin i châk anih chuan i hmu ngei ang, hmela," ti in a rawn vau let ta chhur chhur mai a. Chutah Hickock a chuan chu vauna aw chu chhang let ve in zamna chhin eih pawh pu lo chuan,"I vaupung ang taka vautu che kha chu awm na sela chuan i hlau nasa awm mang e. I vauna ang khan a tak i thlen thei anih chuan a lawmawm ngawt zawk ang. I thei lo anih vaih erawh chuan hremhmun lalpa nen in in chibai lawp lawp dawn a ni mai a lawm, a han tihkhum ve ta sak mai a. Chu deusawhna tawngka chuan pa cher a chu a ti thinrim zual ta sauhva. A ruk tak chuan zam deuhna riau pawh a nei nghe nghe a ni. Chu pa chu tunge anih a, engvanga chutitaka mi in lek ve tak thin laka rawn tawng huai ngam nge anih tak mai.? Chu zawhna tak chu a ni pa cher a tihlautu chu ni. Amah rawn au tupa in a khel tawn tawna 38 Revolver Pistol a paite lah chu inchei nan maia pai pawh a ni lovang tih pawh a kawm hnum thatdan atang chuan a hrechiang em em bawk a. Mahse a lo in lekna leh a thil lo tih tawh chu han sut leh mai tur chuan tlawm thlakin a hre bawk si. Mahsela atu apawh chu ni rawhse, Benvo khua leh a chhehvel reng renga cheng tena an tih ve ngawih ngawih leh pathian biak taka an lo biak tlawn ve thin kha a ni miau mai si a; chu chapona chuan a tum chu a tihtlang tir dawn ta a ni. Pistol phawi rang berte zinga mi

kha a la ni tho a lawm! Engahnge a zam bik ngawt ang.? Chutianga a ngaihtuahna chuan huaisenna pawh a rawn pe thar leh ta a ni chek aniang chu, a rawn au chhuak leh ta piap piap mai a.

Teng fe mai hian, "Anih a hnu, i han enchhin ang hmiang," ti in a rawn cho ta mai rohva. Chutih rual rual chuan a pistol chu a chuh zui ta nghal a. A pistol han chuh zet chu ran pawh a lo rang ve nangiang reng a ni. Mahsela a hma a mi chu Wild Bill Hickock a ni tlat!. Hickock a pawh chuan rang lutuk tak mai hian a ban chu a vai thla ve nghal fua a, second chanve pawh tling lovah a kawng zawn atang chuan a rawn de ta zawk a. Chuveleh pa chera pistol chuhna kut  dinglam chu Hickock a pistol mu chuan a hnung lamah a len phe lawp a, thisen tharlam zet mai chu a rawn chik chhuak ta ziai ziai mai le. A themtlaw avanga a nunna chu laksak lo pawh a ni hauh lovang tih chu a hmutute ho pawh chuan an hai bik hauh lova. Chutianga han hrem rih phawt chu a duh a ni zawk.

Pa cher a na ti lutuk chu a then tlawk tlawk a, a kut vei lam chuan a kut lehlam hliam atanga thisen rawn

chhuak tam lutuk tur chu a hmer ping ve hram hram a. Chutihlai chuan a hmelah chuan inchhirna pawh lang nghal a. Silaimu chuan a thisen dawt pui ber a rawn verh miau avang chuan hmer ve chiam bawk mahse a kut zungtang karahte chuan thisen chu a rawn hnam chhuak tuam tuam thova.

Hickock a chuan a pistol kaw hmawra rawn khu chhuak chiai chiai chhem kian hak pah chuan, "Khati kha chuan i vau pung pawh a na tawh lo deuh ang chu tiraw pu a.? Duh chuan that nghal thei che pawh ka ni ngei mai, mahse i zu man pe leh thei tur leh nun kawng dik i zawh theih nan hun ka'n siam sak ta zawk che anih kha! Chutihlaia phuba lak tumna i la nei fo anih chuan engtiklai pawhin ka inpeih at reng e," zawi leh vawt ruih chuan a han ti leh charh charh a. Hickock a vek chuan Bar nghaktupa lam chu hawi in, "He kan hmai hriam a hian i pawisa engzat chiah nge a bat.?" ti in a zawt a. Bar nghaktupa chuan rang fahran mai hian, ""Tuna mi nen khan a vai in dollar sawm sarih leh panga chiah a ni tawh," a lo ti ve thuai a. Hickock a chuan, "A ipte vel hi va check sak la, chutiang zat chiah chu i hmuh chuan la la, i hmuhin a daih lo anih chuan a pistol saw a gunbelt chawpin kawlsak la, i pawisa a bat zat chiah chuan a la rawn tlan leh mai ang ti in a hrilh ta a Chutah Bar nghaktupa chu a han tim deuh rih a, mahse Hickock a mitmeng rum tak mai in ti tura a mitmei nawn leh takah chuan pa cher a thawnhmaw chu a va dap sak ta mawlh mawlh a.

Bar nghaktupa chuan dollar sawmli leh cent nawi tlem hi a rawn phawrh chhuak a, "A ipte zawng zawng ka dap sak vek a, heti zawng hi ka hmuh chu a ni," ti in Hickock a chu a han rawn leh a..Hickock a chuan awlsam deuh hian, "A pistol pai lai pawh khan dollar sawmthum chu a hen ve thei mai

ang chu," a lo ti leh hmiah a. Chutah Bar nghaktupa chuan pa cher a gunbelt pawh chu a va hlihsak leh ta thuai a, Bar dawhkan chhung lamah chuan a dahtha zui ta hmiah a. Hickock a chuan a pistol hum lai chu a han vai vir map map a, en pawh en chuang lovin a Hoster ah chuan a thawlh lut ta zauhva. Tichuan pa cher a chu a va pan phei a, a bul a va thlen chuan, "Zu um hi chhar le, he saloon hi chhuahsan nghal vat rawh. Tun chinah chuan hetiang thil hi ching tawh lo la, i lu bûr khan a him rei phah sawt ngei ang a, ngaihtuahna hun a nei rei sawt bawk ang. dam duam ang reng tak, mahse nelawm lo leh thu pe aw tak a ni tih erawh chu hai chi rual a ni lo.

Harsa ti tak chungin Pa cher a chuan a ban na lo lam chuan chhuata zu umdarh nuaih chu a chhar ta mulh mulh a, saloon kawngka lam pan chuan a in zakzeh chhuak ta tut tut a. Saloon kawngka pawn atang chuan a rawn hawi let leh a, teng tha fe mai hian, Tex, kha kha a tawpna chu a la ni mai lovang tih lo hria ang che," a han

ti veleh hram a. (Tex:-tih hi Mexican hovin Texas mi an koh elna a ni)

Hickock a pawh chuan zawi sap hian, "Ka beisei deuh reng a ni," a han ti ve leh sap a.

A hma lawka saloon reh thuap, hriau pawh tla se a ri a hriat theih ang tih hial tur khawpa reh duk pawh tunah zet chuan a rawn ri leh ta mur mur mai a. Tunah chuan Hickock a pawhin a riahna tur hmun Hotel lam a pan veleh tawh a. An vai mai chuan mikhualpa tunge tih pawh an la hriat loh (Hickock a) pistol phawi ranzia em em chu an ti ti tui ber a ni ta mai a. Thudang reng a leng ta hauh lo. Tun hma zawnga tihbuai thiang lo ang hrima an lo ngaih, tuna ui dawih zawk ang maia pa cher a han chhuak khup ta zul zul mai kha mak an ti a,chuan an nuihzat ru hle bawk a. Chumite pahnih in tawng chan chin mawlh mai sawi chuan an thum mur mur mai a ni.

Pakhat ve thung chuan, "Kha zet kha zawng Sudden a an lo sawi fo thin ai mah pawhin a rang zawk hialin ka ring a ni. Mahse Duck a khan a pu bul a va thlen chuan a rawn lang veleh thuai ang a, Duck a pu, Black Bonda chu turu lutuk tak mai hi a ni ringawt.Chuvangin kha mikhualpa nen khan an in tawng anih pawhin Bonda lamah ka thap nghal duh ang, a rawn ti chhuak ve mauh mai thung a. A bul lawka putar sam tuak var vek tawh, kum sawmruk chunglam ni tawh ngei awm chu za fahran mai hian a rawn nui chhuak kuah kuah mai a. A nuihza zualpui a han reh hnu chuan, "Duck a pu Black Bond a kha maw.? Ran zawng a rang kher mai tak a, mahse tun lawka chhuak ta kha Wild Bill Hickock a a ni tih hria la chuan Black Bond vun duma lamah chuan i thap ngam kherin ka ring lo," a rawn ti ta phawng mai a. Chu hming zet chuan saloon chhung chu a fan chhuak rang kher mai le! Mak tih vangin an kâ ho mai hlawm a. Wild Bill Hicock a hming leh a chet ranzia chu hre lo fa pawh an awm tawh lovang tih hial tur a ni a, a hmel tak hmu leh hre tawh erawh chu an la tam teh lua lo thung a ni. Chuvang chuan chu saloon chhunga awm thenkhatte pawh chuan an hmu vannei hle in an inhre nghe

nghe a ni. Chutah zet zawngin Black Bond a rawn fak chiamtu pawh chuan mak a ti ve hle mai a. Mahsela han ngawih hlen phah hmiah erawh chu tlawm thlakah a la ve deuh a ni ngei ang, putara lam chu hawi in, "Hickock a a ni tih ka hriat chian ve hma chu Bond a lam ah ka la thap tho vang," a la ti ve fan mai cheu a. Putar a chuan, "Ngawi teh ka nau, ka thusawi chu dawtah i ngai talh dawn anih chuan i sawi fel nghal a ngai ang. I pian hma kum tam tak liam tawh atang khan Hickock a hi ka lo kawp tawh thin a, mahse tun tumah kha chuan min hmuh ve kher lem loh avangin engmah ka sawi ta lo chauh anih kha. Ka mit hian khua a hmuh theih tek tek chhung chuan ka thianpa Hickock a hi zawng ka hai ngai lovang," tih pah chuan a ding chhuak ta nghal a. Mahsela Black Bond a ranzia sawitupa lah chu diau duh bik hek lo, a rawn ding chhuak ve ta a. An aw ki chu a ring dunin silai chuh pawh an hnaih ther ther hman tawh kher mai. 

Mahse chutihlai tak chuan Benvo khaw Marshal chu Hickock a silai ri avang khan saloon chhungah chuan a rawn tek lut ve ta nawlh mai a. Chumite pahnih in dinchilh mekte a rawn hmuh

chuan a pistol a rawn phawi nghal a, an awmna lam rawn pan phei pah chuan, "Nangni pahnih kha Jail bang zut in duh loh chuan awm hle hle rawh u," ti in a rawn vau ta a. An ni pahnih pawh chu an thu a nep bakah Jail bang zut kher kher chu an chak fahran lo bawk a, thuawih tak chuan an thu thla veleh ta ruai ruai a. Chutia boruak a han daih leh tak duk avang chuan saloon chhunga awm ve dangte pawh chu an thaw ve leh ta huai hlawm a.Thuneitu aw tih miten an hre lovang tih hlau ni awm fahrana ring hian Marshal chuan, "Ka rawn lan hma lawka silai puak ri ka hriat kha tu kah nge ni.?" a han ti lung lung a. Mahse tumah chuan Marshal zawhna chu

chhan tum awm pawhin an lang hlawm lova. Putar a bawk kha rawn ding chhuak lehin, "Marshal, hriatchian i duh anih chuan a rik hlim chhawn khan rawn lan vat tur a lawm. I office awmna a hlat lohzia lah kan hre tlang theuh si a; mahse i hre duh tak tak anih

chuan ka han hrilh ang che. I pu Black Bond a uipa Duck Hilden a kha mikhual pakhatin uipui rai lai ang mai in a rawn tlawm ta der mai anih kha. Anmahni ang bawka nunrawng chu nisela i pu uicho Buck Hilden a kha zawng hremhmun ban hman loh hlauvin a thlarau pawh a thlawk

vawn vawn tawh ngei ang. Chu mikhualpa hming chu ila hre duh cheu anih chuan ka han hrilh ang che- I

Black Bond a ai pawha a let sawma rang zawk mah tur Wild Bill Hickock a ni e. a ti ta siah siah mai a. Hickocka chu a chhuang hle a ni tih a tawngdan atang pawh chuan a hriat theih mai a. Chu bakah Benvo pa hausa Black Bond a. I pu. a han tih siah siah mai te chu tih ngam awm loh tak pawh a ni a, mahse a sawi hreh chuang hauh lo a ni. Chutiang kher khera deusawhna tawngkam chu Marshal chuan tuar har a ti rilru hle mai a, mahse Putara Sawi ang zawng zawngte chu a dik miau si a, buaina siamtu chu tunge ni ang tih pawh a hre reng a, mahse Duck Hilden a banrek thi hnuâng mai leh puakruk pawh pai lova rawn chhuak ta mai a hmuh khan chutiang taka lo sawisa theitu chu va vaudaih mai mai chi ni thei dawnin a ring lova, va intih mualpho hrep ai chuan chu Duck

Hilden a sawisa tupa rawn chhuah hun awm chu a nghak a, a chhuah tak hnu lawkah saloon ah chuan a rawn pen lut ve ta chauh a ni. Duck a sawisa tupa chu J.L Ranch atanga a rawn haw tauhna chhan pawh kha a ni ngei tih

pawh a hai lo. Chu putar chu haw hle mahsela eng han tih theih nei ta si hek lo, Jail ah han khung ngawt dawn sela a khungna chhan turah chuan Benvo khaw mipui reng rengin thiam an chantir thei dawn hauh bawk silo!

Tawngka tala han hnehsawh ve deuh tum chuan. *"Kidney, i tawngkam hlei hluak tak kha cheh fo tawh lo deuh turin fimkhur rawh! Chuti lo zawng tawng leh tur i awm tawh lo mai tur a nia," ti in a han vau ve leh khu khu ringawt a. Mahse Kidney a lah chuan a lo ngai pawimawh lo nasa mai si a, nui hawk hawk chung hian, "Marshal ka hriat tawh azawngah chuan i la nep ber hial awm e.Putar keini ang tuan fum tawhte chauh hi min vau ngam mai anih awm hi maw? Silai hum sa zawk i ni bawk a, i duh phawt chuan min han kap ta che, kei hi zawng dam rei tur pawhin ka in beisei vak tawh chuang hleinem! Min khaihlum hlauh erawh chuan i Marshal nihna arsi lem inbel kha chu i kawr awmah khan a in bel reng kher tawh lo mai thei a ni," a han ti let veleh ta khauh khauh mai a.Marshal pawh chuan han chhan leh zel ngaihna

vak hre tawh chuang hek lo, amah deusawh taka lo melh rengtute bulah chuan awm reng pawh nuam a ti ta bik

lova, "Kidney, tun tum chauh chu ka la ngaithiam ang che. A leh pek a awm chuan i nui tawh lo chiang viau ang," ti nuah nuah pah chuan saloon kawngka lam chu a pan ve ta daih a. Nuihzat fahrana Marshal chhuak tur han then khum hak hak pah chuan, "Ka rin ang chiah, i dawihzep zia hi chu ka hrechiang a lawm," a han ti zui ve leh hram a. 

A ni reng bawk a, he putar Kidney a hian Marshal Tim a hi chu englai mahin a ngeih thei ngai reng reng lo va, Black Bond a, he Benvo khaw pa hausa leh chalak ber maite nen an in ti thiam riau mai tih a hriat phei chuan a ngei hluah hluah tawh mai a; hetia han hnial buai leh a thinrimna han siam sak vel te pawh hi nuam a ti ve hranpa reng reng tawh a ni.