Bung-8

 Texan pa chu zan thla êng dul ruih mai hnuaiah chuan kal zelin a sakawr Black Nill chuan Canel Plane lui kamah chuan a kalpui thoh thoh zel a. Chu Texan pa chuan Marshal hmel atanga thil tam tak lo lang a hmuhte chu a han ngaihtuah let leh nauh nauhva, Rustler pakhat an khaihlum dawna khati tak maia rem a han ti lo bûr thei mai te kha mak a ti em em a ni. 

Marshal tumahin Rustler an man te khaihlum rem ti lo an awm pawh a lah hre ngai si lova; Chuvangin hemi thilah hian Marshal kha engemaw chenah a inrawlh ve reng mai thei a sin! Mahse, chu erawh zawng hun in a la rawn herchhuah pui mai dawn a lawm' ti te chuan a ngaihtuah zui rauh rauhva.

 Chutianga mûk taka a kal bauhb lai chuan a hriat mang loh lai in Rustler pakhat an khaihlumna  hmun kha a lo thleng der mai a. An Rustler khaihlum pa pawh chu a ngai ngai in a lo la inkhai uai zuar mai a. Chu thing awmna chhak

lawkah chuan lawn chhovin hmun biru deuh laiah chuan a sakawr atanga chhukin saddle chunga komol inzial chu a la thla a, a tul thuta a tlan leh daih mai theih nan a jeans erawh chu a hlip thla tel duh ta lova.

A sakawr khela han ben sak taih taih pah chuan, "Black Nill, hmun biru lai ber tura awmin i duh leh chawte va pet ta la, ka rawn koh veleh che erawh chuan rangtakin helai hmun hi i rawn pan leh thuai dawn nia," tiin a han hrilh sup a.

Chutih pah chuan Saddle sira Rifle a thawlh luh ran chu a phawi a, ngawi rengin Black Nill pawh chu a inher liam ve ta nul nul a. A pu Texan pa chuan chuti maia hmuh awlsam tur chuan a in pho lang duh hauh lovang tih pawh a hre mai a. 

Thut hmuna sikret tlawn hnih a han zuk leh vang vang hnu chuan a komol chu leiah a phah a, a kuta pistol hum reng chung leh a Gunbelt pawh phelh chuang lo chuan a mu ve ta thun a; fimkhurna thlahdah loh hi a thupui a ni ringawt reng tawh mai a ni.

A tuk zing khawvar rual chuan Texan pa mutui em em lai chu hlauhawm lo thleng tur engemaw hriatlawk theihna tha tak a neih chuan a rawn kai harh ta hlawl mai a. Thawh phan pawh nei hauh lo chuan a rawnh nghal kawk a. A mit leh beng hriatna chak tak mai chu hmangin a kiang vel melh kual ruai pah chuan ulukf thawm chu a han ngaithla leh ta vang vang a.

 Amit chuan thil rinhlelhawm tur engmah hmu hauh lo mah se engvanga rawn harh hlawl nge a nih chu a benghriatna chuan a rawn hrilh ta thuai mai reng a.

A piah lawk ngaw kara sakawr ke pen rawn ri khap khap chu tudang nge ni thei ang? Rustler hovin an thianpa bo ta daih chu an rawn zawng a, chumi rual rual chuan an tawm kuk hmun hmuchhuaktu chuan midangte a hrilh pun zel hmaa rawn dahthat hmak an tum a ni ang tih chu hrilh ngai hauh lovin a hriat sa theih mai ah  Texan pa chuan a ngai a ni.

A komol chu a zial fel nghal vat a, a Rifle chu a han  endik leh zung zung a. Chutihlai te chuan sikret han pak talh talh pawh a chak rilru hle a, mahse chutiang ang zingkar boruak thiang tha takah chuan sikret han zuk nam rum rum zawng a hun loh lai tak a ni tih pawh a hrechiang em em a. Sikret rim chuan thui tak thlengin fan thei dawn a ni. Chuvang chuan chak rilru hle mah se a thiltih tur avang chuan a in thunun ve hram hram a ni.

Texan pa in a thlir vuah vuah lai chuan ngaw kar atang chuan sakawr pasarih lai mai an rawn in zui chhuak ta tham tham chu a hmu ta a. Sakawr chung chuang hmasa pahnihte chuan uluk fahran hian lei lam chu an bih reng a, engnge an bih reng nachhan tih pawh Texan pa chuan a hrechiang em em a ni.

A Winchester Rifle ngul pawh khaw êngin a rawn chhun zawnga tle hauh lo turin thinghnah chikhat hmangin a lo hru dum sa vek tawh a. Vawikhatna ah chehman eih lo tura a thal hman vek loh vek pawha tanhmun siamdan tur te chu a chhut ru nauh nauhva. 

Rustler ho lah chuan min changtu an awm tih inhre hauh lo chuan phul hmun chu kal pelin Canel Plane lui kamah chuan an rawn chhuk thla zel a. Texan pa in a lo channa zawn an rawn thlen tak meuh chuan an hmahruai pahnihte chu an rak ta that mai a. Engvanga rak ta teh thawt nge an nih pawh Texan pa chuan a hrechiang em em mai.

 A Rifle chu kap zawt thei mai turin a darah chuan a han chhuang kawh va a, chung Rustler ho awmkhawm deuh hun chu a nghak ta ran mai a. Rustler zinga pakhat chuan a pistol chu phawi in an thianpa thing zara inkhai uai nual nual lam chu tinin a nghawnga inkhaina hrui chu a kap chat ta hmawk a.

 Chumi rual deuhthaw chuan an chhak lawk tlangpang atang chuan Rifle a rawn puak ta zawt zawt mai le!. Chuveleh Rustler ho zinga panga lai mai chu an sakawr atang chuan an tla thla nghal hlawl hlawl mai a. Chutihlai in pahnihte erawh chuan an sahimna zawngin an sakawr chu an tlantir nghal puat puat bawk a. Thlarau sual hmu pawh nisela chutiang bak bak chuan an nasa tawh chuang bik hauh lo ngei ang le!

 Ngaw lam pang hawi zawnga Rustler pahnihte tlan mek lam hawi chuan a Rifle chu a han tin kawh leh vang vang a, vawikhat chiah a han hmet puak leh ta thuai a, chutah Rustler pakhat zawk chu chiang fahran mai hian a sakawr atang chuan a eu leh awrh a, a taksa in phul a zuk den meuh chuan a thi chiang hman hle tawh a ni ngei ang, che lo chang lo chuan a thal hlen nghal der mai.. 

Rang zet mai in Texan pa chuan a Rifle chu vawi khat dang a han hmet puak leh ta thuai a, Rustler pakhat la tlan par par mek chu a tukkhumah tak mai Winchester mu in a han verh leh tak sat ah chuan a bu lawp a, a sakawr atang chuan a let thla ve leh nghal tawl mai a. Mahsela a ke bawr chu a sakawr jean rah chhanah chuan a tan tlat avangin tla thla mai thei ta hek lo, a sakawr chuan a hnuk zui ta chiam mai a, ngaw chhunga a hnuh luh thlengin Texan pa chuan a thlir zui vang vang a. A silaimu avang khan thi lo ta pawh nise a sakawrin khati taka a hnuh avang tal pawh khan a thi chiang hle tho vang tih chu a hria a ni.

Muang changin a Rifle mu chu a han thun khat leh te te a, chutah a mi kahhlum takte ho ruang chu endik turin a komol khai chung chuan a pan thla ta chhat chhat a. 

Chungho bul a zuk thlen thlak chuan an lo thichiang hle hlawma a hriat avangin kir leh mai tumin a sakawr Black Nill chu a ko ta a. Black Nill pawh chuan a pu aw a hriat veleh a bihrukna hmun atang chuan a rawn dawkchhuak nghal pur pur a, a pu bul a rawn thlen chuan ding ta chut a. A sakawra lawn mai a tum lai chiah chuan thil engemaw han phe zauh chu a mit sir chuan a hmu ta hlauh mai. 

Chuveleh laklawh awm map lovin a vir leh ta zawk a, a bawk phek nghal thlawp a. A bawk fel hman awrh tih chuan pistol hi a rawn puak dawt a, a lu chung lawkah chuan silaimu chu a rawn ving phei ta thiak mai a. Chu pistol rawn hmet puak leh ta maia chu thi tawh ni ngeia a hriatte zinga mi kha a lo ni reng mai a, a thi teuh ther ther kher mai! A vanneihna chiahin a la hum a ni mai awm e.

 Chuveleh ani pawh chuan rang lutukin a pistol chu a han pawt dawk ve ta zawk a, a lam hawia pistol rawn tin mêktu chaldar ah tak chuan a va kahsak ta siah mai le! Chu silaimu avang chuan Rustler pa chu a kang âwk a, thluak per chuai khawpa a lubûr rawn verhtu silaimu chu dam chhuah pui chi rual a ni tawh lovang tih hriat zet hian a ke te chu awmze nei lek lo chuan a khawng a, a khur zui ta ngawt ngawt a. Second hnih lek chhung chuan a thianteho kalna hmun boot hill lam pan tur chuan a liam veleh ta tho mai le!!

Texan pa chuan a kekawr leh kawr vela vaivut kai paw ther thur han ben fai thawk thawk pah chuan, "Black Nill, tlema tlemah putu kan in mangtha thelh a lawm le; A...nang teh reng pawh chuan engtia engmah i lo hriat lawk bik hauh loh theih chu le? Mahse thih zawng kan thi ta em lo a lawm," ti in a thian neihchhun Black Nill chu a be mawlh mawlh a, a sakawr pawh chuan a lu alo thing ve nû nu a.

A komol chu saddle ah chuan a phuar bet leh ta mawlh mawlh a, a pistol mukhat kah ruah tak pawh chu thunkhat leh nghalin in thazo fe hian Black Nill chungah chuan a in vawrhkai ta nawlh a, J.L Ranch lam pan chuan an kir leh ta a.

"Black Nill, tun thleng hian a vannei zawkah chuan kan la tang zel rih chu a ni a, kan vanneihna in a daih loh hunah chuan khamite ho chan ang bawk kha kan chan tur a ni ve mai dawn a ni. Nimahsela beiseina i han ti sang viau rih phawt mai teh ang aw," ti in an kal pah chuan Black Nill chu a be pah mawlh mawlh a.. 

J.L Ranch In a va thlen leh chuan tukthuan ei hun vel hi a lo ni tawh a. A sakawr tlan ri tak tak thawm chu hria in Deputy Sheriff pahnih leh Bat a leh Fredy a te bakah Jonathan a te chu pawnah an rawn chhuak vat a. An hmel atang ringawt pawhin Texan pa an hmu chu an lawmzia a hriat theih a ni.

"I sawi ang ngeia i rawn kir leh kan rin avangin tukthuan ei tur pawhin kan lo la nghak che a sin," tiin Jonathan a chuan a lo be hmasa a. Texan pa erawh chuan, "Khawiahnge Marshal hi" ti in a lo zawtlet ve daih thung a.

 "A sawi tak ang khan tukin zing khawvar rual rual khan a chhuak nghal a, Benvo khaw lam a pan ta aniang chu kan ti mai a?" ti in Jonathan a chuan a lo chhang a.

"Chuti anih chuan a tihzia hlauh a ni mai a lawm; Law man ka hmuh tawh a zawngah chuan a ngaihdan ala danglam ber hial awm e. Law man tupawh mai hian Rustler hote hi chu an phu tawk anga hrem hmiah zel mai hi an duh mai thin emaw ka ti a, a ni ve kha chu a dang riau a ni," tih pahin Texan pa chu a sakawr atang nghal chuan a chhuk thla ve a. 

Chutah midang zawngte chu choka lamah chuan an lut ta a, Jonathan a leh Texan pa erawh chu Ranch an in zui chho ta thung a. Chhawng chung lam panin an pahniha eitur tuk thuan chaw Minky in a rawn pek chu tui ti taka ei bawrh bawrh pahin Jonathan a chuan. "I lawm loh zawng sawi chu ka duh bik hauh lova, rem i tih chuan i hming pawh kan la hre lova, koh ngaihna che pawh hi kan hre hek lova, min hrilh theih chuan ka lawm khawp ang," tiin a zawt ta chawt a.

Chutah zawng Texan pa pawh chu a nui ve ta hawk a, inthiam loh hmel deuh chuan, "Aw. a ni teh tak e a, kan inhmuh tirh atang khan lo hrilh tawh tur che hi ka ni a, mahsela i la hre mai ang. Ti ta daih ila bawngrual  eng zat vel nge i neih ang?" Jonathan a zawhna pawh chu chhang ta chiah lem lo chuan a han ti leh ta daih a.

Han zawh chhen pawh sawt dawn chuang a a hriat loh avangin Jonathan a pawh chuan, "An vai chuan sanghnih te chu an la tling ngei chuan ka ring. Tun hnaiah kan chhiar rih ta hauh lova, bawng sangthum vel neia kan in hriat lai in Canel Plane lui tuia tur a rawn luan tel tak chiam avangin za tam fe chu an thi ta phawk phawk mai a, chu bakah engemaw zat Rustler hoten min ruksak bawk nen, chung bak zawng chu tuna kan la neih chu an ni tawh mai," ti in a han chhang a.

"Tûr a ni? Engnge chu chu a awmzia? Miin an rawn chah/ hrai i tihna nge ni a, vanduai thilah a rawn awm ve ngawt mai em ni zawk?" tih pawhin Texan pa chu mak ti hmel tak chuan a hawi ka ta ho mai a. 

An chaw ei lai pawh chu a chawlhsan phah ta hial nghe nghe a. Jonathana pawh chuan thil kal tawh leh thil thleng vel zawng zawng chu Texan pa hnenah chuan a hrilh fai ta vek mai a. Canel Plane luia tur rawn luang tel paw nguih nguih mai a nauteho nen lui hnâr lam pana an chhui a, a tawpa ip lian tham taka in fun lung ang mai, tuia lo inchiah luau luau an hmuhchhuah tak te chu a hrilh ta mawlh mawlh a.

 A thusawi tlang kawm nan chuan, "Chutiang tehhrep chu kan chunga vanduaina lo thlen dan chu a nia, chuvangin ka tan mai pawh ni lo, ka fanu Lori tan hian chung Rustler hote chu ka nuai chimih vek an tul a ni. Mahsela chutiang ti thei tur chuan keini chuan tihtheih kan neih tlem zia pawh a lang vek tawh a. Man chhuah tuma chhuak kan naute thenkhatin an thih phah tak dan te, a vawihnihna a Marshal ho meuhva an kal pawha an lo man leh vek dan te ka ngaihtuah chuan ka bei a dawng em em tawh lawi si a. Chuvang chuan nang ang mihring tan chauh lo chuan engtianga han tih leh zel tur nge tih pawh ngaihtuah phak beiseina awmchhun chu nang chiah hi i ni ta mai a, min puih theih dawn phawt chuan hlawh lam chu i duh zat zat.. "

A la sawi lai mek mek chuan, "Min sawm hma atang daih tawhin puih che hi ka duhin ka thawk chhuak daih tawh a ni zawk a. In hriat lohvin ka lo chhui ve chiam chiam tawh zawk a, chutia ka chhui zelna avang chuan an tawm kuk hmun pawh kha ka va hmu chhuak ta reng a ni. Hlawh lam pang chu ka phut hauh lova, ka hman tur ka mamawh tawk chu ka nei ve e. Mangangte tanpui hi nuam ka tih zawng a ni ve hrim hrim a, eng nge kan an dawn phei zawng hriat a la ni lova, hunin a la hril mai dawn a lawm," a lo tih khalh ta zung zung a.

 Chutah Texan pa vek chuan han sawi zawm lehin, "Nichin khan samkhuih leh Spanish sikret tih ang reng vel te kha i sawi ri zauh khan ka hria a...?" ti in hriatchian châk hmel tak hian Jonathana chu a han melh pah hâ a. 

A hmelah chuan phûrna dangdai tak a rawn lang chhuak bawk a. Amah tanpui inhuam em em tu Texan pa, palianpui mai chu a hming pawh la hre lo mah se a ring tawk em em  nghal a, a thla pawh a muang huai a ni tih chu a hmel hlim suah atang chuan a hriat ngawih ngawih a ni.

Jonathan a chuan, "Ni e, kan naute lo haw har ta lutuk chin chang ngai changa ka va chhuah tumin ngaw chhung ah chu chu ka va hmu ta a ni. Chung Spanish sikret zu tute ngei chuan ka Foreman Jim a leh Snap, Ted, Rollen leh Bento te pawh an lo that ta a ni," tih thu a han sawi rik meuh chuan a hmaa a hlim hmel suah pawh chu thinrimna in a rawn thlak leh ta thut a.

Texan pa chuan, "A tha e, mi fimkhur thei tak te pawh hian engemaw tak hmaih palh hi chu an lo nei ve leh zauh bawk thin a ni. Chu thil chu nakinah min la pe ang che aw.? Naktukah Benvo khua ka va tlawh ang a, a tangkaina pawh hmuh chhuah tur ka va hre mial mai thei a nia. Chu bakah kan Marshal mak dangdai tak pawh kha a hma lak zel dan ka va thlir pui ang e. Kan beisei ai pawhin a lo fing phian mai thei asin," a han ti duam duam a. Chutah chaw ei dawhkan chu a thawh san zui ta nghal a. 

Tukthuan an eikham chuan sikret man to tak chi hi Jonathan a chuan a rawn phawrh a, "He sikret hi han zu ve phawt teh. Sawi tur pawh tam tak ka la nei a, hmanhmawh thlak tur engmah a awm loh hi, han zu ve muang chang phawt rih teh?" tiin Texan pa chu a pe a, amah pawhin tlawnkhat chu a tankai ve nghal a.

 Texan pa chuan Jonathana sikret tanna lighter chu la in phawk lêk tak chuan a bih ta vung vung a. Jonathan a ngei pawh chuan Texan pa thiltih dan chu mak a ti ve hle tho mai, "Kha lighter kha i hmuh tawh hnu a ni elo? Tha ve tak a ni reng a nia," a lo ti thuai a. Engdanga chhang lovin Texan pa chuan, "Calvalry sipaia ka tan ve lai in kan Battalion Commander Mc Ronald an hetiang ang chiah lighter hi a hmang thin a, chu chu ka 'n hrechhuak zawk mai a nia," ti in a lo chhang a. Chutah Jonathan a hmel chu a phawk leh zual a, "Z" Battalion Calvary sipai i ni tawh thin a maw.? Kei pawh chu Battalion ah chuan M' Troup Captain ka ni ve thin a, nang khawi Troup ah nge i awm ve a.?" ti in Texan pa chu a zawt ta hluai a. Texan pa pawh chuan, "Ka hria che asin, Captain turu tak leh ralrel thiam berte zinga mi i ni tih pawh ka hre reng a, mahse hriat ang zawng zawng han sawinghal vek mai chu ka duh lem loh avangin ka hriat thu che chu ka la sawi lang lo mai chauh zawk a ni. Kei hi chu C Troup ah Captain ka ni ve thin," ti in a in sawi ve ta a.

Chu veleh Calvary sipai Captain hlui ve ve han in hrechhuak ta chu Army ho chibai in buk ang ngei in ke per meuhvin chibai an han in buk tha leh ta a. Chutah zet zawngin Jonathan a hmelah chuan hlimna sawi hleih theih loh khawp arawn lang chhuak ta a ni.

 Jonathan a chuan ama tawngkam ngei pawh mak a la ti cheu awm mang e tih tur khawp hian., "Eheu. Captain Wild Bill Hickock, kan va han in hrechhuak har deuh ve le! Hmelma te dan beh leh suat mang ngawt ngaihtuahin Battalion khat a mi ngei pawh kan in hmu kim hlei thei hlawm lova, i hming leh i hnathawh hi chu Commander khan min hrilh ngunin i chetdan thin te lek phei chu a fak thei teh mai che a sin! Nang ang reng renga pistol phawirang leh kah thiam, huaisen bawk si phei hi chu ala hmuh ngai loh thu pawh a sawi cham chi thin nghe nghe asin," phur zet hian a ti sauh sauh va.

 Wild Bill Hickock (Texan pa tih kha 'Hickock' tih hlirin kan sawi tawh ang.) chuan, "Chu em em zawng a uar lu deuh ani ta ve ang.  Kei aia huaisen leh tuantha hi zawng an tam hle ngei ang." ti in a han tlip ve vat a.  Amah an fakderna ri hi ngaihthlak nuam ati fahran ngai lo thin reng a ni.. 

Amah Hickock a vek chuan, "Sawi hnawkna tur remchang takte i hria anih loh chuan Benvo khua ka va tlawh chhungin nangnin Bawng rual hralh tur in neih ang zawng zawng chu lo khalh khawm ula, tichuan Benvo khua ah chuan hralhna tur ka rawn ngaihtuah pah anga, nidanga in hralhna thin Santio chu tun tum atan chuan a hla lutuk hret a ni.  Buaina lian tham tak kan hmachhawn tur hi bawngrual nen, chhangchhe tak chunga lo hmachhawn mai chi ani dawn hauh si lo a ni," ti in remruatna ang reng deuh chu a rawn phuh chhuak ta zung zung a... 

Jonathana pawh chuan hrethiam takin, "Tehreng mai Captain Hickock, i remruatna apiang chu pawm loh ka nei lovang.  Khua ah chuan keimah hi kal ka lo rilruk deuh a,"  a rawn ti ve thuai a...

"Engti tur in maw..?"

 "Naktukah khian ka fanu Relah a rawn thleng dawn a, chu chu lo va hruai angai dawn ani,"  a ti a.  Chu zawng ngaihtuah buai a ngai lovang. Amaherawh chu a hming min hrilh la, keiman ka rawn hruai haw mai ang e,"

"Lori Jonathan..."

Hickock a chuan Jonathan a pindan chu chhuahsanin Ranch tualzawl lam chu a pan thla ta a. A sakawrah chuan in thazo fe hian a in vawrhkai nawlh a; Ranch In bathlar atanga rawn thlir rengtu Jonathan a lam hawi pah chuan, "Naktuk ni tlak rual vel chuan kan rawn thlen hman ka beisei," tiin a han au lauh lauhva. Benvo khaw lam pan chuan a sakawr Black Nill chu a kaltir ta nghal a.

 Black Nill pawh chu phur hmel fe chuan a pen ta thoh thoh a. A lan theih chhung chu Jonathan a chuan a thlir zui vung vung a, chutah ama hriat theih tur tawk leka zawi sup hian, "A mize ngainatawm tak mai, aw dam thluam mai leh nuihmel pu thei reng mai si te kha aw! Ka mi ngainat zawng chu a va ni tak em! Kan Battalion Commander Mc Ronald an Wild Bill Hičkock a a lo ngaina viau kha chu a lo awm hle reng anih hi. Tunah zet chuan thla pawh a muang ta huai e. Gunman turu tak tak engemaw zat inhawrkhawm ai pawhin Hickock a hi chu a la turu fe zawk ang tih ka hre tlat a ni," a han ti chuar chuar a. Hickock a a tlan liam tak hnu chuan inchhung lamah a lut ve ta a.