Bung-5

 J.L Ranch ten buaina an tawh a, tam takin nunna an chan phah mek lai chuan J.L Ranch chhak lam, Minert an tih mai cheng ve, palian leh thothang tha zet mai, fit ruk leh inches hnih laia sang, dar pharh tha hlep hlawp leh ram sakawr pa ang maia chak leh zuan zang, rangkachak laih chhuah ngawt tuipui ni mai awm a bukkhuar meuhva rangkachak zawng thin pakhat chuan tunhnai mai atang kha chuan a hnathawh thin rangkachak zawn lam reng reng a ngaihtuah thei tawh bik lo.

 

   Uluk leh fimkhur em em hian J.L Ranch ho vanduaina tawh dan leh a chawk buaitute hnuhma chu alo buaipui ru ve miah miah thin a lo ni a. Amah chu hnuchhui thiam tak mai anih avangin J.L cowboy leh a anpuit miner tam tak ten phul hmuna hnuhma hlohva an buai an buai lai khan ani chuan buaina nei miah lovin thui tak thlengin a lo va chhui daih tawh a. Mahse chungho chu an finthiam em avangin an tawmkuk thleng chuan ala chhui chhuak thei bik hauh lova, beidawn mai erawh chu a la tum bik bau lo a ni.

 

   He thilah hian a lo buai ve na tur leh a tana hlawkna tur pakhat mah phei chu a hre hauh lova, mahsela mi mangang tanpui ngai ni a a hriatah chuan hlawkna lampang ngaihtuah hauh lova puih mai hi a chin dan fo a ni thin reng a. Tunah pawh hian a nunna atan pawh pawi in, a thihphah theihna hial tur thilah a inrawlh ve ngawt pawh a ni thei; mahse chawlhsan mai erawh chu a tum lo bur mai a ni.

 

      Misual hoten Marshal leh a hote an man ni pawh chuan zing khawvar rualin a tho thuai a, nitin thahnemngai taka a lo thawh ve na thin Miner tlangchhip chhuah chhoh dawn tepa a rangkachak khur neih ve chu tlawhinr a rangkachak laih chhuahna hmanrua zawng zawng te pawh chu a buk chhungah chuan a dah tha vek a. Rei tak

pawh a tlawh tawh lo mai thei a, a chawlhsan hmak tawh mai thei bawk tih hriain, a rangkachak laih chhuahsa a dip nawi  thenfai tawh leh a tlang lian vak lo palite pawha chu a fun tha a, a sakawr saddle bag ah chuan a khung tha ta hmiah a.

 

            Thil tul ang zawngte chu a peih fel a, buk kal chhuahsan theih anih meuh chuan tukthuan ei pawh a lo hun ve leh der tawh a. A hma zana a lo siamsa chhangper tlem leh sazupui sa kan ro chu a han ti lum a, coffee sa tha ver vawr tak a siam bawk a, tui ti tak chuan a keih bawrh bawrh a. A ei kham chuan sikret a zu a, engemawchen chu a han chawl leh vang vang rih a. Chutah kal mai inpeih at in a sakawr chungah chuan a lawn kai ta a.

"Black Nill, tlangram boruak hipa tawm chawrh chawrh reng mai hi i ning ve tawh lo maw?" tiin a sakawr chu a be mawlh mawlh a. Black Nill pawh chuan a pu thusawi chu dik ti ve hle ni awm takin a lo bu ve loh loh va.

 

       Hmanhmawhna pianpui ve hauh lo ni mai awm hian chu pa chuan a sakawr chu Canel Plan lui ruam lam pan chuan a kal thlaktir ta chhut chhut a. A thil tih tur hlauhawm zia chu hre chiang hle mahse a hmelah erawh chuan huphurhna emaw, hlauhna emaw pakhat mah hmuh tur a awm lo reng reng thung. 

 

     Canel plane kam a zuk thlen thlak chuan khawchhak lam hawiin a zawh chho ta ngat ngat a. A fimkhurin, langsar lo thei ang ber tur laiah zel Black Nill chu a kaltir a. Black Nill chu sakawr lian leh tha chak zet mai nei a ni bawk a, darkar khat lek chhungin J.L. cowboy pali leh an Foreman Jim-a te thihna hmun phul chu an thleng ta thuai a.

 

       Helai hmun a rawn thlawh hmasak ber tuma misual pawlho hnuhma a chhui chhuah dan hautak zet maite chu a han ngaihtuah let leh a. Chu phul chunga phaitual hnim hring dup mai chu rawng danglam deuh bik lai a awm a, 

midang te pawh khan chu phaitual hnim hring dap mai kara phaitual hnim rawng danglam deuh bik, Nisa lutuk em tuar lova ro nimai awm chu an hmu ve theuh ang a, mahse phaitualhnim ro satliah mai chu han rinhlelh ngaihna reng reng an hre lo ni ngei tur a ni. Mahse chu Texan pa erawh chuan chhinchhiahna leh sakkawr hnuhma ang thova pawimawh anih theih a ring tlat a; a rin ang ngeiin a fiahna pawh a hmu ta thuai reng a ni.

Chu phaitual hnim ro that mai chu hmun khatah chuah ni mai lovin, phul hmun a in tan phat atanga ngaw thleng chuan awmze nei zat, zik-zak deuh tak si hian a inzam phei zar zar a. Ngaw bul hnai tak, phaitual hnim pawh a chhah deuh bikna laiah chuan buhpawl kuang pahnih tawi te te, sikret tlawn chen vel chauh tur hi a lo awm a; chuta tang chuan misualho thil tih dan tur awmzia chu chiang taka hre ta ah a in ngai hmiah mai a ni.

 Misual hovin ngaw an pawhna lai chu chhuitu tan pawh a rinawm loh ber lai tur ngeiah hian a ni bawk a. Phaitualhnim chunga an sakawr rahna hnu reng reng chu buhpawl kuang chilhkhawm hmangin an hru reh leh dap zel a. Phul chunga an kal danah pawh chuan uluk leh hnuhma thup tur tlem thei ang ber chi zelin an inzui thliah thliah thin ngei ang tih pawh phaitualhnim an hruk ro sil sel zimte avang chuan a ring thei mai a. Delhtu leh khawihtu nei ve lo phaitual hnim te chu an hring duah hliah vek a, misualho zawh bik kawng ruk erawh chu an chhuahlam leh haw leh lamah pawh buhpawl chilhkhawm hmanga an hrut tawn chhen thin avangin a lo rophah ta bik a ni tih pawh a hre thei ta mai a ni.

    Chutiang hlir a ngaihtuah lai chuan ngaw chhung ril tak a lo lut hman tawh a. Sakawr rualkhat hnu a hmu chu ukul tak leh chik zetin Black Nill dintir meuh chuan a han bih a. Chutah zawng a hmelah maktihna pawh a lolang chhuak ta nghal a.

"E heu, kan sa chante chu an lu a haiin, an thluak a buai zo ta em ni? Nge ni, bengvar chhuaha hma thar lo la ve an awm zawk? A engapawh ni sela, vawiin ni atana he ngaw tlawh hmasa bertu hi zawng ka ni tawh lo phawt mai" tiin a han hawi he haw a.

 A sakawr nghawnga han chulsak thuak pah chuan, "Black Nill, rin loh deuh thil han hmuh thut hi chuan naupang chhia ang mai kan ni thin alawm le; kei ang bawkin nang pawhin hnuhma tharlam chu i beisei bikloh thil a ni tih i hnar chakpui mai i han len vel dan alang khan ka hria alawm," tiin a han be leh mawlh mawlh a. Black Nill pawh chuan a pu thusawi chu hrethiam ve kilh kelh nimai awm hian a lu chu a lo bu ve thloh thloh a. A pu duhdan chu a hre sa lawk vek emaw tih mai  turin sarual hnu tharlam kalna hnuah zel chuan per rin lutuk hlau ve awm fe chuan a pen ta zut zut a. Ngaw chu chhuahsanin kawr ruam biboh tak tak leh awihtlan pial vit vet te chu an kalpel zel a; mualdung pakhat chu zawhin khawchhak lam hawi zawng chuan an kal ve ta zel a.

 Chu Texan pa chuan a sakawr Black Nill' tia a koh thin chu vawi tam tak hnuchhuinaah a lo zirtir fo thin tawh avangin chung an hnuchhui lai pawh chu a buaipui ve chiah thei zel a ni. A tih ve ngai hauh lovin Black Nill chuan chhui dik mah sela, mualdung atanga kawr ruam an pan thlaklai chuan Black Nill chu a ding ta chut a; rang tak leh hmuh hmaih nei hauh lo tura ngun thlukin chu Texan (Texas mi) pa chuan an din na lai thing tuai hmun vel chu a han melh kual zung zung a. A kutbawr chu a khela .38 Revolver pistol kawm hnaih takah chuan a tul phawt chuan rang lutuka phawi thei mai tur hian a thlak thla reng bawk a. Rinhlelh tur leh ngaihthat lohna tur thil a hmuh tak loh avangin Black Nill chu kaltir leh mai a han tum a; mahse Black Nill chu kal mai duh ta lo chuan ter ut ut ta mai a ni.

 

Will Bill Hickock chhan leh vang awm lovin Black Nill chuan a pu thupek a zawm lo hauh lo vang tih chu Texan pa pawh a chuan hrechiang hle. Kunh meuhva hnuhma chu a han bih chianzet chuan Black Nill-in a thupek a zawm loh chhan chu a hmu ve ta nghal thuai a.  Chutah leiah a chhuk thla ta a.

       An chhui tantirha sakawr pali-panga hnu vel nisi kha chu  an dinna lai atang chuan sakawr dang pali hniak hian a rawn belh ta tlat mai a. Chuveleh Texan pa chu phur zet hian a rawn zuang tho leh ta a, a vel chu ngunthlukzet mai bawk chuan a melh kual leh ta zung zung a. A dinna atanga Yard sawmhnih velah chuan thingtuai hung khat, buk chhah deuh bik laih mai hi a va hmu a, chumi lam pan chuan fimkhur tak chungin a pen phei ta thauh thauh mai a ni.

Chu thingtuai buk bul a va thlen chuan thil awmzia pawh chu a hrechiang ta nghal a ni. Pawiti awm fahhran chuan a han chek tlak tlak a, "Ka ring sual hle anih ngawt loh chuan J.L. Cowboy thenkhatte chuan an tawpna ni an hmuak thleng mek tawh ngei ang le" a han ti zui sap sap a.

An hnu a lo chhui mekte chu tudang ni lovin tanpui a lo tum mek, J.L mi leh sate sulhnu a niin helaiah hian misualhote zinga palite chuan lo changin an hruaibo ta a ni ngei ang tih pawh an hnuhma awmdanah chuan alang reng a. "A hun taka ka va pawh hman loh chuan he laia misualho pawl (Gang) inkulhte hian an tawm kuk hre tawh reng reng, nungdama chhuahtir leh mai zawng thil rinawm loh tak niin ka hria," tih mawlh mawlh pah chuan Black Nill bulah chuan a phei a, in thazo leh rang zetin Black Nill chungah chuan a invawrhkai ta nawlh mai a. Misualhoten an mi man an kalpuina hnuhma chu fimkhur lutuk tak mai hian an chhui leh ta zel a.

 

          Kawrte kam, fur laia tuiin a chimna hnu fai hluau maiah chuan thui tak an kal ngat ngat a. Hmunkhat laiah chuan awmze nei hauh lo leh thla neia thlawhsan tak daihna hnu ang maiin an hnu chhui lai chu a bo leh ta hmiah mai a. Mahsela uluk lehzuala a han bih chuan phul hmuna an tih ang chiah bawk khan an hnuhma chu an lo thup leh hi a lo ni a. Kawrte ațang chuan pengin an hnu chu hmarlam hawi chuan a chhui leh thei ta zel a. Kal pah chuan, "Ruah sur duh hun lai a ni lo hlauh chu kan vannei hle a nih hi Black, ruah tlemte pawhin an hnuthup tawhna hnu hi chu han nan chhilh sela chuan tupa mitmahin an chhui thei bik hauh lovang le, tiin a thian neih ve chhun Black Nill chu a han be leh mawlh mawlh a. Black Nill pawh chuan dik tive niawm takin a lo bu ve nghut a.

 

      An hnuhma thup dan pawh an uluk sawtin chu Texan pa tan ngei pawh chuan chhui a awl ai lo ta riau mai a. Mahsela hnuchhui kawngah ngat hi chuan Red Indian pasaltha elkhen pawhin an tluk loh, lawng kalna leh rul tlengna hnu pawh a chhui thei awm mang e, tih hial tur khawp anih miau avangin chuti maia han hloh mai mai chi chu a ni lovang. Chutitaka an hnuhma an thup uluk sawt avang chuan an tum ram pawh thleng tep tawhin Texan pa chuan a ngai hial tawh a. Tihsual palh zeuh pawh awm hauh lo tur ang ber chuan a fimkhur tak zet zet a ni. An hnu thup chu hmuh a awlai loh em avang chuan sakawr chungah pawh  chuang lovin ke in a kal ta hial a ni.

 

         Chutiang taka a fimkhur chung pawh chuan buaina chu a duh aia hma in a tawk ta tho tho mai!

Chik zeta hnuhma a bih ngar ngar lai chuan, "Ding rawh. Rifle kausa in ka tin reng che a nia," tia vauna aw chu a veilam

atang chuan a rawn chhuak ta tlat mai le!!

Chuveleh, rang lutuk tak mai hian aw lo chhuahna lam hawi chuan a han vir kual zawk a. Pistol chuh nghal mai tumin a ban chu a han vaithla nghal thuak a. Mahse chu a thil tum chu tihpuitlin loh a that zawk ngei a ring a, tha tak chuan a dingve leh ta zawk a.. 

 

    Pistol chu lo chuh sela chuan amah Rifle a tin reng tu chuan a Rifle chu a hmetpuak ang a, a ni pawhin a chhan let ve ngei a ngai bawk ang a, a thi zawkah tang lo hlauh pawh nise an silai ri chuan chulai ruam zawng zawng chu a luah khat anga, misualho tawmkuk chu a lo hnai viau tawh anih phei chuan a ti ralkhel zo vek ngei ang a, chu chu atan chauh pawh ni lo, va puih a tum J.L mi leh sate tan ngei pawh chuan a pawi thui thei hle dawn tlat a ni.

  Chu pa chu a bihrukna atang chuan a rawn pen chhuak ta thuai a. Texan pa awmna atanga fit sawmhnih vela hla ah chuan dingin, "I pistol kha a hrenna chawpin phelhthla la, helamah hian rawn theh phei rawh," ti in thu a rawn pe ta tlat mai a.

Texan pa pawh chuan thuawih takin a Pistol hrenna chu a phelh ve nghal mai bawk a. Chupa awmna lamah chuan a theh phei ta a. A ni chuan zei fu hian a lo man chut a, nui vur vur chung hian, "I sakawrah khan chuang leh la, 'Kal rawh' ka tihna lam a pianga kalthei turin inpeih rawh le; vervekna thil (trick) hman i tum anih vaih chuan helai hmun hi damin i chhuahsan hauh lovang," a han ti a.

 

       Texan pa chuan a rilru te te in 'trick' hman chu tum lo mah ila nung dama min chhuah zawng a rinawm loh khawp mai hi maw! Mahsela chutimaia thih chu ka la tum bik hlei nem; Harsa taka chhui buai ngai lovin in tawmkuk zawng min hruai thleng ngei mai dawn chu a ni a, a tawpna chu i rindan ang ngawt zawng a ni lo teh mai ang chu' a ti nauh nauh a.

   

        Rifle a tin rengtu in kalna tura a hrilh a piangah chu Texan pa chuan Black Nill chu a kaltir zut zut zel a. Rinhlelh kai lo thei ang ber turina ban chu saddle chungah chuan a dah chhuak reng bawk a. Mahsela Black Nill ve thung erawh chuan silai nena vil reng nih chu a ngaithei lo hle ni ngei tur a ni, a han ter leh ut ut thin a. A beng bulah a pu in eng thu emaw a rawn sawi sap hnuah erawh chuan thuawih tak chuan a kal leh ta zut zut a.

An kaldan kawng kikawi buai nuaih teh hrep chu mi naran tan chuan chhui zui leh theih tur khawpa chhinchhiah thiam pawh huphurh awm tak tur hi a ni a. Texan-pa chuan hmaih nei hauh lo chuan an kalna hnu chu a mitmei  ru ran reng zel a. Dama an chhuak leh anih ngat chuan chu an kalna chu an la chhawr tangkai thei hle dawn tih a hre tlat a.

 Mel khat chuang lai an inchhawm hnu chuan khua pawh a lo tlai tawhin Ni pawhin tlak tumin khawthlang

kawl kil a lo hnaih viau tawh nghe nghe a.

 Tlang kangin a leilung awmdan a lo khawih danglam mual pali lai indawt phei put, rualrem lo leh sakawr tan pawh chetsual palh hlauhawm tak hmun chu an zawh phei a. Mual tawp ber an thlen chuan an han ding a, Texan pa chuan thlanglam chu a han hawi thla a. Tuifinriat zau tak ang mai in

chhum chhat zet hian thlang lam ram zawng zawng chu a tuam hmuk mai a. Chu chhum chhah zet khuh mup hnuaiah

chuan luikawr nge, phaizawl nge, ngaw em ni ang tih chu Texan pa pawh chuan rin thiam harsa a ti hle a ni.

 Amah hruaitu chuan, "Mak iti hle mai maw? I zawn ber chu khu ngei khu a ni a lawm. kan thleng thla anga, tunai hian mak i ti zual zawk hle ngei ang," chapo ang reng tak chuan a han ti nghut nghut a. Chulai chhum chhah takin a tuam mup ram chu an tawmkuk awmna hmun chu niin, a chhuang hle tih pawh Texan pa chuan a hrethiam nghal  mai a, chuvang chuan chet hun a ni ta tih hria in remchang a melh ta ran mai a.

 An kalna laiah chuan thing hmuh tur pakhatmah a awm lova, a khat tawkin lungpui upa tak tak hi an lo ding leh luah thin tih mai loh chu a fai hun mai a ni.

 An hmalawk a lungpui lian tak tak pathum lo inchhawng lurh mai chu Texan pa chuan a melh ru pah zauh zauhva. Chulai hmun aia chetna tur hun remchang chu awmin a ring tawh lo bawk a, chuvangin chu lungpui chu a thlawna pelh liam mai mai a tum tawh hauh lo a ni.

 

     Chet theihna hun zawng le a hmu na meuh ta mai! Mahse amah tin rengtu Rifle chu vawikhat te pawh puak hauh lo tura chet a ngai tlat dawn si a, chuvangin a la che rihlo mai chauh a ni zawk.

 

      A awmdanah rinhlelh a kai mai loh nan, "He ram leilung hrep chu'h, ka sakawr pawhin kal a harsat hle a nih hi. A tluk palh hlauh chuan kan lum thui duh teh ang chu," a han ti bal bal a. Chumi pah chuan a pheikhawk keartui in Black Nill chu a han tai zauhva. A sawi zawh rual chiahin Black Nill chuan a ke hmalam chu a han tihniam nghal ve thut a. Ke chheh sual vanga tlu mai tur ni awm tak hian a han pai khut khut a. Texan pa pawh chu in dawm nghet hman lo niawm tak hian a ban chu a phar kual vel ta chiam a. A tawpah phei chuan a sakawr chung atang chuan a tla thla ve ta hial nghe nghe a.

 A thlang lawk lungpui pathum insir khup thleng chuan a lum thla ta tawp tawp a, Lungpui bulah chuan a bawk phek ta reng mai a. A kut ding lam chuan a theihtawka tamin lei chu a tham nghek a, Na ti lutuka rum ang chiah chuan a rum ta hlat hlat mai a.

 Amah Rifle a tin rengtupa pawh chu a ngaihna hre lo zet hian a kâ ve ta hau mai a. Rangtakin a sakawr atang chuan a chhuk thla ve ta a, hmanhmawh zetin Texan pa bawk phek thlawp reng lamah chuan a pen thla ve ta hmawk hmawk rohva.

Texan pa chu chuti maia thih tir chu a la duh bik lova, a chhan pawh an tawmkuk chhui chhuaktu, amah chauh lehnghala a man theih avang chuan Fog Land kulh (Misualho tawmkuk) lalpa, Killer-a duhsakna a dawng ngei dawn tih a inhre ve miau a ni. Mahse chu zawng mumang lam ram suangtuahna ang lek a ni dawn ta!

 A that mai dawn lo tih chu Texan pa lah chuan a inhre ve kiau tawh bawk si.

 

Texan pa awmna a zuk thlen chuan fimkhur thu hlaah Rifle a tinreng chung chuan a han en leh vung vung rih a. Texan pa chu hliam tuar che thei lo ni ngeia a lan tak  si avang chuan a Rifle ken lai chu lungpui bulah chuan a tung tha ta mai a. Tichuan chu Texan pa chu kaih zang thal tum chuan a pan hnai zual ta sauhva.

 Mahse Texan pa chu kaihthawh reng a lo ngai hauh i khaw lo mai le! Bumin a awm a ni tih a han inhriat zet chuan thil engkim a danglam zo hman ta si; Texan pa chuan amah pana rawn kal hnai chhut chhut chu hmu lo mahsela a rawn hnaih tawh dan awm ang chu a lo chhut thiam vek thova.

Rifle a tung tha daih tih a han hriat phei kha chuan hlawhtling tur angah inngai nghal tawhin a rilru tak chuan a lo nui ru vur vur tawh reng a ni. A bawh rengna atangar fit riat vel a rawn thleng tawh ang tih veleh chuan li nei ang auhvin a inperh tho ta lawp mai a. Chupa mit bawrvelah tak chuan a lei tham sa chuan a vawm ta chuai mai a, a lo rin ang ngeiin chu pa chuan a mita lei nawi lut tuar avang chuan engmah pawh ngaihtuah lo chuan a innuai ta chut chut rohva. Chuveleh rang lutukin Texan pa chuan a boot kara bakmeh chemte hriam lutuk mai chu a phawi dawk zawk a. Kar nei hman miah lovin chupa lamah chuan a zuang phei nghal dawrh a, a chemte humna a ban dinglam chu a han vaithla pawp a.

 Bakmeh chemte in chu pa dul a han tai tet zet chu a ri hrawih mai a ni. Chemte chu phawi in a thin hnunah tak chuan a han thilsak leh ta pawlh a; Chu zet tawh zawng, pa tuarfei ber tan pawh han dam khaw chhuahpui chi a ni ta lo. Lirnghingin In derdep tak a sawi chim ang mai in a sawp ta rup a. Awmze nei lek lovin a ban chu a han vai leh chiam a, Fog Land lalpa duhsakna nilovin a beisei tur la awmchhun chu Setana duhsakna chauh a ni ta!

 

       Texan pa chuan a bakmeh chemte a thisen kailuai chu chu pa kawr awmah chuan a hrufai nawk nawk a, a boot karah bawk chuan thlawlh lut lehin a chetdan lo thlir doh doh tu Black Nill a dinna lamah chuan a chho leh ta a. "Black Nill, i ti tha kher mai," tia fak pahin sakawr nghawng chu a han chulsak thuak thuak a. Black Nill pawh chuan a pu fakna ri chu a lawm ve ni ngei tur a ni, a ke a lo per ve uih uih a.

 A vihhlum tak pa sakawr saddle filawra ama Gunbelt ngei inbang hnap chu la in a hreng leh ta mawlh mawlh a. A hren fel hnu chuan a Pistol chu a mu a kim leh kim loh te a han en leh te te a, a pangngai thlap a la ni tih a hriat chuan Black Nill chungah a zuangkai ta nawlh a, an thlang lawka chhumin a bawh mup ruam lam pan chuan fimkhur takin an kal thla leh ta bauh bauh a.

 

       An hnaih thla tawlh tawlh a, chhum pawh chu a pan ve tial tial zel a, mual chhip atanga han thlira engmah an hmuhtheih loh kha phaizawl zau nuam em em mai awmna hi a lo ni reng mai a. Lungpui lian tak tak, fit sawmthum laia sang tur engemaw zat te chu an hmabakah chuan a lo in hung thluah thluah mai a.

Chung lungpui lian tak tak phenah chuan In lian fe fe pawh awm mahse pawn lam atang chuan han hriat theih tur chi ziazang ani hauh lo.

Chung lungpui hrulah chuan Black Nill chu a han pawtding ta a, thawm ngaithla in a han ding vang vang rih a. Tawngri  leh thawm dang engmah chu a hre hauh lo nain, meikhu rim erawh chu a hre ta tlat mai a ni. Chu lungpui piah lamah chuan mihring an cheng ngei a ni tih pawh hrechiang ta a. Chuta chengte chu engti mi nge an nih ang tih pawh rindan a nei thiam nghal mai a ni.

 

     Amah ang bawkin Black Nill pawh chuan meirim chu a hre ve a, a bengte chu a tun hru hru a, a pu fimkhur zia chu hriatthiam pui ve ang hrimin thawm engmah erawh chu a chhuah bik hauh lo thung.

 

       Leiah chuan chhuk thla in Black Nill chu hmun biru thei ang ber tur laiah chuan a dintir a. Tuna a tih tur awmchhun chu nghah chhuah a ni ta rih tih hriain, lungpui pakhat ngheng chuan sikret a zu ta vang vang a.

 A thiltih tur chu a huphurhawmin fimkhur tul hle mah se, a hun hmaa lo zat ruai chuan awmzia a nei lo tih a hriatchian em avangin hman hmawhna leh enghelh neilo ang mai in a sikret chu a pak khu laih laih reng a. Engtia chet leh zel tur nge ni ang tihte chu a ngaihtuah kual nauh nauh reng bawk a.