Bung-4

Jonathana'n a naute ruang ava phum zawh a Ranch-a alo kir leh chuan Ni pawh khawthlang kawlkil lamah bihruk tumin a sen suar suar tawh a.  Fredya leh Bata te Benvon khuaa va kalte pawh chuan Sheriff leh Deputy tawrhhlelhawm tak tak te hruaiin JL Ranch ah chuan an rawn kir a, an rawn thleng ve chiah bawk a. An thiante chanchin an han hriat zet chuan Bata leh Fredya te chu thinrim leh phuba lak chakin an hmel chu a dur nghal khaih a.  An thinrim zia chu an hmelah pawh a lang chiang hle mai. Kum kha leh chen, a nuam leh hrehawm tinrengah pawh lo kaihruai thintu an pu Jonathana ngei pawhin chutiang taka Fredya te thinrim hmel chu a la hmu ngai bik lo a ni. Bata chuan thinrim hachang thial rap rap chung chuan, " Sheriff,  kan tlai lu hrat ani maw..?  Mahse, tutenge an nih a, engvanga hetianga nunrawnna a kan chunga hlei an lenna hi kan hriatchhuah hma leh kan nuai chimih hma chuan engdang mah kan ti thei tawh lo ang," a han ti charh charh a. A mitmeng tualthah pawh pawisak lohna lo lang chhuak chu a tuartu tur tan chuan Mexico ram chhuahsan lawng lawngna tur hial khawp a tling a ni. 

       Benvon khaw Sheriff pawh chuan an chunga thil thleng leh an awmdante chu a hriatthiam pui ve em em a.  A thinrim pui ve hle ani tih a hmel atang pawh chuan a lang chhuak hial a.  A theih ang tawka aw pangngai hman hram hram tumin, "Pu Jonathan, he thilthleng hi i tan chauhva pawi ani lova,  helai chhehvel ram hausakna tlan ve tu tam tak te tan leh kei atan thleng pawh hian a pawi thui em em thei a ni. A chhan pawh heng ram zawng zawng hi ka bial ani a, ka venhimna hnuaia zalen taka in awm hi ka mawhphurhna liau liau a ni." a lo ti ve vat a. Chumi ni atan chuan eng han tih theih an neih tawh loh bakah khua in a rawn thim hnan ta si a,  zanriah tui taka an eikham hnu chuan an mu ta thuai hlawm a. A tukzing khawvar ruala thawhchhuah chu an tum a ni.. 

 An tum ang ngeiin a tuk khawvar rual chuan an tho kim thap a. Eng chen pawh thang ngai dawn sela ei leh in tlachham hauh lova an awm theih nan thahnem tawk tak an sakawr sadle ah chuan an pai puar lah hlawm a. Jonathana erawh chu Sheriff chuan kal ve lo tura a ngen tlat avangin hreh tak chung chuan Ranch in ah a lo awm ta a. Midang zawngte chu an in zui chhuak ta thliai thliai hlawm a. Sheriff te kalliam tur chu Jonathana chuan a thlir zui vang vang a. Ngaw a a va luh tirha a thil hmuh leh chharte kha a hrilh vek bawk avangin va chet dan tur pawh an hriat nghal mai a ring a. Amaherawhchu, Jima te chan ang mai kha an va chang ve palh ang tih erawh chu a hlauhthawnpui hle thung a. Tun tum chiah hi Jonathana beiseina awm chhun ani tawh a. Hetah pawh a chan chhe zawk a la chang fo anih phei chuan atan chuan beisei tur dang a awm tawh lo a ni.. Gun man turu tak takte rawih khawma,  Outfit lian tham tak din chu atan tih theih tur awm chhun ani chauh ang. Mahse,  chu chu a thil duh loh ber te zinga mi, thil tenawm tak ani dawn bawk si.  Mahsela, chu chu amah tan mai ni lo, a fanu Lori leh Minky tan ngei pawh chuan dinkhawchhuah leh theih dan kawng awmchhun ani dawn lawi si a, tih te a han ngaihtuah chuan a in thing nawk nawk a.  " Chu em zawng ni lo hram turin ka beisei, " a han ti sup a.  Ranch in lamah chuan a tawlh lut ve leh ta a. 

     Zing ni chhuak turin boruak a rawn kahen ruih chuan Sheriff te pawh chuan phul rai dup, hmun  zau tak awmna chu an thleng phei tawh a. Hnuhma thlithlaia an din zawk lai chuan, "Mak ve tak chu, helai phula kan hnuhma a lang chiang thei thin hle si a, Rustler ho hnuhma ve thung erawh chu heta tang chiah hian a bo hmiah zel thung si a ni, " ti in Fredya chu a rawn tawng chhuak hlawl a. Sheriff pawh chuan, " Anih hmel khawp mai, he phaitual hnim chap darh zui mai hi a hmang thiam tan chuan hnu thupna tha tak zawng a tling khawp ang, " ti in Fredya thusawi chu a lo zawm ve thuai a. Sheriff chuan hma a hruaia ngaw chhung chu an lut ta a. Jonathana sawi lungpui chu a langsar bawka reilote ah an zawng hmu thuai a. Jonathana'n chulai hmuna lo awm ten sikret an zuk bung a chhar bangte chu alo la let ram bawk a. " Hei ngawt hi chuan misual ho hnuhma chhuina kawngah hian min puih theih vak a rinawm loh,"  ti in sikret bung chu Sheriff chuan a han lek vat vat a. Chutah amah vek chuan, "Nakin hnu lamah chuan tangkaina te pawh a nei mahna le," ti in sikret bung chu a ak tha ta a. Rei tawk ngial lungpui leh a bul vel chu hnuhma an bih leh hnu in Mosacin (Indian ho bun thin pheikhawk) rahna hnuhma, fiah lo tak tak chu an hmu ta hlawl mai a. Uluk leh fimkhur em em chung chuan an chhui zui ta zar zar a. Mel chanve vel an chhui hnu chuan sakawr rual dinkhawmna hmun chu an va hmu ta a. Sakawr ek pawh a lo awm phung nghe nghe a.  Chuta tang chuan an mi chhuite chu sakawr chunga chuangin an kal zel tih pawh a hriat a ni. Mosacin rahna hnu fiah lo tak tak aiin sakawr rahna hnu chu a fiahin chhui pawh a in nawm hleih hle a. Sakawr atanga chhuk buai pawh ngai lovin an hnu chhui chu an hmu zar zar thei zel tawh a. 

   Mahse, mual dung sei fahran mai an han lawn chhuah a, a thlang kawr ruam an pan thlak tantirhna  thingtuai hmun an thlen chuan an hnu chhui lai chu a bo leh hmiah mai a. Sakawr atanga chhukin uluk fahran mai chuan an han dap leh ngial a.  Mahse, rul tlengna hnuchhui tum ang tluk  hial khawpin a vang leh ta kher mai. A ngaihna hre lo zet chuan an ding khawm laih laih a, engemaw sawi tumin a ka a han ang zuau a, mahse, a sawi tum a sawi chhuah hma chuan an beisei lawk hauh loh mai aw thum chher chhur hian, " Awlsam taka chhui theih mai tura hnuhma kan hnuchhiah reng in ring anih zawngin in ring sual hle ang, " tih ri chu an bul lawk hnimbuk kar atang chuan a rawn ri chhuak thut mai a. Thil awmzia hria in Sheriff chuan a Pistol a han chuh vat a, mahse,  a tlai lutuk ta hrat tho mai.  Rifle a han di thuai a,  Sheriff in pistol a chuhna kut ding lam chu a leng lawp a, a ban rek atang chuan thisen a rawn dir chhuak nghal zawih zawih mai a. Mihring aw ti a vuah ngam harsa khawpa teng pherh chhe zet hian hnimbuk kar atang bawk chuan, " In nunna in la ngai hlu rih dawn anih chuan tumah kha che tawh hauh suh u, ka themtlaw vanga i thinhnun taka rawn verh lova i banreka rawn kap kha ka ni hauh lova nia, " ti in a rawn vau zui leh tuar tuar a. Chumi rual deuh thaw chuan Rifle a rawn puak leh thawr a,  Sheriff lukhum khum lai chu hla fe ah a leng leh nghal lawp ta mai a. Aw lo chhuahna hnimbuk chu a che lawih a, palian tawk tak, balh hmel zet leh biang dinglam ser ruak mai hi Rifle hmawr la khu hlat hlat hum chung hian a rawn pen chhuak ta chhur chur a. Sheriff leh a hote tan chuan han chet ve ngaihna reng a awm ta lova, han che dawn ta tehreng pawh nise a che hmasa apiang an thal tawp tawp zel mai dawn tih lah tumahin an hai hauh si lova.. 

        Rifle hum pa chuan Sheriff leh a hote chu rum fahran mai hian a han melh kual dun dun phawt a. Sheriff kamis kawr awma badge arsi lem, silver tle var mai a han hmuh chuan ngeiawm thei ang ber tur hian a mitmeng chu a han ti danglam ruih a. Chutah za awm fahran hian a han nui leh kuah kuah a. A nuih zawnga a mitmeng han zim sun mai leh a ha,  balh hmel lutuk tak mai rawn langte chuan nunrawng tak ani ngei ang tih chu a ti chiang hle a.  A khel tawn tawna Dragon Colt lian fahran mai leh a Rifle hum lai mek te nen ngat phei chuan Rattle snake leh Keipui hliam tuar ai pawhin a la tawrhhlelh awm zawk ngei ang tih chu a chiang em em bawk a ni... A duh tawka Sheriff leh a hote a hah nuih khum uar uar hnu chuan Sheriff chu a melh bing ta vung vung a, " Lawman rimchhe tak tak hi chuan he hmun hi rawn hmelhriat ve lo tawp ula a ti chi zawk asin mawle.!! Boruak hip tur kan indaih lo mai dawn alawm mawle,  Mahse, tun tum zawng i rawn dai thuk lu hrat bawk a, i huang lo hi nawr fo lo tura zirtirna kawng khat zawng nang leh i mei te tan khan siamsak che u in ngai dawn ta anih hmel hle mai, " thum chhuk hian a han ti leh zuah zuah a. Chupa chuan a lu chu ahan thle buk a, a rawn chhuahna hnim buk phen atang bawk chuan amah ang bawka Rifle kausa reng hum chung chuan mi pathum hi an rawn tawlh chhuak nghal a. An mitmeng thip leh nelawm loh fahran mai atang chuan an chunga zahngaihna beisei chu thil tih chi loh tawp ani ang tih pawh a chiang hle a ni... An hnuhma thup leh fin thiam dan atang pawh khan chuti maia han bum lah an ni hauh lovang tih lah a chiang reng si a. An hotu deuh ber ni ngei tur hnimbuk phen atanga rawn chhuak hmasa ber bawk a khan, "In ban kha sang takah phar chho vek rawh u, rinhlelhawm thil reng reng chu ka hmu thei lo hle tih pawh lo hre tel bawk ula," ti in Sheriff hnenah chuan thu a han pe khur khur a. Chutah zaizirin a hnung zuitute hnenah thu a han pe zui zat bawk a. Thupek zawm mai chu an tan tih theih awmchhun anih miau rih si avangin Sheriff te pawh chuan tha takin chunglamah ban an phar chho nghal a. Mi pathum Rifle kengte zinga pakhat chuan rang fahran mai hian an pistol pai lai theuh chu gunbelt chawp chuan a rawn phelh thlak sak nghal mawlh mawlh mai bawk a. 

      Misual hotupa bawk chuan an sakawr chung theuhva chuan turin thu a han pe leh a, Sheriff leh a naute ho chu kal hmasak tirin mual dungah chuan an in chhawm thla ta duah duah a. 

         Mual dung an zawh thlak zela thingtuai hmun an pelh thlak chuan mual rualrem lo leh kawrte khawkrawk fahran mai hi an pawh thla a. Chu kawrte chu thui fe mai an zawh ta ngat ngat a. Chu kawng an zawh chu hmarlam hawi chuan a kual hret zel bawk a. Chutia an kalpah chuan misual zinga pakhat chuan thing hnah lian zeta tawn khawm hmang chuan an hnu chu sakawr chunga chuang chungin a rawn hrut reh hauh hauh zel bawk a. Chutiang ngata tih chuan hnuchhui thiam ber tan pawh chhui fuh mai harsa tak ani thin. Mi tam zawkte chuan hetianga hnuthup nachang hi an hre hauh lo a ni.. Misual hotupa chuan Sheriff hote chu ding turin thu a han pe leh a.  Leia an chhuk fel hnu chuan an mit tuamsak turin a Kid te zinga pakhat chu a han hrilh a,  a va hrilh pa pawh chuan rang takin a saddle bag atang chuan puanthem engemaw zat chu a rawn phawrh chhuak a, a sakawr atanga chhukin Sheriff leh an mi man pali te mit chu a rawn tuam sak nghauh nghauh mai a. Tichuan, a tuam zawh fel veleh an kal leh ta thuaia , kawr dung chu zawh tawh lovin khawchhak lam hawiin an peng ta thung a.