Bung-2

 THUHMA... He story hi post siam tawh ni a a lan avangin chhunzawm tawh lo mai ka tum hnu in member thenkhatna ngen zah sak avangin chhunzawmna rawn dah leh ani e..

Lui tui chunga rawng dang lo luang tle nuar nuarte chu khawi atanga rawn luang nge tih hriatchhuah hmasak phawt chu an tum a. Chu thil rawn luan chhuah tanna ah a titute hnuhma engemaw tal pawh hmuh theih an inbeisei bawk a ni.

Miner ho chu tlangpang khawi lai laiah emaw chuan buk sa in an in khuar thliah thluah hlawm a. Vanneihna hai chhuah tuma an in hai velna pawh a rei tawh ang tih an hnuhma atang chuan a hriat theih a. Miner ho hmunpui pel rawka Canel Plane lui dung chu an zawh hnu pawhin engmah hnuhma danglam leh han rinhlelh tur chi engmah reng an la hmu ta lo cheu mai a. Mahse, an pu ber erawh chuan beidawn mai chu a tum bau lo. Lui tui rawng danglam tak an hmuh chhung chuan an tumna hmun chu la thleng lovah a inngai hmiah a, ngawi rengin a sakawr chu a kal tir miah miah mai a ni. Canel Plane chu tlang lah tlang inkar khawk rawk zetah hian an zawh zel a. Ngaw piah lawk kawrkam khawk rawk zeta an kal lai chuan Jonathana chuan a sakawr chu a pawt ding ta chawt a. A hmuh duh ber hmu ta ni awm tak hian a han rum nghat a, Sakawr atang chuan chhukin Canel Plane leh a kam vel chu a thlir ta vang vang a. Tui chim chin leh chin lote pawh chu a bih ngun em em bawk a. A naute ho pawh chuan an sakawr theuhte chu an pawt ding ve theuh bawk a, an chhuk ve nghal sap sap a. Canel plane lui tui fim thianghlim ta kak an hmuh chuan engvanga ding ta nge an nih pawh chu hrilh hran ngai tumah an awm lo. Hnuhma rulchuk tak tak te chu chiang lehzuala finfiah tumin an vir ta vat vat hlawm a.

Hnuhma hmuh tur zawng alo awm nameuh mai le.! Tui chim chinah chuan lung lian tak ni ve mai awma lang ip lian tawk tak mai chu a in chiah pil deuh hmuk a. Chulai zawna tui chu a dang zawngte ai chuan atak leh zual a. Mak tak maiin a chhak lawk atang chuan tui rawng chu a fim tha leh em em lawi si a.

Midang zawng ten lung lian tak ni ve maia an hmuh, tui rawng in thlak danglamna bul ami chiah chu Jonathana chuan rinhlelhna lian tak mai a nei ta a... Tui chu a thuk lem lo bawk a, a dai phei nghal bawrh bawrh a, chu thil awmna chu ava thleng phei thuai a. A rinhlelh ang ngeiin chu thil chu lung lian tak ani ta awzawng lo mai le..!!

"Ka ring dik chiah anih hi," ti in a naute ho chu a hrilh nghal a. Rang takin chu ip chu vaukamah an zawn chhuak ta nghal a, tangkaina ala awm takin tih thu ah chu ip chhunga thil hring, diak deuh thlir thler chu tlem an fun tha ta a. A dang zawngte chu tui atanga hla tawkah chuan an phum bo ta hmiah a.. A thenin tur funna ip phum bo dan tur an lo ngaihtuah lai chuan tur dahtute hnu hma lo thlithlai tawk an awm bawk a. Harsa lo takin hnuhma pawh chu an hmu ta thuai bawk a ni.

Khua ala tlai lo bawka an hnuhma hmuh chu chhuizui turin an sakawrah a lawn kai zui ta nghal a. A hma ang bawkin Jonathana leh foreman bawk hma hruai chhunzawm leh in uluk takin hnuhma chu melh pah reng chung chuan an kal leh ta bauh bauh a..

A tir lamah chuan an chhui mek sakawr rual khat hnu chuan Canel Plane luikam chu an zawh ve zel a. Mel khat dawn tur chu an zawh a, ti chuan Chhim lam hawiin Canel Plane lui chu an pen san ta a. An hnuhma atang chuan chhuizui an in ring lo nge ni an fimkhur lovin chhui pawh an harsa lo kher mai... Jonathana te tan pawh chuan harsa lo takin sakawr chunga chuang chung pawhin an chhui par par thei a ni..

Mahse, chutiang reng chu ani ta bik hauh lo mai le.!! Tlang hniamte pakhat lawn liama thingtuai hmun tlang an han pelh fel meuh chuan Jonathana meuh pawh a buai ve ta map mai. Phul hring hmun zau fahran mai hi an hmabak ah chuan alo in pharh duai a. Chulai hmun an va thlen chuan an hnu chhui lai pawh chu an hloh ta hmiah mai a. Phul hmun zau fahran ah chuan hnuhma zawngin a vak darh ta sang sang hlawm a. An hnu chhui mekte chuan sava angin thla neiin chu hmun chu an thlawh khum ta mai emaw tih tur khawpin an hnu chu a bo ta hmiah mai a ni.

Beidawng takin an ding khawm ta taih hlawm a, Jonathana meuh pawh pa tumruh tak ni thin mahse tunah zet chuan a beidawng ve ta kher mai.. An hnu chhui zel tur chu lawng kalna hnu chhui tum ang mai ni in a hre tawh a.. Khawi laiah emaw hian an thep rel ta aniang han ti dawn se,chu lai ram han thlir vel chuan chu chu thil theih ni in a lang thei ngang bawk si lo. Jonathana chuan thinrim ha chang thial rap rap chung chuan, " Kan mi suak sual dawihzep ho zet chu leh rul tur nei ang maia an hlauhawm ang bawkin sihal nu ai pawhin an fing vervek thiam zawk anih hi le,!!" ti in a han seh chilh deuh rap rap a. Hah taka an kawng zawh tawh pawh chu kir leh mai loh chu tihngaihna awm ta hek lo, beidawng thinrim em em chungin Ranch lam chu an pan leh ta ringawt a...

JL Ranch chuan a khat tawkin buaina chi hrang hrang a taek ta zeuh zeuh reng mai a. Amah ang bawkin a kiang hnaia Ranch dangte pawh chuan buaina chu an tawk ve tho bawk a. An buaina chu Rustler ho hnathawh ani deuh zel hlawm a. A thenawmte aia Ranch lian leh hausa zawk anih vang nge ni, Jonathana chuan bawng pawh a hloh hnem thei hle bik zel lehnghal a. Kartin bawng za rual zet hloh ang hial a ni.

Chutiang taka chuan Rustler ho te che thin mah se an hnuhma an thup hneh thin em avangin thui tak chhui zui thei lah anni ngai hek lo. Jonathana pawh a mangang ve ta hle mai a. An ranch atanga mel 20 vel laia hla Benvon khuaa mi Sheriff tanpuina va ngen mai chu a rilruk ta hial nghe nghe a. Jonathana duh ang chuan Fredy-a leh Bat-a te pahnih chuan Benvon khaw sheriff tanpuina va dil turin JL Ranch chu an chhuahsan ta a. Midang zawngte chuan Foreman Jima hovin a hma zana an bawngrual tam tham tak khalh bo anihna chu chhui turin an inpuahchah sawk sawk a, an inpeih veleh an kal chhuak ta nghal a.

Tun ang bawk hian an bawng rual hnuhma chu vawi tam tak an lo chhui tawh thin a. Engemaw chen chu an han chhui ve thei mai thin bawk a, mahse, a tawpah beidawng thinrim em em hian an kir leh nge nge thin a ni. Tunah zet chuan JL cowboy ho thin pawh a ramin an lu a hai tawh hle a ni. An bawngrual bo tanna hmun an va thlen chuan Foreman Jima chuan rem a han ruat zung zung a, "Tun tumah chuan an hnuhma hi kan hloh leh anih pawhin mel khat bial chhung chu kan dap chhuak fai kelh tawh ang a, a tul phawt chuan khaw thim thak thlengin kan bei mai tur ani. Kan chunga an suahsual rawngbawlna hi a tam lu deuh ta a ni." a'n ti charh charh a. A hmela tumruhna leh thinrimna lo lang chuan a thusawi chu a ti chiang hle bawk a. A ngawih vang vang hnu ah Jima vek chuan, " Ni dang ang lo takin tun tumah chuan keimahin ka lo va chhui hmasa anga, tichuan darkar chanve vel hnuah min rawn zui ve dawn nia.. Min lo beisei rengtute pawh awm mahsela Sakawr rualkhat inzui dul dul ai chuan pakhat chauh fimkhur taka kal chu hmuh mai pawh a harsa zawk ngei ang, ". a han ti zat zat a. Jima chuan fimkhur takin bawng rual leh sakawr hnu inpawlhsawp nuai chu a chhui zel a, nidanga rukruho hnuhma an hloh thinna hmun a va thlen chuan a ngaite bawkin a hnu chhui chu a rul chuk zo leh ta vek mai a. Chutah thinrim zetin a han phun chiam ringawt a. Chu an hnu hlohna thin phul fai zau tak, phaitual hnimin a bawh hrin hlap mai inchap zui mai chu uluk fahran hian a melh kual a. " An sualna a nasata a hnawksak zawh poh leh an fing zual anih mai hi maw.?!!. a han ti nang nang a..

A dik chiah reng bawka, tun hma zawng kha chuan Miner ho Cowboy, Rustler ho, tumah rengin chulai phaitual hnim chu an chhawr loh mai piah lamah tlawh pawh en pawha an en hauh loh ani si a. Tunah chuan JL Ranch leh thenawmte pawhin chu hmun chu an buaipui ber ani ringawt tawh a. Chung thuthang vak avang chuan chulai hnaia cheng Miner hote beng pawh a verh ve zar mai a ni. 'Kei ka ni alawm' in ti ve thei chin thenkhatte chuan chulai phul hmun chu an rawn belchiang ve ngial thin a, tumah JL Cowboy hote hriat bak chu an hriat belh ngai bik lova. "A mak teh zawng anih hi" ti in an tawp san ve leh hlawl thin a ni... A sakawr atang chuan a chhuk a, thingthi meuhin hnuhma chu a'n bih a, engmah hmuh phei zawng a nei ta chuang lova. Ke chuan a han kal kual leh pap pap a, hnuhma chu hmuh ngei a tum nasat poh leh a beidawng thlak zia hrechiang ni maiah a in ngai tawh a. Sakawrah lawn kaiin chu phul chu khawchhak lam hawiin a rin zawh leh ta chawt mai a. Mel chanve aia thuk zawk mah a zawh hnu chuan a zawh lai phul chu ngaw chhah hmel fahran ah hian a in khawh lut a. Chu ngaw chu mak tak mai in a lo reh duk a. Sava hram leh ramsa thawm riva pawh hriat tur eih a awm lo. Chu mai piah lamah ro awmna riau awmin Jima chuan a hre bawk a. Chu ngaw chhungah chuan kuh nghal mai nge tha anga nau te ho lo nghak rih zawk tur le tih te chu a ngaihtuah nauh nauh a. Mahni chauhva. luh chu thawm pawh a dim theih deuh anga a finthlak ber zawk dawna a hriat tak avang chuan luh mai chu a tum rilru ta a....