Bung-15

CARDBOARD HERO

Khawvel huapah, British awp chin si ah chuan Nassa a Casino hi dan ang leh phalna awm a hawn awmchhun a ni a, hetianga pawisa khelhna hi Commonwealth ram hnuaia phal a ni mai hi a chhan leh vang sawi fak a har hle a ni.

He Casino hi Canadian Gambling Syndicate in an hawh a, an vanneih tum chuan dollar 100000 lai te an hlawh thei a ni. Inkhelhna ah hian Roulette hi an uar hle a, hei lo pawh hi infiamna dang ala awm nual bawk a ni. Casino nuam leh changkang tak anih avang hian an hlawkna pawh hi an phu viau reng a ni.

Governor ADS chuan Bond leh Leiter chu Casino a awlsam tea an luhtheih nan Membership Card a pe a, harsa lo takin an lut thei ta mai reng a. Bar ah chuan coffee an in phawt a, pawisa khelhna chu a hrangin an hrut kual ta a.

Largo chuan pawisa khelna Chemin de fer an tih chu a lo khel mek a, a hma dawhkanah chuan pawisa aiawh lehkha hi alo thal phung tawh a. Chung zingah chuan dollar za leh sangkhat aiawh tam fe chu a lo awm tawh a ni. A hnung sir lam deuhvah hian Domino Vitali chu alo thu a, an inkhel lai en chung chuan inzawm pat in meizial hi a lo zu a.

Bond chuan an inkhelh dan chu ngun tak hian alo thlir ran a, Largo chu a hlawk telh telh a ni tih a hriattheih mai. A bula thute pawh chuan a han chetfuh chang chuan kut bengin an lo au dar dar thin a. Domino erawh chu ngawirengin a thu a, a hmelah chuan a nin hmel hle lehnghal. Largo dinglam a hmeichhe thu chuan a zawn a a hloh tak nual avangin a bang ta a.

Largo chuan dawhkan a beng ri thlup a, lehkhaden sendang chu a bawm atangin a han pawtchhuak a. Bond-a lamah chuan nawr pheiin, ani chuan alo pawt ve leh a. Chumi hnu chuan a dang pakhat ve ve an pawt leh a. Bond chuan a card pakhat chu a han thal a, zum zatkua alo ni a. Bond chuan Largo melhpah chuan, "A fuh dawnin ka hria. ka card pahnihna hi ka thal leh nghal e," a han ti a. Zum zatsawm. Largo lehkhaden pahnih belhkhawm chuan pakua emaw, sawmpakua emaw a tlinloh chuan Bond a chak zawk dawn tihna a ni.

Bond chuan rang takin a pan phei vat a, thutna ruak chu a luah nghal a. An inthapna chu dollar 800 in an tan a, Bond chuan dollar 1000 chiah a ak tih pawh a inhria. Mahse vanneihna chu tu ta mah a ni biklo tih hriain a inti luhlul tlat a.

Bond a han hmuh chuan Largo chuan nui chung hian, "Aahh.. Thian duhtak Mr. Bond a ni maw? Tunah chuan kan thap sang thei deuh tawh ang chu. English ho hian rel ah pawh inkhelh hi an thiam viau mai zel a. Lo hloh hlek dawn pawh ni ta ila, Mr. Bond-a laka chan hi chu pawi ka ti hauh lo," alo ti suam suam a.

Croupier chuan pawisa aiawh 'chips' thenkhat chu Bond-a lamah chuan a nawrphei nghal a. Bond chuan Largo hma a chips awm kawhpah chuan, "Italian ho deuh alawm thei le. Vawiin tlaia lungrual taka inkawp ka rawt kha i hnial vei anih kha," a han ti a.

Largo chu za vaklo chuan a han nui a. "Min titang dawn riau mai," tihleh a card thal chu a rual nghal a. A card chu Tawka zatriat leh Ak King a lo ni a. Largo chu point khat lekin a chak ta lo. Nui chng hian, "Chaklo zawk kan awm chu a ngai si alawm," a ti a, hawikual pah chuan, "English ho hian inkhelh an thiam tih ka sawi kha a dik em?" a han tih zawm leh a.

Nui chung hian Largo chuan, "Awle, i han bei leh chhin ang hmiang. I man sa kha dah la, i dinglam a Mr Snow nen khan tangdun in kan han beichhin teh ang che. Rem iti em, Mr. Snow?" a han ti a.

Mr. Snow hi European mi, dehkhirh hmel tak, Largo te ro zawnna lama an shareholder pakhat a ni a. Ani chuan a lu a lo bu nghoh va. Card chu an han pawt leh a, chumi tum pawh chuan Bond chu point khat chiah bawkin a chak leh ta a.

Dawhkan kiltu ho chu an ngawi duak a. Largo leh Bond-a te inkarah chuan boruak engemaw tak a awm tih an hretlang nghal vek a ni. A hmaa infiamna nisi kha inhlauhtawnna in a rawn luahlan ta daih mai. Nula vang nge ni ang le? Anih ngei ringin a entu ho chuan phur deuh hian hmui liakhuh in an thlir ta thup mai le...

Largo hmelah chuan a nuih a za tawhlo a ni tih a hriattheih tan ta. Mr. Snow chuan Bond-a mansa dollar 1000 hu chips chu a rawn nawrphei a. Bond chuan card vawihnih pawhah Dollar 1600 leh pound 500 vel zet chu a hlawh ta a ni.

Bond chuan, "La main Passe" a han ti a, LArgo chuan dollar 1600 hu tur chips chu a rawn thehphei a.

Largo chuan Bond-a lam chu hawiin zawisap hian, "Engvanga min rawn cho via nge inih, ka thian? Phuba lakna lam hawi em ni?" a han ti a.

Helai ka rawn thlen khan Spectre (Huai) ka hmu tlat a ni," a lo ti mai a.

Largo nuihmel chu bensawk ang mai hian a reh nghal vek mai. A mitmeng pawh a fimkhurin a tang hra tawh mai a. A hmui a han liak huh a, "Chuti elo? Eng i tihna nge?" a han tilet a.

"A, chaklohna huai ka hmu tlat a ni. I vanneihna a liam dawnin ka hre tlat a ni; ka sawi diklo a ni maithei bawk."

Dawhkan kiltu ho chu an ngawi duak a. Largo leh Bond-a te inkarah chuan boruak engemaw tak chu a awm ani tih an hrethiam ta a. A hmaa infiamna nisi kha inhlauhtawnna in a thlak ta. Nula vang emaw anih ngei ringin a entu ho chuan phur deuh hian hmui liakhuhin an thlir thup ta mai.

Largo chu a nui hawk a, hmel pangngai put tum tak hian, "Ka thiana hian ka card hi anchhia lawh a tum anih hi. Ka lokalna atang chuan chutiang chu tihdanah kan nei alawm," a ti a, a kut zungchal leh zungte chauh tikawhin Bond-a hmaizawn chu a han hawlh a. A lo entu te tan chuan infiamna satliah ang chauhvin alang na a, mahse Bond chuan Largo hmel leh boruak a kut a dawn lekdan chu Mafia ho tihdan a ni tih a hria a, induhsakna a tel hauhlo tih pawh a hrechiang hle mai.

Bond chuan nuichung hian, "Khati kha chuan ka tluang tawh bik hauh lovang le. Mahse kan card ho chu a khawih danglam dawn chuang em ni? I spectre leh ka spectre chu han insuttir ang hmiang," a han ti leh a.

Largo hmelah chuan ngaihthatlohna a rawn lang leh ta. Chu thumal kher kher Bond-an a hmang chu hriatthiam harsa a ti tlat a ni. Chutah card bawm ben pah chuan, "Awle, ka thian. I han tileh chhin ang hmiang,' a ti ve ta a.

Card bawm atang chuan lehkhaden pali a han pawtchhuak a, dawhkan kiltute chu an reh leh ta thuap mai. Largo chuan card pahnih chu Bond-a lamah chuan a hnawl phei a, ani card chu tawka zat4 leh ak zat10 a ni. Zat 5 hi marginal no a ni a, hetiang card neih tawh chuan duh leh card dang a pawtin a pawtlo thei a ni. Bond chuan card chu a khup zawngin a dah a. A kut kuangkuahin, zat dawih deuh nei niawm tak hian, "Kei chuan ka pawt ve tawhlo mai ange," a han ti a.

Largo chuan Bond-a rilru chu hriattum tak hian a han en vang vang phawt a. Chutah a card chu a han en a, dawhkanah chuan a khup leh a. A card chu zat5 bawk hi a lo ni a. A pawt ang nge pawt lovang!!? Bond-a ngaihtha hmel chu a han en leh a, card chu a pawt leh ta a. Tial zat5. Tichuan Bond-a zat5 chu zat4 chauh neiin, zat2 bawkin a chaklo leh ta a ni.

Bond chuan hmel pangngai deuh hian a card chu a han thal ta a. "Keimah ni lovin, card a Huai kha that zawk la tha tur a nia," a han ti zui a.

Dawhkan kiltute ho chu an thum ta hak a.

Largo thinur chu a insum hram hram a. Harsa take hian a han nui lui a, a kut humruh tlat pawh chu a han thlah zal a, a han thaw huai a. Bond-a chibai buk tur chuan a pharchhuak ta a. Bond chuan a chibai tur kut thahrui chak dan tur chu a hrethiam nghal vek avangin a kutzungpui chu a kut chhunglamah a dahlut vat a. Mahse Largo chuan chibai satliah mai hian a lo chibai a. "Ka chetthat hun nghah a ngai dawn ta a nih hi. Ka pawisa mansa min chhuhsak vek mai si a; Ka vahnu hi lamna lama hruaiharh ka lo tum mek a," a ti a. Chutah Domino lam chu hawiin, "My dear, Mr. Bond hi phone a in inbiak tihloh chu I hre kherlo anga. Ka thil ruahman a tibuai ta vek mai. Midang hruaitu tur I zawn ava ngaih hmel ta ve!?" a han ti zui a.

"I dam maw? Tukin khan meizial zawrhna ah kan inhmu em kha?" tiin Bond chu a dawn inrawlh vat a.

Nula chuan ngun takin Bond chu a han en a, chutah, "Chuti em ni? A ni maithei. Mi hmel chhinchhiah hi ka harsat riau va.." a lo ti niah niah a.

Bond chain, "Chuti chu intur ka leisak dawn che em ni? Mr. Largo hi a thilphal hlauh va, tunah chuan Nassau ho induh ang chi satliah chu ka leithei tawh ang. Helai hmuna ka tihluih zel chuan Ka vanneihnain min kiansan daih thei a, chuvangin ka inhnuhdawh a hun ta tlat mai," a han tileh a.

Nula chu a dingchhuak a. "Thildang tihtur I neih hranloh chuan a pawi hleinem," alo tisam et a. Chutah Largo lam chu hawiin, "Emilo, Mr. Bond hi ka kalsawnpui chuan I vanneihna alo kirleh maithei asin. Chaweina pindanah Chavier leh champagne kan lo va in ange. I pawisa hloh kha a tam thei angber lakluh leh I tum tur a ni ang," a ti a.

Largo chu a nui hawk a, tlem chuan a hlim leh deuh tawh niin alang. "Mr. Bond, tunah chuan thirbel atangin meialh ah I zuanglut ta anih ber kha. Dominetta kutah chuan ka hmaa thut aiin I che chhe viau zawk maithei a nia. Nakinah kan la inhmu leh dawn nia, thian duhtak. Harsatna min siamsak sukiang tura hmathar ka lak leh angai dawn ta a nih hi," a han ti suam suam a.

Bond leh nula chu chaweina pindan lamah chuan an phei ta a. Pindan kil dawhkan chu Domino chuan a thlang a, a hnung lama kal anih avangin Bond chuan a ke chu tlemin a bai deuh a ni tih a hre ta a. Hmeichhe duhawm tak, a huna pawisak nei miah si lovin chutiang ang famkimlohna alo nei ve chu a ngainatawmphah sawt hian a hria a.

Clicquat Rose leh Beluga Caviar an chahfel hnu chuan Bond chuan, "Vawiinah I tuicheng I intipalh em ni?" a han ti a. Nula chuan thutak hmel zawk hian, "Tipalh lo ve. Ka ke hi inchi 1 in a intawihleih satliah mai a nia. I tihtheihloh zawng tak em ni?" alo tilet a.

"Teuhlo mai, a mawi ka to zawk. I landan a tinaupang zawk a,"

Cho hmel tak maia Bond-a enchung chuan, "Mi hmei, pawisak neilo tak aiin maw?"

"Chu chu I inhmuh dan emaw ni reng le!!?"

"Mi mitah pawh a langsar viau lo em ni? A engapawh chu ni se, chu chu Nassau a ni zawng zawngte rindan a ni reng reng a," tiin nula chuan hrethiam hram tura ngen mitmeng chuan a han melh ralh a.

"Chutiang lamin tumahin I chanchin hi min la hrilhlo reng reng. Engpawhni se, mi chanchin an sawi nazawng ka pawm ve ngai lo; mahniin ngaihdan ka insiam ve mai zawk thin. Midang ngaihdan chu enge a pawimawhna? Ramsa te pawhin ramsa dangte chungchang ah ngaihdan an inzawtin an relho ngai hleinem. An inen a, an inhnim a, hmangaihna leh huatna chungchangah pawh chung thil pahnihte chu an pawimawh ber a ni. Mahse mihringte hi chuan an rilru chhunga an ngaihdan awmsa hi an ring ngamlo va, hnemtu leh thlawptu an mamawh thin. Ti chuan an inzawt vel a, khawvel lah hian thu lawmawmlo lam hi a chawtui ber leh ngaihven zawng a lo ni bawk si. Nangmah ka ngaihdan che hi I hreduh em?"

Nui chung hian nula chuan, "Miin an ngaihdan hriat chu hmeichhia zawng zawng hriatchak a ni ang chu. Mahse phuahchawp lovin, dik takin sawi ang che. Chutilo chu ka ngaithla zui lovang," a ti ta a.

"Ka hmuhdan che chuan naupangte, I land tum dan aia naupang I ni. Uluk taka chhungkaw pangngai taka seilian leh chawilen I niin ka hria. Mahse vawilehkhatah I innghahna ber chu chawplehchilha phehsak ni ngeiin ka hmu che. Ti chuan lohtheihlohvin, I tum loh ang taka khawsak alo ngai chho ta niin ka hria,"

"Ti chuan I tho va, I lo khawsak tawh thinna ang chu chan leh ngei tumin I bei a, hemi kawngah hian pawisak pawh I nei vakin ka ringlo. I duhzawng hmu tura I beihnaah I chhia leh tha hriatna pawh I dahbo a tul chang a lawm ngei anga, mahse chu pawh chu I bosan thui lutuk chu ka ring lo; I ngaihtuah duh rihlo ni mai maiin ka hria. Tunah hian I duhzawng chu inei kim thawkhat ta niin ka hria a, I kham lek lek tawh niin ka hre nghe nghe che a ni," a ti ta duah a.

Bond chu a han nui hak a. "Mahse chutiang lam chu sawi khunkhan lutuk lo zawk teh ang, nangmahin I hre vek zawk ang. Mahse ka sawi duh chu - I duhawm a, I sexy a, I zalen in i thu I duh a, I thin a ram bakah I nun a rawng bawk," a han ti leh a.

Ngun leh chik deuh hian nula chuan Bond chu a han en a, "I thusawiah chuan thuthar a awm vak hleinem, ka hrilh deuh vek tawh che kha. Italian hmeichhe mizia chu I hrenual anih tak hi. Mahse engvanga nunrawng min ti nge inih le,"

"Largo ang khan pawisa khelhna ah chetsual tawkin ka bulah ka hmeichhia chu thu ve se la, min thlamuanlo leh min fuih miah lovin ngawi ta reng se la chuan nunrawng ka tih mai chu ka ring a ni. Mipa te hian an hmeichhiate hma a chetsual an duhlo hle thin si a,"

Nula chuan, "Vawi tam a chefuh lai leh intithei lai ka lo hmu tawh a, ka kham a ni. Chak zawk la ka lo ti rilru reng nghe nghe asin. Nilo pui nih tum hi ka thiamzawng a ni ve lo. Ka felna pakhat I sawihmaih chu dikna ka ngaina tih hi a ni. Tunah hian Emilo nena kan inkar hi chumi chanve vela awm chu a ni. A hmaa inngaizawng thin kha tunah chuan thiantha tak kan ni tawh zawk. Ka guardian anga ka hrilh che kha dawt muhlum a ni; a hmei ka ni zawk. Bawm mawi taka Sava khawi nen kan danglam chuanglo. Ka bawm leh ka intiamna chu ka kham tawh a ni," a ti ta hlawl mai a.

"Emily tan chuan a na in a lawmawmlo viau mai thei. Mahse mihring ka ni ve miau mai si a. Mihring taksa chu I lei thei mai thei; Mahse mi rilru leh thlarau an tih erawh chu ilei thei chuanglo. Chu chu Emily pawh hian a hria a, hmeichhia te hi hman tangkai atan leh nawmchen nan chauh a duh a ni. Tuna kan dinhmun ve ve pawh hi a hrechiang a, mahse tunah chuan ka intiamna hi kenkawh harsa ka ti tawlh tawlh tawh mai..."

An han ngawidun deuh va, "Champagne kha min han thlitbelh teh. Kan thusawi ho deuh deuh hian ka dang a tiro deuh tlat mai. Players Cigarette ka zu chak tawh khawp mai. Advertisement a an tarlan ang chi meizuk ringawt hi ka khamkhawp tawh lo. Ka hero ka mamawh a ni," tiin thudang a sawi ta daih a.

Bond chuan nula rilru kalpen dan chu hrethiam takin, "Engtin nge maw cigarette a milem hi a ziahna chang an hriat zawk ni," alo ti ve a.

Nula chuan cigarette a milem hrang hrang an ziahdan te leh a naupan laia a lo hmuhdan te chu tui tak chuan a sawi ta bawrh bawrh mai a. Bind chuan ngun tak mai hian alo ngaithla a, nula chuan a duhtawk a sawihnu chuan thutak hmel zawk hian, "Awle, ka thu sawi ho tak tak mai ilo ngaihthlak hram hram avangin ka lawm hle mai. Hmanlai lasi thawnthu ang chauh anih kha," a ti ta a.

Ngaihtuahna vakthui tih hriat tak mai hian nula chuan, "Mahse hetiang lamah hi chuan kan naupan lai chuan kan lo â tlâng viau zawng anih awm kha. Han upat deuh hma hi chuan lukham hnuaia naute lem leh thillem chi hrang hrang dah kan ching theuh hlawm a; mipa naupang pawh an bang biking ka ring lo," a han tileh a.

Bond chuan, "A dik khawp asin. Keipawh ka naupanlai chuan I sawi ang khan hun reitak chu ka awm ve asin," a lo ti ve a.

"Kha! Ka tih reng kha. Ka unaupa pawh hian a awmtunu in a pek 'charm' tereuhte chu kum 19 anih thlengin a roh hlur mai a, a han tibo chiah chu a phun nasa teh asin. Chung lai chuan air force a zawm tawh bakah indo lai a ni lehnghal a, vanneihna thlentu ah a ngai tlat asin. Mahse kha mi tello pawh khan a tluang hle tho va. Kei aiin a upa deuh nâ a, ka ngaithei em em mai a. Nula te hian mi awmkhawlo deuh te hi an ngaina phian thin a; Kei pawh hian a awm tha duhlo nâ a, ka hmangaih tlat a ni. A chetthat em avangin engemaw min tihsak ka ring viau nâ a, tun thlengin engmah min la tihsak ta lo chu a ni a. A pu chu Dolomitea vela sa humhalh phil ching leh smuggler larber pawl a ni a, Bolzano thlanmuala Petacchi ho thlanmualah chuan a ropui ber awm e. Ka unaupa chuan a pu anga pawisa hailutin ani aia than ropui zawk a neih tur thu a sawi thin a ni,"

Bond chuan a cigarette chu a han hip vang vang a, "Chuti chu in chhungkaw hming chu Petacchi a ni maw?" a han ti bauh va.

"Ni e, Vitalli tih hi a ri a mawi zawk a ka hriat vanga hmang mai ka ni. Ka hming pakhat zawk hi chu tumahin an hrelo. Kei ngei pawhin engemaw chang chuan ka theihnghilh thin,"

"I unaupa chu tunah khawnge a awm tak a? A hmingpum enge ni?"

"A hming chu Giuseppe Petacchi a ni. A tal ho viau na a, mahse thlawhna khalh thiam tak a ni. Ka hriat hnuhnun berah kha chuan Paris ah hna lian deuh zawk pek a ni awm e. A rilru te pawh a puitlin phah deuh zawk mahna. Khawvela ka neihchhun a ni miau va, ka hmangaih tlat a ni. Chu chu I hrethiam ang tiraw?"

Bond chuan, "Hrethiam tehreng mai," a ti a, a cigarette chu nawrhlum in, an ei leh in man bill chu a chah zui ta nghal a.