Bung-14

Chutichung chuan an tan vanneihna kawng ala inhawng rih a ni ta ve ang, Fog Bound Gang, corral bula awm zinga pahnih erawh chu inchhung lamah an tek lut hman ta hlauh va. Midang panga te erawh chu an thal ta hlawm a. Hun reilote chu silai ri a reh leh dak a, chutah inchhung lam atang chuan silai a rawn ri ve leh ta zawt zawt mai thung a. In tin mai atang chuan Rifle mu hi a rawn ving chhuak ther ther ta mai hlawm a. 

 

Hickock a leh a nauteho tanchhan lung pang vel te chu Rifle mu chuan a rawn deng tawk tawk hlawm mai bawk a. Mahsela a hmaa Hickock an a naute ho hnena a lo chah lawk diam tawh angin a thlawn mai mai tur chuan tumahin silai an hmet puak ve mai mai lova, a khat mawi tawk chauh erawh chuan inchhung lam atanga silaimu rawn thawk chhuak fur fur chu an chhang let ve lek chauh va. Hickock a chuan loh theih lohna avang ni mahse an duh hun aia hmaa silai hmeh puah a ngai ta chu pawi a ti hle a, mahse tih ngaihna dang a awm ta silo. A rilru chu a siam leh zung zung a, tih zel dan tur chu a riruat nghal vat vat zel thova. Chutah a awmna atang chuan in pakhat chu a han thlek zauhva, chutatang pawh chuan Rifle mu a rawn ving chhuak fia fia reng thova. Inchhung lam atang chuan Rifle mu rawn chhuah na chiah, kuttum tiat vel zet chauh reh kuak atanga Rifle dawt rawn lawr chhuak tat chu a hmu ta a. Chumi zawn tak tur chuan uluk zetin a Rifle chu a tin ve ta a. Chutahleh, chumi Rifle hmawr rawn lang tat atanga fit chanve vel tura sang bang verh pawp khawp chuan a Rifle chu a han hmet puak ve ta thuai mai a.

Chung bangte chu thingphel hlir a ni bawk a, Rifle mu chuan a tawn tlang harsa lo kher mai. A pawp nghal hawk a, chuveleh inchhung lamah chuan na tuar han te thawt thawm chu a awm chawpchilh zui ta a. Chumi atang zawngin chu in atang chuan Rifle pawh a rawn  puak ve ta lo reng reng a a ni. 

 

       A han nghah leh vang vang hnu pawhin chu in atang chuan thawm hriat leh tur a awm ta lo reng reng a.

 

Chutah a Rifle chu a tung tha lawk a, zik zak deuh taka tlan kawi zawr zawr chung hian chu in kawngka lam chu a pan phei ta nawk nawk a. A tlan phei lai te chuan in dang atanga silaimu rawn kal chu a bul lawk lawkah an ving thiak thiak mai a, mahse a vanneih a siamin silaimu tawng fuh hauh lovin chu in kawngkhar chu a thleng phei ta hram a.

 

     Kawngka chu a phih hawng rawp a, inchhung ah chuan a bawk lut nghal thlawp bawk a; Mahse thawm engmah chu a la awm zui ta chuang hauh lo mai a. A bawh thlawpna hma lawkah chuan a hmaa a tawmna lungpui phen atanga a va rin kah pa kha a chal dar taka kaw phawt hian a lo thal der mai hi a lo ni a. Chu inchhungah chuan midang tumah an lo awm lo reng a ni tih a fiah hnu chuan inchhung chu a dap ta zung zung a. 

 

Kudam ang reng atana an hman ni ngei turah hian bungrua chi hrang hrang hi a lo awm teuh mai nghe nghe a. Hmunkhat laiah chuan percel in tiang âm mai chungah chuan lehkha khawng bawm hian engemaw hi a in khung âm mai a. A tuamna a han hawn chuan Dynamite hlir mai hi a lo ni a. Lawm rilru tak chungin Hickocka chuan thildang a han zawng leh a, chu pawh chu awlsam takin a hmu leh ta mai a. 

 

Chutah Dynamite leh a fuse bakah thil tul ang zawng zawngte chu a fit ta zung zung a. Dynamite awm zawng zawng chu hmun hran hranah a fit zo ta vek a vawikhata puak vek thei turin a fuse pawh chu hmun khatah a la khawm vek a. A han enfiah leh tê te hnu chuan a fuse hmawr chu mei in a dep kai ta a. Fuse chu a thi tawh hauh lovang tih khawpa a mut kai that veleh chuan a tawmna ngai bawk pan leh tur chuan a tlan kawi chhuak leh ta zawr zawr mai a.

 

       Vanneihthlak takin a tawmna ngai hmun bawk chu him takin a thleng phei leh ta hram a. Rifle mukhat erawh chuan a rawn thawi thiak a, mahse engmah ana lo hlauh a. A thlen phei chuan a Rifle mu kah ruah tawh te chu a han thun khat leh mawlh mawlh a, "In phu chiang teh ang chu," tiin a han phun sap a. 

 

Minute khat vel chiah a ral hnu chuan Fog Bound ruam mai pawh ni lo, chu lai Mexico Boundry ep chhung ram zawng zawng a mi te pawhin an hriat phak vek tur khawpa ring chuan a rawn puak khawk ta ruih ruih mai a. Chu In phei chu a vawrh darh chhe nghal leu mai a. A darh chhia mai pawh ni lovin mei alhin a rawn tuam nghal hlup mai a. Hickock a Dynamite kam zet chuan a tam tham bawk a, a thawk na kher mai a. An awmna vel te pawh chu a nghawr dawt mai hlawm a. Reiloteah chu inkang hlup hlup chuan in dangte pawh chu a kangkai ngei dawn tih lah a chiang nasa mai si a. Inchhung lamah chuan te teng tung thawm pawh nasa kher mai. Inchhunga tawm reng ringawt pawh a him dawn chuang lo tih an hriatin Fog Bound Gang te chu Rifle hmet puak zawt zawt chung chuan paruk lai hi an lo zuang chhuak ta nawk nawk hlawm a. 

 

Chutia mangang taka mumal pawh nei lek lova an rawn zuan chhuah phak phak lai chuan duhthusama lo hualtute lah chuan nuam ti fahran hian an lo thal ta hmiah hmiah mai zel si a, an tan han tan reng ngaihna pawh a awm ngang lo a ni. Mit khap kar lek chhungin chung mi parukte chu an thi fai ta phiar a. 

 

Silai thawm chu a reh ta duk a, meialh in hlap ri hlup hlup thawm chauh chu a ni mai hian a hriat a. Amaherawhchu,  meialh han in hlap ri hlup hlup karah chuan Hickock a hriatna beng tha tak mai chuan thawm engemaw hi a hre ta tlat mai pek a. Chu a thil ri hriat chu sakawr tlan ri tak tak thawm hi a ni tlat mai le!

 

   Chu sakawr ke pen ri thawm chuan Fog Bound kulh chu rawn pan lovin a tlan chhuahsan mêk a ni tih chu a thawm hriat zawi tial tial avang chuan a hre thei ta a. Killer a ber chu a tlan chhuak ta a ni ngei ang tih pawh Hickock a chuan a ring nghal mai a. Chuti anih ngawt loh chuan kang hlum mai ringawt tur chuan In kang hluah hluah mek chhungah a pawngpaw tawmsen reng ringawt a ring lova. Chutah fimkhur tak chungin a nauteho tanhmun chu a fang kual ta zung zung a. 

 

Deputy pakhat zawk chu a banah an rawn kah hliamsak ve zeuh tih loh chu tumahin hliam leh nâ engmah an tuar hauh lo a ni. A naute ho ngei pawh chuan Dynamite han puak dur ta mai kha a ngaihna an hriat loh thu an lo sawi liam liam hlawm vek a. Chutah Hickock a han hrilhfiah ve ta zung zung a, a kip a kawi erawh chuan hrilh hman ta bik lo va.

 

       Hickock a chuan a naute ho hnenah chuan, "Heng hi lo ngaihven rih ula, nung dam an lo la awm anih vaih chuan zuah hauh suh ang che u. Kei erawh chuan an hotupa ber, Killera a tlanchhuah avangin ka um zui dawn a, thil engmah ngaihthat lohna tur a awm tawh lo tih inchian hnu erawh chuan Benvo khua, Black Bond a kulh lam panin in rawn tlan ve chauh dawn nia," tiin a han chah leh zung zung a. A naute tumahin an chhan ve hman hma chuan In kang lam pan chuan a kal phei leh ta nghal vat a. 

 

In la kang kai ve lo, Killer a chenna ni ngei tur chhungah chuan a va lut ta a. A lo rin ruk ang ngei in chu In hnunglamah chuan chhuah rûk theihna tur kawngka hi a lo in hawng phuau mai reng a. Chu kawngka atang chuan tuma hmuh theih hauh loh turin Fog Bound chu a chhuahsan theih reng a ni tih pawh chu a hmu chhuak ta a. 

 

Chuveleh Black Nill a dahna lamah chuan a kal leh nghal vat a, a thlen veleh a chungah in vawrh kai nghal lawpin, Killera chhuah rûkna kawngka zawn atang ngat chuan a um zui ve ta char char mai a. Killer a chuan khawilamnge a pan ang tih pawh Hickock a chuan a hrethiam nghal mai a. Black Bond a kulhah ngei khan a lut dawn a ni tih pawh a hre sa reng a. Mahse Killer a chu Black Bond a kulh chhungah a luhtir hauh tur a ni lo reng reng. Chu chu a nan hman loh vaih chuan an buaina chuan tawp lam ai in zual lam a pan ngei ngei dawn a ni. 

 

Black Nill a pawh chuan a pu hmanhmawh zia chu a hriatthiam pui ve a ni ngei ang, ke chhep rual hlah hlah khawp chuan a tlan kawh ta zur zur mai a. Reiloteah Lori a va chhanchhuah tuma Lori i rutute nena an inbeihna phaizawl cham dup hmun kha a va thleng leh ta hlawl mai a. Phaizawl chu rei vak pawh a tlan hma in phaizawl lai tak vela sakawr leh mihring lo ding reng chu a va hmu ta mai a. 

 

 An bul hnai a va thlen a, sakawr bula lo ding reng chu tunge anih a han hriat meuh chuan Hickocka chuan chupa chu Texas State ah chuan Gun- fighter turu lutuk mai leh mite pawhin an tih rilruk em em thin Rudolf-a a ni tlat mai!!  Chu mihring chu henglai ramah hmuh mai pawh Hickock a chuan a inring lo reng reng a ni. 

 

Chu pa chuan nui then deuh thu chung hian, "Mak mi ti hle mai maw!. Texas ah chuan Rudolf hming pu thin chu ka ni ngei thin a, mahse helai Mexico ah ve thung hi chuan 'Killer' ti in ka thang ve tlat thung a ni. I ranzia an sawi thin hi chu ka bengah hian a rawn ri ve tawh bawk a, chuvangin nangmah nen ngeia kan in tawn fuh theih hun tur hi ka lo thlir reng thin tawh a sin; tunah chuan chu hun chiah chu a lo thleng ta anih hi! Min umzui ngei ang tih ka rin avangin ka hnuhma pawh ka thup duh lova, hmuh awlsam turin ka hnutchhiah lui zel zawka tichuan he hmunah hian ka lo nghak ta che a ni. I ngam anih chuan i sakawr atang khan lo chhuk la, i rawn chhuk lo anih vek pawhin ka kaphlum tho tho dawn che," ti in a lo cho ta chheu chheu mai le!.. 

 

     Tlawm ngai lo Hickock a nen an in tawng fuh ta; Muang raih hian Hickock a chu a sakawr atang chuan a chhuk thla ve ta a. Killer a lamah chuan a pen phei ve ta chhat chhat a. An inhlat zawng chu fit sawmli vel chauh a ni tawh ang tihah chuan Hickock a chu a ding leh ta chat a. Black Nill chu lo in saseng rih turin a han hrilh leh rih a. Black Nill pawh chu a pu thuawih takin sirlamah chuan a va ding ve ta rohva. 

 

Killer a mitah tak chuan en ran chungin Hickock a chuan, "Killer, tih hming hi i lo pu zo meuh ngut dawn emaw chu? I hmaa ding ngam lo tur khawpa dawihzep ka lo ni lo hlauh mai hi chu a pawi anih hi. I hote thi mai tura tlanchhiatsan duh mi dawihzep hi i ni ang tih ka lo ring lo hi chu ka tisual thelh zawng a nih hi," a han ti let ve ta sak sak mai a.

 

     Chu tawngkam zet chu Killera chuan a tei thei lo hle a ni ngei ang, thinrim aw teng pherh chhe fe mai chuan, "Hrep tak che chuan," tih leh a pistol chu a rual ta nghal mai rohva. 

 

Pistol chuh ah chuan Killer a zet chu ran pawh a lo rang na ngiang mai reng a, a uar deuhte phei chuan han sawi sela, "Kawlphe pawh minit khat lai in a hnu fum zawk mah ang." tiin an sawi hial awm e, tih tur khawpa rang chuan a che ta a. Chumi rual deuhthaw chuan Hickock a pawhin a Pistol chu a theih ang tawka rang hian a chuh ve nghal zat a. 

 

A khel dinglama 38 Revolver pistol chu a han pawt dawk zawk mai a, vei lamah tlemin a thle phei zauh bawk a. Kar pawh awm hman lek lo khawpa rang chuan a kawng zawn atangin Hickock a chuan a hmet de ta zawk zawk mai a. A pistol mu chuan Killera chal ah tak a va verh ta sar mai a. Killer a silaimu pawh chuan Hickocka lu chung lawk boruak chu a rawn tawn ving phei fua mai bawk a. Mahse mukhat chiah chauh chu a pawimawh ber tlat a, leh pek a awm thei tawh lo!. Chuveleh han kap nawn leh tur pawhin tha chakna reng a nei lo zui nghal a. A kaihza chu a thlep hnawk a, a pistol hum lai chu a thlauh bawl a, amah pawh chu phul cham dep, tu huat thu mah sawi ve ngai hlei lo chungah chuan pawisak nei hauh lo ang mai in a tlu sawp ta nuaih mai a. Chal chang pawh awm hran lo tawpin a chatthla zui ta a ni. 

 

        Tunah zet chuan Fog Bound Gang chu an mang fai ta phiar a, mahse a ruka an hotupa ber, Benvo khaw pa hausa ni ve mai anga lang Black Bond a chu a la dam tlat si a ni. Chu chiah chu Hickocka mawhphurhna tawp

khawk pawh a ni dawn ta a ni. Hickock a chuan a pistol chu a paiah a thawlh lut leh ta zauhva. Chutah, Black Nill chu panin a chungah chuan a in vawrhkai nawlh a, Black Bond a kulh chhunga lut turin Benvo khaw lam pan chuan a limtir ta puat puat mai a. 

 

Black Bond a kulh a va thlen chuan tukthuan ei hun a pel hrat tawh a. Black Bond a kulh chuan nidang a lo ang ta hauh lo mai a. Gate vengtu lah an lo awm hauh bawk lova, chu kulh ropui tak mai chu a reh hian a reh hmiah  tawh mai a ni. Luahtu pakhat mah pawh an awm  tawh lo emaw tih mai tur khawpin a reh duk mai a. 

 

Khawchhung lamah an awm mai ringa kir leh a tum lai chiah chuan Black Bond a aw ngei mai chuan, "Wild Bill Hickock, a tawpna chu kan hlen law law tawh mai dawn lawm ni?" tiin kulh chhung lam atang chuan a rawn au ta loh loh mai a. Hickock a pawh a hawi let leh rang kher mai. 

 

Chu rawn chona aw ri chu pal zam mai mai chi a ni lo tih pawh a hrechiang em em bawk a. Hickock chuan fimkhur tak chungin Black Bond a compound ah Black Nill chu a luhtir a, amah pawh chu a sakawr chung atang chuan a chhukthla ta bawk a. Black Bond a rawn chhuah leh hun nghak chuan a ding ta ran mai a. 

 

Rei vak lovah chuan Black Bond pawh tualzawl ah a rawn chhukthla ve ta thuai a. Hickock a dinna atanga fit sawmnga vel tura hlaah chuan a ding chut a, a pistol chu chuh vat thei mai turin a kut bawr chu a khel sirah chuan a phar kak thu bawk a. Tlemin a ke chu a chhep kak deuh bawk a. Hma lamah chuan a rawn awn phei deuh du bawk a. Hickock a pawh chuan a khel zawnah a kut chu a pharh thla ve ta a, chet mai inpeih  at in a ding ve ta hah bawk a.

 

      Black Bond a mit meng chik taka a melh ran lai chuan Black Bond a chenna bik In lian tak mai tukverh atanga Rifle hmawr rawn hawlh chhuah da da chu Hickock a chuan a mitsirin a hmu ta tlat mai a. Mahsela chu Rifle chu Black Bond a chet hma chuan a puak mai bik hauh lovang tih erawh chu a ring tlat thung a. Hickocka chuan chu lam chu hmu lo ang mai hian hawi pawh a hawisawn phah duh bik hauh lova. Black Bond a chu thinrim in sum hram hram tih hriat zet mai hian a rawn tawng chhuak ta zuah zuah a. 

 

"Remruatna hi zawng i thiltih thiam berte zinga mi pawh a ni ngei ang a, tunah tak phei chuan min fin khalh tak avangin ka hote zawng zawng pawh an thi zo vek ngeiin ka ring bawk a. Mahsela tunah erawh chuan i tawpna a thleng ve tawh ang a, chumi zawhah chuan ka chan chin a mualpho thei ang bera Benvo khaw mipuite benga fahtu, i thianpa Kidney a pawh hian a rawn zui ve thuai bawk ang che," a rawn ti ta dum dum rohva. Hickock a chuan ngeiawm thei ang ber tura han thenkhum sak pah chuan, "Chung i sawi zawng zawngte chu i ti thei meuh angem tih chu a taka i lantir hma chuan ka awih thei hauh lo mai. A thi zawka i tan hlauh zawngin Benvo khaw mipuite hian i ruang chungah chil an rawn chhak tuar tuar ngei ang," a han tih khum ve ta salh mai a. 

 

    "Ka fiah ngei ang," han tih ngut pahin Black Bonda chuan a pistol chu a chuh ta chut a, a ran pawh a rang kher mai. Killer a te kha chuan a nê pawh an ek pha lovin chutiang taka phawirang chu Hickock a ngei pawhin a la hmachhawn ngai lo mai pawh ni lovin a hmuh pawh a la hmu ngai reng reng lo a ni. 

 

Chuveleh a theihtawp tak meuhva rangin Hickock a pawh chuan kawlphe ai pawha rang zawk mah tur hian a kut bawr pahnihte chu an phe ve ta zauh va. A kut phaha 38 Revolver pistol rawn bei chawt mai te chu a kawng zawn atang chuan an puak de dun ta zawk mai a. Black Bond a pistol pawh chu a rawn puak de ve zawk bawk a, Hickock a pistol mu pahnihte chuan Black Bonda chaldar takah kua an va hreuh dun ta sawr mai a. 

 

Hickock a silaimu chuan a va den hman tak hlauh si avang chuan Black Bond a silai chuan a tum pawh chu a thelhphah ta a. A silaimu rawn thlawk chhuak chuan Hickocka bek sam a rawn chhawk thawt a, a thi ve teuh ther ther kher mai. Chu aia vei lam hret inches hnih velah chuan han fuh vaih sela chuan an tawpna ni ve ve tur a ni mai dawn a ni. Mahsela han kapnawn leh tur lahin Black Bonda chuan chance reng a nei zui leh thei ta ngang silo. Black Bond a chu a hnung lamah a eu awrh a, a pistol hum lai chu thirling sa takah a chang ta thut emaw tih mai tur hian rang zet mai in a thlauh zui ta bawl a; Hreh hmel zet chuan a tlu ta ruai ruai a, a taksa in lei a thlen thlak meuh chuan a thichiang fel der tawh a ni. 

 

Black Bond a chuan a thil lo ruahman leh ropuina a lo thlir thin tawp khawk pawh a thleng hman teuh hle a, mahse a ropuina tawp a thlen hman hma in a nunna tawpna ni chuan a chungah rorelna,  Hickock a silaimu tuar lovin a kulh ropui chhung tualzawlah ngei mai chuan a thal hual ta mai a. Tunah zet chuan a thlarau pawhin Setana thu tiamtir apiang a chham zuah zuah tawh ngei ang le!!

 

    Tukverh atanga amah tinzawn tura Rifle ngul han che hrat chu Hickock a tan chuan signal tha lutuk mai a lo ni ta a. Rang lutukin a hma lamah a zuang phei dawrh a, chutih rual vek bawk chuan tukverh atanga Rifle ngul rawn lawr chhuak pawh chu a puak nghal thawr a, lo awm sawn hlauh lo sela chuan Hickock a chu a thi chiang kher ang chu! A vanneihna hian a hum theih thin em vang a ni. 

 

Chutah tukverh darthlalang zawnah chuan Hickocka pistol mu chu a thlawk chho ta fia fia a. Rifle rawn kap tupa kha a han fuh ta ngei a ni tih hriat zet hian a te ta ruai ruai a, chuveleh tukverh atang chuan a rawn tlachhuak ta nawlh mai lehnghal a. Hickock a silaimu chuan a thawk tha miah miah hlawm kher mai. Chu pa chuan nâ pawh a hre rei bik vak lo ni ngei tur a ni, lei a thlenthlak pawh chuan che leh tur awm zui hauh lovin a zal hlen nghal der mai zu nia maw le!!

 

   Lei a thlen thlaka a chetzui tak hauh loh takah chuan a thi ngei anih Hickock a ring mai a. Mahse trick pawh a lo hmang mai thei tih thu ah inring rilru tak chung chuan a pan phei nghal a.

 

A bul ava  thlen nâk chuan rinloh deuh mai in Marshal Tima kha a lo ni reng mai a, a lo thi chiang hman hle tawh lehnghal a. A tir atang renga Hickock a rindan chu a lo dik chiah mai a, Rustler an khaihlum dawn atang renga a lo rinhlelhna kha tunah chuan a dikzia a chiang ta hle a ni.

 

Thinrim zet chungin Hickocka chuan, "Sorkar hriat pui meuhva Marshal ni ve lem siah chuan i depde ber awm e. Misual laka venghimtu tur ni si, misual puitu i han ni reng reng mai chu'h..!. Tunah chuan a hlawkna chu i tel ta anih hi," hachang thial rap rap chung chuan a han tihkhum ta sak sak a. 

 

  Tunah chuan a naute ho pawh khan Fog Bound chu rawn chhuahsanin kawng laka mithi te pawh kha rawn hmuin an hruaitu Hickock a sulhnu a ni tih pawh an hre mai a. Benvo khua chu rawn lutin a hma a Hickocka'n a lo tiam tawh ang ngeiin Black Bond a kulh chhungah chuan an rawn pawh ve ta a.Thil awmdan zawng zawng Hickock an a naute hnena kim chang taka a han hrilhfiah kilh kelh hnu chuan lungmuang siai chungin Benvo khua ah chuan an lut phei ho ta a. 

 

Tukthuan ei hun tlai lam tawh mah anih avangin tukthuan chu an ei ve nghal a. An eikham chuan Hickock a chuan a thianpa Kidney a hnena a pawisa dah

kha va lam turin a kal nghal a. Kidneya hnenah chuan a thiltih dan zawng zawngte hrilhin kawng hrang hrangah a hriat ang ang te a lo hrilh tawh avanga a lawmthu te Hickockan a sawi hnu chuan Benvo khaw lamah a rawn kirsan leh ta a. 

 

Tluangtaka an chet theih avangin Kidneya pawh chuan a lawmpui ve zia thute a hlanlet ve bawk a. Hickock an a nauteho a rawn fin leh chuan hlimna namen lo hian a chiah vek tawh a, an chet tlatna J.L Ranch chu thlen leh thuai thuai pawh thil hmanhmawh thlak tak awm angin lang tawh lo mah se an rilru chu lawmna in a tur tawh zawk a. Hlim em em chungin J.L Ranch lam pan chuan an in zui haw ta thliah thliah hlawm a. 

 

        Tunah zet chuan J.L Ranch chuan zalenna hlim awm a lo hmu ta a, Jonathana lawmzia chu tawngka pawha sawichhuah theih chi a ni tawh lo. Chutiang bawkin Lori pawh!... 

 

Jonathan a chuan a nauteho chunga a lawmzia chu a titi tui ber a ni ringawt tawh a, sawi tur dang pawh a hre hlei thei tawh zawk lo. Nitin mai hian Hickock chungah a lawm em avangin a fanu nena an inkar thil vel pawh a hriatthiam pui ve em em thin a, innei ngei se a duh thu pawh a chhakchhuak ta hial nghe nghe a ni. Hickock a pawhin chu thu chu a pawmpui ve thu a hrilh nghal a; Mahse a lo tiamsak tawh angin Bringo chu a tul anga tanpui rih phawt a tum thu pawh a sawi tel nghal a. Lori Jonathani phei chuan kal chhuak tawh lo se a duh hle a, mahse a tunhma nun dan atangin mi mangang te tanpui chu a châk zawng tak a lo nih thin zia lah a hria a, dan chi ah pawh a ngai ta bik lova. 

 

Kar khat a lo liam leh hnu chuan Hickock a pawhin Bringo a, Tualthata an puhna hmun Texas State chhung, Abilen khaw lam pan chuan Arizona ram mawina zawng zawng ai pawha a thlan Lori Jonathani chu a kalsan ta nge nge a: Hreh rilru ve tak chung leh a thutiam tawh hlen ngei tumna rilru pu chung chuan J.L Ranch chu a chhuahsan leh ta a, Bringo a pawh chuan a zui hnak hnak bawk a.. 

 

 

        A TAWP TA.