Bung-13

Hickock a te chuan an chhuah atanga nihnih ni ah tlai ni tlak dawn suar suar lai chuan Benvo khua chu an inkhalh thleng ve ta hram a. Black Bond a pawh chuan a lo tiam tawh ang ngei in bawng pakhat zelah dollar sawmthum chuan a lo leisak ta ngei bawk a, a hmel atang ringawt chuan a thil tum chu ti duh awm hmelpu pawhin a lang hauh lo; mahsela rose par mawi tak pawh hi a hling chhun chu na tak anih theih tho ngai hi!!

 

        Pa fing tak a ni. Hickock a te panga pawh chuan pawisa te an inhlan fel tak hnu chuan Bond a kulh ropui tak chu chhuahsanin Benvo khuaah chuan an lut phei leh ta a. An kal pah te chuan an hnung lamah mi tuin emaw a rawn enthla zel ngei ang tih pawh a rin avangin Hickock a chuan rem a han ruat pah zung zung a. 

 

A remruat angin chumi zan chuan amah tih loh midang zawngte chu Benvo khaw Hotel ah chuan an awm vek anga. A ni erawh chuan an bawng hralhna pawisa zawng zawng, Dollar singthum leh sangthum zali leh sawmnga lai mai chu dah bo rih turin a thianpa Kidney a Ranch lam pan tur chuan tuma hmuh hauh loh turin Benvo khua chu a chhuahsan ve ta thung a. 

 

Kidney a Ranch a va thlen chuan a ni chu lungleng awm fahran hian a Ranch tualzawlah chuan thu chungin a lo faifuk hlurh hlurh a. Hickock a hmel a lo hmuh veleh chuan a thuthmun atanga rawn tho chhuakvatin, "I sawi lawk ang hun chiah vela i hmel hmuh hi ka lo beisei reng a ni," ti in hlim hmel tak hian a lo lawm a.  Hickocka pawh chu a sakawr atanga chhuk ve vatin pawisa funna bag chu a han hlang thla zui nghal a. Chung aia pawimawh zawk chu sawi tur ka ngah mai. Kid, ti teh, inchhung lamah i lut thuai phawt mai teh ang," a han ti a. Inchhung lamah chuan an in zui lut ta thuai a. 

 

A hma a thil chinchang lo hre ve ruak tawh anih avangin Hickock a sawi tur awm ang chu Kidney a pawh chuan a hre ve nghal mai a.

 

Inchhung an lut a, thuthmunte an han rem fel hnuah Hickock a chuan, "Bawngrual chu tluang takin kan rawn thlen thei ta hram a, Black Bond a pawhin dollar sawmthum zelin min lo lei sak hmiah a. Mahse thil engkim kan hrechhuak tawh a ni. Killer a Gang zinga pakhat thianah ka siam a, chupa chuan thil engkim mai min hrilh fai vek tawh," a han ti ta a. Thil awmdan engkim mai chu a thianpa Kidney a hnenah chuan a hrilh ve ta vek a.

 

Kidney a chu mak ti takin a meng phawk nghal hru a, chutih pah chuan Kidney a chu a han faifuk raih a.

 

"A va han mak duat duat ngai ve le! Ka lo beisei ai daihin thil a lo inkaiphan chhawng kual vel vak mai anih chu le," a han ti ta bal bal a.. 

 

  Hickock a pawh chuan, "Dik chiah! Chu chu a dik miau si a ni. Chuvang tak chuan he i Ranch ah ngei hian pawisa zawng zawngte pawh hi kan thukru vek rih mai ang a, tichuan he thil kan chinfel veleh hian kan rawn la leh mai dawn a ni. Ka mi rin ber te zinga mi i nih avangin ka rawn pan vang vang mai che anih hi," ti in a duhdan chu a han sawi chilh nghal zat a. Engkhaw sawi set set lovin Kidney a chu a tho ta hlat a, pawnah a va chhuak zawk a; a lo luh leh chuan thirtiang ban chen vel lek tur hi a rawn keng lut rang rang a. Chutah an awmna chhuat thingphel chu a han kar phawk lawp a, Hickock a pawisa ip rawn ken chu a khunglut ta thawt a, chu thingphel chu a hma ang chiah bawk chuan a kilh leh nghal hmiah a. 

 

       A thirtiang ken chu dah tha in a kut a han beng thak thak a, "Ti khan i duh ang chu a ni mai lawm ni.? Ka awm loh hlan pawhin i duh hun hunah i la thei tihna a ni tawh mai," ti in a thut hmun chu a pan veleh ta a.

 

Nui var var chungin Hickock a chuan, "Rem i hre kher mai, ti kha chuan a him ngawt ang chu!" tiin a han fak pah fe hlak a. Kidneya coffee siam te an in fel hnu ah chuan thla pawha eng nuam bawk a, Benvo a kir leh tum chuan a tho chhuak ta uaih a. Kidney pawh chu tho chhuak ve in kawt zawl thleng chuan a va thlah a, "Hickock, kei pawhin rawn inrawlh ve chu ka hreh hauh lo a nia, a tul anih phawt chuan min rawn hriattir ve dawn nia," ti in a in huam thu chu a han chah zui ve luam a. Hickock a pawh chuan a sakawr Black Nill chunga han invawrh kai nawlh pah chuan, "Teh reng mai Kid, a tul phawt chuan ka rawn hriattir em em ang che. Mahsela rawn pun kher che chu ngai lo hramse ka ti ngawt mai," tia han chhan let ve pah chuan Black Nill chu a kheng tlan zui ta nghal a.

 

     Hickock a Benvo khua a va luh chuan a nauteho awmna Hotel chu a va tlawh leh hmasa phawt a. A nauteho pawh chuan an lo la nghak thap hlawm a. A la hma deuh bakah nihnih chhung ngawt hah taka bawngrual khalh hrep tawh an ni bawk a, tlem a zawng va lem ve hlak rih turin saloon lam pan chuan an in zui chhuak ta dam dam hlawm a. 

 

Saloon chhung an va luh chuan dawrtu pawh an lo tam phian a; Hickocka te ho an va luh ve chuan thawm chu a reh nghal duk mai a. Thil engemaw tak chu a awm dawn tih Hickock a chuan a hrethiam nghal mai a. Mahsela thil lo thleng tur a awm anih pawhin a rawn thleng mai tur a ni. A hma a lo zat lawk ruai chuan awmzia a nei lo tih pawh a hrechiang hle thung a. 

 

Ngaihthah lohna engmah nei lo ang hrimin a nauteho chu Bar lamah chuan a phei tlangpui nghal zel a. Dawhkan awl pakhat awm chu kilin zu chu an han lam ve nghal zui zat a. Chutihlai te chuan Hickock a chuan a mit chu a len ru pah deuh reng a. No khat pawh an la lem zo hman lo tih chuan thil awmzia chu a rawn lang ta nghal mai reng a ni. 

 

An piah lawka mahni chauhva dawhkan kil palian pui mai chu a rawn ding chhuak ta hlut a, Hickock a zu no dawm lai mek dara han dawm chut pah chuan, "Nangmah hi maw Wild Bill Hickock in ti thin a chu! I huaisen hle thin ni pawhin an sawi che a, i lo huaisen ve tak tak thin reng nge ni a, i pistol hmang lo hian i huaisen nge sen lo tih fiah ve ka duh a ni. Kei chu i hmuh angin silai ka pai ve lo va. i ngam anih ngai chuan i gunbelt kha phelhthla la, rawn ding chhuak ve ta che," tiin a rawn cho ta mai rohva. 

 

Chutah a zu no dawm lai chu Hickock a chuan a han thawk khat pawp a, a dara vuantu kut hrawl zet mai chu na tawk fe hian a han vaithla lawp phawt a. Rawn thawh chhuah ve pah chuan penruk lai tur hi a han tawlhsawn nghal a. Chupa lam hawi chuan a han inher ve nghal a. 

 

Mite chuan an rawn en ta thap a, a hma ai mah chuan a reh zual hle tawh a. Saloon chhunga awm ho te reng reng pawh chuan chutiang ngata inchona chu tumahin an ngawihbo pui mai mai ngai lo tih pawh Hickock a ngat phei chu chuti mai in a tlawm hauh lovang tih pawh an ring theuh bawk a ni. Mite chuan an inbeihna turin hmunte chu an lo kian nghal dual dual a.

 

Wild Bill Hickocka'n a nauteho hmel  chuan rawn chet ve mai duhna a hmuh avang chuan, "Fredy, nangni pawh kha lo in saseng ve rih ula, tupawh dik lo taka rawn chet tum an awm anih vaih chuan lo thal nghal tawl mai ang che u," a han ti ta a. Chutah a gunbelt chu phelh ve nghalin a naute lamah chuan a theh phei zui ta zat a.

 

Hickock a rawn chotupa chuan nui vur vur chung hian, "I Gunbelt chu i phelh ve ngam ta chu ania maw..,  I ringruh kha ka thuai tliahsak nghal dawn che a ni mai a  lawm," a han ti churh churh a. 

 

A sawi zawh rual chiah chuan Hickock a lam chu a rawn pan phei zui nghal a. thawklehkhatah Hickock a chu a rawn zuan ta thut mai a.

 

Chuveleh rang lutukin Hickock a pawh chu a vei lamah a lo per sawn ve ta zauhva, chutih pah chuan amah rawn zuantu tukkhumah chuan a lo bensak ngheng mai a. Chupa chu a balance hloh avangin a hma lamah chuan a pai phei zui nghal chuan chuan a, dawhkan pakhat chu a va delh thlu ta ruap mai a, amah pawh chu a tlu zui ta rawk rawk a. A chet chhiat lai chu va nang ching zui duh lo mai pawh ni lovin Hickock a chuan a dinna pawh sawn hauh lo chuan a lo nghak ta ran mai a; va bawh chilh duh sela chuan che leh tur awm lek lo pawhin a va sawisa thei ngei ang! Mahse mi che thei lo lai han bawhzui kher chu Hickock a ngaihdan a ni lovin a duh bawk hek lo. Chupa chu thinrim vanga rum chungin a rawn tho chhuak veleh ta tuah tuah a. A hma aia fimkhur leh chetsual zawk tum tawh hauh lo chuan Hickocka chu a rawn vehphei leh ta hruau hruau a. A ni Hickock a ngei pawh chuan chetsual chu a tum bik der silo. Chu pa chuan rawn bawh leh thut pawh nise engtiang kawng pawhin rawn bei leh mahsela lo bum mai bakah a na thei ang bera lo kuk let leh siah tur chuan a insiam ru sauh sauhva.

 

Thinrim luat avanga a fimkhurna  hloh a, a hun hmaa va bawhchilh mai zawng a tum bau lo a ni. An palian dunin an intum tawk hmel bawk a. Entute mit pawh an titlai dun kher mai. A tunge chak zawk ang? tih inrinsiak chunga lo inchawi tawk pawh an awm nawk tawh a. 

 

A tam zawkte chuan Hickock a rawn chotupa, Buster a an tih mai chu insual a thiamzia leh a chakzia pawh an lo hmuh fo tawh avangin a che tha zawk turah an lo ruat tlat a. Bar nghaktupa leh mi tlemte te erawh chuan Hickock a tuanranzia te, a taksa thahrui hlira phiar fuat maite an hmuh zet erawh chuan chak zawk turah an lo dah ve tlat thung a ni.

 

Vawilehkhatah Buster a chuan Hickock a chu a lu a rawn tauh bur mai tum chuan a rawn bawh leh ta mak mai a. A lo persawn leh zauh ring sa chungin a ban chu a rawn vai phei fua bawk a. Mahsela Hickock a chuan a chetdan pang ngai kha chu a lo hmang duh bik ta hauh lova, a ban veilam chuan Buster a ban rawn vai phei chu a lo dang tleu a, chumi rual chiah bawk chuan a kut ding lamin tuboh liana chhut chawrh ang hiala nâ chuan a tukkhumah tak bawk chuan a lo chum sak leh ta bur mai a. Buster a tlu tur chu a khupin a han do kang leh chawrh a, chumi rawn dak awrh tak mai chu a khabeah tak mai na lutuk fe mai hian a han pe zui leh ta siah bawk a. 

 

Chutah rang zet mai in a dulah chuan a tlir sak zuipawp pawp mai bawk nen!. Chuti chung pawh chuan Buster a chu vawikhat a han pai uan a, tluk mai chu a tum bik ta rih lo. Amah han ena a pa len ang hu a mawi lo khawp chuan rang zet mai in a kut tum chu a han vai leh ta fua mai a; Hickock a pawhin lo bum seng ta bik hek lo, a rawn vai fuh ve ta siah mai a. 

 

Hickock a chuan a beka Buster a rawn vai fuhna chu sakawr pa khen ang chawrha nå hi niin a hre hial a. Penhnih lai chu hnunglamah a han pai dawt dawt a, mahse tluk zawng tlu ta bik em lovin a ding leh ta hram a. A beng kiu mum mum chu pawisa duh bik lovin Buster a chu a veh phei zui veleh ta thung a.

 

   Buster a chuan kut a tuar ngun ta deuh bawk a, ramsa thinrim han in hrosa vel ang hrim hian a rum ngul ngul tawh mai a. Mahse Hickock a khawihna te chu na tiawm pawh hian a lang chuang hauh lo!

 

Va bawhchilh ve mai tum niawm tak hian Hickock a chuan a zuan phei ta dawrh a, mahse va kuahchilh mai phei zawng a tum lo chiang kher mai. 

 

Buster an a rawn zuan mai dawn emaw tia lo kuah beh chawt tuma a ban rawn pharchhuak duai chu Hickock a chuan a kun san ta thut a, Buster a kerek dinglamah chuan manin a thawhpui zui ve thut zawk a. Chuveleh Buster a chuan chutiang chu lo ring lawk hek lo, tukkhum lei vaw chawrh chuan a tlu thal ta hual mai a.

 

Dimna tel hauh lovin Hickock a chuan a khabeah tak mai chuan a han chhir chawrh mai a, a boot hmawrin a khawihna lai chu thuife hian a kak nghal ruak ta mai a. Thisen pawh a rawn chhuak tha duh pur pur kher mai.

 

Pennga vela han tawlh hnun san lehin Buster a rawn thawhchhuah leh hun chu a lo nghak leh ta rih a.

 

Lo entute zinga thenkhat chuan ring taka au ngam meuh si lo hian. "Va bawhchilh la, va that nghal law law rawh," an lo ti sa sa bawk a. Mahse Hickock a chuan chutia an rawn auhna te chu hre reng mahse engah mah a ngai duh chuang bik hlei lova.

 

Hmai thi hnuang chunga Buster a rawn tho chhuak leh chuan khua pawh hmu meuhvin a lang tawh lo hial a. A thin chu a rim tak zet tawh a. Fimkhur nachang pawh a hre tawh lo emaw tih mai tur hian Hickock a chu rawn reh hlum nghal law law mai tumin a ban phar huang chung chuan Buster a chuan a rawn bawh phei leh ta ruak ruak mai a. 

 

Chutia a rawn phar phei chu Hickock a chuan tawlh sawn pawh tum bik hauh lovin a lo nghak ran mai a. Tun tum hi chuan a tawpna thlen tir ngei pawh a tum ta a ni. A tawpna a thlentir lo anih vaih chuan a leh pek chu a duhawm lo hle tawh ngei ang tih pawh Hickock a chuan a ringhlel hauh tawh lova, chuvangin leh pek neihtir tawh loh pawh a tum hle a ni.

 

Buster an a rawn bawhchilh lai tak chuan a kut pahnihin Buster a ban tawn tawn chu a lo vai kiang lawp a, alu chuan Buster a hnârruh tak maiah a lo tauhsak ta bûr mai a.

 

Chutah leh, Buster a chu a han nguk hruih a, a hnârruk tliak hial khawpa Hickock a tauh sakna avang chuan thisen chu a hnâr atang chuan a rawn dir chhuak ta nguah nguah mai a. 

 

Buster an a hnâr thi zur zur hup tuma a han invai buai lai tak chuan a kut zung tangin Japan insual dan chikhat, (Jister) hmangin a han ti kak tha a, Buster a hrawk bawk khalh chiah chuan a va chhunsak ta siah mai a. Chutah Buster a hrak bâwk chu a chung lamah a tawlh chho zawt a, chutah zet zawngin a tan dam khawchhuah lehna turin khua a tlai zo ta! A pai chuan chuan a, a meng pual rulh rulh mai bawk a, a hrawk nâ chu dawm run chung chuan a tlu ta dup rohva. A tluk hnu chuan a ke chu a han leng leh chiam a, sapui thi tur ang mai hian a han râk ruan ruan a, a rak chiam chiam a tawp rual rual chuan a chatthla chu a ni zui ta der a, a zal ta riai riai mai a ni.

 

       Buster a a chatthla fel chiah tih chuan thil engemaw han phe vuai a hmuh avangin Hickock a chu chhuatah a bawk phek nghal thlawp a, kawngka lam atang chuan pistol hi a rawn puak zui nghal thuai bawk a. Hickock a fuh ngei tura pistol mu rawn thlawk ving thiak phei chuan tum tak chu fuh lovin Bar dawhkan seipui mai chu a verh pawp ta hawk zawk a.

 

 Chuveleh saloon chhunga midang hote pawh chuan an sa himna chuhin an bawkphek ve sup sup nghal vat bawk a. Hickocka pawh chuan a pistol chu phawi mai tumin a kawng lamah a ban chu a han vai thla ve fua a. Mahse chutih rual rual chuan a gunbelt chawpin a lo phelhthla a ni tih chu a han in hrechhuak chawp chilh leh a. A kawrban chhung lama a chemte pai chuh a han tum leh lai tak chuan Bat a pistol chu a rawn puak ve ta thuai a. 

 

Saloon kawngka bula pistol hum chunga ding, hmana Hickock an a kut bawr a lo kahsak tawh Duck a chu Bat a pistol mu chuan a va lenvir ve ta nawk mai a. Lei a a tluk hnu pawh chuan Duck a chuan a tum chu a la tiruh viau tho ni ngei tur hian a pistol hum lai chuan Hickock a chu a la rawn tin veleh ta hram hram a.

 

 Mahse a hmehpuah leh hman hma chuan Bat a pistol bawk chu a rawn puak leh ta thuai a, Duck a chal dârah tak mai chuan a va verh sak ta sawr mai a; chutah zet zawngin Duck a pawhin a tum chu a thulh chiang kher mai le!!

 

     A chaldar taka silaimu in a den rual rual chuan Duck a chu a tawm nghal chawih a, suahsual rawng bawl leh tawh ngai hauh lo turin a zal nghal ta rawih rawih a. 

 

A kawr awm vela bawlhhlawh han ben fai thak thak pahin Hickock a chu a rawn tho chhuak ve ta a. A nauteho awmna lamah chuan pheiin a gunbelt chu a hreng ta mawlh mawlh a. Chutah Bat a dara han ben thak thak pah chuan, "Min lo tanpui avangin ka lawm kher mai," tiin Hickocka chuan lawmthu a han sawi ve a. Midangte pawh chu lawm ve tih hriat tak hian an lo bu ve zauh zauhva.

 

Chutiang thil thleng vel mak ti chuan entu mipuite chu an hawi kâ hau mai hlawm a. Chutihlai in Bar nghaktu erawh chuan an in thapna ah a man tu anih tak avangin a pawisa man chu a chhiar nuap nuap bawk a. Chutah, "Aduh a piang tan..." tih pahin a pawisa manin a daih tawk zu um ruk lai chu a rawn chhawp chhuak ta a. 

 

Chuveleh a thlawna zu in theih na nâ na chu ti in an rawn bawr nghal lut lut a; zu man sen ngai lo in pah chuan Hickock ran zia mawlh mai chu an sawi pah sup sup hlawm a. 

 

Pakhat phei chuan a uar zual deuh bik a, ring tawk leng lawng hian. "In sual a han thiamzia em em mai kha mak ka ti tawp thei lo a ni. A pistol phawiran zia lah chu chuti hlauh! 'Hickocka phawi khalh tur chuan a hma darkar chanve laia lo phawi lawk a ngai ang,' an lo tih fiamthu pawh hi a awm viau in ka hria. Insualah lah chuan Buster a kha kuttum hmanga inbeihna ah ngat chuan tumahin an hneh pawh ka lo ring ngai lova, kut lawng hau ngat leh nghal, hliam pawh tuar ve lovin a that thei ta mai chu a ni si a, ka hmu ve ngei chung pawhin ka la ringhlel rum rum cheu mai ka ti," a han ti lar lar a.

 

 Hickock a te thianza ho an chhuah tak hnu pawh chuan Hickock a chanchin ringawt mai chu an titi tui ber a ni zui ta a, an la sawi liai liai reng mai a ni. Wild Bill Hickocka, puakruk phawirang bera an lo sawi thin, a tak ngeia an han hmuh ve tak hlawmah chuan ti ti tui bera an han neih zui ta pawh chu a in awm ve tho a ni.

 

     A tuk khawvar hma hma chuan Hickock a te ho chu an tho kim vek tawh a. Zing ni a rawn chhuah hma ngeia The Fog Bound hmun chu thlen hman an tum a ni.

 

Ni chhuah hmaa an va thlen hman phawt chuan duh ang tawkin tan hmun pawh an va siamrem hman vek dawn tih pawh an inhria a, hmanhmawh tak chuan an insiam ta sauh sauh hlawm a.

 

An insiam sawk sawk a, minit sawm chhung lekin Benvo khua chu an chhuahsan fel thei ta mai a. Bringo khan uluk zetin Hickock a hnenah Fog Bound kawng, Benvo atanga kal pawhna chu chiang deuhva a lo hrilh diam tawh avangin harsatna pawh nei hauh lovin an kal par par thei a, an theih ang chuan an hmanhmawh sauh sauh bawk a. Chung an kalna vel te chu hriat lawk sa loh phei chuan han kalna awm pawh niin a lang lo reng a. Mahse Fog Bound kawng chu a ni ngei mai si a. Rustler hote fin thiamzia em em chu Hickock a ngei pawh chuan mak a ti in a ngaisang ve hle tho a ni.

 

 Bahlahna nei lova kal ngar ngar an ni bawk a, darkar khat pawh tling lovah Fog Bound kulh chu an va thleng thei ta mai a. Bat a te ho an tantirna lungin bul mai ah khan chu an kawngzawh chuan a pawh hlawl mai a.

 

 Sakawr atanga chhukin an sakawrte chu kulh ațanga hla deuh tak mahse an duh hun hunah chuan awlsam taka va hman mai theihna turah chuan an dah khap hlawm a. Silai ri an hlauh avanga an tlanchhiat theih mai loh nan uluk leh nghet tha tak, phelh awlsam tak tur si hian an thlung tlat vek bawk a.

 

Midangho zawngte chu khawilai emaw ah hian an awm thap hlawm a. Hickock a erawh chu amah chauhvin kulh vel va en thlithlai tur chuan a kal ta a. Duty pawh pakhatmah an in dah lo emaw tih mai tura an nauteho awmna lama kal leh mai a tum lai tak chuan lungpui phena han khuh khurh thawm chu a hre ta hlauh mai a.

 

Chutah thawm rawn neitupa, rawn khuh khurh a chu a han phun zui nuah nuah a, a khat tawka a han inben rik leh thlup thin a hriat avangin Hickock a chuan thosi chaw a awm chu ningin a phun nuah nuah anih pawh a ring thiam mai a. 

 

Tichuan a boot kara bakmeh chemte hriam ver vawr tak mai a thuhrûk chu a phawichhuak a, a han hum nghet fan a, thawm nei map lovin lungpui lam pan chuan a tawlh phei ta zal zal a. 

 

Lungpui bul a va thlen chuan a han chawl dat rih a. Chu ralveng pa chu in hiat soh soh chung hian a lo la phun bul bul reng a. Khaw han var, rawn êng ruih avang chuan, "A tih chi viau dawn e, a rei lutuk tawh reng reng," a han ti leh sup a. A sawi chu Hickock a pawh chuan a hrechiang ve ta kher mai. 

 

Hickock a chuan a lungphu te chu ring ta sauh hian a han in hria a; thawm chhete pawh a neih vaih chuan Killer a leh a hote chu an rawn harh anga, an thil tum te pawh a hlawhchham phah hial ngei ang. Mahse chu ralveng pa chu a hmasa ber atan dahthat nghal phawt a tul tlat a ni. Chuti anih loh chuan hnai takah Fog Bound kulh chu hual theih a ni dawn lo reng reng si a.

 

Thawklehkhatah Hickock a chuan chu pa phun nuah nuah reng chu a zuh bawh ta thut mai a. A kut pakhat chuan ralvengpa kå chu hup sak nghalin a kut lehlam chuan bakmeh chemte hriam elkhen a hum sa chu a thinhnunah tak mai chuan a chiu lut nghal pawp bawk a. Chutah chho zawng chuan a han pir zui leh ta kawk a. Ralveng tupa chuan a chungah engthil nge thleng ta tih pawh a hriat hman hmel loh kher mai. Rang tak chuan a chemte chu a phawi leh a, a mi thah pa kawr hma ah chuan a thisen kai luam chu a hrufai leh pawk pawk a, a boot karah bawk chuan a thawlh lut leh ta than a. 

 

Chutah ralvengtu Rifle leh pistol pahnihte chu a laksak a, a naute ho awmna lam pan chuan a kir leh ta thuai a. A nauteho hnenah chuan, "Pakhat chuan an kiam ta phawt mai a, a tam berah pawh sawmrual bak chu an ni tawh kherin ka ring lo. Hei Rifle leh pistol hi keng tel ula, lak lawh thilah pawh a mu thun chawp leh rih ai chuan a tuanran theih zawk fe ania," a han ti leh zung zung a.

 

An tanhmun tur theuh chu Hickock a chuan a han rel fel leh ta zung zung a. Silai hmeh puah hun tur erawh chu ama zai ngai turin a chah hlawm bawk a. Chutah amah pawh chuan a tanhmun tur chu a siam fel ve ta thuai a.

 

Rustler hote chuan an rawn kah let ve ngei dawn avangin silaimu laka an him theih nan lungpui tan chhan an nei vek a. Thawn thawh thut ai chuan anmahni rawn chet chhuah ve hun hun lo nghah mai tha zawka an hriat avangin an rawn thawhchhuah hun chu an lo nghak ta ran hlawm a.. Tunah chuan khua pawh a êng chiang hle tawh a ni.

 

Ni a chhuak tep tawh a, khawilai ah emaw chuan nichhuak êngmawi tak pawh a lang thei ngei tawh ang tih pawh a hriat a; mahse Fog Bound ram erawh chuan ni hmel reng a la hmu pha ve rih lo a ni. Killer a leh a hote pawh chu an rawn tho ve tawhin kulh chhung lamah chuan thawm an rawn neih ta laih laih a. An meichhem rim te pawh chu a nam chiai chiai tawh bawk a, mahse pawn lama rawn chhuak erawh chu tumah an la awm hauh lova. 

 

Bringo a sawi kha a dik anih ngai chuan tukin zingah ngei hian Fog Bound Gang ho chuan beihpui thlak turin J.L Ranch chu an rawn pan tawh dawn a ni a, chu tak chu lo va chan khalh an tum a pawh a ni reng a ni.

 

          Darkar chanve dang an han nghah leh meuh chuan Killer a hote hmel chu an hmu nameuh ta mai le!

 

Inchhung atang chuan an rawn chhuak ta zauh zauh hlawm a, a rawn chhuak hmasa a piang chuan an sakawr jean te chu rawn pu chhuakin Corral lam chu an pan nghal zel a. Corral chhunga sakawrte chu an kaichhuak a, an sakawr jean an rawn kenchhuah chu an chuanna tur sakawrah chuan an phah mawlh mawlh hlawm zel a.

 

Corral bula awmte zawng chu an vai in pasarih an tling tawh a. Mahse chhung lamah chuan tlem a zawng chu an la awm a ni tih an thawm la ri laih laih ațang chuan a hriat theih a. Chuvangin Hickock a pawh chuan chet mai a la duh rih tlat lo a ni.

 

Mahsela in pakhat atanga rawn chhuak mi pakhat chuan thil a rawn ti khawlo zo ta vek tlat mai le!.. 

 

Chuvang chuan Hickock a pawhin a duh aia hma a chet a ngai tih a hre nghal mai a. Chupa chuan midang rawn chhuak te tihdan ang lo deuh mai chuan Rifle hi a rawn zakzeh chhuak tut tut a, zan ralveng kha ava thlak dawn anih hmel hle a; ralvengtu awmna lam chu a pan phei ta tlat mai si a. Ralvengtu va thlak tur awmna a va thlen a, a hmuh hun hunah thil chu a buai zo vek tho tho dawn tih a hriat avangin

 

Hickock a chuan a Rifle chu a kau ta rap mai a, a koki ah chuan a chhuang chhova, uluk zet chuan a tin ta a, rei rial lo chuan a hmetpuak ta thuai mai a.

 

 Chu veleh chupa, Rifle rawn zak zeh chunga ralvengtu awmna lam pan phei mek chu chiang zet mai hian a thal nghal awrh a, tichuan corral lam hawi chuan a Rifle chu tin leh nghalin a hmet puak zui nghal ta zawt zawt a.

 

Vawithum a han hmet puak a, a hmehpuah a piang mai chuan Fog Bound Gang te chu an thal tawl tawl zel mai bawk a. Hickocka'n silai a hmehpuah veleh a nauteho pawh chuan an Rifle chu an hmetpuak ve nghal zawt zawt a....