Bung-10

A tuk khua a lo var chuan Hickock a chu hma tak ah a tho va, coffee sa tha tak mai leh biscuit thahnem tham fe a a in hnawh puar hnu chuan Hotel manager, pa rinawm pui mai chu ti ti khawchang sawipui a rilruk ta a. A awmna lamah chuan a chhuk thla ta a. Manager pa chuan hlimhmel pu suah chung hian, "E khai, keimah ang bawka mut rei theih lohna hri vei ve bawk i ni dawn maw?" tiin a lo be hmasa soh soh a. Chupa hmel leh mizia chu Hickock a pawhin ngainat zawng tak hi a ni ve a. Tlangnel takin Hlickock a pawh chuan thuthmunte a han rem ve te te a, "He khua hi ka vawikhat tlawhna chauh a la ni a, a nuam ve hle ang chu maw.?" a han ti ve nghal sawt sawt a. Manager chuan, "Nuam ve viau bawk e, mahse, pa awmnem tak tan chuan han in kulhna chi vak zawng a ni lo anih hi," nui deuh hak hak pah chuan a han ti ve a.

 

Hickock a chuan, "A ni ngei in ka ring. Pa hruanghrau pui pui, hnathawh pawh nei mumal mang silo, tawrawt hmel pui pui hoten khawsak nana an hman tawhna ah hi chuan Dan ai in puakrukin ro a rel chawk thin a ni. Mahse nangni zawngin Marshal rinawm leh chhuanawm tak in nei a, a zia pawh a awm viau ang chu," tih pahin a han kiai deuh sak a.

 

     Hotel Manager pa pawh chu a kuaite zuk tur beng mawlh mawlh pah chuan hul deuh hak hian a han nui suk a, "Thenkhat tan chuan a lo rinawm viau pawh chu a ni mai thei e, mahsela kei erawh hi chuan vawiin ni thleng hian hna a thawh that a, khaw mipuite hian kan chhawr tangkaina vak awm pawh hi ka la hre ve hauh lo mai thung," ti in a kuaite zuk tur chu a tankai zui ta hlap hlap a. Hickock a chuan, "Chuti chu ka lo rindan zawng a dik lo der tihna zuk nia. Chuti anih chuan anih leh tunge a kawp  tak deuh bik anga, a han thurual pui deuh bik awm te i hria em?" tiin a lo zawt var a. "Chu zawng, amah i zawt anih ngawt loh chuan keini tan han hriat theih chi a ni lo; Ka hriat theih chinah chuan Black Bond a thu leh hla saw a ngai pawimawh thei riau thin tih mai chauh a ni," tiin Hotel manager chuan a hriat dan ang chiah chuan a chhang a.

 

 Hickock a chuan phur hmel deuh hian, "Black Bond a i tihte phei chu ka hre ta lo deuh deuh mai. Chupa chu he khua a awm ve hi em ni? Pa hausa tak zawng a ni ngei phawt ang chu maw?" tiin naupang chhia ang maia dilchhut chuan a zawt ta sek sek a. A rilru tak chuan a thu hriat duh chu chung atang chuan in kaihhnawih dan awmin a ring tlat a ni.

 

Hotel Manager pawh chuan Marshal chu a lawm tehchiam lem lo bawk a ni ang, chung chanchin vel te chu a sawi chak zawng tak mai a lo ni ve a, a kuaite zuk lai chu a han pak khu tulh tulh phawt a. 

 

"Hausa teh reng ang chu le! Black Bond a aia hausa tur he khuaah hian tumah kan awm hauh hleinem. Ani chuan bawng rual tam tham tak pawh nise, pawisa pe tla nghalin a lei hmiah hmiah thei maw le. A tihral lehna lamah pawh sum a ngah tawk bawk a, engmah harsatna a nei ngai lo reng reng," a han ti a, a kuaite chu a han pak leh talh talh rih phawt a. 

 

   Chutah han sawi zawm lehin, "Kan Marshal ve te hi chu ui te, a pu in a duh ang anga a kaih kawi vel theih ang chiah hian a duhna a piangah a tirin a kai kal vel mai mai anih ber hi; 'ka êk ei rawh' pawh ti ta sela, tui tihhmel takin a ei hmiah hmiah maiin a nia ka rin ni. A hming chuan Tim a hi Marshal chu han ni ve bawk mah sela, Dan chu Black Bond a kutah vek hian a awm a ni ber mai," a ti ta zuah zuah a, a kuaite mawlh mai chu a pak leh ta sek sek a.

 

 Hickock a chuan a lo ngaithla tui hle a, a duh ang tawk pawh ngah tep tawhin a inhre nghe nghe a ni, "Chuti anih te chuan Benvo khaw mipuite hi tangrual ula, Marshal dang neihdan ngaihtuah mai ula a remchang mai lawm ni?" tiin a kuaite zuk karah chuan a lo zawt leh zauh va. Manager chuan awlsam fahran hian, 'Engnge awmzia awm chuang lem ang? Chutiang chuan Marshal rawn awm apiang hi a tawp a tawpah chuan Black Bond a kutah bawk hian an awm leh nge nge thin a ni," alo ti leh mai a.

 

 Hickock a pawh chuan nih hmel hle in a hre ve a, pawisa in thila tihtheihzia leh Dan chunga rorelna a chan tawh hi chuan mirethei tan chuan han tih danglam ngaihna vak pawh a awm tawh lo a ni tihte chu Hickock a chuan a hre ve vek a ni.

 

       Hickock a chuan, "Anih leh Black a in tih chu khawilai hmunah hian nge maw a khawsak ve le.? Vawiin lam chu tlawh chhuah ve te pawh ka duh riau a nia. Bawngrual hralh turte pawh tlem a zawng chu kan nei ve dawn a, a reng thuah chutiang mi ropuite chu han kawm ve reng rengte pawh ka châk riau a ni," a han ti ve a. Manager pawh chuan, "A ni teh tak e, va hmu ve teh: mikhual chungah phei chuan a tha viau leh nghal a nia. Heta tanga chhimlam kawng in kham raih saw i hmu anga maw," tih pahin tukverh atang chuan a han kawk a, ani chu a lo bu nghat a.

 

 "Mel chanve vel han kal a. Black Bond a kulh inzar put chu i va hmu mai ang," tiin a hrilh ta a. Hickock a chuan Manager hnenah chuan thiltam tak a hrilh avang a lawmthute hrilhin Hotel chu a chhuahsan ta a.

 

 Kawtzawl a thlen chuan zawite hian a han faifuk raih a. Chutah carrol chhunga Black Nill lo muthlu lup lup pawh chuan a pu faifuk ri chu hria in a awmna atang chuan a rawn chhuak ta thoh thoh a. Ngai ve hle niawm tak hian a pu chu a rawn nul thuak thuak a.

 

      Black Nill chunga han invawrhkai nawlh pahin Hickock a chuan, "Black Nill, tirawh le, tukin chu zingkarah hnathawh tur a tam avangin i han che sauh sauh nghal teh ang" a han ti sap a, chutah an kal chhuak ta nghal vat a. 

 

Kawtthler ah chuan a han tlan kual pawp pawp phawt a. Chutah a duhzawng thil chu a hmu fuh ta mai a. Dawr pakhat inhawng tan chiah kawtah chuan a ding ta chat a, a sakawr atang chuan a chhuk nghal a. Chu dawr chu lian vak lo mah se  mamawh chihrang hrang ei leh bar thil an zawrh kim ve biai naah chuan  a lut ta a.

 

 Dawr nghaktu, pavalai tak leh cher khen khawn tak si chuan Hickock a lo lut chu a lo be sawt sawt a, dawrtu an la awm loh avangin phur pawh a phur hle nghe nghe a ni. Hickock a chuan, "Hemi ang samkhuih hi i dawrah hian i zuar ve thin em?" tih pahin a kekawr ipte hnung lama a ah that, samkhuih te tak te chu a rawn phawrh chhuak a. Chutah dawr nghaktu chu a han in ngaihtuah vang vang phawt a, hrechhuak ta thut ni awm tak hian, "Ka lo nei tawh hauh lo mai, a dang i duh mai lawm ni? Khatiang kher kher kha chu Pu Bond a nauteho hian an duh bik riau mai thin a, an rawn la zo leh duak mai thin a ni," a rawn ti ta a. Chu chhanna avang chuan Hickock a chu a lawm ta em em mai a, mahse a hmelah chuan a lawmzia chut tihlanloh hram erawh chu a tum tlat a. A langah chuan pawi ti ve deuh niawm tak zawk hian a lang a.

 

 "Chuti anih chuan ngawi teh, a neitu turte ka va rawn leh phawt anga, an lo duh tho anih chuan thildangte pawh kan rawn lak belh teuh zawk dawn nia," tih pahin chu dawr chu a kal chhuahsan leh ta a. Chu dawrah chuan sum sengin engmah a lei lo na a, a duhthusam erawh chu a lei tlat si a ni. Chutah rilru hlim em em chung chuan Black Nill chungah chuan a han invawrhkai leh nawlh a, Black Bond a kulh lam pan tur chuan chhim lam chu pain, a sakawr chu a kal tir leh ta zel a.

 

   Kawtthlera a kaltlang lai te chuan miten an hmu duh hle a ni tih chu a mitsir chuan a hmu ru reng a. A chhan awm erawh chu a hre lovin a bangbo hle thung a ni. Nizan boruak avang kha a ni ang e, han ti ngawt dawn sela, silai hmanga inbeihna te chu an peih leh peih loh hmuh tur a awm reng mai hmel bawk si! 

 

Chhim lam in tawp ber a pelh phei hnu lawk chuan a rin loh tak mai in Marshal Tim a nen chuan an in tawk ta hlawl mai a. An in tawh veleh chuan Marshal chuan a sakawr chu pawt ding meuhvin, "Hickock, i pan lam hi i hria maw? J.L Ranch kawng ni lovin nimin tlaia i kahhliam Duck a te kulh i pan dawn a ni. I fimkhur hle loh phei chuan thlanmual member tipungtu mai i ni dawn a ni," a rawn ti chhuak tawng mai a. Chu zet chu Hickock a pawh chuan mak a ti ve kher mai. "Engtinnge ka hmingte chu i lo hriat hman pek? Kan pu Jonathan a kha i lo zawt leh ngial zawk em ni?" a han ti deuh he haw a. Saloon ah khan a hming hrethei tur awm a hriat loh avangin Hickocka tan chuan a mak hle reng a ni. A hma in Marshal khan hriatna a lo neih em a ring hauh silova.

 

Marshal chuan, "Nangang mulukawlh ang maia awm hmun nghet pawh nei thei lova phawirang nih duh vang ngawta mi cho tur ngawt zawng chiam chiam mai mite hi chu keini ang sorkar ruat Marshal chinte hi chuan kan hai ngai hleinem?" a han ti deuh salh a. Chu tawngkam chuan Hickock a thin chu a tisa ta deuh phat mai a, mahsela a la hun rih lo tih hria in a inbengdai thei ta hram a.

 

 "Ka hming zawng i hre dik na meuh e. Mahsela, nang ang mi  depde leh Dan pawh keng kawh ngam lova mahni pute kephah liak ve duh turah chuan min ngai ve lo la i tisual tam pui lovang. Tunah pawh hian i pu Black Bond a chu ka va hmu dawn a, i nihna hi chu ka la phawrhsak leng ang che," han tih zui siah siah pah chuan Black Nill chu a kaltir ta a

 

Marshal Tima han thinrim hmel zet chu turu tak hi a ni ringawt tawh mai a. Hickock a chu a hnunglama thlir zui vung vung chungin a in sehruh fan mai a, a tukkhum atang chuan a thluak bur han kah darhsak vek mai tak a nap a. Mahse chu em chu Marshal ve meuh tan chuan han tih chi a ni der bawk silo. "Nang pawh i chanchin engkim hre vek tu Kidney a hnen atangin ka hre fai ve vek tho vang," Hickock a hriat phak ngei tura han tih sup pah chuan a sakawr chu a kaltir veleh ta chhut chhut a.

 

 Chutah chak mang khenin a tlantir ta puat puat a. 'Kidney' tih hming a han sawi rik zauh chuan Hickock a hriatrengna chu a rawn kai harh ta zawk mai. Kidneya, tunhma hun kal tawha a nun lo chhanhim sak tawhtu, a thianpa ve thin kha a ni ang em? Lo ni ta nisela saloon chhungah khan a lo awm ve reng em ni dawn le? Mahse, chutiang ngaihtuah vakna hun chu a la ni lo tih hria in Black Nill chu a kaltir ta zel a.

 

 Black Bond a chu eng ang hmelpu nge anih ang aw? tihte chu a ngaihtuah zui leh ta zel zawk a.

 

     A hma zana a naute zinga pakhat nen an infiam hlakna avang khan a hmuh veleh a lo kap pawp nghal mai duh ang em? tihte chu a ngaihtuah pah nauh nauhva. Mahsela chu zawng han ngaihtuah lawk vak a sawngsawhlawt vak lova, hunin a la rawn hril zawk ang chu.  Engpawhnise Black Bond a chu va hmuh a, va biak ve reng reng a duh tlat si a ni.

 

A thlenna Hotel Manager in a lo hrilh tawh ang ngeiin mel chanve vel a kal hnu chuan Black Bond a kulh chu phaizawl hmun rualrem tha zet maiah chuan a lo inhung put mai reng a. In lian zet mai, a bang pawh lungrem veka sak, var vo mai chu in tetakte te hian an hual khap a. Chung In awmna chu a kual chhuakin pal, fit sarih vel laia sang hian a hual chhuak vek a, palte chu thirhlingnei hian an thuah leh vek bawk a ni. Chung pal, rinawm zeta an siamah chuan luhna leh chhuah velna turin kawngka (Gate) hmunkhat chauhvah siam a ni a. Chu pawh chu mi pahnih Rifle keng hian an veng reng mai lehnghal à. Phalna nei tan lo chuan han luh mai mai pawh harsa tak tur a ni tih Hickock a ngei pawh chuan a hre nghal mai a. Amaherawh chu luh theih ngei chu a tum ruh ve nasa mai si a, engemaw chhuanlam tha tawk tak a siam pawh a ngai ngei ang le!

 

     Hickock a chuan Gate bulah chuan a sakawr Black Nill chu a dintir ta a, "In pu hmuh lawk ka duh a, a awm em?" tiin a han zawt tan phawt a. Gate vengtu pakhat zawk chuan inti rinawm hmel zet hian, "Luhtir tura hrillh kan nih bak chu tumah kan luh tir ngai lo," a han ti deuh hmak a.

 

 Chupa han hawiher leh chevel reng reng chu Hickock a chuan a ngei tawka lo tling hman hle a. Mahse, aw dam thluam bawk tho hian, "In pu hnenah chuan anih leh min han sawi sak ta mai ula, amah hmu tura lo kal hi Wild Bill Hikcocka ka nih thute sawiin, bawngrual sang chuang hralh tur kan neih avanga amah chu be duh ka nih pawh han sawi nghal bawk ula, ka luh chu a rem ti em em ang," tiin a han hrilh leh ta a.

 

    Wild Bill Hikcock' tia a han inpuan meuh chuan an mitmeng chu hmuhtheih khawpin chu mite pahnih  chu an danglam nghal hial a. Chutah pakhat zawk chu muangchang lovin rang zet hian a inher a, an pu hmu tur chuan a kal nghal ta vat a. Gate duty pakhat zawk chuan a thianpa kal bo hlan chuan, "Kan pu chuan a hmuh duh thu che chu a sawi tawh ngei tak a sin. Mahse Duck a ve thung erawh chuan hun remchang a hmuh veleh thah nghal che a duh hial ngei ang," a han ti nung nung a.

 

Hickock a ve thung chu ngai pawimawh vak awm pawha lang chuang lo chuan a han nui var var a, "Min hrilh avangin ka lawm hle mai. Khatiang mi Duck a in tih ang mi tan kha chuan an duh aia hma ah khawvel an chhuahsan fo tawh thin reng a ni; kan....."

 

 Han sawi chhunzawm leh a tum lai tak chuan Gate vengtu pakhat zawk kha a lo kir leh ta mai a, a sawi duh pawh sawi chhun zawm zel ta lo chuan Hickock a pawh chu a ngawi ve leh ta zawk a. 

 

          Chu Gate vengtu rawn kir leh pa chuan, "I rawn lut thei ang," tih pah chuan Gate chu a hawnsak ta nghal a. Gate chhung lama a luh hnu chuan a sakawr atanga chhukin in var lian tak kawngka lam pan chuan a kal ta thauh thauh a.

 

   In lian tak kawngkhar vengtu pawh chuan Hickock-a chu kawngka a lo hawnsak thuai a; Hickocka'n inchhung a han luh meuh chuan a rin ai daihin a lo ropui zawk lehnghal a. A hawi vel ruai a, Mexico ah pawh hetiang hmun kilkhawr ber pawlah lehnghal hetiang taka inchhung changkang a han awm mai chu a la hmu ve lo tan chuan tupawh nise mak tih loh rual a ni lo reng a ni. Hickocka chuan an inchhung cheivel dan te chu ngun takin a mitmei pah reng a, hmuhnawm tihna tak pawh a nei a ni. A hawi vel ruai a, Hickock an Black Bonda hmel a han hmuh chuan a rin ang reng a lo ni lova, han en mai phei chuan pa rinawm leh fel tak hmel pu a ni rohva. Mahse, hmel han en ngawta sawiselbo ni mai awm pawh hi mi suaksual leh chimawm ber an ni ve thei tho tih erawh chu a hre em em thung a ni. A rinhlelh tawhna zawng zawng chu anihna tak fiah anih hma chuan mitha en a en ngawt chi ah chuan a ruat thei chuang lo.

 

 Black Bonda chuan a lo hmuh veleh hawihawm thiam tak hian, "Hickock, ka hmu che chu ka lawm ngawt mai, engnge tihsak theih che ka neih?" tiin a lo be hmasa luam rohva. A chan chin la hre ngai hauh lo te tan phei chuan mitha tawp thang ni mai awm a ni.

 

Hickock a chuan a rilru te te in Hotel Manager pa i'n 'mikhual chungah phei chuan a tha thiam teh mai a nia' tia a lo hrilh tawhte kha a hre chhuak rum rum a. Dik dawn hmel hle pawhin a hre nghe nghe a ni. 

 

Chutah thudang han vawrh daih chu tul a tih bik lem loh avang chuan, "Heta tanga mel sawmli vela hla atang hian bawngrual sang chuang mah tur, thau tha tak tak rawn hralh kan duh a, tichuan a man lamah harsatna i nei ve ngai lo tih mi kâ atanga kan lo hriat avangin nangma hnen ngeia rawn hralh hi kan rilruk ta a, kan rawn dawr che a ni," tiin a kal chhan dik tak pakhat chu a han hrilh ta a, pakhat zawk erawh chu sawilan chi a ni hauh thung lo.

 

Black Bonda chuan a churut lianpui chu a rawn phawrh a, a tan nghal a. Han fawh khuk luai luai pah chuan, "I hre dik e. A man lamah chuan ka buai ngai lo reng a ni. Chutianga bawng thau tha anih chuan pakhat dollar sawmthum zelin ka lo la ang e," chapo deuh tak chuan a ti ta a.

 

Chutah Hickock a pawh chuan lawmthute hrilh nual pah chuan, "Chutianga min lo laksak theih dawn phawt chuan kan rawn khalh ang e. A man tur pawh ka beisei ai daihin a tha dawn lehnghal a. Nang nge nge rawn pan vang vang man pawh i awm khawp mai," tiin a han fak zui hlak a. Mahse khawi atanga rawn kal nge tih erawh chu a hrilh tel duh hauh lo thung.

 

Black Bond a chuan a churut han pak khuk luai luai pah chuan. 'I rawn kalchhan chu kan sawi zo ta bawk a, hmuh duhna che pakhat ka nei ve a, remchang takin i rawn kal ta hlauh bawk a, min lo ngaihthlak sak teh; "Nimin tlai kha ka naute zinga pakhat chu hun rei tak chhawr theihloh tur hialin min lo siamsak ta a, amaherawhchu tunge i nih leh khatiang taka pistol chelek hneh sawh leh phawirang kha ka mi duhzawng tak an ni hlauh thung a. Chuvangin nang pawh pawikhawihtu ah ka ngai lo che in ka haw hauh lo che a, ka lawm hle zawk a ni. Tin, i kutpalh lo tuartu kha Ducka a ni a, ani hi chu a tul bak thleng thleng hian a in luling deuh thin reng a, i hriatthiam pawh a ngai a ni. Tichuan ka hmuh duhna chhan che chu i duh phawt chuan ka hnenah thla khatah dollar za hlawh tura rawih che hi ka duh a ni tih hrilh che hi ka duh a, ka sawm nghal che a ni. Hna hahthlak tak thawh pawh a ngai lovang," Black Bonda chuan a ti ta churh churh a.

 

       A rilru tak chuan Hickock a chu a nuih takte pawh a za ru hle a. Mahse a in sum hram hram a; a hmelah chuan lantir loh hram hram a tum tlat thung a,  "Chu zawng ka pawm thei ngei ang emaw, ka pawm thei lovang tih pawh tunah mai chuan ka sawi thei lo. Engpawhnise, tuna ka rawn dawrna ah che chuan han in tifel zo hmasa te te rih phawt ila, thu tlukna chu kan la siam zawk dawn nia," tiin an thu chu a pawt chat ta zaih a.. 

 

       Ani ve thung hi chuan engtikawng mahin a hnena thawh hi chu a tum dawn lo reng reng a, mahse a laka beisei awm tak anga lan rih chu tun atan chuan a pawimawh ber rih tlat si a. A kalchhan pakhat a la chian loh

avangin duh lo anga lan nghal mai chu a tih chi rih lo a ni. 

 

Black Bonda pawh chuan beiseina sang tak neichung chuan, "Tehreng mai, ka lo beisei reng ang che. Anih  leh engtikah nge bawng chu i rawn thlen theih ang?" a han ti veleh ta soh soh a. Hickocka chuan, "Naktuk ațanga nithum ni ah rawn thlen pui theih ka beisei a, mahse muanchanna tur thil engemaw a awm palh anih erawh chuan ni lina ah pawh a ni mai thei thung," tiin a tho ta a. Tihtur pawimawh dang a la neih chhuanlamin chhuah tawh mai tum thu a han sawi lang zui a. Tichuan a kal nghal a. Bond a pawh chuan kawngkapui thlengin a rawn thlah ve ta nghe nghe a.

 

Black Bond a nena an han din dun meuh chuan amah aia palian leh sang a la ni mah zawk tih chu Hickocka chuan a hre mai a. Chu bakah a pistol pai dan, a kawm hmalam hawi (cross draw) zawnga a pai, a kawm hnum hlarh maite chu inchei nan maia pai chu a ni bik hauh lo tih pawh a hrechiang em em bawk a ni. A han che vel reng reng chu a inring tawk hle tih a chiang a, a tul phawt chuan kawlphe ai maha rang tur khawp pawhin a phawi thei ngei ang tih pawh a ring thei nghal mai a ni.

 

       Black Bonda kulh ropui tak mai Hickocka'n a chhuahsan leh tak hnu chuan a sakawr chungah chuangin Black Nill chuan a kalpui thoh thoh a. Hickock a chuan a rilru te te in J.L Ranch bawng rawn ruksak thintute nen inkungkaih theihna tur awm angte chu a chhui pah nauh nauh reng a. A rindan chu a dik anih chuan Black Bond, Rustlers, Marshal te chu an inzawm kual vek a ni chiang mai tihte chu a ngaihtuah a. Chuti ni ta sela engvangin nge J.L cowboy pahnih leh Marshal leh a Deputy pahnih tena Rustler ho hnu an chhui khan engtizia a Marshal chu man tel ve tho nge an nih ang?

 

 Mahse chu zawng thil awm lo a ni hauh lo. Man tel lovin chhuah ta bik ngawt sela mipui ngaihah Marshal chu chawp leh chilha rinhlelh a ni thei nghal a, chuvang chuan Marshal an man tel ve kha thil awm lo chu a ni hauh lo. Chung thil ti rinawm lehzualtu chu Rustler an man, an khaihlum dawn khan engatinge Marshal khan khaihlum kha a rem tih ve mai tlat loh. Hickock a chuan a chhanna chu a hmuchhuak nghal mai in a inhria a.

 

Tunge mahni sangawizawn puite leh mahni mi leh sa te khaihlum duh ang. Khatihlai khan a awm ve reng si a, Chumi thilah chuan in hnamhnawihna a neih loh thu leh an ruala a kal ve loh thu dawtin lo va in sawi fihlim diam a duh tihna a ni mai. Chutiang ni lovin a Deputy te pahnihte duh ang kha tawm pui ve thei nisela chuan tun thleng pawhin J.L Ranch ah chuan a la tap ve ang a, khaihlumna chung thu-ah chuan a in sawi fihlim thei mai dawn hauh lo a ni. Chungte avang chuan Deputy te pahnih thlauh thlak pawh pawisa lovin a haw ta a ni ngei ang, tihte chu Hickock a chuan a ngaihtuah zui nauh nauh a.

 

 Chutiang vel neuh neuh a ngaihtuah lai chuan Benvo khaw kawtthler chu a lo lut ve leh ta der tawh a.

 

          Nizana a luhna saloon ah bawk khan luh leh tumin saloon kawtah chuan Black Nill chu a dintir ta a. Saloon kawngkhar lam pana kal a han tum mek lai chiah chuan ralkhat hla fe atanga sakawr rawn tlan chak fahran mai avang chuan a han tawi muang leh deuh hrat a; chutah saloon ah chuan a lut ta thova.

 

Zingkar la ni mah se saloon chuan dawrtu a nei nual thova. Ani erawh chu zu in tuma lut a ni lem lo bawk a, ding takin Bar nghaktupa lam chu a pan phei nghal a. A lo hmuh tawh hnu anih tawh tho avangin nel

tak hian eng chi nge a duh tihte chu Bar nghaktu chuan a lo zawt ve nghal bawrh bawrh a. Hickocka chuan thutak deuh tak hian, "Zu chu ka la mamawh rih lo. Ka rawn kalchhan tak zawk chu thil dang daih a nia. Ni zan tlaia khatiang boruak kan tawh vel lai khan Kidney' tih hming pu i saloon ah hian a lo awm ve em ni?" ti in a zawt ta phawng mai a.

 

Bar nghaktupa chuan nui deuh vur vur chung hian "Awm chiang e, amah pawhin Ka thianpa ani  ti in  a sawi nghe nghe che asin. Amah hi pa fel tak mai a ni a. Kei phei chuan ka mi ngainat zawng tak pawh a ni nghe nghe a ni. A awmna te pawh i hre duh anih chuan ka'n hrilh nghal ang che. Heta tanga khawthlang lamah khuan Ranch lian vak lo a nei ve a, tumah pawh ruai hauh lovin amahin a enkawl mai a, a enkawl hneh hle a ni awm a sin! Nizan khan khua ah hian a riak ve a, mahse tunah hi chuan ama Ranch ah eitur siamin a buai vel mek tawh ngei ang. Va tlawh chhuah i tum anih zawngin va tlawh ngei rawh. Bo na tur kawng peng emaw pawh a awm lo a nia," a han ti sawt sawt a. Hickock a pawh a lawm hle a, Bar nghaktupa hnenah chuan lawmthu te sawi in, "Kidney a chan chinte min hrilh theih avangin ka lawm khawp mai. Kava tlawh ngei pawh ka ring," tih pahin saloon kawngka lam pan chuan a pen phei veleh ta a.

 

       Chutia a inher a, a pen phei lai chuan saloon kawngkhar chu a rawn inthen nawlh a, cowboy thuama inthuam, pa sa tha nelh nawlh tak mai, pistol pai fual hnalh mai hi a rawn lang ve ta hlawl mai a. Chupa chuan saloon chhung chu a han melh kual dan  dan a, chutah kawngka atang chuan pen li vel a rawn penlut a, ring tawk leng lawng tak mai hian, "Tu ber hi nge Wild Bill Hickock phawi ranga ni che u? Pawnah sawn a sakawr ka hmu tlat a ni," tiin a rawn au lauh lauh a. A kut bawr chuan a pistol kawm chu a hlat lo hle bawk a.

 

 Chutah chu pa chuan Hickock a lam chu rawn hawi in, "Nangmah hi a ni maw Hickocka an lo tih thin chu? Nizana i chetdan ka lo hriatin hmuh che ka duh a. Nangmah hmu turin ka rawn zing kal nal nal mai a ni. I chanchin, i ranzia hi tupawhin hahipin an sawi a, sawi nuam an ti hle zel mai a, i lo rang tak tak meuh em tih fiah tura rawn kal ka ni," a rawn ti ta chheu chheu mai a. A in siam rem pah sauh sauh mai bawk a.

 

Chuveleh silaia inbeihna a chhuak ngei dawn a ni tih hria in saloon chhunga mi tlem azawng awmte chu kil khatah in hawr khawmin an lo in sa seng nghal sang sang a. Silaimu kal sual palh lo dawngtu nih pawh thihna a ni thei dawn tih hria in silaimu kal kawi palh tur laka an him theih dan tur an ngaihtuah reng a ni. 

 

         Hickock a ranzia chu an lo hre theuh tawh a. Chutiang bawkin amah rawn chotu chu rang ve tak bawk a ni tih pawh an hriat sa tho a ni bawk a. Chuvang chuan a tu zawk nge che rang ang tih inrin siak velin zawite hian an lo phun sap sap hlawm a. A thente chuan pawisa te an lo inchawi nual bawk a. 

 

         Hickock a chuan dam dap bawk hian, "Silai hmanga mi cho tur ngawt zawng chi, nang ni ang ho thah hi chu mihring thatah pawh ka inngai bawk lova, pawi tihna lah ka nei hauh bawk hek lo. Khai le, i rawn kal chhan chu han hlen teh le," tiin a cho let ve ta kawl mai a. A hmelah chuan hlauhna emaw, zamna emawa a lang der bawk silo. Hetiang mi hrep hi chu an thih hma chuan tlansan mai mai theih chi pawh an ni lova, zawl dawhin awmzia a nei hek lo tih pawh Hickock a chuan hrechiang em em a ni.

 

     Hickock a rawn chotupa chu za em em awm hian a han nui ta kuah kuah a, a entute leh Hickocka ngei pawh chuan chupa nui rei lutuk chu mak an lo ti hle a. Chupa nui kuah kuah lai chu kuang bang pawh awm hauhlo chuan a han tawp leh chawt a, chumi rual rual chuan a pistol chu a chuh ta nghal a. Chutih rual chuan Gunman nazawng pawhin an tih ngai loh ang takin a vei lamah a awn phei pah thut bawk a. Chuveleh Hickock a pawh chuan tek tla de zawr ai pawha rang zawkin a khel tawn tawn a pistol te chu chuhin a kawng zawn atang chuan a rawn hmet de ta thuai mai a.

 

Mahse chupa chu a vei lama a han awn zauh avang chuan Hickock a silaimu chuan a va fuh ta hauh lo mai a. A kap thelh tih a inhriat veleh a thu hniam nghal vat a, chutih rual rual chuan a lu chung lawkah silaimu a rawn thlawk ving phei ve thiak mai reng a. Lo thu hniam hlauh lo sela chuan a tawpna ni tur a rawn inher chhuak ve der mai dawn a lo ni! Tin pawh tin lem lo chuan a rualin pakhat puaka ang mai hian a han hmet puak leh thuai a. Chutah meuh zawng chotupa chu .38 Revolver a dula Hickocka pistol mu hnih rawn lut sa zawk ta mai chu tuar lovin a hnung lamah a eu awrh a, a hlawm nghal tawl mai a. A tluk hnu chuan vawihnih vawithum vel chu chal changin a han in leng uih uih a, chuta tang zawngin tumah cho leh ngai tawh lo turin a zal hlen ta rawih rawih a; a thlarau pawhin hremhmun lalpa chibai buk tlai lutuk hlauvin a thlawk chhuak nghal luap luap ang chu!

 

      Hickock a chuan a pistol mu kahruahna mu li lai mai aiawh tur chuan a hran a han thun leh malh malh a. Bar nghaktupa awmna lam chu a pan phei pah chhat chhat a. Bar nghaktupa hnenah chuan, "A vanduai zawkah kan va tang teuh ther ther ve le! Khatiang trick hmang thin ho kha hriat lawk siloh chuan hlauhawm tak an ni reng a ni," a han ti nang nang a.

 

Bar nghaktu pawh chuan a thusawi chu dik a lo ti ve in a rawn zawm ve vat a, "I sawi chu a dik chiah a ni. Ran lamah chuan i ne pawh a ek pha lova, trick hmangin bei lo che sela chuan a phawi chhuah hma in a thal der dawn a ni. Trick a hman vang chauhin a rawn  kaplet ve chauh che a ni. Trick a hmang thin tih ka lo hrilh theihnghilh hlauh che a, pawi ka ti khawp mai," a han ti ve nung nung roh va. Hickock a chuan, "E, mai mai a, inthiam lo duh reng reng suh. A tawng rei zawkah ka la tang thei a lawm. A rawn lut leh kei a chhuak tur kha kan in hmachhawn a ni zui ta mai si a, i tan pawh eng han sawina hman tur a awm reng reng lo anih kha," tiin a han chhang ve thluam thluam a.

 

      Chutah Hickocka vek chuan han sawi zawm leh in, "Engpawhnise hei kei chu ka kal a tul tawh miau si a. hepa ruang phumna tur man hi chu a ipte saw va dap ula, a ak mai ang. A lo ak lo anih lek leh i pawisa lo hmang mai la, ka lo kir leh hunah ka rawn rul leh mai dawn che nia," a han ti a, saloon atang chuan a chhuak ta a.

 

A riahna Hotel ah chuan tukthuan te a va ei thuai thuai a, chutah a ei man leh a riahna mante chu a pe fel nghal vek bawk a. Tichuan a komol te chu tel fel diamin a sakawr jean ah chuan a tawn bet a. Chutia a in peih fel vek hnu chuan Hotel Manager hnenah a remchang anih chuan vawiin ngeia he khua hi chhuahsan tawh mai a tum thute chu a hrilh a, chu Hotel chu a chhuahsan ta a.