Alice-2

Alice's Adventures in Wonder Land

THE POOL OF TEARS

Alice chuan mak a tih êm avang chuan tawng nachang pawh chu a hre tawh lo va. "Tunah chuan telescope lian ber ka hmuchhuak ta," a han ti a. "Mangtha, oh! Ka ke tê tak te, tuin nge pheikhawk leh mawza bun tir ta ang che le!? I tan chuan buaina bak ka thlen silo," tiin a phun mawlh mawlh a, a thil sawilai chuan a lu chuan hall chung chu a va tauh ta a. Tunah chuan feet 9 lai in a san belh ta a, chumi vel ah chuan a rangkachak chahbi chu glass dawhkan aṭang chuan la in, huan mawi tak lam chu a pan ta a. Alice khawngaihthlak-i thiltih theih chhun chu mu chunga a mit lehlam a huan en chauh a ni ta. Chuta kal tur chuan tihtheih engmah a nei silo. A ṭhu thla hnawk a, a ṭap ta a. A mit aṭang chuan mittui tam deuh a rawn luang chhuak a, a mittui tam em avang chuan hall chhungah chuan a mittui a khat a.

Chutia Alice-i a awm lai tak chuan hla deuh tak aṭang a pen thawm hi a hre ta a. A mittui chu hru hulin, tu nge lo kal tiin a en ta a. Sazupui var kha a lo kal a, kawr nalh deuh nen, kutkawr var nen, a kut lehlam ah chuan hmaizah a keng tel bawk a. Hmanhmawh deuhvin a rawn kal phei a, phun mual mual chung chuan a rawn phei ve ta zel a, "Oh, ka nupui khan nuam a ti miah lovang, hetia ka in nghahtir reng chuan," ti chungin a rawn kal phei ve zel a.

Sazupui chu a rawn kal hnaih zel tak ah chuan Alice chuan a aw thian in, "Ka pu, khawngaih tak in min lo tanpui teh," a lo ti a. Chu sazupui chuan Alice chu a lo en reng a, mak a tih em avang leh a hlauh em avang chuan a kutkawr lehlam leh a in zahna chu a thlauh va, a tlan ta vak mai a.

Alice chuan sazupui kutkawr leh a in zahna chu va chhar in, phun mial mial chung chuan a inzâp ve ta a. Lum a tih em avang chuan inzah chu nuam a ti em em a. "Vawiin chu ka awmdan ava mak em! Nimin a ka awmdan nen ava in ang ta lo ve," a ti a. "Tunah hian eng khawvel ah nge ka awm le," tiin a ngaihtuah leh ta a. A thil sawi lai chu chawl in, a kut chu a han en a,  mak a ti ta em em a. A chhan chu sazupui kutkawr kha alo bun tawk chiah vang a ni.

A rilru chuan, "Engtin nge kutkawr hi ka bun tawk theih mai le," tiin a ngaihtuah a. "Chumi awmzia chu kei hi ka te leh ta hi a ni lo maw," tiin glass dawhkan bulah chuan inteh turin a va kal a. A han ding chuan feet 2 lek a sang a lo ni leh ta a, a têt nachhan a ngaihtuah chuan a hmai zahna vang a ni ang tih ringin, a in zahna chu chhuat a chuan a dahthla ta tawp a.

"Tunah chuan ka chhuak thei tawh ang," a ti a, huan kalna tur kawngkhar lam chu a pan leh ta a. Mahse chu kawngkhar te takte chu alo in kalh leh ta mai a, chahbi chu a han zawng leh a, glass dawhkan ah chuan a hma ang bawkin a lo awm leh ta a.

Phun sep sepin, "Thil awmdan chu a hma aiin a ṭha lo dawn zawk tlat," tiin a ngaihtuah leh a, a han in en chuan, "Hetiang em em hi chuan ka tê ngailo asin," tiin a ngaihtuah a.

Chutia amah leh amah a inbiak mawlh mawlh lai chuan tui chuan a khabe thleng a lo chim ta a, lui a tla ang hial in a inngai a. Mahse thil ngaihtuah chhuah a nei tlat mai. Tun a tui hi nichin a feet 9 lai a sang, a ṭahna mittui kha niin a hre ta tlat mai a.

Chutia a awm laitak chuan thil ri hi a hre ta a, tui ah chuan a hleuh va, a thawm hriatna lam chu ava pan phei ta zel a. A va en chuan sazupui kha a lo ni a. Alice chuan sazu chu biak a tum a, mahse ṭangkaina a nei angem aw! tiin a ngaihtuah leh ta lawi a. Chutia ngaihtuah lai chuan a infuih phur leh ta a, va biak mai mai te chu a pawina awm in a ring ta lo va.

Alice chuan sazu chu ava be ta a, sazu bulah chuan, "Hemi aṭang a chhuah dan tur I hre mial lo maw?" tiin ava zawt ta a. Sazu chuan a en ta reng mai a, a mit lehlam chu a khap zawk a, mahse thil engmah chu sawi a nei chuang lo. A chhan chu maw! Sazu chuan Mizo ṭawng a hriat miahloh vang a lo ni a. Alice chuan French sazu a nih a ring ta a, William the Conqueror a ṭawng dan, lehkhabu a zir ang chuan biak a han tum ta a, sazu bulah chuan, "Où est ma chhate?" ava ti ta a. French lehkhabu a thil inziak a hmuh hmasak ber a ni. Chu sazu chuan Alice chu kalpelh a tum a, Alice chuan, "Khawngaih takin chhuahna tur kawng min han hrilh teh" a va ti leh a. Mahse Alice chuan sazu rilru a nâ ang tih a hlau em em bawk a, "Zawhte I duh tih ka hria a nia," a va ti ta tawp mai a. Sazu chuan "Zawhte ka duh lo" a lo ti a, sazu chu a ṭap ve ta mai a. "Keimah ni ta la, zawhte I duh dawn a mi," a ti a. "Aih, ni lo ve," tiin Alice chuan dam thei ang ber in alo chhang a. "Zawhte ka nei a, a hming chu Dinah a nia, hmu ve la ka va ti em!" a ti leh a.

Sazu chu a ṭap khûr ta ngawt ngawt a, "Kan chhungkua chuan zawhte kan haw lutuk," a ti a, "Mi khawngaihna pawh a neilo," a tileh a. 

"Zawhte hming hi ka hriatah sawi lang tawh suh ang che," a ti a. Alice chuan a thu sawilai chu thudang in thlak a hun a ni tih a hre ta a. "Ui (dog) I hlau em? Kan in bulah ui ṭha tak tak an tam lutuk a, hmu ve la ka va ti em!" a ti leh ta a. "Sazu pawh a that vek ṭhin," a ti zui leh a. 

Sazu chu pool aṭang chuan a chhuak ta a, Alice chuan, "Lokir leh rawh. Chuan zawhte leh ui chungchang pawh ka sawi tawh miahlo vang," tiin ṭawngkam nêm deuh zawka a sawi tak ah chuan sazu chu Alice bul ah a rawn kalhnai leh ta a. A hmel chu a dâng em em a, aw khur lek lek si hian, "Min lo zui la, tichuan zawhte leh ui ka huat nachhan ka hrilh dawn che nia," a ti ta a.

Alice chuan a zui ve ta a. Tui ah lah chuan sava leh ramsa chi hrang hrang an rawn lut a, sava leh varak te chu an rawn zuang thla ve a, Alice chuan sazu chu zuiin a kal ve ta zel a.