A Coffin-2

A Coffin Full Of Dollars

Los Ydros khaw chhunga Sheriff Jess Prack-a chu pa dawlhkai lampang niin, a kimtlang thawl zet zawt te, a mitmeng chul deuh rap tawh leh a hmel nguai angreng takte han hmuh mai chuan uisathiam tha ṭhum  tawh lam te pawh a ang dawn dawn a. Enga pawh chu lo ni ta se, a hmel phulova mi a chhinchhiah theih dan leh a hnuchhui thiamna chu chulai ram bial vel titi tui ber a ni fo thin reng a ni.

A office chhuata ruang let reng chu a han hel kual a, a hmuihmul ki van mai han tuai pawk pawk pah chuan a phun mawlh mawlh a. A ke chheh chu siamremin mitthi pa samah chuan a han tham a, en chian lehzual tumin hnar mumal awm tawh lo mitthi hmel chu chunglam hawiin a han kuai her sawk a.

Megley hnarneilova chu tunhma atang pawhin hmeltha hmingthanga sawi chu a la ni ngailo hrim hrim a. A tlangval chhuah hlima silaia inbeihna a telna a, silaimu lenglakin a hnar a thlawh bo tak hnuah phei chuan a landan chu a that phah sawt lem lo tih a chiang ngawih ngawih a. A kimtlang sawrbawl tak han en mai chuan a mitmu lo awm ve tawhna thin mitkhura silaimu luhna hnuhma te chu a pianken ve reng ni mai a mawi hian a lang a.

Sheriff chuan chupa hmel tuihnai lo zet lu a chawikan mek chu chhuata han nghah leh chawrh pahina rawn dingchhuak a. "Amah ngei chu a nih hmel, a tihzia e."

Banga luman intar hrang hrang chian a lo bih kual mek tu Luman khawma eizawngpa chuan a koki chung lam atang chuan, "A hun leh hmun a zirin thil I ring sual lem love." a lo ti chhak a.

"Ho-ho," Sheriff chuan a lo ti hluk a. Safe chu hawngin, a chhunga thil intiang zinga lehkha ip buang lam deuh chhah nelh nawlh chu thlangin, a la chhuak ta nghal a. "Hei le luman pawisa chu. Dollar sangthum a ni e. Tun achinah chuan I thiltih leh turah reng reng min rawn hnar buai tawh lo la a tha ang. "

"Ka lawm e." tih pahin Hmingneilova chuan ngun takin a pawisa dawn chu a han chhiar a, chutah a poncho hnuai lamah chuan a khung bo ta a. " Tleirawl pakhat, chawrche zet, sam rawng var lam deuh kha a awm ve tak a sin. Hnarneilova ang deuh a hnung lam atanga fiamthu rawn thawh a tum ve ngawt kha a tifuh lo hle nghe nghe a nia.."

Sheriff chu phawk zetin a rawn hawi chho a. "Tuai-a !” Chutiang chu kan koh thin dan a nia. Doc Peter-a sawi danin Hnarneilova nena an inkawp dan kha 'Khuanu duan dan piahlam deuh. '  thil te pawh a awm ni awm tak a ni.

"A nih chuan, ka hnungzanga ngen mu rawn thun a tum lai vela nausen tah taka a tap pawh kha a mak vak loh chu."

Sheriff  Prack-a chu a lo bu nghat a. "A ni ngei ang. Kha naupang khan luman nei em tur chuan thil sual lian tham tih a na nei ngai lo a sin, engtinnge I tih tak zel ?"

"Mulukawlhte intihhlim nan ka hnuchhiah ta mai a nih kha."

"Mihring nunna hi I hlut lo hle mai maw.. ? Hrep tak che chuan.  Luman an neih loh chuan, I thengthawngah a thawk lo hle tihna a nia."

"Ni chiah love, sheriff. Ka nunna ka la hlut ve zia hi chu I hrethiam pha kher lovang."

"A a tu a pawh lo ni la, luman neih chungchang hriattirna tar i han hmuh thin hi chuan I lawmlo hran lo a nih ka ring." Sheriff chuan a lo ti a. Chutah, a chal chu a han dawm chawt a, "Khai aw, receipt (sum dawnna lehkha) lam ka lo theihnghilh hmin der a lawm maw le. Dan angin Receipt form-ah ka dahkhah a, chu chu I Sign a ngai a nia. Tichuan, chhiah petu leh min vote tuten he sum hi ka ei ral mai mai lo tih an lo hre ve thei dawn a ni." Tih pah chuan a dawhkan pawhdawh leh kawkel hrang hrang chu a han dap rawk rawk a. Ui beng pianzia deuh lehkha chilh khawmna a chilh beh, khawl chhuta ziah khah sa lehkha engemaw zat chu a han phawrh chhuak a. A pencil hmawr chu a seh nghal mulh mulh a. A seh huh ta maw tihah ziahchhan khawng at chunga lehkha chungah chuan a lek ta nghal a.. "Tunah.. I hming pum chu lo ziak ila."

"Hming ka neilo."

Pencil hum chunga ziak tura lo intintuah mek Sheriff chuan a thiltih lai chu a tawp chawih a. Chu pa, a lo kalna chin pawh hriat lohva chu a melh ta reng mai a. "Hming ka nei lo I tih chu enge a awmzia ni teh hrep le, Tlangval ? Tupawhin hming chu an nei thin a sin. Eng mi leh sa nge maw I nih le - mi tlahlang vakvai mai nge I nih, thildang te a awm em ?"

"Midang ho chuan an lo nei thin a ni mahna. Ka hming chungchangah chuan, hming atan hian Tom-a, Dick-a leh Harry-a te hi vuah a, lehkhabua chhinchhiah ngei ngei tur a ni tih Dan bu in a sawi awm reng reng pawh ka lo la hre law. I duh leh Jiggaree Jurinupus tih emaw thil dang hming tlaktlailo dangte pawh I duh duh ziak la, ka lo sign mai dawn a lawm."

Chutah, Sheriff hmel chu a thutak ta sawt a. A pencil humlai han dah thlak thuai pah chuan,  "E heu ! nuihzatthlak hlawm khawm mai zuk ni che a.. tiraw ? a hun leh hmunin a zir viau na a, ka nuih kekawr ka lo hak theihnghilh tlat mai a….. I rawn felfai angreng phian si a, awmze neiin tawng teh aw.. He Office pawh hi sawrkar dan leh hrai ang thlapa ka enkawl a nia, chutah chuan dan ang leh Pathian hmingin mumal taka sign……."

A ka chu a la chip lo nain, a thusawi chu mumal lo deuhin a thamral ta mai mai a. An bul hnai lawk kawtthler vaivut kar atang a music tang tak rawn ri phut chuan a ngaihtuahna a hruai peng chiang hle. Tawtawrawt ri fiah zeta rawn ri ruai ruai te, a kara Organ pump chi awmze nei vak lova fiak zeta tumrik te, Bass Drum ri dup dup te, a rik chawlh karah chuan sakawlh rum ri niawm tak te chu..

Kawtthler an hmun tin hmun tangah chuan kawngka a inhawng chik tuar tuar hlawm a. Phurna avanga au chel chul thawm te, mi engemaw zat tlan thawm avang chuan kawngsir ke a kalna dawh te chu a ri tuk tuk a. Mite chu phur tih hriat fahran a au chel chul chungin rimawi thawm awmna lam pan chuan chuan tlan an liam zel a.

Pa rawl ring leh thunei aw tak hi a rawn ri dum dum a., "Naupangho kha kiang rawh u ! A nung chunga ei in duh loh chuan kha ramsa bawm atanga a hla thei ang berah khan awm rawh u. Africa Sakeibaknei kawlh chi ber mai kan khung a nia. Remchang a hmuh vaih chuan naupang sa tih vel mai mia chu zing chaw atan a hmang hreh hauh lovang. Khang thir tun tlar vel mai mai kha chu nawalh far tluk lekin a pawt darh hneh viau ang.."

Sheriff chu a thutna atangin a rawn pawk nawlh a, kawngka lam pan chuan a phe phei ta dawr dawr a. Hunter-a pawh lo dingchhuak ve mekin, music ri bur bur a tawp tan lai chuan, an pahnihin kawngka atang chuan pawn lamah an rawn leng chhuak lawp hi ni ber a.

Dan pangngai angin chung ram phul hmun vela veivak thin Sakawr paruk hnuh thin Wagon (Tawlailir) chungkhuh nei chi hrawl tak tak pathum lai mai in khua an rawn chuan ta a ni tih hriat takin, thawm ri le lu chungin an rawn lang tan ta a. Mitthi vui kawng zawh ni awm fahranin an hnungah chuan an rawn zui dum dum bawk a.

Chhun nisa vawl vawl in a em na lai, Wagon chungkhuhna puanah chuan hawrawp dangdai leh mitla takin a hunlaia hming lo chher fe tawh "DANDY DEEVER'S WORLD-REKNOWNED CIRCUS!" tih chu rawng senin a inchhu kulh mai a, a hlimthla chu rangkachak rawngin an chei bawk a. Chumi chawih mawi tawk tur chuan Wagon pang leh a ke bial vel chu rawng sen leh rangkachak rawngin a in tial buai mai bawk a. Wagon hmasa pahnihte chhuat hnuaiah chuan Bungbel eng engemaw an khai uai tluah a. Wagon pathumna hnungah chuan thir tun tlara siam bawm pakhat hi thlung betin, chutah chuan Sakeibaknei tuang chhah tha fe mai hi a muthlu lup lup a. Lungphur leh thotle in an bawm lat lat a.

Wagon hmahruai khalhtu chu tu dang nilovin "Dandy" Deever-a ngei a ni tih hriat takin a inchei fel fai thlarh mai a. Khuang ri thum chi chu a khat tawka han vuak dup pah chuan chumi thlunzawmna savun a siam hrui chikhat chu a han pawt zut a. Chuti a tih a piang chuan Ramsa kawlh rumri ang ri rapthlak deuh hi a rawn awm chhuai chhuai a.

Wagon pahnihna khalhtu chu nu sambuang leh a chawih tawk tura hmel pawh tuihnai angreng tak niin, a bul chiah ah chuan a fanu tih hriat tak, a mah ang tak, mahse hmel tuaitir deuh leh thawmhnaw tawt lam deuha inbel chu a thu bawk a. Chu hmeichhia chu Organ pump chi, an thutna leh Wagon khuhna chung inkara rem taka an hun chu, tumin hnunglam hawiin a thu a.

Sakeibaknei bawm hnuktu Wagon khalhtu chu vur ram sazuk hmel pu deuh roh, pa bem lam leh hrawl tak, che muang ruih chi hi niin, a kut lehlamin ramsa kaihna hrui a vuana, lehlamin Tawtawrawt a keng bawk a. A rimawi rawn tum ri chu a hun lai hmanrua phu lova ri fawn nalh leh thinlung chawktho chi hi a ni lehnghal. Wagon hnung bawm chhungah chuan Sakeibaknei chhuak hlui chi hian anmahni rawn zuitu mipuite lam hawiin a mit chu a khap fuk fuk a. A changin a han khuh huk leh tuar thin a. Chu chuan a chhehvel chu a khawk rum rum thin a.

Inchei uluk deuh pa chuan Wagon chu tidingin, a rawn zuang thla a. Thawmhnaw zuartute’n an thawmhnaw pho nana an haktir thin milem ni awm tak hian a rawn phar phei duai duai a. A kawrchung nalh angreng tak tlang chu a hnungah chuan a rawn phe phei hluap hluap a. A mawi tawka hnaiah chuan rawn dingin, a kawng chu a han dawm a. A hmai chu a rawn zangthal ha a.

"I ni tiraw...? nia, I ni ngei tur a ni. Pa lian, samsen, hmeltha leh thei tawk, misualte pawh ti chiai fo tu, a chanchin kan lo hriat fo, Sheriff Jess Prack chu."

Sheriff kutphah chu vuanin phur tih hriat takin a han hmer vang vang a, chutah Hunter-a chibai leh tur chuan a han inher a.

"Anih leh ka pu nang hi! Dandy Deever-a thil hriat zawng hi a awm ve a nih ngai chuan, pa tling tak chi hi chu ka hai bik law. Khang mitmeng vawt raih maite, khabe invuah nghet tlet tlawt te, hmui inpet ruh tang mai ka hmuh rual khan Dan kengkawhtu thei tak midang an awm tih ka hre nghal mai, chuan ka tisual tampui lo bawkin ka hria. Hlauh awmze hrelo mihring chu."

Sheriff chuan ro deuh halh hian, "Luman khawm chi mawle. Ruang a rawn lakluh pawh ka chhuatah a la leh reng kha. A thisen man pawh a dawng chiah a nih kha."

Dandy-a chu a phu zawk a, a chil lem khawlh pahin a han inthunun leh vat a. "Chu chiah chu a lawm ka sawi — hlauh hrelo tawp mihring, dan thlawp zawnga a ralthuamte chelek fo thin a chu." Chutia a tawng pah chuan Ticket rawng hring hi a han dap chhuak a. "Sheriff, I rilrem zawng a nih chuan, khaw daia hmun ruakah sawn inkhuar kan duh deuh a. Vawin chawhnu lama kan hun hmanna turah hian nang leh innu – chutiang mite an awm chuan, khual zahawmah in lo tan theih chuan kan lawm khawp ang. Dar hnih chiahah tan tur a nia."

Chutiang thil la tawng ngai lo ni awm takin "Tunah…..a tha a lawm," Sheriff chuan a lo ti buh deuh nuaia, "In va ti ropui awm ve, Mr. Deever. Lawm takin ka pawm e, kannu chungchang kha chu a mawihnaia I sawi ve mai miah ngai ta ila. Helaiah hian Wagon themlem te te pahnih khat ennawm chhuah bak hi chu kan lo la tawng ngai lem lova, nangni Wagon naran lo tak pathum lai in rawn kal hian kan khua Los Ydros pawh a tihzahawm dawn khawp mai hi maw "

Dandy-a chu Hunter-a lam a han hawi a, chutah ticket la awm lam chu a han en leh a, hlim teh chiamlo chuan a lu a han thing a.. "A khai aw thianpa, a thlawna I lo luh ve theihna tur la awmin ka hre deuh a sin mawle… Mahse.. heng hi chu karleh lam tur atan daih a ni mai a…."

"A pawi hlei nem," Hunter-a  chuan hmel hlim angreng takin a lo ti et a. "Buai duh reng reng suh, miin khawvel a rawn dai luh tawh hi chuan, a dam chhunga tihsual neih pheng phung hi chu thil nih dan phung ve reng a nia. Mi huang an dai loh a, a kawnkaw zawnga an khawsa vak te a nih lem loh chuan thil pawi engmah a awm love."