A Coffin-6

 A COFFIN FULL OF DOLLARS

1971

*****

BUNG 6-NA

Khatih lai huna an dinhmun tawn mek angah kha chuan thuber thawk a thaw silai chelek thiam tak tak an kat nuk a. A tam ber chuan single action (a cheng kau hmasak kher ngai lova hmehpuah nghal thuai theih chi) puakruk vilik dan vel chu, thih leh dam hriltu a nih avangin, ‘ka vaibel’ ti khawpin an thiam a. A trigger (hmehpuahna) chu vawikhat kuaiin, chumi rual deuhthaw chuan an kut lehlamin a Hammer (a chek puaktu/a cheng) hnung filawr ah chuan han beng/vai a, tunlaia puakrang (Machine Gun) tluk deuh thaw a rang hian a puak zawih zawih ta mai thin a ni. A harsa deuh nain, chutianga tum ṭhelh miah lova an chelek thei a nih chuan, a tihdan phung pangngai aiin chet a rang duh bik em em a ni tih tute pawh an hai lo.

Dinhmunin a zir viau chuan tihmi loh tak tak a lo awm thei lova, themtlaw tak pawh an vang viau reng a ni. Chutih rual erawh chuan, khatih laia thisenin a bual khawthlang ramah kha chuan, incho satliah mai mai avang pawha inkahna a tam em avangin eng anga silai chelek thiam mi pawh nise, hring nun hmang rei tak hi chu an vang pharh thung. Thawnthu phuah mi ten an lo ziah thin angin, silai kaw hmawrin a tin rengna leh silai cheng kau deuh phan renga awm a ngaihna hmun Hudson River khawthlang lam angah te kha chuan, a ruh no no chhuakah tih hi an thurolum a ni deuh tawp mai a ni.

Chutiang dinhmun karah pawh chuan Hmingneilova’n a kut veilam hmanga a chengrang a autir lai mit ngei a hmutu apiang, silai chelek thiam ngaisang lemlo tu te pawh nise, an mit a tlai fu thin a ni.

*****

A taksa pianhmang lang ruak mai silhfen inbel a chevel mek nula chuan Mitkhingdela leh a thiante’n mawihnai vak lova an lo chhaih eu vel chu hriat loh der a tum hram hram nain, a biang chu sen tan tan a. A tawp nan mipui chibai bukin a han bu leh a, puanin chei buai lamah chuan a relh bo ta a.

Mi pangate chu an thutna atangin an lo tho chhuak ta tuih tuih hlawm a. An zu in bang la awm chu an han khiat zo leh rih phawt a. Chutah, an zinga ngo leh hmulphurh chhe ve tak, Panhandle-a chuan an zu um ruak chu dawhsan hnuaiah chuan a han vawm lut a.

Irh uk uk pah chuan, "Sawlai puanin chhunga thil duhawm tak saw engtikah nge kan chanpual atan kan lak theih ang tih hre turin kan rawn dingchhuak a ni " tiin a han au lung lung a.

"Va kal ta che," tiin Mitkhingdela chuan a lo fuih bul bul a. "Kei chu, ka chuanna tur ka melh fel tawh e. sawlai nu lian ber saw…. ka duh zawng tak a ni. Kan inmil khawp ang," a han ti zui a.

Puanin lam pan chuan a inchhep phei chu a ni nghal ta mai a. A ṭhian dangte pawh chuan pai deuh khat khat chungin an zui ve bawk a. Chutah hmai dang sawp sawp chungin Dandy-a chu dawhsan atangin a rawn zuangthla a, chung mi te lo dang tur chuan a tlan phei ta nghal a. Hunk-a pawh hlau hlawp tih hriat tak, mahse tumruh hmel pu taka rawn zuang pheiin, puanin kawngka dal chiah chuan awmhmun a rawn rem ve ta nghal a. A nihna takah chuan silai nen ṭan lo khawh ta pawh nise, an dinhmun tawn mek chu an tan chuan a buaithlakin, a u lam hret chu a ni e.

Ralthuam nei tawh lo leh a kekawr tla tur chelh a lo buai mek Sheriff pawh chuan thawm riva rawn nei ve lehin, "Nangni kha tawp rawh u! Khatah khan ding rawh u," a rawn ti a.

"Ngawi teh u, thiante u," Dandy-a  pawh chuan a han ti lauh lauh a. "Insum teh u! Ka nupui leh ka fanu chungchang a nih kha in sawi. Ka tuar thei thlawt lo a nia," a han ti a.

Mitkhingdela chuan a silai chu a han vuan chawt a, a rawn vai kual nghal pawp a. A ri chawrh a, Dandy-a chu a thlu nghal thlawrh a, a mel ta reng mai a. Chutah, Hunk Bannister-a pawh chu awmze nei vak lo leh tum mumal pawh nei lem lovin hmalamah a rawn pen chhuak ve ngawt a.

A hmazawn hmun fai laia lo penchhuah pah chuan Hmingneilova chuan a poncho chu thehhlimin, a koki dinglamah chuan a han bang liam a. Shadrach-a lam chu a han mitmei pah zawk a, mahse chulai tak chuan mipuiin an lo hliah avangin a va hmu mai thei lova.

"Previs! Panhandle!" 

A aw chu Molly Deever-i bawng vuakna savun hruihrual chelek ri ang maiin a ri fiak thak a. "Kha lam hawia in kal theih chin chu in thleng ta. A bak chu keiman ka lo hruai tawh ang che u." a han ti ta chheu chheu mai a.

Mi pangate chu an rawn lehhawi kual ta ruai a, an rin loh dan deuha thil lo thleng avang chuan an phawk lutuk a, an tlu ṭhelh a. An ka hau ta mai le. Thisena tuihal thin Previs-a mitmeng ṭha lam chuan a vawikhatna atan Poncho leh lukhum parh te, meizial chum bat te chu a han melh vung vung a. Hei leh chen a dam chung hian a lu nung ngeiin Hunter-a chu a la hmu ngai bik lo nain, misual dangte ang thovin, a chanchin thangva turu buru tak tak a lo hriat danah, a incheina aṭang ringawt pawhin amah ngei a ni tih a hai bik lo.  Chu chu Hunter-a duhdan chiah pawh a ni a. In hmuh rual ruala inkah lirh nghal tawl duhna rilru pu khawpin a chanchin chu hria se a duh miau mai a ni.

"Amah ngei kha a ni," tiin Mitkhingdela chu a ṭe ṭhawt a. "Luman avanga mi that thin kha… man rawh u!"

Huntera’n a mit leh mit inkar tak a rawn verh sawr lai chuan a silai chu a lo la phawichhuak kim hman lo deuh hlek a ni. Midangte pawh chuan an silai chu an chuh nghal suau a. Hunter-a chuan a .44 laite chu a kut dinglam a phawiin, a chet loh nan a kawngbawr beh-chhanin nghet charhin a keng a. A tum fuh ngei tura tinkawh chungin, a kut veilam chuan mita hmuh hman rualloh a rangin a chengah chuan a han beng zawt zawt a, a rawn puak sen chhuak zawk zawk mai a !!.

Silai vawili puak chu vawikhat puak ang maiin a ri rual ṭhawt a. A la dam palite pawh chu an tlu thum nghal dawt dawt a. Tu silai mah a pai chhuahsan fel hman a awm lo.

Buaina chu a puak chhuak dawn ngei a ni tih an hmuh veleh khan mipuite chu chiai takin an darh sung sung a, a rem dan danin leiah chuan an tlu tawp tawp hlawm kha a ni a. Hunter-a chu a rawn inher a, fimkhur takin chhuata lo bawk mek mipui leh a chhehvel chu a han en kual a, chutah nur deuh nang chungin a lu chu a han thing a. A puakruk mu inthunna lai (Cylinder Chamber) chu a han thing chhuak a. Silai mu kah ruah tawhna pali chu kheuh chhuakin, a mu thar pali chu a han thun leh nghal a.

Thil ngaihtuah nei tih hriat takin a mu ruak chu a han thlir chiang leh vang vang a. Chung kartut ruakte chu a kutphah ah chuan an ri raih raih a. Leiah chuan an thla ta phak phak a. Inkahna chu a zo tawh nia a lan avanga muangchanga mipui ho lo tho chhuak mek lam chu a han thlir leh a. Chutah, kartut ruak leia tla chu a ke hmawra thai letin, a han chhiar tha leh ngat a…

Kartut ruak pali a awm avangin vawili a kap puak tihna a ni. Mahse… mi panga lai chu thi in an let hlawm reng bawk si!!

A vawi ngana chu Shadrach-a’n a duhdan ang taka a siam danglam, silai ngul inches 14 laia sei a ṭanga lo kal ni ngeia a rinna chu a chhia leh tha hriatna chhungril ber atang pawhin a pha thei tlat lo mai le!. Amaherawhchu, khawiah mah hmuh turin a lo awm tawh lo. Buaina a sosan lai tak khan hmun dangah a lo relh bo daih tawh te pawh a ni mahna. Awihawm vak lo  mah se, chutiang baka chhuidawn dan tur chu a hre chuang tlat lo a ni.

*****

A khabe ruh kual laia vung duk deuh raih tih loh chu Dandy Deever-a pawhin ngai a rawn awh leh tawh viau a. Inthup tum viau mah se thil thleng chuan a ṭhawng nasa bawk tih chu a hriat viau tho mai. A lu chu a thing nawk nawk a, phawk em emin Hunter-a chu a en tlawk tlawk mai a ni.

Chutah…"Ka ring thei lo. Ka han chalchang zawk nain, nikhaw hrelova awm reng chu ka ni bik law… engkim kha ka hmu ve vek a ni. Pathian leh, I silai kah thiam dan chu a va han turu ngai ve! Bang-bang-bang — khatiang deuh kha a ni e. An mit leh mit inkarah I fuh vek lehnghal. .. Ekhai, I no a ruak a nih kha, thianpa. Pathian hmingin… kan nunna chhanhimtu pa hi no ruak huma ṭhuttir reng chi a ni nang..." a han ti a.

Tlailam ni dul ruai hnuaiah chuan far thinga siam dawhkan ṭawngṭawl lam tawh kilin, puanin kawtah chuan titi an vawr kual a. Ṭhuthmun an rem mek a ni. Chawhnu her a lo nih khan mipui te pawh haw darh tawhin, ruang te pawh an senghawi fel meuh chuan  Hmingneilova pawh dollar 1500 laiin a lo hausak belh tawh a. Sheriff ngei chuan a chawlhni kawr tih hriat ngawih ngawih nena in duangin, a pawisa fai ngeiin an inhlan nghal ta a nih kha.

Laura-i  leh  Molly-i pawh wagon piah lawk a awmtual meichhemna ah chuan awmin, thlamuang takin an titi kotlangah chuan an lo dak ve reng a.  Sa kan rim chu tlai lam thlifim thaw chuan a rawn len nam chem chem a. Dandy-a chuan Hunter-a no khulh hnuhnung ber tur chu a lo thli khat leh chiah a.

"Molly! Laura!" tiin a han au leh lung lung a. "Damdawi kha han la leh vat teh u! Rulin min chukna hi a rawn thual leh ṭan dawn tlatin ka hria."

Laura-i pawh thawmhnaw pangngai tak lo inbel tawhin, Whiskey bottle khat dang chu a rawn la chhuak leh vat a. Hnai set sawta han bih chian takah chuan chu nula chu mi hipna ngah tak chi a lo ni reuh a. Hunter-a chu rawn nuih sak pahin a pa Dandy-a hmaah chuan a bottle leh a inna vel chu a rawn chhawp ta a. "Muangchang khan aw, ka pa, nang phei chuan i zawh vak loh thin kha," a han ti a.

"Ka naute tak hi chu aw…," a awmdan ṭhin avanga inthiamlo hmel pu deuhin Dandy-a chuan a lo ti a.  "Vawiina ka thil tawn duhawm loh zet avang khan lu lam leh mawnglam pawh hre hrang manglo khawpin khulh ta pawh ni ila a awm lo hran lovin ka hre na a. Amaherawhchu, tun atan chuan chutiang em em chu ka rilruk lo a nia.."

Hunter-a chuan a no chu chawiin a han dut hraih a, chutah pangngai tak hian, "I unaunu hming kha tunge?" tiin a han zawt a.

"Cora-i a nia," a lo ti a. Chutah, makti takin a chil a han lem khawlh a, a kut chuan a hmui a han hup nghal a. "Nang pui roh hi, min chhimbu dawi chiang mai," tih pahin a pa lam chu a han  thlek a. "I lo hrilh a ni maw, kan hmuhnawm chhuah dan vel hi i lo puangzar thawt thawt zel a..." a han ti a.

"Ka tih a ni lo, eng thil mah ka hrilh lo a nia" tiin Dandy-a chuan a lo hnial a.

"A tum loh deuhin I unaunu kha a inhai lang palh pek a lawm maw le," Hunter-a chuan a lo ti a. "Kuang hmanga hmuhnawm in chhuah hnu chiah a I aiawha mipui hmaa a han buk kual vel lai khan a beng hnung lama hmaihnawih chhah lai bik riau kha ka lo hmu fuh a. Hmai hnawih I hmang lo tih ka hrechiang bawk si a. Chuti a nih si chuan I phirpui nu niin, nuihza siamtu Bobo kha a ni ngei turah ka ngai ta mai a ni."

Tih vak ngaihna hrelovin Laura-i chuan a lam hawiin a chal a rawn chuar vak teh ngawt a, chutah, "Unaunu lo kal teh.. kan Bean chhum a liam nasa a nia," a han ti lauh lauh a.

"Ka hria e. In titi zawng zawng kha ka lo ngaithla ve vek a nia," Cora Deever-i chuan a lo ti a. Puanin kawngka ah chuan lo chhuakin Hunter-a chu a rawn nuih var var a. "Silai chelek chauh nilo thil dang pawh i lo hnehsawh hle tih ka hre mai," a han ti a.

Kil hrang hrang aṭanga han thlir pawhin chung phir unau pahnihte chu an inang hle reng a ni. Chutah, Dandy-a chuan hmeichhiate ṭawngkam avanga Hunter-a lai hmel vel chu hmuhnawm ti takin a lo thlir ve ta thung a.

"Thil ropui teh lua chu a nih loh kha maw? Fiamthu tuihnai lo tak chhuah an tum tih kha ka rinlawk dan deuh chu a ni a, tichuan an vanneihna in a daih ta lo chu a nih kha. In rinzawng a ni emaw .. a chang hi chuan ṭan an lo khawh ve ṭhin avangin a fala hrilhfiah zel hi ka thei bik lo fo ṭhin a," Hunter-a chuan a han ti chhak chhak a.

Cora-i chuan, "Thihna ai mah pawh a dinhmun duhawmlo a ding maithei tur, kei leh ka nu min chhanchhuah tak avangin a mimal tak pawhin lawmthu ka han sawi ve hrim hrim teh ang," a rawn ti leh bawrh bawrh a. Chutah, nuih awr awr pah chuan, "Enteh u.. kan palian huaisen leh silai chelek thiam a hi…! A sen ṭawn ṭawn mai hei…." a han ti a.

*****

Zanriah eikhamah chuan Molly leh Nula pahnihte chu sekrek khawih turin an bibo ta a. Chutiang bawkin New Orleans lam awphawi deuh a thawp suta lo ti ti ve chuar chuar, Hunk-a pawh Wagon lamah a kir phei ta bawk a. Chutah…Dandy-a chuan Hunter-a no leh ama no chu a han thli khat leh a. Rui lutuk chu a la ni lo nain, tlemin a kai ve hlek tawh a. A leili pawh a harhfim laia a nihphung pangngai ai chuan nal tawh tak a ni.

"Mi tawrawt ho tehreng chu a…sum ka rut leh nual ang chu tih nak a laiin, vawiin kan ennawm chhuah boruak an rawn tikhawlo vek mai a." a han ti leh hluai a.

"In zo tawh niin ka lo hria a," Hunter-a chuan a lo ti bauh a, "Kuang hmanga mitdawih-vaih in chhuah kha in ennawm hmawr bawkna niin ka lo ngai a."

Dawhkan kuk kauh kauh pahin Dandy-a chuan "A nia lawm— mahse, rangkachak luipui luan tanna te pawh a tih theih bawk ang chu. Ka ṭhian," a han ti a. "Khatah tak khan hlep tak tak chu a awm ṭan dawn chauh a ni. He hun takah hian Card hmanga inthapna chikhat, Card dehthiam leh mi ei chat lama duhthusamin a sawngbawl vel, chu kan bei ṭan leh ṭhin."

"Chu.. Gambler i ni elo?"

Dandy-a chu a lo ner sawk a. "Khatiang kha chuan min ko teh suh, Ṭhiana.. Gambler te chu engkim huamin an inthap ṭhin a, an hloh chang pawh a awm chawk reng a. Kei chu thil chiangsa ah chauh ka inthap ṭhin. Tin, ka hloh ngai lo bawk."

Awmze nei taka mit han siai khum zauh pah chuan Card pathum hi a kutzungtang hmawrah chuan a rawn dawk chhuak a. A thal zawngin a han dah thla thak a, chutah, Ak Queen, Zum King leh Tawka King hi a lo lang ta a.

"Three-card monte an tih ṭhin hi lo hmelhriat ve tawh ṭhin reng reng em, ṭhiana ?"

"Hnehna chang zat zat tur khawp chuan la hrechiang lutuk nang," Hunter-a chuan a lo ti ro halh a.

Dandy-a chu a nui ta hawk hawk a, "A rinawm vaklo reng a ni. A semtu / sawng-bawltu tan lo chuan hnehna chan theihna dan a awm hleinem." A han ti a. (Three –card Monte chungchang a sawi dan vel hi chhiartu tam zawk tan hriatthiam a har avangin sawifiah zui vak lovin tawngkam pangngai anga dah mai a ni e – MH)

Chutah, Card chu a han khup leh a, an awmhmun te chu a han thlakthleng kual a. "Tunah, eng ber hi nge Ak Queen ni a I rin le?" a han ti a.

"Kha laia mi kha a nih hmel khawp mai," tih pahin Hunter-a chuan a han kawk a, "Ka lo tawn hriat tawhna aṭangin, a ni lo thei lo tih ka chiang e."

"I va ring dik thei ve a," tih pahin Dandy-a chuan a card kawh ber chu a han thal a, Tawka Mal a lo lang ta a. "Vawi thum lai chance pe che mah ila, I ring dik thei chuang lovang," a han ti zui zat a. Chutah, Card dangte pawh chu thalin, Zum King leh Tial Jack a lo ni leh a. Mak deuh maiin Ak Queen chu a lo bo daih mai a.

"I va dek nalh ve a," Hunter-a chuan a lo ti a. "I kutphahah khan engmah a awmlo a ni tih hriat nan a pahnih hnihin a thal zawngin min han hmuh dawn ta ang la…. ?"

Dandy-a chuan a lo ṭhenkhum sak a. "Nang pawh hremhmunah kal dawn ta ang la.. Thiana?" a lo ti leh bauh a.

"A nih leh mipui hmuh lai reng a Laura-i kuang aṭanga a relh chhuah dan thuruk kha min hrilh dawn ta ang la…."

Dandy-a chuan tang hra hian, "Ṭhiana, kha zawng famkhua ka lawi ni thlenga keimah chauh a ka vawn reng tur thuruk a nih kha. Kuang sira ding reng ṭhin Hunk-a ngei pawh hian a hre lo reng reng. He mitdawivaih ka tihdan thuruk ka puanzar theih nan hian pawisa tih tam fe a dawr ka lo ni tawh ṭhin a. Ka hnial thla fel ta hram chu a nih kha. Khatiang sum leh pai tam tham han hnial thlak kha chu a ruk tak chuan ka ui khawp mai a, nachhawkna tellova ka ha zawng zawng min phawi sak tluk hialin hrehawm ka ti mai a."

"Eng dinhmunah pawh ding dawn la, I sawi duh lovang tih a chiang reng a lawm." Hunter-a chuan a lo ti a. Chutah, meizial a han ṭan a, a dawhkan kil lai aṭanga han tawlh hnun deuh pah chuan, "Titi phungleng dangah pakai tawh teh ang," a han ti a.

Dandy-a chu dawhkan chungah rawn bawk pheiin, a chal a han chuar tap a. "Zanriah min kilpui tur a ka han chelh takah che khan ruahmanna neihpui che ka lo rilruk deuh kha a ni a, mahse, ka han ngaihtuah ṭha leh a, ka chilper ka sen thlawn mai mai ka ring leh deuh a," a han ti a.

"A ngaihthlak lam chu ka thiam zawng a lawm, han sawi lang ve hrim hrim la," Hunter-a chuan a lo ti bauh a.

"Kan zinga lo telve tur hian ka thlemthluk theih mai che ringin ngaihtuahna atthlak deuh ka lo nei a. Chhimthlang rama phawirang ber anga puangzar che in, ennawm atan silai chelek lama I thiamna chi hrang hrangte hi mipui hmuhah I entir duh takin tih thu mai mai mawle. Ka han belchiang deuh che a, I ngaihven zawng a nih leh nih loh hrechiang hmasa hawt lova chutiang ngaihtuahna ka lo nei chu a atthlakzia ka hre ta tawlh tawlh mai a."

Hunter-a chu inngaihtuah ngun tih hriat takin a han nur deuh nang a. A kutzungṭang te chu elh riin, a khabe kual a khabe hmul tawngchham ang reng tak chu a han zut hauh hauh a.

"Chhimthlang rama phawi-rang ber," tiin a han phun sap a. Chutah... "Phawirang, kei ka ni inti chin reng reng chuan mimal taka chona angah ngaiin, hmingthan lehzual duhna nen, min phawikhalh an tum ngei ang le."

"Ka hria a lawm," Dandy-a chuan a lo ti chuai raih a, "Mahse, a tirte ah kha chuan heti zawnga ngaihtuah nachang hi ka hre bik law… tunah zawng, I bengkhawn duh loh nachhan tur chu ka hre ta mai."

Chutah, Hunter-a chuan "Han sawi teh le… Dandy, nang leh I pawlte hi henglai, Tlang Vanduai leh a chhehvelah hian in vak kual ṭhin em ni. Tunah hian chet chhuah mai in tum hnai em?" tiin a han zawt a.

Dandy-a chuan hmai zangthal ha a rawn enin, "Engati maw.. aw…. Hangville-ah te pawh kumtin ennawm chu kan chhuah ziah ṭhin a lawm. Crazy Woman Pass aṭanga hnaite, mel nga leka khaw awm kha… sum pai kan ruhna hmun ber a lawm.."

Hunter-a chu a kiu rinchhan meuhin dawhkanah chuan a rawn kun phei a.. "I ruahmanna chu lo ngaithla chhunzawm zel ila, ka ngaihven zawng tak a nih theihna chhan ṭha tak a awm dawn tlat mai," a han ti a.