A Coffin-5

A COFFIN FULL OF DOLLARS

1971

*****

BUNG 5-NA

Dandy-a pawh chuan a hmuhnawm entir chu a vawrtawp a lo thlentir mek a. Boruakah chuan a rualin thleng panga lai vawrvirin buai miah lovin a lo dawng leh vel mek a ni. A ngaihtuahna tibuaitu a awm takah chuan, thleng invawrh lai pali te zeihawi taka a dawn chat chat laiin, a pangana erawh dawhsan chhuatah chuan a tla keh ta chuai a. Chu pawh ngaihven zui tawh lovin a rawn hawi chhuak a, che lo chang lovin chhak lam chu melh chho ta ran mai a. Ennawm lo thlirtu mipuite pawhin engti zai zia nge ni ta tiin, a melh na lam chu an hawi nghal thup a.

Sakawr chungchuang panga lai hi an chhak tlang chuan hnuai lam atang chuan an rawn lang tham tham a. Chutah Sakawr lakam hrui pawt marin, a hnuai zawla thil awm chu thlirin, an han tawi khaw muang phawt a. Zu (whiskey) bur chu an han inhlan chhawng kual leh liam liam a, an zu bur inhlanchhawn chu ni zung chuan a phet tle zawk zawk a. Chutianga patling threh thrawh panga lai rawn lang ta chu mipuite zinga a tam zawk pawhin mak an tiin, an hamhaih deuh tih a hriat a. An boruak rawn ken chuan mipuite pawh a abarakhaih deuh niin a lang.

Thawklehkhatah, an zinga pakhat chu Hel (Rebel) ho auhla a khek rawng rawng pahin, a sakawr chu han kheng thuai a. Mipui awmkhawm lam chu rawn pan ding ngatin, awihtlanah chuan a rawn lim thla ta tehreng a. Kar lovah a dangte pawh chuan an rawn zui nghal tuk tuk a. Zurui inhrosa thawm leh lukhum vai ri fua fua thawm te nen chuan an rawn ri thla ta hup hup mai le. Rei vaklo chhung mipuite chu hamhaihna nen, khuavang kal lai ang maiin an han reh thup a, chutah patling anchhelawh thawm te, nutling mangang au ri te chu inpawlh nghal nuai nuai a, chung mite kawng lo kian tur chuan mumal lo taka inbawhthuah tup tupin, an theih dan danin an insaseng nghal sung sung a.

Sheriff pawh chu a thutna a tanga rawn thovin, ban vai meuhin a han au tuar tuar, "Tawp tawh u! nangni zurui mi a ho kha. Dan hmingin ding turin thu ka pe a che u!" a han ti a.

Mi panga te’n timna eih neilova an rawn chil thlak zel takah chuan ani meuh pawh chu kawng lo kian turin a han zuang sawn a, chair chungah chuan tumloh deuhin a insawh hnang awl awl lehnghal a. Thaw hlawp hlawp pah chuan anchhia a han phuhchhuak bawrh bawrh a.

An rawn thlen dawn a ruaiah chuan an sakawrte chu an han pawt her sawk a. Sakawr kechheh inher thut avang chuan lungthril, chirh leh tuihawk chuan mipuite chu a per ur ur a. Thinghmun lam pana tlan tlangin, thinghmun an thlen dawn chuan an rawn inher leh thut a. Chutah dingkhawm leh deuhin zu um chu an han inhlan chhawng kual leh liam liam a. An tawi khawmuan leh hlek hnuah intivei tak chungin mipui lam chu kein an rawn pan phei ta a.

Hunter-a erawh chu a awmhmun atangin a la che chhuak duh lem lova. Meng deuh sur sur pahin chung intivei tak tak pangate chu a lo chian ve mek a. Silai chelek thei ve pangngai, mi deusawh leh tihduhdah hmang, an lan ang aia rui em em lo, buaina zawng chi mihring niin an lang.

A hmasaber a kal chu pa el kun leh hang lam deuh niin, mit khing lehlam tuamna dum a inbel a. A kawr hma phel kar atang chuan zu um a rawn lawr a. Hunter-a mitmeng chu rawn de nghal sawr sawrin, a thinlung sum leh pai inziahna phek kar khawimaw laiah chuan, danin a zawnlai misual Previs-a, mit khing del, a thi in emaw a nungin emaw dollar 1000 tih chu a rawn lang zawr a. Chupa kiu zawn sir lamah chuan pa cher ruh theng thawng, bal leh sual hmel ngawih ngawih, ngo lam deuh awmin, chu pa chu, a luman atan a dollar 500 an phalrai mek, Panhandle Egger-a a lo ni ve thung.

Midang pathumte erawh chu a thengthawngah an thawk zui lemlo nain, khawi lai ram bialah emaw chuan danin a zawnlai chu an nih ve ngei a rinawm tho mai. An tello pawhin Circus ennawm chu a hlimawm viau nen, tunah chuan chutiang tihna nikhua leh boruak pawh a awm ta si lova. Chutah, Shadrach-a chu a han melh zawk a. A elpuipa hmelah pawh chuan chung mite’n hlawkna sumpai an rawn paipawn chu a hai bik lo a ni tih a hriat a. Chung mi hrat khawkheng pahnihte chu pawisa khur thuhmun inchuhin an in tawksir ngei dawn a nih hmel ta… !

Sheriff chu thinrim avanga hmel dur khuih chungin a rawn thawk phei a. "Tunah.. ngaithla rawh u, khatiang buaina leh sahawkna ang chi kha Los Ydros leh a chhehvelah hian a thlen kan remti lo a nia. Mi tihnat palh te pawh in nei thei tih in hre ve lo e maw ni le ?"

"I ka lianpui kha I chip loh chuan tuemaw chu a intina palh mahna," tiin Mitkhingdela chuan a thusawi chu a lo pawt chat a., "Hetah hian Circus en turin kan awm ve dawn a, kan duhdan leh phu tawk anga a hmuhnawm leh si loh vaih chuan boruak hi kan chawk hiar vek a ni mai, Sheriff."

Ticket hralh tuma lo phusa tan mek Dandy-a lamah chuan a han vir vut a. "An hruaitupa hi I nih chuan huaihawt la, ennawm chu chhuah vat rawh u. Kar tluanin hun kan nei lo a nia" a han ti a.

Dandy-a chu chutiang boruak tawng atan chuan a derdep bakah thisen chhuahna lam pang mausam vek tu a lo ni bawk a, "Awle, ka pu" tih pahin dawhsan lamah chuan a phe chho nghal dawr dawr a.

"Enteh mihring," tiin Sheriff kha a rawn teng nasa mai a, "I thu rum pui pui chhakchhuah kha a khamawm ta e. Hetah hian dan kengkawhtu ka nih hi...."

"Tun dinhmunah tak chuan ni love," tiin Mitkhingdela kha a rawn inrawlh leh a. A pistol, a paia inthun zan mai chu ben thak thak pahin, "Kan awmna hun leh hmun apiangah chuan, hei, Pu Samuel Colt-a chiah hi Dan a ni. Pu a. I lo theihnghilh takin, naupang tha awmdan angin, I kawnghren leh silaite kha tha takin han phelh la, min lo hlan ang che. Kan kal bo hnuah I hmu let leh thei ang. "

Sheriff chu pa huaisen tak a ni nain, mi a nileng chu a ni bik lova. Chutianga mipui hlauhlawp innek tuau tuau karah chuan inkahna a thlen a, silai a puah vaih a, a nghawng pawi theihdan tur chu a hre chiang ropui mai si a. Pawisawilo tuemaw hliamin, thihna hial pawh a thleng mai thei a ni. Chung mi bawraw tak tak pangate hmel chu a han en a, silai phawi mai hrehlo tih hriat taka an kutbawrte silai kawm bul maia an lo ti muke thu mai te nen chuan… Chutiang dinhmuna pa pangngai leh dawn thui takin an tihtur dik tak tiin, fimkhur takin a silai leh a kawnghren chu a phelh a. Mitkhingdela chu a pe ta a.

Misualpa chu a thianpa lam hawi chuan a han ner nung a. "Hetianga Dan kengkawhtu sakhawmi tak hi I la hmu ngai bik lovang a tiraw ?" a han ti a.

Chutah, a kut chu rawn phar chhuakin Sheriff kekawr kawngah chuan a han man thut a, a phih nghal sawk a. Thawmhnaw thler kawk ri a lo awm a, kawrkilhna chu a thlawk darh zui nghal chuai a. Sheriff chuan a ngalrek thlenga a kekawr tla tur chu vengin a kekawr kawngah chuan remlo zetin a tham khawm hram hram a.

Mitkhingdela chuan chek tluk tluk pahin, "Tunah zawng kut awl hman lek lovin I phar buai dawn ta si a, kan ennawm enlai min rawn tibuai sek tawh lo’ng chu maw..." a han ti zui ngul ngul a.

Chung mi pangate chu mipui lam tlar hma berah chuan duhdah zetin an thu thluang ta duai hlawm a. Mitkhingdela chuan duhthawh zeta zu um chu a han khulh leh pup pup hnu chuan a thiante chu a han pe chhawng leh a. A mitmeng pawisak neilo leh sen rum chuan mipui chu a thilr kual awl lova. A kutbawr lah chu a silai kawm atangin a tla hla ngai hek lo.

Ennawm dawhsan lamah ve thung chuan, inchei danglama nuihza siamtu (Clown), Bobo-a chuan, dangdai deuh a sakawr var Milky mawngbawra inban kual velin mipui chu a lo chawk hlim mek a. A tihtur pual a zawh chuan puanin chei buai lamah a pilbo ta a. Mipui lawm changtum thawm leh tlar hma lama mi panga te lei ruta nui lum ri hul hul thawm karah chuan Laura-i chu a rawn inlar ve ta thung a.

A thawmhnaw rawn inbel tawngchham tak leh taksa pianzia lang chiang tak avanga entute thawm riva rawn sa zual ta hulh hulh ah chuan Hunter-a pawhin silai nena in fam ther huang mi pangate lamah chuan a mit a len ngun zual ta sauh a. Buaina lo thleng mai tur atan leh a lo thlen pawh a, a chantha zawk chang thei ngei turin a insiamrem sauh sauh mai bawk a. A mitsir chuan Shadrach –a pawhin arbawm a tah mai mai lo tih hriat takin, inralrin dan chikim nen, a lo hnai sawt hle tawh mai a. Hunter-a rilrua zawhna awm ta chu; Buaina chu lo puak chhuakin, chu’ng mi pangate nen chuan silaia inbeihna lo nei ta se, a elpuipa chuan remchangah lo hmangin a hnung lam atangin ngen mu chu a lamah rawn sur tir duh mai lo’ng maw ?

Laura-i lah chu, hnehsawh leh dangdai taka thil kual kara uai kual velin a thiamna tawp nen a, chanpual chu a entute tana hmuhnawm thei ang ber turin a lo bei mek a. A vawrtawpna atan, a inthen vel pah chuan a uaina chu a han thlah palh (lui) a. Boruaka a rawn vir thlak lai chuan, a tla zel tur lo dawm tumin kut bawr tam fe hi an rawn phar suau a. Dawm tum tute kut a rawn thlen hma chiah chuan, amah vengtu tura a banreka thlun tlat, a entute tana hmuh harsa thei ang ber tura duan hrui fei leh sin tak chuan, a pawt ding chawt a. Chutah, Laura chu hrui thlun atanga tal put nghalin, chhuatah chuan a rawn tum thla a. Entute’n kut an lo ben hluah hluah lai chuan chibai bukin mipui lamah a han kun a.

Chulai hun remchang chu chuhin Hunter-a pawhin a pawisa khur turte awmna lam chu a rawn hnaih zel a. Mipui insingsa vel zai ngai ran chuan eng tin tin emaw a thlafem lam, buaina a lo thlen pawh a chiang taka thil awmdan hmuh theihna lai tur, chu thleng phei ta a. A elpuipa hlauhawm tak nena an inkarah chuan entu mipui tam fe hi an ding tlim hmur mai a.

Dawhsan lamah chuan Dandy-a chu rawn au leh tuar tuarin, "Pi leh pute u... tunah… kan ennawm chhuah tawh zawng zawng zinga ropui lawr lak, khawi circus ennawm chhuahna hmun mahin an la chhuah ngaih loh, a hmu tute pawh mittlai leh maktih luat avanga chilthli far duah duah a siam thin tu, lalte leh khawnbawl upate ti hawihaitu, Kuang ruak mak tak chungchang chu le." a han ti a.

Laura leh a nu chuan puanin chei buai mai kawngka zar hliahna puanzar chu an han keu a. An suih tan mawlh mawlh lai chuan Hunk Bannister-a kha puanin chhung atangin a rawn chhuak a.  A hun chhan cheimawi a inhungin, Kuang dum tle hlurh mai chu a rawn nawr chhuak ta a. Silk puana thuah, a chhung lam chu entuten chiang taka an hmuh theih tur zawngin a han hung rem a.

Chutah, Molly chuan thutna sang chi (Stool) rawn lain, chuta Laura a lawn lai leh Kuang dung tluan awh tura, a chhunga mut hmun a rem lai chuan a lo pui a. Laura chu kuang kotlangah chuan lo dak chhuakin entu mipui te lamah chuan kut a rawn vai lap lap a. Chutah, Molly pawh chu chhuk fel nghalin, kuang chu an chhin a. An kalh nghet nghal a. Dawhsan chungah bawk chuan bawm chemawi pakhat awmin, chu chu Dandy-a chuan a han hawng a. Pistol kaw var huau mai, mimal buaina chinfelna tura ngam leh ngam inhmachhawna inkah nana an hman thin hi,  rawn phawrhin, mipui mitla thei tur ang berin a han vilik kual vel a, a mu te chu a han thunin, a han sawngbual kual vel a. Chu thil chuan mipui mit chu, kuang lam pawh ngaihven tawh lovin,  chulamah chuan hun rei vak lo chu a hruai peng a.

Kuang dahna atanga Molly leh Hunk an lo inthiarfihlim lai chuan dawhsan atangin Dandy-a chu a rawn zuangthla a. A pistol chu a han lekkawh a, kuang chu tin chilhin a han hmetpuak ta dur mai a. Chutah, a silai puak thawm thangkhawk pawh a reh fel hma chuan kuang chhin kalhna chu phelhin, a chhin pawh chu a theh hawng ta nghal a. Hunk-a chu rawn pen chhuakin, kuang chhung lam chu a ruak ngei a ni tih tute pawhin an hmuh theih nan a rawn tilang leh ta a.

Mipui chu thaw dep dep leh ka hau in an awm thup a. Chutah, hla deuh atanga au thawm a lo awm a. Chu lam chu an han hawi a…an piah tlangdung awihtlanah chuan sakawr chunga chuangin mi pakhat hi a rawn tlan chhuk ta auh auh a. A rawn hnaih zel takah chuan, a chunga chuang chu tu dang nilovin, Molly Deever-i kawppui, sambuang, ria zeihzawih leh taksa rem zaih mai thawmhnaw ha ngei kha a ni tih tute pawhin an lo hre thei ta a ni.

Dandy-a chuan a aurinna chu a hmuiah a han chuktuah a. "Thil bial khai san a hmuhnawm taka uai kual vel, ka fanu Laura kha in la hai lo’ng chu maw. Tunah, he khawvela thil awihawm loh ber pawl, ennawm mak a tih tak avangin, amah lawm nan ring takin kut I lo beng ang u." a han ti a.

Uar tak leh beng khawk rum rum khawpa an kut beng chu Hmingneilova meuh pawh chuan phur takin a lo zawm ve a. Mipui kar atang chuan a han thlir phei a, Shadrach-a pawh, a kut dinglam chu a kawrchhung chhungah a la zen lut reng nain, mipui te’n chawimawina an pek lai chu thinlung takin a lo zawm ve a ni tih hriat takin, a kut veilam chuan a malpui chu a lo beng ve thak thak a.

Nula chu rawn zuangthlain, mipui kut beng hluah hluah chhawn turin urhsun takin a han kun kual a. A awmna chu Hunter-a awmna atang khan a hla lem lova. Chutah… Hunter-a chu maktiin a meng zau kawk a.

"A khai a! hrep tak chuan" tiin ama hriat tawk lekin han phun sap a.