A Coffin-4

 A COFFIN FULL OF DOLLARS JOE MILLARD

1971

*****

BUNG 4-NA

Thisen chhuah hmang tak a nih avanga luman Dollar 5000 lai khumtu misual pakhat, Scarce-a chu chhuiin thlakhat dawnlai Hmingneilova pawh a lo teihawi leh tawh a. Tunah chuan a hmawr bawk dawn hnai tawhin, darkar reiloteah sum leng vak pawh a tam leh viau dawn e…

Mi chevel enthlak nana a hman fo, a enhlatna hmangin tlangdung ko hriam ruh lai atang chuan a hnuai lunghmun kar te chu hmuhhmaih awm lo thei tur ang berin a han thlir kual a. A langchiang tha kher mai. Chu misual tawmbuk chu, a umtute laka biru leh him thei tur angberin, a hmun pawh uluk taka thlan niin a lang. Kham ko bulthut lamah chuan awmin, puk zau nuam fahran mai hi a ni a, a chung lama lung tohlawt inhung mup chuan chung lam atang pawha hmuh mai a ti harsa ang reng a. A hnuai lamah lah chuan lung pianhmang in ang lo pui pui hi a inrem chhawkawlh thla thluah a. Chu chuan hnuai lam atang pawhin a hliah tlat a ni.

Misualpa chu, a sa kan mek leh coffee bel ung angreng tak chhuan lai chu a vilin, a meichhemna bulah chuan thingthiin a kun mek a.. Chulai tlangdung huihchhuk thli chuan meikhu leh rim awm reng reng te chu a len phirsi zel a. Eng dinhmunah pawh ding se, Scarce-a chu a inthlahdah miah lo tih hriat takin, kut veilam bul maiah chuan lung bang nghengin Rifle a tung a. A kut dinglam atanga inches khat leka hnaihah pistol chu kausa rengin lung chungah a dah bawk a ni.

Luman khawm tupa chu lungawi tih hriat takin a han bu nghat a. Chung ralthuam a hmuhte chuan a tibuai hran lo, chu aia amah tibuai zawk tu chu kar khat lai kalta atanga a mi veh mek lo veh tu awm ve tlata a hriatna chu a ni.

Chhun zan zawma enthlak reng ni a inhriatna chuan a ti tlawmngaiin, dawhtheihna pawh a tlachham sawt hle a. Vawi hnih khat chu hlimthla phe zeuh niawm tak pawh a hmu nghe nghe a, mahse hrechiang turin an inkar a hla lutuk thin bawk si. Vawitam a kalna chu a han chhui let thin nain, a hlawhtling lem hlei lova. A sulhnu rawn chhuitu tu chu a takin hmu lo mahse, hnuhma thar awm leh fo thin te, sakawr hniak chiang angreng fu lo awm thin te, sakawrin a pal tih hriat taka hnim tlu leh thingtang tliak lo awm leh thin te chu a khat tawkin a hmu fo a ni.

Tuk khat, hnuhma a chhuilet tum pawhin Hunter-a chuan, a zan riahna hmun a va hmuchhuak nghe nghe a. Lei chu Sakawr leh Boot hniakin a lo phut dup a. A zing meichhemna vap pawh a lo la lum thar thar nghe nghe a ni. Hunter-a chuan a mah rawn umtu chu khawiah emaw hnaiteah awmin, a chevel a lo thlithlai reng a, a lungni lo hmel vel te pawh chu nuihsawh tak chungin a lo thlir a ni tih chiang taka hriatna a nei tlat a ni.

Buaina siam tumna leh hlauhthawnawm awma a hriat tak lohah chuan, Hunter-a chuan a thiltih lai mekah chuan ngaihtuahna sawrbingin, amah umtu niawm tak chungchang chu ngaihthah a tum lui hram hram a. Scarce-a nanchin a, a luman khawm chu a tum bulpui ber a nih angin, thildanga pengkawi hman niin a inhre rih lova. A tum chu a hlen fel hunah duh leh amah rawn chhuitu nihna leh tumdan chungchangah chuan a insawrbing leh mai ang chu..

Engpawh nise, ko pang lehlam enthlithlaiin a han khawtlai leh deuh a, thil chevel erawh hmuh a nei lemlo. A sakawr pawh a hnuchhiahna hmunah chuan a lo tla malh malh a ni. Tuemawin a thlir reng ni a a inhriatna chu a zual leh sauh a, a sakawr lam a pan thlak pah chuan chhechhamin a phun thla mawlh mawlh a. A tih leh tur la awm chu, tlang kar kal khan a luh phei a, misualpa chu a inrinloh lai taka va nanchin thut a, a luman khawm tura khaw lama kirpui leh mai chu a ni ta…

Sakawrah chuan a invawrhkai dawn chiah a, a khawng ta at mai le.. A sakawr zin hrenbehna kara thil lo inzep chu lehkha inthlep hi a ni a. A han pawt dawk a, pharh ta a. Lehkha chu a ruak mai a ni nain, a lo awm ngawt chuan thil tamtak a hril tlat mai. Hlimthla biru thiam tak chu a la awm reng a, a rawn chhaih kual vel a ni..

Hunter-a chu a sakawrah chuangin tlangkar kalkhan lam chu a pan ta a. Hmanhmawh ru tak chungin a sakawr chu a han kheng tlan a. A han luh thuk deuh chuan, hla taka silai puak ri thangkhawk fiahlo tak chuan a beng a rawn verh ta chiah mai lehnghal a. Anchhelawhin a han phun sap a, a sakawr chu a kheng lim ta puat puat a.

Chu misual tawmna hmun a thlen chuan, thawm dim lam pawh ngaihtuah hlei thei tawh lovin silai keng chungin lung hmun karah chuan a pakai a, a phena lo hmuak tu tur hre sa leh inring tak chungin a han zuangthla a …..

Tumah an lo awm lo!

Sa tlang chu meiah chuan a lo inrawh chawrh chawrh a, Coffee bel inchhuang pawh chu a lo so bawrh bawrh a. Rifle leh Pistol erawh kha chu bo tawh. Scarce-a chettlatna lai velah chuan thisen farna hnuhma a lo awm pheuh pheuh a. A misual veh mek chu amah emaw a ruang emaw hmuh tur reng reng a lo awm tawh lo.

Khaw lamah pawh chuan dawng zawk a nihna chungchang thu chu Sheriff chuan lawm tak chungin a lo nemngheh sak hi a ni ringawt a. "Nichin lawk, darkar hnih pawh la tlinglo ah khan Scarse-a kuangbang la awm chhun keng chungin mipakhat a lo kal a, luman pawh a khawm tak kha. A hming pawh ‘Shadrach’ niin a insawi tak a sin. Lehkha ip pawh a hnuchhiah che kha.. I hming chu a hrelo nain, a hnu I rawn dal zel niin a sawi a, I pianhmang leh incheidan pawh ‘T’ ang chiah a ni e.. a tih che kha..."

Lehkha ipah chuan dollar 10 note leh tihelna thu dengkhawng angreng tak, "Mr. Scarse-a awmna hmun min zawnchhuah sak na lama I ngal tha hah man atan hei hi min lo pawmsak hram ang che, a lehpek a I chet chhuahna turah pawh a lawmman chu kan insem tlang zel a ni ang chu." tih hi a lo awm bawk a. "Shadrach." tiin a inziak mawl leh tawp a.

Chu thil thlen hnu kar lehlamah pawh chuan a lawmman hui tur tha ve tawk tak pahnih lai chu a kut atangin lak khalh a ni leh ta….. A tana lawmawm loh tawp turin thu ngai leh dollar sawm note chu hnuchhiah a ni ziah lehnghal a. A landanin chu mi hmingthang Sadrach-a chu phubalakna angrengin a che te pawh a ni mahna, a nih loh pawhin Hmingneilo-a chu silai hmanga a inbeihpui ngei theih nan deusawhna nena cho chhuah a, chulai ram, misual luman khawm thintute chetna bialah chuan, tuma hnial rualloha a ber nihna hauha chetvel a duhin, a inringtawk hle te pawh a ni ngei ang.

An theihdan chin an inhrechiang dun bawk a, an kawng zawhah pawh a in tawksir zawngin a kal zui ta meuh lo nain, a ruahmanna a hlawhchham hnuhnun ber tum chuan Hunter-a chu a sa kher mai le. Deputy Sheriff bulah, "Shadrach-a te ang hrep hi I lo hmu fuh mial a nih chuan, ka hmuh leh rual rualin ka that nghal a ni mai tih thu hi lo hrilh ang che." tiin a han ang ngial kha a ni a.

Chu deputy sheriff lah chuan a tukhum lama kutsuih paha a thutna nghenchhan ngheng ar ar chungin, "Tehreng mai.. in khawvel hi a te deuh niin a lang.. a ni lawm ni ? I rinlawk deuh dan tho chu a nih hmel a — Kha pa Shadrach-a khan chutiang chiah chuan hrilh tur chein min ti ve tho a sin !" nuihzat awka lek lekin a lo ti a.

Tunah, hun rei tak hnuah, chung mi in el tak pahnih te chu, an kuta silai hum rengin, an rilrua pialral  lam a in thawn tu zawk nih tum ran ve ve chungin, inhlat lo takin an chetla mek ta chu a nia. An inkarah leh an velah chuan khawchhung mi nu leh pa te engemaw zat awmin, naupang te chu an tualchai nak nak a.