A Coffin-3

 A COFFIN FULL OF DOLLARS

*****

BUNG 3-NA

Daipawn a hmun ruak zawl durh lam pana Wagon hnuhnungber a her liam luai luai thleng chuan thil awmdan thlirin kawng sira ke kalna phah hmawr tawn ve ve ah chuan Sheriff leh Hunter-a chu an ding dun ta reng a. Chutah Hunter-a chuan a meizial cigarro chu a han tan leh chiah a, nawalh bawk thi tawh chu kawtthler vaivutah chuan a han pen vir thla nawk a. Sheriff chu a lam hawiin a rawn inher a…

"Tikhan kan indawrna chu a zo ta in ka hria, min hrethiam la ka Office lamah tihtur pawimawh zawk dangte ti turin ka’n phei san tawh ang che..."

"Chung zinga pawimawh ber chu.. ka hriat danin," tih pahin Huntera-a chu a lo then sak a., "Nangmaha tualthattu leh misualte zawn chhuah emaw chutiang ti thin mite I theih ang tawka lo thawhpui hi a ni a. I tan thil awlsam tak a nih thin loh avangin, chutiang mawhphurhna I hlen laia lo pui tur chein lo phei ve nghal ila a tha ang."

Thawk hulh pahin "Luman khawm fing phakar ho" tiin Sheriff chu a phun phei sup sup a, Inchhung chu a dai lut chawrh a, Hunter-a pawh chuan a rawn zui lut chu a ni nghal deuh mai a. Dawnkan kila thutthleng nghenchhan nei lo inhungah chuan a thu thla hnawk a, Dawhkan sir lehlama Hunter-a thuthmun lo rem ve mek chu a han mitmei rulh a. Hunter-a chuan pindan banga luman nei ho hrang hrang intar chuai lamah chuan a meizial bung kenlai chu a han vai kual a..

"Khilai poster khi an chhusual nge khi misualpa ‘Apachito’ ti an koh thin luman atan khian dollar 15000 an phal tak tak le ? Ka lo hriat dan chuan Mexican misual 'Little Apache' an tih ve mai kha niin, tunlaia  misual tangrang satliah dawrzawn engemaw zat phu luai luai kara mi pakhat ve mai tan chuan an phal tam lu deuh a ni.."

"Chhutsual a ni lova, tin, Apachito hi tualthattu naran mai a ni lo bawk. Amah leh a hote hian helai ram chuan hnuai lam hi chu an awpbet hneh khawp a sin. Gold leh Silver an ruk nasat em avangin Mine (a laihchhuahna hmun) te pawh khar a ni mek a. Vengtu sipai sakawr chungchuang rual (Cavalry Escort) mumal tak an awm loh chuan khualzin leh bungraw phur sakawr tawlailir kalvel thinte pawh tihtawp a nih mai hlauhthawnawm dihmunah an ding tawh a. Epocito piah lamah chuan rel te pawh an veivak ngai tawh lo. Henglai vela Bank zahve aia tam mah lah chu rawk fai leng an ni tawh bawk a sin."

Hunter-a chu a han faifuk raih a, a mit chhing duar duar kara mitmeng chu a tle ra mai a..

"A ngaihnawm riau dawn mai. Han sawi zel teh aw."

"Apachito-a chu apache leh commanchero thlahpawlh a ni a, tur hlang hi a ni ringawt. A mi thahte muangchanga thih tir a, an natuar chiau thawm ri ngaihthlak hi a intihlimna ber a ni. A luman khawm tur hian mi paliin an bei tawh a. An ruanga kuangbang la awmchhun chu khawtlang sumin kan phum hlawm tak kha. An hmelhmang chu hmuh a nuam vak lo tih te pawh ka han hrilh law law teh ang che. A pangana nih I tum a nih phei chuan khawiah pawh I ruang tha taka phum a nih theih nan dollar sarih fai threh thrawh chu inring reng ang che."

"A va ropui ve, Sheriff. Hmasawnna kawng lam zawha thil liantham a tih miah loh laiin, chutiang Apachito-a chanchin ropui chu khawi atanga rawn zi chhuak nge ?"

"Ka hriat dan chuan a luman hi a pung chho thur thur mai chu a ni. Sierra Malhoras chhehvel kawi lai emawah hian tawmbuk a nei a – Tlangdung vanduai an tih maiah khan.  Hmuhchhuah lah chu a har phian lehnghal. Tlangkar kalkhan ‘Crazy Woman Pass’ thleng khan vawi tam kan um tawh a, boruakah zuk thamral ringawt zel a mawle. Ka mithmuh ngeiah pawh hian vawi engemaw zat chu a thleng tawh. Chutiang chu thil nihdan chu a nia, hausak nge atso mai chu I thlan dawn ngaihtuah chhuak ve tawh mai rawh."

"Hausakna chu ka’n um ve phawt ange," Hunter-a chuan a lo ti a. Chibai buk nan a han phar chho zauh a, a tei chhuak ta nghal a.

Sheriff chuan tihvak ngaihna hrelovin a kalchhuak chu hnung lam atangin a melh zui run run ringawt a. "Pathian leh.. hrep tak che u hian." tiin a phun zui sup sup a. Chutah dawhkan lam chu a han melh leh a, Receipt Form lo inpharh chu a han hmu leh thut a, a dingmar nghal zawt a.

"Hey, hey, nang poncho bat pa, meizial heh pa kha! Luman pawisa I dawnna chungchangah khan I hming i dah theihnghilh a nia."

Ziahchhan leh pencil chu a han hum chawt a, Hnarneilova ruang lo la let reng chu pal phei nawk pahin kawngka lamah chuan a inchhep phei a. Pawn lam a va enkual meuh chuan kawtthler chu a lo ruak vek tawh a. Chu luman khawmpa chu Apachito ang maia hmuh harsa niin, boruakah a lo thamral tawh te pawh a ni mahna.

An hla chham hluk hluk pahin a dawhkan lamah chuan a rawn kir leh vut a. Receipt ah chuan "Hming neilova" tih chu a han thai hrawk hrawk a. Thinrim zetin "X" tiin a han sign ta nghal a.

A hnuai zawl thlirna remchang lai mual pawngah chuan, a hnuaia mipui phu mur mur thlir turin a sakawr lakam pawt marin Hunter-a chu a han ding vang vang a. Tawilailir-a an thil buaipui thin chu chumi hun laia khawthlang rama mipui bawh nasat leh hlung em em thin a ni tih lo hre fo tawh mahse tun tum tluka a hun dik tak leh a hmun dik taka thil thlen dan diktak a hmuhchian tum hi a la nei awm ngai awm love. Chutih rualin, thil thleng thei dang  hrang hrangte te chu uluk takin a chhut kual pah nghal zung zung a. Tawng zat zat paha Dandy Deever-a chevel pawh chu a thlir uluk hle a ni. Chu Circus ennawm chhuah mekin thirhipthei chak tak tluk zet a a misual zawnlai te ho a veh phaka a hipkhawp theih dan tur te pawh a hai lo.

A landanin, Los Ydros mipui zawng zawng, tarchhia atanga nau hnute hnelai chenin, chu Circus en tur chuan an rawn thawk chhuak ni maiin a hriat a. Khual zahawm a tang mek Sheriff thutna, thing thutthleng nghenchhan nei, bak chu puanzar emaw thutna mumal taka han rem pawh a awm lem lova. A laia ennawm chhuah mek chu bial chanve anga hualin midang zawng chu a rem dan danin mumal tehchiam lovin chhuatah chuan an thu kawi nuai mai a ni.

Circus Wagon pathum te chu mipui kil bial bial tawpna lehlam lehlam ah chuan an hung a, chu chu ennawm chhuahna hmun huam chin leh a hnunglam a ni nghal a. An dinna kawt chiahah chuan killi neiin puan in chung cheimawi buai hi a inkaih a, a hungna bang chu a inphet hniam a. A hlimah chuan sakeibaknei bawma khung kha a lo muthlu lup lup a. Chumi zar zawm chiah chuan thing chhehkhawmin dawnsan an siam a. Chutah chuan an rimawi hmaruate; Organ, Bass Drum leh tawtawrawt lian chi te kha an rem bawk a. Puan rawng pawldal lam deuha khuh dawhkan chu an hung tel bawk a. Dawnsan hnung lamah chuan sakawr pakhat, a zin tial buai inbel chu an thlung bawk a.

Hunter-a chuan a sakawr chu a han kheng zauh a, awihtlan ah chuan kal thlain, mipui lo awmkhawmna chu a pel phei a, chumi nena inhne renga lo awm hnim leh thing tona, Circus pawl ho sakawr awmkhawmna thinghmun lam chu a pan a. Chulaiah chuan inphenna tur remchang hmu chhuakin, mipui lamah chuan a kir phei leh a. Mipui lo thut bialna thleng chiahlo deuh hmun awl lai chu thlangin, ennawm chhuah mek leh a entu mipui chevel chu thlir turin awmhmun a rem ve ta a.

Kawr, a hnunglam fual chi leh a chunga silk puan a siam hak thuahin, inchei tak chungin Dandy Deever-a pawh mipui thutna bial velah chuan a lo teikual mek a. En man lakawm leh Ticket semin a lo phusa hle a ni. Chutah, Hunter-a bul pawh chu a lo thleng phei ve ta a. A rawn be lum lam nghal zat zat a, " Dandy Deever-a circusah hian kan lo lawm a che, Thian a. Dollar nga a ni ang aw —"  chutah a han tawng tawp thut a, amah lo huihai turin a han nui then leh var var a. "Aw, nang I ni maw ! Teh khiah che chuan.. helai hmuna I rawn lan tak tak chu ka lo beisei chiah lem lo a sin."

"Enman I bituk zat hi hre lawk ila chu ka rawn lang miah lovang," Hunter-a chuan a lo ti a. Chutah, a pawisa ip chu phawrhin rangkachak pawisa nawi chu an han in pe a. "I ennawm hi entlak lehzualin chhuah la tih hi ka sawi theih tawk ni mai teh se."

"Chuan.. hei mupui lu chuang a chanve hi lo la teh," tiin Dandy-a chuan pawisa thir seh pah chuan a lo chhang a. " Mahse, I tum aia I senso san deuh avanga riat buai vak emaw lo mutthluksan emaw chu I duh ka ring lova, tikhan ennawm kan chhuah tawp thleng chu khalai velah khan lo inthiat luklak ve phawt la, a let sawm hu vela I vanneihna I neih let theih nan hun remchang chu min pe ve phawt ang chu maw le."

Dandy-a tawlhkir tan mek hnenah chuan Hunter-a chuan, "Tunah, kan insumdawn tawnna chu a intan nghal e" a han ti a

Dandy-a chu pen thum vel a lo pen hman tawh a, a rawn vir let zawk a, engemaw ni hi a kutah chuan a keng a.

"Tak a, mei I nei lo maw.. thianpa ?"

Hunter-a chu lo bu nghatin, nawalh bawk pakhat chu a han phawrh a, a kutzungpui tinah chuan a han tat alh pharh a, Dandy-a chuan a kut a rawn tihpharh meuh chuan meizial cigarros chum bat mai hi a lo keng reng tawh a. A hmuiah chuan a han dah a, tankai turin mei eng lamah chuan a rawn kun phei ta nghal a.

"Meizial min theh a, ka lawm e, a ru deuh nain, a tui khawp mai." Chutah kutphah chu a han tipharh leh a, Arsi tle var mai hi a rawn hmuh a.. "A bo tak tak hmain Sheriff hnenah he a thil bel hi pek kir leh tur a ni tih ka theihnghilhloh a ngai tak a sin."

Hunter-a chu a lo ka hau mai a, engmah sawi zui lovin a chip leh hmak a. A tan chuan sawi tur a vang hle reng a ni. A silai leh a mute chu a la kim nge kim lo tiin kut chuan a poncho hnuai chu a dap kual nghal ruai a, bo thlau em chu a lo la awm love. Mahse.. mi thil ruk a zei dan em em chu..a thlamuanawm ta hlek lo mai le. Chuvangin, Dandy-a mizia chu en chik zui deuh chi a ni tlat mai.

Atana hlauhawm emaw hlawkna tur emaw thlen thei an awm leh awm loh chianin entu mipui hmelhmang hrang hrang chu chik takin a han thlir kual vel a. Chutah, a mitmeng zim san mai chu, a piah lawk mipui kara kawrchung hlui lam tawh fual dulh mai ha pa sang tak lo ding ve reng ah chuan, a fu ta chat mai le.

Hmelhmang belhchian dawl tak, dar rawng deuh, hmai sawl leh biang ki ruh sang lam, khabe nghet tlut mai, kimtlang hriam hrak mai a ni a. Hunter-a chuan tunhma lamin chutiang hmelhmang chu a takin emaw luman nei ho an tarna ah emaw a la hmu ngai lo phawt mai a. Mahse, chu chuan a hrechianglo emaw tihna erawh kawk lem lo. A dinhmun meka ama theihna leh thiamna chin te a han chhut vang vangin, nuamlo tihna riau rawn neiin, thram er er tu awm angin a inhre ta tlat mai le.

Chu pa pawh chuan mipui ho chu thlir kual satliah mai piah lam deuh chuan a lo enkual ve mek a. A mitmeng vawt raih mai chuan poncho in a khuh dulh mai ruangam chu rawn hmu ve nghalin, reivak lo a rawn thlir zawk a, hmundang a hawisan leh ta a. Mahse, a han meng zau kawk ah chuan a rawn hre ve a ni tih hai chi a ni chuang lo.

Kum engemaw zat a finna leh a silai chelek ranna avanga misual turu tak takte luman khawma lo khawsa tawh, hlauhawm lo thleng mai thei tur hriat lawkna danglam tak chi ruk lai mai nei mihring tan chuan, he mikhualpa hi rul tur nei hlauhawm ber chi ang mai a a nunna atana thil hlauhawm a ni tih rin mai piah lamah, hriatchianna danglam tak a nei nghal a.A tulna in a nan palh takin tiin, sathau a a hnawih nal han mai, a pai atanga phawi chhuak mai theih turin a phoncho hnuaia a .44 laite fawng chu a han chul hauh hauh a.

Dawnsan lamah chuan Dandy-a pawh aurinna hmangin a pawl member-te chu entu mipuite hnena hmelhriattirin a lo au lauh lauh a. Sambuangliani chu a nupui, Molly Deever-i chu a lo ni ngei a, a cher zawk chu a fanu, Laura-i niin, thiam fahrana tawtawrawt hamtu pa liana chu Hunk Bannister-a a ni ve thung a. Entute’n an beisei loh leh a hma pawh a an la hmuh ngai loh, dangdai leh nuihzatthlak deuha inchei, inhnawih mawm hluam mai, Member pangana, Bodo a la awm bawk a. Sakeibaknei chu ‘Elmer Mihring eitu’ tiin a rawn hmelhriattir a.  Sakawr var chu Milky an ti ve thung a.

Chung mi palite chu rimawi tho at a a rik lai chuan an rawn inkhawh chhuak zawk zawk a. Nuihza siama inchei danglam pa erawh kha chu mipui lawm turin muangchanga che velin a lo phusa ve deuh reng bawk a. Elmer-a mei chu pawt kual velin, Sakawr varah te chuan zeilo fahranin chuan tumin a lo bei kual vel a. Hunter-a pawh chuan Circus pawl ho thiltih leh a ruk tea amah rawn thlithlai pah reng tu mikhual pa lam chu a ngaihven tawn chhen a. Chutiang mipui karah chuan buaina a irh chhuah mai chu ring chiah lo mahse, a poncho khuh hnuaia a silai hnaih thei ang berah a kut chu a dah deuh reng a ni.

Rimawi chu a han tawp a. Dandy-a chuan Molly chu "Whip (Savun hruihrual) sei chi chelek lama tuma tluk rualloh." tiin a han puang leh a. Molly-i kut tharui ngah leh chak tak ah chuan feet 20 laia sei savun hruihrual chu awmin, amaha nuna nei niawm tak hian a ving vial kual nawk nawk mai a. Laura-i’n Organ a tum rik mil chuan hruihrual chu a ri fua fua a, a chang leh silai kah rik ang mai hian a puak leh pawp pawp mai thin a..

A thiam dan chu thiam tih piah lam a ni awm e. A entlak bawk a niang, Hunter-a meuh pawhin kawrfual ha mikhualpa a thlithlai lai mek chu a theihnghilhtir thelh a ni. A hriat chhuah leh meuh chuan a mi enthlithlai pa chu puitling thu ho leh an kara naupang vei tawn nuk nuk zing atang chuan ngawi rengin a lo inthiarfihlim daih tawh hi a lo ni a.

Ennawm dawhsan lamah ve thung chuan Dandy-a’n a kuta lehkha phek a kenlai chu whip vingvial kual vel chuan a lo vaw sawm mek a. Dandy-a chuan Pistol paina kawnghren, a pistol pawh awm sa chu hreng mekin, meizial bung hi a hmui chuan a pet kawh va bawk a. Whip chu vawikhat a rawn ri thrawt a, mezial bung chu a per chhuak nghal nawlh a. A rawn ri leh thrawt a, puakruk chu a pai atangin a thlawk chhuak leh nawlh a, dawhsan atanga yard khat vel chhuatah chuan a thla nghal bawl a. A tawp khawk, ennawm thlensan vanglai tak tur atan Dandy-a chuan dawhsan hmawra khi karah chuan nawalh far paruk a han phun tlar a. A rawn dahchhuah leh rual in Molly-I chuan whip chu rawn vai lehin, a indawtin a whip hmawr chuan a nawt alh phei ta zar zar mai a..

Mipa naupang leh hmeichhe naupang rual hlim taka an in um kawi zawr zawrna mipui kar atang chuan Hunter-a pawh hnung lamah zawimuangin a insaseng tan ta a. Chutah, hla vak lovah chuan kawrchung fual ha mikhual pa chu a kawrkilhna lo inphelh fel diam tawhin, inhmachhawna silai phawi rangte inbeihna tur atana inpeihsa tih hai ruallohvin, a kut pawh chhung lama lo dah diam tawh in a hmu ta thut a.. A thil hmuh chuan Hunter-a bengah ralkhel dar a rawn khawng ri ta bal bal mai le. A teuh ther ther viau nain, a vawi khat nan a biang veilam tilang tura pakhat zawk a han hawi sawn takah chuan a tawpkhawk chu an thleng ta em lo a ni.

Sakawr zin thami ang maia tihrawl sen ruh thah maiah chuan ser a lo awm ruak mai a. Chu ser chu Y pianhmang ang deuh hian, awn deuh leh a kawkalh a awmin, a hmui chung lawk atanga intanin a mit ko hnuai chiahah leh a beng kawm bulah a tawp a ni.

Chung thil te a han hmuh leh takah chuan Hunter-a rilruah thil chi hrang hrang a rawn lut zut zut a. A thinlung phekah chuan meialh in hming pakhat a rawn inziak zuai zuai a.

Shadrach!

Pa pahnihte hi an la inhmu ngai miah lo nain, inhmuh rual ruala inthat turin ualau takin thu an lo tiam ve ve tawh a nih kha.

Shadrach!

Chhimthlang lam ram hmun tam zawkah chuan chu hming chu vanduaina hmahruai emaw sual fir rem rawm sawina atana an lo chher fe tawh a ni tlat mai.

Shadrach, luman khawmtu, a silai chelek ranna hmachhuana an luman dollar tlemte atanga sang engemaw zat beisei a, luman nei ho um hlum thak thin tu chu.

Shadrach, pialral palai, a ngam sang apiang tana tualthat mai thin, hlawkna a chan dawn phawt chuan lehlama pakai mai pawh hreh lo mihring....

Shadrach, chhia leh tha hriatna pawh nei lo. Rangkachak chauh pathian tlur mai, duhamna chauhin a nawr kal theih mihring….

Pa ho awmtual mei aina hmunah te a chanchin hi titi tui ber a ni thin a. Khual thuthang leh ar pan chuk chu a pun zel an tih angin, chanchin a nei turu telh telh a. A hman tur silai a mah ngeiin a siam danglam thin dan te, Rifle leh Shotguns a sakawr zina a tel, vawikhat lek a tawnna a han pawh phelh zeuh a lo lang nghal tuar thei te, a pistol ngul sei chi, inches 14 laia sei, a tul huna thlawn theih chi a kawm vuah a, koki a chhuan mai theih chi, rifle tluk deuh thaw a hla tak ami pawh kap fuh thei a neih thu te chu mite titi ngaihnawm a ni thin. Kawlphe ang maia a tuan ran turu dan leh inhmachhawn pawh a tumah phawikhalh thei an la awm loh thu te phei chu an sawi ring tha ngam lo reng reng a ni.

Khual thuthang leh ar pan chuk chu a pun zel thin tih hriain, mi hlauhawm leh hratkhawkheng Shadrach-a chanchin Hunter-a’n a hriat tam zawk chu eng he hu ah a ngai duh lem lova. Chuti teh lua in a ngaisang hran lova, a buaipui lem bawk lo a ni. An chetna bial a inhlat thawkhat a, chuvangin, chuti mai a an intawksir a rinawm lem loh a ni. Enga pawh chu nise, thil laihchhuahna hmun lo pung zel te, bank lo inzar pharh zau zel avang te, khualzin leh bungrawphur sakawr tawlailir veivak lo pung zel te chuan misual leh rukruk chingte a tipung angin, an luman khawm a eizawngtute pawh a tawkfang chuan an pung ve zel bawk a ni.

Tichuan, khual thuthang leh bawm ak thu mai mai anga an lo hriat Shadrach-a chu hnaite ah a lo awm ta thut a. A hring a hranin a rawn inlar ta… a lo awm ngei a, a chetna bialah chuan a huhang leh a rim pawh a rawn nam pha ta tlat mai… A lo intan dan pawh chu theihnghilh mai mai chi miah lohin, a kip a kawiin a hrechiang khawp mai le…..