A Coffin-1

 A Coffin - Full Of Dollars

Fam chang ta Marvin Megley “Hnarneilova” chu a dam lai chuan Saipui kallai ang mai a thawmna niin, ruhrel ruakhau zet leh sek phiar fut mai a ni roh a. Tlem lai lawk ah khan Bank rawk lamah hlawhtling taka chein, danin a zawn lai misual hotuahte a tang a. Mi satliah mai mai anga nung thin kha chutiang inrawkna lama a thau sawh khawm te chuan a in chhek arbawm ta hle mai a..

Chutiang dinhmun hial lo chuang kai tawh chu ni mahse, tunah chuan ruang mai niin, amah phawi khalh tupa, Luman khawma eizawng (Bounty Hunter) pakhat chuan a taksa zawi vek tawh chu samkhai angreng takin a han pu nawlh a. A sakawr zin hnung chiah sakawr mawngtam zawnah chuan a khawkhang zawngin a theh kai ta nghal a. Savin hruihrual chuan a banrekah tawnin hrui hmawr lehlam chu sakawr pumah chuan a vet a. A lehlama a kerek lo uaithla ah chuan a han suih nghet leh nghal chaih a. A sakawr lian leh duhawm fe mai, ke rang ruk chuan chutiang thil phurh chu a lo tih than fo tawh angin, talbuai lovin a lo dawh hlu hlu a.

A damlai hun hman danah, Megley-a chu nuamsa leh vul deuh chuk a inchei ngaina chi a ni tih hriat takin savun hruihrualin a phuar mek a kerek ah pawh chuan pheikhawk nalh leh manto tih hriat ngawih ngawih hi a inkhai a. Kut ngata thui par nalh takin a inchei buai a. A pheikhawkah chuan sakawr khenna (Spurs) mawihnai tawk tak, in enna darthlalang atana hman theih khawpa tle tha fahran mai hi a invuah va mai bawk a.

Chutiangin. .44 silai kaw hmawr atanga lo chhuak, suan mu zum zuih tat mai luhna kaw phar avang chuan Paliana te ang chi mihring nunkawng in hampuar chho mek chuan tawpna ni an lo hmu thin chawk reng a ni.

A lehlam zawng tak erawh chuan pa thawmna ve tak ‘Hnarneilova’ chutianga pa satliah ve mai ni a lang ‘Hmingneilova’ tukzala a han awm teh ringawt chu a pamhmai lua em aw… a tih theih rum rum  awm e.

Luman khawma eizawng pa chu a thlen chin apiangah mi hawkdak leh dilchhut deuh mit la tur ang chi a duan hi a ni ve hrim hrim niin a lang. Zen thlarh mai, tihrawl phiar fet fawt niin, a pheikhawk rawngsang nena a han din char chuan ft 6 leh inches 4 zet a sang a ni a. Silhfen ngai deuh reng inbelin, mi zingah pawh a hriat hran riau bik a. Mexican ho tihdanin ‘Poncho’ an tih mai, A buang leh var a inpawlh puan fem nei, hlai hluap mai chu a inbel a. A lai takah chuan verh pawpin, chutah chuan a ring rawlh chhuak a. A puan fem chuan hnung lam leh hmalamah a khup thleng thuakin a khuh hlup mai bawk a. Chung ho chungah chuan Texas ram tihdan phung pangngai angin, a chip zawl chi lukum parh hlai hlep hlawp chu a inchhuang larh bawk a.

Chu ‘Poncho’ hnuaiah chuan beram vuna siam tawnzau inbelin, a ipte chu nawalh fung, a tawk fang a tam leh a nihna leh hmelhmang nena inchawbe em em thin, Mexican Sikret tawi het hawt engemaw zatin a lo luah lum ve thung a.  Poncho hnuaiah chuan thildang pawh a la puanhnuai cheu mai ! .44 Laite, thar tawh lo tak, chhimthlang rama hlauhawm ber nia chhal leh mite chunga thihna sar zam khum fo thin tu chu. !!

A chetna ram bial chhungah chuan Dan mite leh Misual, dan pawna hnawl tawhte chuan an hre lar viau mai a. Mahse, chhan mumal tak engemaw avang nimaw, chulai vela damlaite zingah a hming hria emaw khawi atanga lo zi chhuak nge tih hria emaw an awm lo. A remchan dan leh tul atih dan a zirin, a nihna leh hming chu a duh duh a invuah mai thin.

Han ngaihtuah thuak chuan Pa pakhat, a rawn kalna chin hriat loh leh hming pawh neilo a ni ve satliah mai a. Ramri chuan hnuai lamah erawh chuan ‘Senor Niguno’ an ti mai a, danin a zawnlai te tihkhai a ni a. Chu lai vel, chhimbuk leh ram sihalte tuallena hmuna zin kawng thlur nguai mai zawh fo thintu misualte veh/pel tu ber a ni thin. Luman khawma hmanhlelin, ‘Thih thutna thlentu palai’ ti ila a inhmeh zaw ber mai awm e.

A savun hruihrual suihngheh mek chu a zo chiah a. Kun titih deuha a awm lai chuan mitthi pa sakawr khenna (Spurs) tle var lam chu a mitmeng vawt raih mai chuan chechang zui lovin a mer ta ngar mai a. It leh ngaihsan vanga thlek erawh a ni hauh lo mai le. A mitmeng chu a rum rat mai a.

Chu thil thle var mai chu atan chuan darthlalang tha tak niin, a hnunglam lungpui chunga mipakhat tan siama bawk mek thla chu a lang chiang hle a. Chu hmelhriat loh pa chuan lung chu behchhana hmangin a kut dinglama Pistol a ken chu Hunter-a hnungzang zawnah chuan a lo lekkawh mek chu lo niin…..

Hmingneilova chu a han vir zawk a, a sakawr sir lama per nawlh pah chuan a poncho chu a kokiah a han theh hlim a, a phawi dawk nghal zawk a. Chung thil zawng zawng chu kawlphe zawr tluk zeta rangin a thleng rual nghal vek a ni ber e. A silaiin pai a chhuahsan fel chiah tihah a kut veilam chuan a cheng chu beng kau nghalin, silai vawihnih puak ri chu a ran em avangin vawikhat ri ni maiin a hriat a. Mikhualpa makti hmel chu a mit leh mit inkar taka silai mu luhna kaw phar avang chuan mitthi maiah a chang ta.!

Lung insi khup kar velah chuan hmelma leh thil hlauhawm dang an awm leh awm loh chianin Hunter-a chu a han tawi khawmuang leh hlek a. Chutah, a silaimu kahruahna pahnih chu a kawnghrena mi silaimu tharin a han thlak nghal a. Silai chu a paiah thawlh leh zauhvin, a sikret chum buang chu a han phawrh a. Nawalh bawk chu a kutzungpui tinah tat alh zauhvin, meizial chu a tan a. Lungawi hmel fein a fawp khu ta hlat hlat a.  Chumi pah chuan lung thlil hmun, Hnarneilova inkhai tlaw rengna lamah chuan a pen phei chhat chhat a.

Pistol mawihnai angreng taka chei chu misualpa in a thlauhna hmun leiah chuan a lo la let  ngat a. A neitupa Hnarneilova anga hmingthang leh kut themthiam takin a cheibawl a ni tih hai rual a ni lo. A ruhrel chu rangkachaka luan niin, eng chhinchhiahna emaw ni te pawh a inchhu nual a. A vawnfung chu saingho a siam niin rangkachak rawngin a sir vel chu a tle sep sep a.

Hunter-a chuan a ngaihven vang em em pawh nilovin a chinchang hria leh khawih thang tih hriat takin silai chu a han endik a. A inbuk tawk dan leh a hnathawh dan te chu hre turin a kawmah chuan vuanin, a han vilik kual vel a. Chumi hnuah chuan a kawnghren karah a zep bo ta daih a.

Chutah rawn dingchhuakin a piah lawk yard tlem te, lung phen a miruang pakhat zawk lo leh rengna lamah chuan a han tei phei leh a. Mitthi pa chuan a silai a lo la hum a. A kut tang kawng vek tawh chu elh mar nawk nawk pahin chupa pistol hum lai chu a han chhuhsak leh a. Silai chu .45 niin hman than tih hriat takin a hnum hlarh a, chu bak cheimawina hranpa erawh a awm lem lo. Belchiang em em hran tawh chuang lo chuan a kawnghren karah chuan a han zep leh a.

Ruang chu a ke a thai letin a han belchiang a. Hnarneilova aia naupang deuh hret tur niin, zantam riak pai lo zeta dawldang leh hmuihmul tlem zuah a ni a. A sam rawng pawh chu a da bui mai a. A biang khuar dek chu mittuiin a luan huh zuih a. Hunter-a lambun a tum lai vel khan lungchhe vankaiin a tap phawt emaw ni chu aw te pawh a tih theih rum rum a ni.

Vanduaithlak takin, a hmel chuan Hunter-a  rilrua a lo inkhung sa lemziak mi in an ziah leh chhut chhuah hmelhmang chi hrang hrang tu mah mil a nei lova. Lu thin sawk pah chuan lungawi vak lo tih hriat takin a han rum nghut a. A tan chuan pawisa a chantir theih loh miruang tluka thil tangkai lo hi a awm awm love.

Mitthi pa ipte atang chuan pawisa nawi tlem, ha kherna fung rangkachaka siam leh rangkachak sana, chiar mumal theih tawh loh hawrawp inchhu te chu a han dapchhuak leh a. Chungte chu khawi lai emaw atanga a ruk sa tlingkhawm te pawh a ni mahna. Chung hote pawh chu Hunter-a chuan a ipte lairil zawk chhungah chuan a ak bo leh ta vek a.

A din chhuah lai chuan thil hlim hian a rawn thlawh pel thuak a, Lung pui chung lam chu a pan ta zel a. A han dak chhuak a, a lu chung lamah chuan Mulukawlh ho chu an lo inhawrkhawm tuau tuau tawh hi a lo ni a. Nghakhlel tih hriat takin an bial luih luih mai a. Chutah, miruang lamah chuan a han thle zauh a.

"Lo inbuaipui ve tawh mai r’u aw.. thiante u…. In chanai vek a ni tawh kha."